Roma 4:2 - Ma Jou ai Demo-demo o Totobelohoka

² Sarakia, bote gea ma titi o Abarahaama ai wowango ma datorino de hiadono Ma Jou wietongo wototiaioka? Angamoi nako hoka o Abarahaama ai totiai ihititi ai datoro ma rorahaiino, gea de ahao tanu o Abarahaama ka idadi womagorakiye o nyawa manga hima-himangoka abe ma titi womamake ai totiai gea. Masara tanu hokogenangua idadi hiadono Ma Jou wietongo wototiai, ho duru ko idadiua o Abarahaama womagorakiye, angamoi o Abarahaama ai totiai gea ko ihititiua o Abarahaama ai datoroka de aino.

Roma 4:2 ပူးပေါင်းရင်းမြစ်များ

Dodadi 12:18

Ho ahao o Firaunu womamao de wohioriki manga panyake ma ngoe ma titi marai o ngo Sarai gea to Abaraama ngoi fekata. Ho o Firaunu o Abaraama wibehehongo abe ai nyawa wahidingoto la iwiaoino. De ma oraha o Abaraama woboa o Firaunu ai himangino de o Firaunu wahiaturoka la o ngo Sarai munangoo naga genangoka. De o Firaunu wileha o Abaraamika wato, “Done sarakia ngohino nohibudi hokonaa? Adodoa ho ko nohihingahua muna naa ngoni fekata?

Dodadi 12:20

Naga ahi nyawa naa ka idadi iningotaka ahi tonaka ma batingika.” Hokogea o Firaunu ai demo o Abaraamika. Ho o Firaunu ai duduhunu ma nyawa o Abaraama iwihihupu ka ma moi de ngoi fekata, de ai nyawa, de ai aewani ma duduono, de ai kiahonanga mata-mata, ho ka ma moi yahihupu o Mesiiri ma tonakino.

Roma 15:17

Ho ngohi naa ahi hiningaka de duru togarago abe ma titi ahi tagongo de ahi leleani Ma Jouika. De gea tohioriki abe ahi leleani ma datoro mata-mata ngohi ka idadi todiai ma titi o Yesusu Kristusino dika, de gea ko ngohinoua ma titi.

1 Korintusu 1:29

De hokogea wodiai angamoi wato done o nyawa womatengoino naga de ka idadi woboa Ma Jouino de womahingahu wato bote Ma Jou wiirikoka ma titi to una dika ma hirete ai sosawaroino eko ai hiakunu eko ai gogere.

1 Korintusu 1:31

Ho, duru itaana Ma Jou ai Demo-demo ma dihira, abe ihitulihukuoka ato, “Ufa o nyawa yomahigiriiri ona ma hirete, masara ona gea koaho iwihigiriiri nanga Baluhu idodutuika dika ma titi to Una ai datorino.”

1 Korintusu 4:7

De naa tinileha de tinitaere nginika abe ngini hatoli nikurutiye o nyawa manga himangoka. Mode ka onagona inihingahu nginika ato, “Nako de o nyawa utu, ka nginiohi nisosawaro de nia demo ma ilingi inouhu”? Mode ko nihiorikua abe nia hiakunu mata-mata gea inihidoaka dika nginika? Ho nako nia hiakunu gea de ngini ka nidafongo dika, gea adodoa ho nimahigiriiri hoka nia karajaangoka de aino iboa?

1 Korintusu 9:16

De abe ma titi ngohi o Abari ma Rorahai tahingahu-ngahu, gea duru ko idadiua tomahigiriiri ma titi ena gea, angamoi ma dihira ahi hiningaka de duru tamao o didila ma amoko ngohino abe Ma Jou wohihuloko wato, “Ngona ahi Abari ma Rorahai kiani nahingahu-ngahu o nyawaika.” Ho gea nako ko tahingahua, gea de ahao kiani o kangela tamake ahi wowangoka.

