Roma 10:21 - Ma Jou ai Demo-demo o Totobelohoka

²¹ Masara nako Ma Jou ai demo abe ma titi o Yahudi ma nyawa manga hininga, gea duru imakohowono. Angamoi ngaro Ma Jou duru woigo la onangoo waduhunu abe imaketero hoka ona ko o Yahudi ma nyawaua waduhunu, masara to Una ai nyawa gea ka iwioluku Unangika. Abeika Ma Jou ma hirete ai demo ma dodihiraino abe Una wotemo wato, “Ngohi naa ma deka-dekanuku tahoko onangika la tato ona yolio Ngohino la tadafongoli, masara ona gea ka ihikaika ihilawana de manga hingounu Ngohino ko iwa.” Hokogea ma dodihiraino ihitulihukuoka ma titi o Yahudi ma nyawa iwioluku Ma Jouika, de hokogenangoo ma oraha naa naga, angamoi to ona manga hininga ka hokogea dika Unangika. Ho gea ka idadi ngone hohioriki abe o Yahudi ma nyawa barikua ona yoihenoka de ihiorikoka o Kristusu ai hingahu ma demo abe o Abari ma Rorahaiino, masara ona ka yoluku yangaku enangika. Ho gea itararono abe duru manga ngolukino dika ma titi hiadono ona ko manga ngoe ko yamakeua Ma Jou ai duduhunu manga howo-howonino.

Roma 10:21 ပူးပေါင်းရင်းမြစ်များ

Sosawaro 1:24

Masara nako o ngo Sosawaro ami demo hoporetika de gea motemo ngoneino mato, “Ngohi naa tinikokiahokoka masara ka nimatopongonokahi hiadono ko moiua nginioka nitoihene angamoi ahi duduhunu nioporetika.

Lukasa 24:47

De ahi abari gea kiani o nyawa yahingahu-ngahu o dunia ma nyawa mata-mataika, de gea yahingahu-ngahu de to Ngohi ahi kuaha. Abe imulaenge o Yerusaleeme ma kotaka naa de imahora-hora o dunia ma amokika. De ma abari gea ma titi abe onagona dika yotoba de yoporete manga howo-howonino, ona gea ahao Ma Jou waofi manga howono gea.

Higalioli 31:27

Angamoi ngohi tinihiorikoka ma titi nia hilawana de nia pea ma dodogowini. Abe ngaro ma dihirainohi de ngohi tomanoa ti ngini nia hidogoronaka hiadono ma oraha naa naga masara ngini ma muruono ibooto niwilawanoka Ma Jouika. De duru tohioriki abe ahao ma oraha ngohi topahaka de ti ngini nia hininga ma lawana ka idogoli ilamoko!

1 Peturusu 2:8

De naga moiohi ai Demo-demoino abe imakiniiki de itemo ato, “Una gea hoka o hakaru abe idadioka o bebeleke o nyawaika de genangino de ahao ona yorubauku.” Hokogea ma dodihiraino ihitulihukuoka. De genangino inahitararono abe ma titi o nyawa manga hohowono nako ona ko yangakua Ma Jou ai Demo-demoika abe ma titi o Kristusu. Angamoi naga ma hitararono Ma Jou ai Demo-demoka abe inahitararono ma titi o Yesusu Kristusu Una gea Ma Jouoka de waino woboa. Ho onagona dika abe yoluku yangaku ai Demoika gea abe ma titi o Yesusu Kristusu, ona gea imaketero hoka Unangika iwipeleke de yorubauku hiadono manga hingounu ko iwa Ma Jouika. De ona gea ahao kiani manga hohowono yamake abe imaketero hoka ma dodihirainohi Ma Jou wahideeoka onangika. Angamoi gea Una wato nako onagona dika ko yangakua ai Demoika, ona gea ma bahauku de ahao manga hohowono kiani yakokimake.