Roma 5:17 - Ma Jou ai Demo-demo o Totobelohoka17 De igoungu abe mangale ma titi o nyawa womatengo dika o Adama ai howonino hiadono ma dodihirainohi de o hone-honenge inahipareta ngone o nyawa mata-mataika ho hiadono kiani ngone mata-mata hokokihonenge. Masara ma oraha naa iboaka moioli ma titi abe ka enangohi ikurutiye. Abe ngaro ma dodihirainohi de o hone-honenge inahipareta, masara ma oraha naa de ngoneoli ka idadi hohikala o hone-honengika angamoi ngone hamakeoka o wowango ma ngango ma titi womatengoinoli abe o Yesusu Kristusino. Abe onagona dika hodafongo to Una ai hidoaka ma owa kohaamoko ngoneino de hiadono hodafongoo to Una ai totiai abe ka wonahidoaka dika ngoneino, gea ngone abe duru holaku-laku ho o howono ko idadiokaua inahipareta ngoneino naa de ka hiado-adonika. Ho abe ma oraha nanga hiningaka ipuda moi abe inahigaro o howonika, ma oraha naa de ka idadi holuku dika haniiki ma howono gea. အခန်းကိုကြည့်ပါ။ |
Roma 5:17
26 ပူးပေါင်းရင်းမြစ်များ
Ho muna gea moihenoka de angamoi mamake ma hofoko gea duru irahai ho duru moigo maolomo hiadono doka ami hiningaka mato, “O hofoko gea nako taolomo marai duru imutiti de gea igoungu inahidadi hososawaro ho duru toigo taolomo.” Ho ma hofoko gea momadofi de maolomo. De utu mihidoaka ami rokatika, angamoi una naga wominiikika, ho unangoo waolomo.
“De gea tahikatingaka ibooto de ahao Ngohi manga Koano ahao tahoko ona ahi nirakoka tato, ‘Niaino la niamake nia hiowa ma hidoaka ahi Babaka de aino, angamoi naa adonoka ma oraha la Ngomi miahikoano to Ngomi mia nyawaika. De nia hiowa ma hidoaka gea duru ma dodihirakahi abe o dunia ko idadiuahi de inihidiaiokau la ngini to Ngomi mia nyawa ahao niamake abe ma oraha minihikoano ngini.’
De marai utu yomaleha-leha ato, “Done sarakia to ngone nanga utumu ma hohailoa gea hamake o nyawa womatengoino dika?” Ho gea ka idadi tinihitararono nginika. Abe gea ka imakadaene dika hoka duru ma dodihiraka, abe ma oraha wonatulaadauku de ipahaino de ngone hodadioka o howo-howono ma nyawa. De genangokaoo inadaene ma titi o nyawa womatengoino dika ai datoro. De hokogenangoli ma oraha naa, abe ngone o nyawa ka idadi o wowango ma ngango hamake ma titi womatengoino dika ai datoro, de gea nanga Baluhu idodutu o Yesusu Kristusu ai datorino! De gea nanga wowango ka idadi hohikohowono de ma dodihiraino o Adama ai datoro moioli abe genangino de ngone o nyawa hohonenge. Abe nako ngone o nyawa mata-mata nanga howono, de gea ihititi abe womatengoino dika ai howono. De gea o Adama una duru wohira wahowono, masara ipahaino de ai howono gea imahora-hora hiadono ngone o nyawa mata-mataika o duniaka naa ngoneoo hakokihowonoka Ma Jouika. Ho mangale ma titi o Adama ai howono gea hiadono ika-ika de una wohonenge. De o hone-honenge enangoo imahora-hora o dunia ma nyawa mata-mataika, ho ngoneoo mata-mata hohonenge angamoi ngoneoo hahowonoka.