2 Korintusu 11:12

De ngohi ka togila-gilahi dika abe o hibalaha ko tomagahokua la tato done yotobadoto-dotoko ma nyawa utu ka idadi yomahingahu ato ona de ngomi ka mimaketero dika. Angamoi ona abe o rerehene ma dodotoko yotobadotoko nginioka, ona gea duru yoigo yomahingahu de yomahigiriiri abe to ona manga tagongo o Yesusu Kristusino de ka imaketero dika de to ngomioli mia tagongo.

2 Korintusu 11:30

De mangale ma titi ngini nihihiribuutu la tomahitaana abe tagou-goungu tileleani o Yesusu Kristusika ho ngohi tamao abe kiani tomahigiriiri ma titi ahi tagongo Unangoka. Ho mangale ma titi kiani tomahigiriiri, ho koaho tomahigiriiri ma titi ahi bole-boleino gea. Abe ahi demoino gea de ka idadi nihihioriki abe ngohi naa o bole-bole ma nyawa dika.

2 Korintusu 5:12

De mia demoino gea ko ma titiua la mimahigiriiri ngomi ma hirete. Hokogenangua, masara ngomi mioigo la ngini nia hiningaka de ka idadi nimihidogarago ngomino angamoi mia hininga ma dumutu ma rorahai dika. Angamoi igoungu naga o nyawa utu nginioka abe yahigiriiri o nyawaika ma titi abe bari to ona manga tagongo eko manga hiakunu duru ikurutiye o nyawa manga himangoka. Masara ona ko yolegaikaua abe o nyawa gea manga hininga ma dolaika, abe nako imakiniiki de Ma Jou ai hininga eko koua. De ona gea abe imilega ngomino de ato ngomi naa ko kia-kiaua angamoi ona ko igou-goungua ihioriki to ngomi mia hininga ma dola. Ho ngomi mioigo la ngini nihioriki igou-goungu to ngomi mia hininga la ufa hiadono ona inihirehene hiadono ko nianiikokaua to ngomi mia dodotoko.

Galatia 3:22

Masara duru ko iwa o pareta abe gea ma paretaino de ngone hamake o wowango. De tanu to Una ai Pareta hamake ai Demo-demoka, ai pareta gea ena abe inahitararono ato ngone o dunia ma nyawa mata-mataika homanoa o howono ma kuahaka, abe gea imaketero hoka inahidubuika o howono ma goronaka ho ko idadiua hohupu ma kuahaino. Ho ai Pareta wonahidoaka la wato ngone duru homahioriki abe ngone naga de nanga howonoka. De nako hiadono ena gea hohiorikoka, gea ahao homahidiaioka de hodafongo ai behehongo ma owa abe ma dihiraino wohibehehongoka. De onagona dika abe iwingaku o Yesusu Kristusika, ona gea yamakeoka ma owa Ma Jouino abe ma titi Ma Jou wakokiofioka manga howono.

Efesusu 2:9

De gea duru ko ma titiua la ti ngini ma hirete nia karajaanga eko nia datoro ma hasili de hiadono nimaduhunu, ho done o nyawa onagona dika de yomasade ma titi genangino.

Filiipi 3:9

la hiadono ngohi naa duru Unangoka dika tomanoa. De abe ngohi naga Unangoka, gea ko mangaleua ma titi to ngohi ahi wowango ma totiai naga abe o pareta tanii-niiki, masara ma titi tingaku Unangika hiadono wohihitiaioka, angamoi gea ihititi de o ngongaku dika hiadono Ma Jou wonahidoaka ai totiai gea.

Yosua 24:2

De ahao o Yosua manga doomu ma amokika gea wahimanga de wahingahu onangika wato, “Hokonaa Ma Jou o Yawe, to ngone o Isiraele ma nyawa nanga Jou, to Una ai hohininga ma demo ngone o Isiraele ma nyawaino. Una wato, ‘Ma dodihiraka abe ti ngini nia totofora o Tera de ai ngofa-ngofaka o Abarahaama de o Nahoro, ona gea yogogere doka o Efaraata ma akere ma honongaka de yomatobahuba-huba o jou-jou ma homoaika.