Yesaya 11:10 - Ma Jou ai Demo-demo o Totobelohoka

¹⁰ De dokenangika ma oraha adonoka de o Dautu ai toforauku gea womaokoino de womahimatoko o dunia ma nyawa mata-mataika. Abe una wodadi hoka o dodunguu moi o dunia ma amokika la o nyawa yokokiboaino de yomatoomuino unangoka. De o dunia ma dutu mata-mata yomahitigino unangino la wahihira-hira, de to una ai gogere duru ma hohailoa.

Yesaya 11:10 ပူးပေါင်းရင်းမြစ်များ

Dodadi 49:10

Ko moiua la iwiakunu ai kuaha ma dodunguu iwiora, Ho ai totoforauku onangino ka ihikaika naga abe yodadi o koano, Hiadono una woboa ai romanga o Silo abe o koano ma tutukunu gea to una ma dutu. Gea una abe ahao o nyawa o tonaka mata-mataika iwihingounu.

Higiriiri 91:1

Koaho ngini nimahitatoko Ma Jou Wokokurutiye ai timiuku, de irahai la ngini nimanoa Una Wokokurutiye ai fofongoka.

Higiriiri 91:4

De Una ahao winigoana ngini abe hoka o totaleo ma mayo yogoana ma ngofaka, ho ai gafuufu ma timiuku gea de ko kia-kiaua idadi nginika. Abe Una watobagou-goungu wagoana ai nyawaika, de ai gogoana gea imaketero hoka o dadatoko moi, de hoka o dadaduhu abe duru iputurungu.

Yesaya 11:1

Nanga koano ma dihiraino o Dautu de ai ngofa-ngofakuku de ai totoforauku ona yomaketeturuuru yodadi to ngone nanga koano, masara ahao naga ma oraha abe ko hokogenangokaua. De abe ma oraha o koano ma kuaha agoraka o Dautu manga tauoka de aino, gea imaketero hoka o gota ma amoko atolangoka de ma hou to ena ma agere dika. Masara dokenangikali de ahao naga ma oraha abe manga agere gea itorioli. De gea ma titi abe o Dautu ai totoforaukuino de naga womatengo woboa de unangoli wodadi wokoano.

Yesaya 11:12

De ma oraha gea una wohidutuboiye ai dodunguu la o dunia ma nyawa mata-mata ka idadi yamake. De genangoka watoomuinoli o Isiraele ma nyawa abe ma dihiraino de yaduhuika manga tonakoka de aika ma homoaika. De hokogenangoo o Yehuda ma nyawa abe yahikabarihoka o dunia ma amokika watoomuinoli unangino.

Yesaya 42:4

De Una gea ka ihikaika woaguru ai himangika de ko worehenua, abe ko womatogumua ka hiadono o totiai duru ilaku o dunia ma amokika. De ngaro o tonaka ma ago-agomoka de hiadono ma nuu-nuuhika masara mata-mataika iwidodamaa de yomahinganono to Una ai hiaturu ma putuhu.”

Gegetongo 10:33

Ho hokogea o Isiraele ma nyawa Ma Jou o Yawe ai loku yanoa de gea yoiki o wange hangeino ma dekana. De manga dodagi ma hiaturu kiani ona abe yao Ma Jou ai Behehongo ma Peti ona ma himangoka yahihira-hira manga dodagi ma ngekomika. De ona abe yatobamoku-moku Ma Jou ai Behehongo ma Peti Ma Jou o Yawe wapake ona la yahidumutu onangika abe o kiaka ma ngi yomatogumu la yomahiaini.

Matiusu 12:21

De ahao ma oraha gea ahao o nyawa o dutu mata-mataino o dunia ma amokika de ona yomahikokinganono to Una dika ai romangika.” De hokogea to Ma Jou ai demo ma dodihiraino abe ma titi ai Huhuloko o Yesusu ai hininga ma dodipokouku.

Matiusu 8:11

De abeika, una naa barikua ko o Yahudi ma nyawaua ma to una ai ngongaku atilakuroka abe ti ngini o Yahudi ma nyawa nia ngongaku. Masara gea tanu ngaro ufa hoheranga ma titi ena gea. Angamoi naa moioli tinihingahu nginika, abe ahao ma oraha dokengika Ma Jou wahikoano ai nyawaika de naga genangoka o nyawa ko manga ngoe abe ona ko o Yahudi ma nyawaua. De ona manga ngoe o dunia ma amokino yokokiboaino la yomakokutuono ihirame-rame de yolomo de nanga totofora o Abarahaama de o Isaka de o Yakubu abe Ma Jou ai rame-rameoka.

Lukasa 2:32

De o ngofaka naa wodadi o dararono o nyawaika. Abe ma titi Una wobaluhiyeoka de ahao wahimatoko Ma Jou ai hininga o nyawa mata-mataika. De gea ngaro ona ko o Isiraele ma nyawaikaua, ma onangikaoo wahitararono. Igoungu Una naa womaboa o Isiraele ma nyawaino, De mangale ma titi o nyawa ahao duru iwihoromati Unangika, Ho o nyawa manga horomati itagioo ngomino, Abe ngomi midadioka to Ngona ani nyawa, ho manga horomati itagi o Isiraele ma nyawaino naa.” Hokogea o Simeono ai higiriiri ma demo Ma Jouika.

