Roma 10:5 - Ma Jou ai Demo-demo o Totobelohoka

⁵ De abe ma titi Ma Jou ai ngekomo la waetongo o nyawaika wato ona yototiai ai himangoka, igoungu abe o Yahudi ma nyawa utu ko yaniikua ai ngekomo gea. Ho ona ka yaniikohi manga ngekomo moioli, abe ona ato yomahitotiai ma titi yatobaniiki o Musa ai Paretaino. Masara naga moi o Musa ai demoino abe inahitararono ato ma ngekomo gea duru ko igapangua la genangino de Ma Jou waetongo o nyawa wato yototiai. De o Musa ai demo gea koaho o Yahudi ma nyawa duru yatailako enangika. Abe ma dodihiraino de o Musa una ma hirete wohitulihuku wato, “Abe nako o nyawa duru ka ihikaika yaniiki itiai ma pareta de ko ma iwa abe yatilakuru, gea ahao yamake o wowango ka hiado-adonika ma titi genangino.” Hokogea o Musa ai demo ma titi o Pareta, de ai demoino gea de ka idadi hohioriki abe duru ko igapangua Ma Jou waetongo o nyawa yototiai ma titi o Pareta yanii-niiki.

Roma 10:5 ပူးပေါင်းရင်းမြစ်များ

Yesaya 55:3

“Koaho ngini nimatoomuino de nitotoihene Ngohino la ka idadi o wowango nimamake! De gea ahao tinihibehehongo moi nginika abe duru ko tawoha-wohangua ka hiado-adonika. De ahi behehongo gea ahao imakiniiki de ahi behehongo ma dihiraino abe tihibehehongo nia koano o Dautika.

Gogao 18:5

Ho ahi pareta de ahi hiaturu kiani ngini mata-mataika nimahitingini. O nyawa mata-mata abe ihingounu ahi hiaturu ma ngekomo de ahi paretaika, to ona manga wowango yomahiaturu itiai angamoi yaniiki to Ngohi ahi demo gea. Ngohi totemo naa Ma Jou o Yawe.’

Higalioli 4:1

De ipahaino de o Musa wahigaro ai gogianongoruika wato, “Abeika, ngini o Isiraele ma nyawa, ngini kiani duru nitotoihene de nianiiki itiai ma huhuloko ma demo naa nginika. Abe nako naga nia hingounu Ma Jou ai huhuloko ma demoika de ahao ka idadi niwango irahai de niwohama ma tonakika gea abe nia totofora manga Jou o Yawe winihidoaka nginika. De niwohama ipaha de ka idadi nimahitingini ma tonaka gea la idadi ti nginioli.

Filiipi 3:9

la hiadono ngohi naa duru Unangoka dika tomanoa. De abe ngohi naga Unangoka, gea ko mangaleua ma titi to ngohi ahi wowango ma totiai naga abe o pareta tanii-niiki, masara ma titi tingaku Unangika hiadono wohihitiaioka, angamoi gea ihititi de o ngongaku dika hiadono Ma Jou wonahidoaka ai totiai gea.