Ngona nohioriki nako nodiai itiai de Ngohi tosanangi tonidafongo, masara naa nomahidodiai angamoi nako nodiai ko itiaiua gea de naga ani howono. O howono imaketero hoka o fuhuku ma aewani de ma buturungoka abe duru ani datekoka inigogataheke la ka idadi inihikangela. Ho ngona kiani duru nalawana o howonika hiadono to ena ma buturungu nohikala.” Hokogea Ma Jou wihitiari o Kainika.
Roma 6:12 - Ma Jou ai Demo-demo o Totobelohoka12 De igoungu ngone nagahi nanga hafini o howonika, masara naa ngohi tinihuloko la ibootohi nianiiki nia hafini ma dorou gea! Abe ngohi tato ngini ufa nimahigunoa la o howono inihipareta nia badanga homoi-homoioka hiadono nia badanga ma hafini ma dorou nihingounu enangika. Angamoi nako nia badanga, ena gea ahao ka ihonenge dika, ho done sarakia de ngini ka nihingounu enangika? အခန်းကိုကြည့်ပါ။ |
Roma 6:12
35 ပူးပေါင်းရင်းမြစ်များ
De Ma Jou wohigila-gila ai demo o Musaika abe una ahao kiani wadofanga ai gogianongoruika wato, “De kiani nahitiarioo onangika nato, ‘Masara nako hoka ngini ko niakiniikua o Kanani ma nyawa gea abe ma oraha naa ona yomanoa ma tonakoka doka, to ona manga hou ahao duru inihikangela nginika hiadono niaetongo hoka o gota moi abe naga nia lako ma goronaka de hoka o hihika ma amoko abe initopoko nia gumurukoka. Abe ona gea duru ka ihikaika inihikokangela nia tonakoka gea abe ahao nimanoa genangoka.
Ho ngaro to ngone nanga badanga ma hafini ma dorou o kia dika naga, masara gea ufa homahigunoa la haniiki enangika hiadono ihihofoko o howono ngoneoka. Masara koaho ngone homaaduru abe hoka nanga Baluhu idodutu o Yesusu Kristusoli ai hininga ma datoro, la gea o nyawa inamake to ngone nanga wowango imaketero hoka to Unangoli ai wowango yamake. De ngone kiani hao nanga wowango hokogea angamoi hohioriki abe ka itigi moduku ma oraha abe Una wonagoraka o duniaino naa.
De tanu enangoo imakiniiki de Ma Jou ai hininga ma dumutu ma dodihirainohi, abe Una duru woigo wonahimatoko ai hininga ma owa gea ngoneino. Angamoi ai Pareta inahimatoko ngoneino abe duru hoperelu ai hininga ma owa gea. De igoungu idadi hokogea, abe to Una ai owa idogo-dogo hiadono duru ilaku ngoneoka. Ho ma dodihirainohi de ngone o howono ma kuahaka homanoa hiadono ka hokokihonenge, masara ma oraha naa de ka idadi ngone homanoali Ma Jou ai hininga ma owa ma kuahaka angamoi Una wonahitotiaioka. De genangino de ngone hamake o wowango ka hiado-adonika ma titi nanga Baluhu idodutu o Yesusu Kristusino.
De gea ka idadi tinihigaro tato ngini naa ko o howono ma kuahakaua nimanoa. Masara igoungu ma dihiraino abe ma oraha ngini ka nimanoahi o Pareta ma goronaka de gea ngini o howono ma kuahakahi angamoi nioigo niwihisanangi Ma Jouika o Paretaino masara ko niakunua nianiiki enangika. Masara ma oraha naa de ngini ko o Pareta ma goronakaua nimanoa masara Ma Jou ai hininga ma owaka dika nimanoa, ho o howono ko idadiokaua inihipareta nginika angamoi Una ma hirete winiduhunu la ka idadi nialawana o howonika! Ho gea ma titi hiadono ngohi tato ngini ka idadi nimahidoaka Ma Jouika dika la ibootohi o howono inihipareta nia badangika! Ho mangale ma titi Ma Jou wonahingohamoka o Yesusu Kristusoka de abe wonahihoheoka o howono ma kuahaino, ho duru ko iwaka ma titi hiadono ngone haniikohi o howono nanga wowangoka, ho naa duru tonahigaro la howango ka Unangika dika!
Angamoi nako ngini niatobaniiki o howonika, gea tanu nimahidadioka hoka o gogilaongo ma nyawa abe o howonika, ho ena gea idadioka nia dutu. De abeika tohiketero moi. De nako hoka ngone homahidoaka o nyawaika la hato ka ihikaika haniiki de hahingounu onangika, de gea homahidadioka to ona manga gilaongo. De hokogenangoo de o howono, abe nako naga nanga hingounu enangika, de gea ena idadioka nanga dutu. Ho gea iti ngone nanga putuhu. Abe ngone ka idadi hohingounu o howonika masara hohioriki abe o howono ma hofoko gea o hone-honenge dika. Ekola ka idadi nanga hingounu itagi Ma Jouika la genangino de ihihofoko de o datoro ma totiai to ngone nanga wowangoka. Ho done sarakia de o nyawa yoigo yomangiriki o howono? Genangoka de duru ka yobodo dika!