Yohanese 12:32

Masara ka de Ngohi o nyawa ihihidoaiyeoka, ho o duniaka ihihitingakoka, de ahao o nyawa mata-mata tataurino Ngohino.”

Hidingoto 11:18

Hokogea o Peturusu ai hitararono ma demo ai gogianongoruika, de abe ma oraha ona yoihene ai demo de ko iwaka manga lawana ma demo ma titi ona ko o Yahudi ma nyawaua. Ho ona duru iwihigiriiri Ma Jouika ma titi gea de yotemo ato, “Igoungu Ma Jou wahidoakoka la ona abe ko o Yahudi ma nyawaua ka idadi yoporete manga howo-howono. De gea ahao ka idadi yamake o wowango ka hiado-adonika Unangoka de aino.”

Hidingoto 28:28

De ahao o Paulusu ka wotemohi onangika wato, “De naa ngohi tinihingahu abe Ma Jou ai Demo-demo gea inidaene nginiukuoo angamoi ti ngini naa nia pea ma dogowini duru nimaketero dika hoka nia totoforali manga pea ma dogowini. Abe ngini niolukoka ai abari abe hokokia Una waduhunu o nyawa manga howo-howonino. Ho mangale ma titi ngini niaolukoka ho Una wohidingoto ai abari gea ona ko o Yahudi ma nyawaikaua, de ona ahao yosanangi yodafongo enangika!”

Ibarani 4:1

De mangale ma titi nanga totofora utu ko yowohamua ma tonakika gea de ko idadiua yomahiaini de de Ma Jou, ho ngone ma oraha naa naga kiani duru hohidodiai hiniiki Unangika done ngoneoo utu ko idadiua homahiaini de de Una. Angamoi igoungu nagahi Ma Jou ai behehongo ngone ai nyawaino abe wonahibehehongo wato ngoneoo ka idadi homahiaini Unangoka. Ho iti ufa naga nginioka abe ko niwiadonikaua Unangika de gea ko nimahiainua Unangoka, masara abe duru irahai la ngone mata-mata homahiadono Unangika la homahikokiaini de de Una genangoka.

1 Peturusu 5:10

De moiohi ahi huhuloko nginika, la ngini naa ufa niafikiri abe inihikangela ma dekana, angamoi nia kangela gea tanu ka jai-jai dika de ipahaka. De gea ipahaka de ahao Ma Jou Una ma hirete winihitogumu nia kangelaino de winihiputurungu nia ngongakuoka. De gea Unangoo winihitongohono la ka nimatongohono ma dorouino de winihibitumu la duru ko nihelorua nia ngongakuoka de aino. Ho ahi gogianongoru, naa tinihigaro abe nia kangela gea tanu ka jai-jai dika de ipahaka. De ufa ngini niawohanga abe Ma Jou ai hininga duru aomanga de ma owa de ma rorahai. Abe Una gea o hiowa mata-mataika ma titi imanoa ka Unangoka dika. De Unangoka naga ai hidee duru ma hohailoa abe winihideeoka nginika. Abe igoungu ngini nidadioka moi de o Yesusu Kristusu, masara hongoli naga ai hidee la ika-ika de o Kristusu winihikodoku de winihidoaka to Una ai medebini ma dararono nginika. De ai medebini ma dararono gea abe ngini ahao niamake Unangoka de aino, ena gea duru itongohono ka hiado-adonika. Ho Una winiahoko ngini la ka idadi niamake ma utumu mata-mata ai hideeoka de aino, abe Una winiahoko ngini wato, “Niaino la nimamake ahi hiowa ma utumu abe Ngohi toigo tinihikodoku nginika!”

Himatoko 22:16

“De Ngohi naa o Yesusu, de ahi malaekata tihidingoto nginika la una o hingahu ma demo naa mata-mata winihingahu abe ngini o gogarejaika la gea nihioriki de niangaku. De Ngohi naa o Dautu ai totoforauku, abe una gea ma dodihiraino o Yahudi ma nyawa manga koano. De nagali ihihiromanga Ngohino ato Ngohi naa o Koruku ma Beka abe ma murumu gea itigi-tigi itebini de duru itararono ma dihangoka.” Hokogea nanga Baluhu idodutu ai higaro ma demo.

Himatoko 5:5

Masara o dimono womatengo wohitemo ngohino wato, “Ibootohi noari! Angamoi abeika genangoka naga womatengo abe naga de ai kuahaka la wahohe ma buku gea. De Una gea abe duru ma dodihiraka de Ma Jou wonahibehehongoka wato ahao Una gea woboa de wonaduhunu ngone. Abe Una gea iwihiromanga o Singa abe o Yehuda ai dutuino womaboa, de gea iwihiromanga o Singa angamoi Una ma koano duru ko ai buturungu. De Una gea o Yahudi ma nyawa manga koano ma dihiraino o Dautu ai totoforauku womatengo. De gea Una wahikalaka ai musu, de naga Unangoka ai kuaha la ka idadi ma guihi tumidi gea wafelenga de ma buku gea ka idadi wahohe.” Hokogea ma dimono ai demo ngohino.