Yeremia 18:8 - Ma Jou ai Demo-demo o Totobelohoka

⁸ De ngaro totemoka ma titi manga hohowono ahao idadi masara nako ma nyawa gea yakokiporete manga datoro ma dorou la ma totiaioli yaniiki manga wowangoka, gea de ahao manga hohowono tagorakoli ho ko idadiuali onangika.”

Yeremia 18:8 ပူးပေါင်းရင်းမြစ်များ

2 Tawari 12:6

De o Isiraele ma nyawa manga hohidimono de manga koano o Rehabeama yoihene Ma Jou ai hohowono ma hingahu gea de manga hiningaka duru yomahitipokouku hiadono yomahingahu ato, “Abe Ma Jou o Yawe wonahohowono de gea Una wodiai abe itotiai dika.”

Higiriiri 106:45

De Ma Jou womahihohininga ai behehongika abe wahibehehongoka, Abe ma dihira wato, “Ngohi ahi nyawa tapaliara ka hiado-adonika,” Ho ai hohowono gea ko wohigila-gilaua angamoi ai dora onangika ko itoakua.

Huhupu 32:12

Ho naa nako ani nyawa nahibinaaha de ahao o Mesiiri ma nyawa yosanangi hiadono done ahao manga demo o hohedu Ngonaika. Ona ahao yotemo, ato, ‘Abeika, manga jou ai hininga duru wabudi hiadono ona waofi o dunia ma lokuino. Abe ona wahihupu nenangino la wao o tonaka utuika de wakokitoma o loku-lokuoka genangoka.’ Ahi Jou, done hokogea manga hohedu ma demo Ngonaika ho koaho ibootoka ani ngamo onangika. Ngohi togahoko ahi Jou ani hininga naturuuru onangika la ufa nahibinaaha.

Huhupu 32:14

O Musa hokogea ona wademo Ma Jouika la Una wahiapongo. Ho Ma Jou o Yawe ai hininga waturuuru ho ngaro wato wahibinaaha masara naa, ko wahibinaahauali ai nyawa gea.

Hosea 11:8

Masara ngaro Ma Jou ai hiningaka de duru wangamo onangika, gea wohigila-gila ai demo wato, “Masara Ngohi naa done sarakia de tinihidoaka ngini la ahao inihibinaaha? Ngini naa o Isiraele ma nyawa nidadioka ahi ngofaka, ho ko idadiua tinihihononga tinihihupu ma homoaika. Duru ko tadadiua tinihohowono de o bobinaaha abe imaketero hoka ma kota hinooto gea ma dihiraino o Adima de o Seboimi. Angamoi ahi hininga aturuuruoka ma titi ahi dora ma hiokoo duru itagi nginika!

Yunusu 4:2

De womaniata womahingahu Ma Jou o Yaweika wato, “Gea! Ngona Ma Jou o Yawe de ma dihirahi ngohi ahi tonakokahi de tato marai hokonaa idadi. De angamoi ngohi tonihioriki abe to Ngona dika ani dora ko iwa ma batingi de duru noigo o nyawa naduhunu. De ani hininga itongohono de ko itai-taitua o nyawa nahohowono ho hiadono ngaro nato nahohowono ma nako yomatoduba hiadono manga dorou yanoaka de gea ko nahohowonokaua. Gea mata-mata ngohi tohioriki de gea ma titi hiadono toara o Tarasiisi ma kotaika.”

Higalioli 32:36

De ahao Ngohi Ma Jou o Yawe tahibalaha la ahi nyawa ka idadi o totiai yamake, de ahi hininga ma dora ma hiokoo itagi ahi nyawaika. Abe ma oraha gea Ngohi tomalega onangika de tamake abe ko yomangakunokaua, de ona gea duru yohutuloka, abe ngaro o gilaongo ma nyawa eko ona abe ko o gilaongua, masara ngade-ngade yohotumoka mata-mata.”

Hihira 2:18

De nako adonokali Ma Jou o Yawe wahidailakokali manga hihira de duru wahiakunu la yolaku manga musuika. Abe o Isiraele ma nyawa manga hihira gea Ma Jou iwiniiki ka hiadono manga hihira gea manga wowango ma bahaika. De Ma Jou ai dora ma hiokoo itagi ai nyawaika hiadono ona abe wahiakunu yahihira ka idadi wapake la o Isiraele ma nyawa wahihupu manga musu manga giamino.