De gea igoungu abe nia badanga ahao iborihonenge, masara ipahaino de ahao Ma Jou ti ngini nia badanga gea wohimomikoli nia honengino. Angamoi ngini mata-mata de naga Ma Jou o Womaha ngini homoi-homoioka. De gea ngone hohioriki abe ma dihiraino de Ma Jou o Womaha Una gea wihimomiki o Yesusu ai honengino. Ho mangale ma titi Ma Jou o Womaha naga womanoa ngini homoi-homoioka ho ka idadi nihioriki abe ngaro ahao nia badanga naa iborihonenge masara ahao Ma Jou winihimomiki nginioo ma titi to Una ai Womahino abe imaketero hoka o Yesusoli wihimomikoka ai honengino.
Angamoi nako o nyawa de manga wowango ma goronaka de yanii-niiki manga badanga ma hafini ma dorouika, gea ahao manga wowango hoka ihonengoka angamoi gea ka yomakitingaka Ma Jouoka de aino. Masara Ma Jou o Womaha wonahiakunu la ka idadi nanga badanga ma datoro ma dorou gea hatingakika! De nako nanga datoro gea hatingakika, gea ahao nanga wowango duru irorahai angamoi imakiniiki de Ma Jou ai mau.
Ho igoungu abe ngone hokururihi ma titi nanga hijai-jai ma badanga naga de ma kurangoka. Masara ko ma titiua la ngone hoigo hohonenge de hanoaka nanga badanga naa la gea nanga jiwa imatawangeika dika. Masara abe ngone duru hoigo, gea hoigo la wonahinoauku de o Horogaka ma badanga abe duru irahaiholi. Angamoi ma oraha gea de ahao nanga badanga abe ka idadi ihonenge gea ipahaka, de aturuuruoka de ma hungioli gea abe itobawango ka hiado-adonika. De gea ma titi hiadono ngomi mia hininga ko itoakua masara miongano-nganono enangika abe ahao hamake o Horogaka.
De igoungu, nako ma dihiraino gea ngone mata-mata nanga wowango ka imaketero dika abe hoka onangoli, angamoi gea hatobaniiki nanga hininga ma dorou. Ho gea ngaro abe nanga hiningaka ma horoodo eko nanga badanga ma hafini ma dorouika, masara gea haniiki dika la hato homahisosanangi. Ho abe igoungu ngone ma oraha gea ka homaketero dika hoka o nyawa utuoli mata-mataika, ho gea tanu itiai nako ma oraha gea de Ma Jou ai ngamo inakokidaene ngoneoo ma titi nanga howo-howono to Una ai himangoka.
Ho gea abe inidotokoka nginika, gea ena kiani nianiiki. Ho naa ngohi tinihibehehongo nginika abe imaketero de ma dodotoko ihira-hira gea. De gea ngohi tato kiani nia hininga ma dihiraino niatingakoka hiadono nia datoro ma dihiraino ibootohi nianiiki. Abe nia hininga ma dihiraino, duru hoka o gorofu dika mata-mata, de gea ma titi nia gimono ma dorou inihirehene o howonika de inibudi la doka nia hiningaka niato ma datoro gea nidiai de ahao ma sosanangi dika niamake. Masara gea ena ma hofoko ka ma dorou dika, ho tanu nia hininga ma dihiraino gea duru hoka o gorofu dika.
De gea ma titi ho hiadono tonihitiari ngonaika tato kiani nomatongohono ma dorouino. Abe ma dorou gea o nyawa utu abe ka o goohi ona gea yotobahafini genangika. Masara ngona kiani natobaniiki ma totiaiika, de kiani natobangaku ma gou-goungika, de kiani nidora Ma Jouika de o nyawa utuikaoo nadora, de kiani ani gogianongoru nao irahai la ani hininga naga de ma riidi. De abe ani gogianongoru genangoka, onagona dika abe manga hininga hatoli ikurangohi itebini ai himangoka, ufa nimaketedodiawo ngona de ona. Masara nako onagona dika abe onangoo manga hininga la iwileleani Ma Jouika de manga hininga ma debi-debini, ona de ngona gea ka idadi nimaketedodiawo niwileleani Unangika.