Masara igoungu abe manga datoro hinooto ma hofoko gea duru ko imakadaenua. Angamoi Ma Jou ai hidoaka ma owa ngoneino la wonaetongo ngone hototiai ai himangoka, gea ena duru imakohowono de to Adama ai howono ma hofoko. Abe mangale ma titi womatengoino gea ai howono hiadono o nyawa ko manga ngoe yohonenge. Masara abe ma titi o Kristusu ai datorino ma hofoko, duru ka enangohi abe ikurutiye ma titi ngoneino. Angamoi nako to Yesusu Kristusu ai datoro, gea duru mata-mata ka ai hininga ma owaka dika de aino. De ma titi genangino hiadono o nyawa duru ko manga ngoe yamake Ma Jou ai hidoaka ma owa. De gea ai hidoaka la o nyawa ka idadi waetongo yototiai ai himangoka. De ai hidoaka ma owa mata-mata abe wonahidoaka, gea o nyawa duru ko manga ngoe yamake ai owa gea ma titi o Kristusu ai datorino abe o gotaka.
De naa marai ngini utu nia hiningaka nimaleha niato nako gea igoungu abe nanga totiai ka o Yesusu ai datorino dika iboa, done sarakia ma titi hiadono ma dodihiraino de Ma Jou wonahidoaka o Musa ai Pareta ngoneino? Mode ko idadiua ma Pareta inahitotiai? De gea ma titi hokonaa. Abe Ma Jou wonahidogo ai Pareta ngoneino la genangino de homahioriki nanga howono. Abe ahao ma oraha hatilakuru ai Paretaika de gea utuohi itararono hataoko abe ngone hatilakuroka ai hininga ma dumutu hiadono hahowonoka Unangika. De barikua o nyawa nanga howono ka idogo-dogo, masara ka Ma Jou ai hininga ma owahi abe duru idogo-dogo ilamoko ngoneino.
De gea ka idadi tinihigaro tato ngini naa ko o howono ma kuahakaua nimanoa. Masara igoungu ma dihiraino abe ma oraha ngini ka nimanoahi o Pareta ma goronaka de gea ngini o howono ma kuahakahi angamoi nioigo niwihisanangi Ma Jouika o Paretaino masara ko niakunua nianiiki enangika. Masara ma oraha naa de ngini ko o Pareta ma goronakaua nimanoa masara Ma Jou ai hininga ma owaka dika nimanoa, ho o howono ko idadiokaua inihipareta nginika angamoi Una ma hirete winiduhunu la ka idadi nialawana o howonika! Ho gea ma titi hiadono ngohi tato ngini ka idadi nimahidoaka Ma Jouika dika la ibootohi o howono inihipareta nia badangika! Ho mangale ma titi Ma Jou wonahingohamoka o Yesusu Kristusoka de abe wonahihoheoka o howono ma kuahaino, ho duru ko iwaka ma titi hiadono ngone haniikohi o howono nanga wowangoka, ho naa duru tonahigaro la howango ka Unangika dika!
De ngaro o kia dika naga abe daku ma hoanino imanoa eko ngaro abe imanoa o duniaka naa, eko ngaro naga utuohi o kia dika abe Ma Jou wotulaadauku, masara gea mata-mataika de duru ko iwa moi abe ka idadi inahikatingaka ngone Ma Jou ai doraka de aino. De to Una ai dora gea wonahimatoko ngoneino ma titi nanga Baluhu idodutu o Yesusu Kristusino.
Ngini naa niato bote nia wowangoka ingodu-ngodumoka. Abe niato bote nia hiakunu Ma Jouoka de aino duru iniwedonoka ho ko iwa nia kuranga, de hiadono ngini nimamao hoka nidadioka o kokoano! Duru irahai gea! Ma, hiokoo, ngomi naa ko mimadaenua. De tanu ngohi duru tosanangi nako niagou-goungu nidadioka o kokoano, la gea ngomioo mininiiki de ahao ka idadi ngone mata-mata hahikoano o nyawa ko manga ngoe!
De mangale ma titi nako ngone abe ma oraha inahikangela de homatongohono de nanga hininga ma dongohono, ho gea hohioriki abe ahao ngoneoo hahikoano de de Una. Abe ma titi ahao naga ma oraha Una woboali de wahikoano o dunia ma nyawa mata-mataika. De ma oraha gea ngone mata-mata abe ma dihiraino nanga kangela ma goronaka de homatongohono ho ko horehenua Unangino, gea ngoneoo ahao o nyawaika hahikoano de de Una. Masara nako ahao idadi abe ngone hotemo hato ko hihiorikua de ko iwa nanga gogao Unangika, gea Unangoo ahao wonatemo ngoneino wato ko wonahiorikua de to Una ai gogao ngoneino ko iwa.
