Roma 5:4 - Ma Jou ai Demo-demo o Totobelohoka

⁴ De abe homatongohono nanga kangela ma goronaka, nanga dongohonino gea de ka idadi utuohi itararono homahioriki abe ma dihirainohi de Ma Jou wonaetongo ngone wato ai nyawa abe duru de nanga ijaka. De ahao mangale ma titi homahioriki itararono abe ngone Ma Jou ai nyawa abe duru de nanga ijaka, gea ka idadi utuohi hohioriki de honganono abe ahao Ma Jou wonahikodoku to Una ai medebini ma dararono gea ngoneino.

Roma 5:4 ပူးပေါင်းရင်းမြစ်များ

Lukasa 21:19

De abe nia kangela ma goronaka de nimatongohono la ufa nirehene nia ngongakuino, gea inihitaana abe o wowango ma ngango nimamakeoka.”

Roma 15:4

De gea Ma Jou ai Demo-demo mata-mata abe ma dodihiraino de ihitulihukuoka, gea ma dumutu ka moi. Abe gea ihitulihuku la ma titi genangino de ka idadi wonadotoko ngoneino. De gea Ma Jou ai hininga la to Una ai Demo-demoino de duru inahigaro nanga hiningaka de hiadono nanga dongohono ka idogo. De ahao genangino naga ihihofoko nanga nganganono abe duru hohioriki ahao ma oraha adonoka de hamake o kia dika abe Ma Jou wonahibehehongoka wato wonahidoaka.

Filiipi 2:22

Masara naa o Timotiusu, una gea ngini niwihiorikoka abe ai hininga Ma Jouika womahitaanoka ma titi una de ngohi mimakutuono miahingahu-ngahu o Abari ma Rorahai o nyawaika, de una ka ihikaika naga ahi datekoka wohiduhunu, abe imaketero hoka o ngofaka abe woigo ai baba widuhunu la wihisanangi.

Ibarani 6:19

De gea ka idadi duru hohioriki abe ma hasili ahao hamake nanga nganganonino angamoi ngone hohiorikoka ko iwaka ma batingi abe inahikatingaka ngone de Ma Jou, ho ma oraha naa de ngone ka idadi hoboa Unangino. Masara nako nanga gogianongoru o Yahudi ma nyawa abe ma dodihiraino, ona gea ka yomakitingakokahi Ma Jouino ma titi ma ngoere ma biri-birini abe to Una ai Tau ma goronaka, angamoi ona ko idadiua yatilakuru ma ngoere gea la yoboa to Una ai himangino. Masara ngoneoli ma oraha naa, ngone imaketero hoka ka idadi howohamika abe to Una ai ngi duru itebi-tebini doka ma goronaika de homarihimanga de Una genangoka. De nanga nganganono ena gea tohiromanga tato imaketero hoka o tapu moi abe inahiputurungu nanga hiningaka la ko idomoua hiadono ko ihelorua.

Yakobusu 1:12

De o nyawa onagona dika abe ngaro o kokangelaika yaohana masara ka yomatongohono ma titi manga ngongakuoka, onangika gea ahao Ma Jou wahiowa. Angamoi ona gea yomahitaanoka abe ngaro de o kangela yahitaili onangika masara gea yagou-goungu iwingaku Unangika. Ho ahao Una wahiowa onangika de manga hadia o wowango ma ngangoino ka hiado-adonika. De ma hadia gea ma dihirainohi de wonahibehehongoka ngoneino onagona dika abe hidora Unangika wato gea ahao wonahidoaka ma titi nanga dora Unangika.

1 Peturusu 5:10

De moiohi ahi huhuloko nginika, la ngini naa ufa niafikiri abe inihikangela ma dekana, angamoi nia kangela gea tanu ka jai-jai dika de ipahaka. De gea ipahaka de ahao Ma Jou Una ma hirete winihitogumu nia kangelaino de winihiputurungu nia ngongakuoka. De gea Unangoo winihitongohono la ka nimatongohono ma dorouino de winihibitumu la duru ko nihelorua nia ngongakuoka de aino. Ho ahi gogianongoru, naa tinihigaro abe nia kangela gea tanu ka jai-jai dika de ipahaka. De ufa ngini niawohanga abe Ma Jou ai hininga duru aomanga de ma owa de ma rorahai. Abe Una gea o hiowa mata-mataika ma titi imanoa ka Unangoka dika. De Unangoka naga ai hidee duru ma hohailoa abe winihideeoka nginika. Abe igoungu ngini nidadioka moi de o Yesusu Kristusu, masara hongoli naga ai hidee la ika-ika de o Kristusu winihikodoku de winihidoaka to Una ai medebini ma dararono nginika. De ai medebini ma dararono gea abe ngini ahao niamake Unangoka de aino, ena gea duru itongohono ka hiado-adonika. Ho Una winiahoko ngini la ka idadi niamake ma utumu mata-mata ai hideeoka de aino, abe Una winiahoko ngini wato, “Niaino la nimamake ahi hiowa ma utumu abe Ngohi toigo tinihikodoku nginika!”