De Ma Jou ai hininga ma owa ngoneino, gea ena inahigaro de inadotoko la hiadono ka idadi holuku o kia dika naga nanga wowangoka abe imakalawana de to Una ai mau ngoneino. Ho gea wonadotoko la ngaro ngone naa ka o dunia ma lokuokahi hogogere masara ibootohi o dunia ma horoodo ma dorou haniikohi. Hokogea wonaduhunu la homatongohono hiadono to Unali ai mau ngoneino ka idadi haniiki de nanga wowango ma datoro ka itotiai dika.
De gea ahi behehongo ma demo kiani nahihohininga onangika la ena gea yahigaro hiadono yaabole-bole o nyawa mata-mataika. Angamoi Ma Jou waduhunoka manga howonino, ho gea ona kiani manga wowango ma datoro imakiniiki de to Una ai mau onangika. De abeika ngaro ngone naa abe hingaku-ngakuoka, masara abe ma dihira de ngone nanga wowangoka duru homaketero dika abe hoka onangoli abe ma oraha naa ona gea ko iwingakuahi. Abe ngoneoo ma dihira gea duru ko iwa nanga tobahioriki abe hiadono ko moiua de hataana de Ma Jou ai hininga. De ma oraha gea ngoneoo ko iwa nanga hingounu, de gea hiadono o nyawa utu inatobabudi de inahihira-hira ma dorouika. De igoungu ma oraha gea duru ka ma dorouika dika inahipareta hiadono nanga horoodo ma gimono mata-mataika ngone ka ihikaika hoohafini genangika, de gea ngone hoigo la homahisosanangi enangika. De ma dihira nanga wowango ma datoroka duru ka ihikaika hotula-tulaka dika de homaketetaleana de ka hiadono homakodohata ngone de o nyawa utu. Hokogea ma dihira nanga datoro ma dorou, de gea ka imaketero dika abe hoka o nyawa utu ma oraha naa abe ona ko iwingakuahi Unangika. Ho ngone koaho haabole-bole o nyawaika abe manga hininga hokogenangohi.
De ngini kiani naga nia hingounu Ma Jouika angamoi ngini nidadioka to Una ai ngofa-ngofaka. Ho kiani niwihingounu Unangika de ufa nimahigunoa la nia hininga ma hafini ma dorou inihipareta nia wowangoka. Angamoi igoungu ngini ma dodihirainohi abe ma oraha ko kia-kiauahi nihioriki abe Ma Jou ai hininga, de ma oraha gea ka inihiparetahi nia hininga ma dorou.
Ahi gogianongoru abe duru tinidora nginika, ngini tanu nimaketero hoka o homoa ma nyawa de gea ngini o dionikino ma nyawa o duniaka naa angamoi nia gogere ma gou-goungu gea nagau o Horogaka. Ho gea ngohi tinihigaro nginika la ka ihikaika nimatongohono de ufa nianiiki nia badanga ma horoodo ma dorouika. Abe nia horoodo gea imakalawana de ti ngini nia hininga abe Ma Jouoka de aino iboa.
De ma demo gea duru yahitaana de ona gea abe yomahisapuru nginika, angamoi ona ka ihikaika yokurubungu de yabobeto o nyawaika, de abe manga wowangoka yatobaniiki to ona ma hirete manga badanga ma hafini. De nako manga uruoka ona duru yomagorakiye ona ma hirete, de nagali abe ona yahigiriiri o nyawa utuika de manga demo ma ilingi ma mutiti la ato ma utumu yomamake onangino gea. Ho gea to Henoko ai demo ma dodihiraino duru yahitaana onangika abe ma titi to ona manga hohowono hokokia ahao yamake Ma Jouoka de aino.
Abe ona manga hitiari ma demo ato, “Ahao ma oraha nanga Baluhu ai gahe ma wange hatoli itigioka de ahao naga utu o nyawa yotobamia-mia nanga ngongakuika de nanga Baluhu idodutuika. De ona yotobamia-mia gea manga wowangoka yatobaniiki to ona ma hirete manga badanga ma hafini abe ena gea duru imakalawana de to Ma Jou ai mau ngoneino.” Hokogea ona inahitiari ma dihiraino.
Abeika ngini ngaro ma dihira niato ko nidiaiua, abe nihihibehehongoka Ngohino, masara naa ngini nihilawana hiadono nidiaioka abe tato ko idadiua nidiai. Ho mangale gea Ngohi ko tiniduhunokaua hiadono ona abe ka yogogerohi o tonakoka naa Ngohi ko tahihupua masara ka tanoaika dika yogogere nia hidogoronaka. De ona tohiketero tato yodadi hoka o hihika nia roehoka abe ko idadiua nimagiwuku ho ka ihikaika inihikangela. De ka idadi ona tohiketero hoka yodadi o modoi nginika abe inihikangela angamoi ahao ti ngini nia hininga ka itagi to ona manga jou-jouika ka hiadono inihidiliko manga popangaoika.” Hokogea Ma Jou ai malaekata Ma Jou ai demo wadofanga o Isiraele ma nyawaika.
ကြော်ငြာတွေ