Ahi gogianongoru abe duru tinidora nginika, abeika ngini nitotoihene ahi demoino naa. Nako ngini niahitipokouku o huha ma nyawaika, gea duru ko to Ma Jouua ai hininga ngini nianiiki. Angamoi nako Ma Jou ai hininga, Una wairikoka o huha ma nyawa o duniaka naa la ma titi manga ngongakuino de ona yodadi o nyawa abe duru de manga utumoka. De ona gea Ma Jou wahigogere to Una ai kuahaka la ahao Una wahikoano onangika, de gea duru imaketero abe hoka ma dodihiraino wohibehehongoka wato onagona dika yagou-goungu iwidora Unangika de ona gea ahao yogogere to Una ai kuahaka.
Masara nako ngini hokogenangua. Angamoi ngini naa nidadioka to Una ma hirete ai nyawa duru ma hohailoa. De nidadioo o hidemo ma nyawa abe niwitobaleleani nanga Koano Ma Jouika. De ngini o doomu moi abe nitebi-tebini angamoi Una womadingakino ngini la nidadi to Una ai nyawa. De gea ngini nidadioka to Una ai nyawa la Ma Jou ai hininga ma datoro ma hohailoa ngini niahingahu-ngahu o nyawaika. De ngini duru nihiorikoka ai datoro ma hohailoa gea, angamoi Una nengokadauino de winihihupuoka o fufutu ma kuahaka de aino de winihigogeroli to Una ai dararonoka abe duru ihohailoaholi. Ho to Una ai datoro gea abe ngini kiani niahingahu-ngahu o nyawa-nyawaika.
De Una wonahidadi ngone to Una ai kokawaaha o doomu moi la ngone ka idadi hileleani ai Baba Ma Jouika abe hoka ma dihiraino ona o hidemo ma nyawa Ma Jouiye iwileleani Unangika. Ho gea kiani ka ihikaika hihigiriiri o Yesusu Kristusika, de ai kuaha kohabuturungu gea kiani hohimatoko o nyawa utuika naa de ka hiado-adonika! Amin!
De ahao nagali tamake o kadera ma hohailoa kohangoe de gea amomoiika naga yogoo-gogeruku ma kaderauku, de ona gea naga manga kuaha la yatobauru-urusu o nyawa manga howono de hiadono yahohowono onangika. De ona yogoo-gogeruku gea Ma Jou ai nyawa manga jiwa abe ona nengokadau yatomaka angamoi ma titi ona yasoino ma hingahu ma demoika abe naga Ma Jou ai Demo-demoka, de gea yahingahu-ngahu o nyawaika ma titi o Yesusu de duru yahigaro la ka idadi iwingaku Unangika. De ona gea abe ko yomahubaua o aewanika gea eko to ena ma pangaoika, de gea ma dodunguu ko yodafongua abe manga pea ma nyore-nyoreoko eko manga giamoka. Ho ona gea yomomiki manga honengino de yomakiniiki yokoano de de ma Mesia o Kristusu abe o taongo o sana moi ma dekanino yokoano.
De nako ona abe o momomiki ma hira-hiraka de yomomiki manga honengino, ona gea duru de manga utumoka de duru yotebi-tebini. Angamoi ona gea ahao duru ko yamaoua o hohonenge ma hinooto ma titi gea ko iwa ma kuaha onangika. Masara gea ona ahao iwileleani Ma Jou de o Kristusika abe hoka ma dodihiraino ona yodadi o hidemo Unangiye onangoo iwileleani Unangika. De gea ona yokoano de de Una abe o taongo o sana moiino ma dekana.
“De onagona dika yolaku ho ma dorou ko yahikalaua onangika, ona gea ahao tahidoaka ma kuaha onangika la ona yogogeruku to Ngohi ahi datekoka abe ahi kadera ma hohailoa o Horogaka. De genangoka ahao yokoano de de Ngohi. De gea duru imaketero abe hoka ma dihiraino Ngohioo tolaku de ahao togogeruku ahi Baba ai datekoka abe ai kadera ma hohailoauku.”
ကြော်ငြာတွေ