Matiusu 5:18 - Ma Jou ai Demo-demo o Totobelohoka18 “De naa tagou-goungu tinihingahu abe Ma Jou ai Pareta ma demo mata-mata gea duru itongohono hiadono ena homoi-homoi ihingodumoka de idadioka duru imaketero abe hoka ma dihiraino Una wonahibehehongoka ngoneino. Abe ngaro ai Pareta ma demoka de naga utu ma dulihi ma hurufu abe duru ma hohumuduru, masara enangoo ko ihihangua ma ka iwango dika. Ho imaketero hoka o dunia naa de ma dihangoo itongohono ka hiadono ma oraha ma baha adonoka, hokogenangoo to Una ai Pareta ma dongohono abe hiadono ma bahaika.” အခန်းကိုကြည့်ပါ။ |
Matiusu 5:18
82 ပူးပေါင်းရင်းမြစ်များ
“De nako o kapongo moioka abe inihikangela nginika, de gea nianoaka dika ma kapongo gea de niloiki o kapongo eko o kota utuikali. De gea tagou-goungu tinihingahu abe o Isiraele ma kapongo ko mata-mataikauahi ngini nimahiadono de Ngohi toboali la tomahimatoko ahi kuaha. Abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa.”
“De naga o nyawa utuoli abe ahao yamake ma owa Ma Jouoka. De gea o nyawa abe iniduhunu ngini ma titi inihioriki abe ngini nihinii-niiki Ngohi. Abe ngaro manga duduhunu nginika hoka o akere ka o mangko moi dika inihidoaka, masara ona gea ahao kiani yamake ma owa Ma Jouoka. De gea ngaro ngini nia gogere ko ikurutiyeua nako de nia dodiawo utu abe ngini mata-mata nihitobanii-niiki Ngohi, masara nako o nyawa iniduhunu nginika hokogea, ona gea ahao manga utumu yamake.” De hokogea o Yesusu ai behehongo ma demo iwitobanii-niikika ma titi abe ngade-ngade yosobo. Abe wahidingoto ona la yahingahu-ngahu o Yahudi ma nyawaika o kapongo homoi-homoiika ma titi abe hokokia ahao Ma Jou wahikoano ai nyawaika. De wahibehehongo ibooto de ona yosoboka yotagi-tagi o Isiraele ma tonaka ma kapo-kapongika.
“De naa tinihingahu nginika abe nako o Yohanese Wotobaohi-ohiki de o nyawa utu mata-mataika abe ma dodihirainohi de ka hiadono ma oraha naa, ma ka unangohi wokurutiye Ma Jou ai himangoka. De ngaro ka unangohi wokurutiye ma oraha naa, masara ahao ma oraha Ma Jou wahikoano ai nyawaika gea ko imakadaenokaua. Angamoi ma oraha gea de Ma Jou ai nyawa mata-mataika naga de manga utumu duru ma amoko abe ahao yamake Unangino. Ho ahao dokena nanga himangika de Ma Jou ai nyawa onagona dika abe ngaro manga gogere itipokouku dika, masara ka onangohi yokurutiye abe nako de o Yohanese Wotobaohi-ohiki eko Ma Jou ai nyawa utu abe ma oraha naa yowango. Ho abeika duru ma rorahai abe Ma Jou ai nyawa yamake ma oraha dokena nanga himangika!”
“De naa tagou-goungu tinihingahu nginika abe ma dodihirainohi de Ma Jou ai uru ma dodofanga de to Una ai nyawa naga utuoli iwitobaleleani ko manga ngoe abe ona ihiorikoka hokokia ahao idadi ma oraha Ngohi naa toboa o duniauku. Ho ona tanu duru yoigo la yamake de manga lako ahi datoro naa abe hoka nginioli naa niamake, masara gea ko adaenua angamoi ma deka-dekanuku de yokokihonengoka. De ona duru yoigo yoihene de manga ngauku to Ngohi ahi demoino abe hoka nginioli niihene ma oraha naa naga, masara ona gea ko adaenua de yokokipahaka. Ho ngini naa koaho duru nigogarago abe ma titi ma datoro de ma demo abe ngini ka niadaenohi nia wowangoka naa.”
De o Yesusu wopaluhu wato, “Mangale ti ngini nia ngongaku ka ikurangohi. De naa tagou-goungu tinihingahu, abe nako ti ngini nia ngongaku naga, gea ahao ngaro o kangela eko o dadaili kohaamoko niaohana nia wowangoka masara gea nia ngongaku Ma Jouika ena gea ka idadi ihikala enangika. Abeika naa tohiketero. De nako ti ngini nia ngongaku naga, ngaro ma eteteke dika nia ngongaku abe imaketero hoka o sawi ma mui ma mengeteke, masara nia ngongakuino gea ka idadi niakunu niahuloko o loku ma amo-amokika gea la imagoraka de imaturuuru o ngi moiikali, de ma loku gea kiani inihigihene. Ho gea duru ko iwa abe ngini ko niakunua nidiai, iti ngini naga de nia ngongakuoka.” [
“De naa tinihingahu abe ngini o gareja ma goronaka naga nia tagongo la nimaketetailako ma titi o howono abe ipuda nia hidogoronaka. Ho nia putuhu o kia dika naga o duniaka naa de gea Ngomi o Horogaka ka idadi mianiiki ti ngini nia putuhu gea. Ho o kia dika niahingahu ahi nyawaika niato ko idadiua, gea o gareja ma nyawa ko idadiua yodiai, ho imaketero abe hoka o ngorana niakusioka. De hokogenangoo abe nako moi niahingahu onangika gea niato ka idadi yodiai, gea imaketero hoka o ngorana moi niafelengaika.”
De ma ngofaka womaokoino to ona manga himangoka de o Yesusu wopaluhu to ona manga lelehaika wato, “Ufa ngini nioigo la nimahikurutiye masara koaho nia hiningaka de nimahitipokouku. Angamoi naa tinihingahu tagou-goungu nginika abe kiani nitoba nia howo-howonino de nimahitipokouku la nia hininga ma dodipokouku imaketero abe hoka o ngofa-ngofakoli manga hininga ma dodipokouku. De nako ko nitobaua de ko nimahitipokoukua, gea ahao o nyawa ko inihiromangua abe Ma Jou winihikoano nginika.”
De o Yesusu wahingahu wato, “Naa duru tagou-goungu tinihingahu nginika, abe dokena nanga himangika ma oraha Ngohi o Nyawa ma Ngofaka tahikoano ahi nyawa de togogerukuoka ahi pareta ma kadera ma hohailoaka abe ma debi-debini, de ma oraha gea ahao nginioo naga de de Ngohi. Abe ngini nihitobanii-niiki niborigogeruku o kadera ma hohailoaka abe naga ngimoi de hinooto homoi-homoiika. Abe ahao ngini nia kaderaka gea la genangoka de niatobauru-urusu o Isiraele ma nyawa mata-mataika, abe ona manga doomu ngimoi de hinooto angamoi yomahidutu o Isiraele ai ngofaka abe yangimoi de yahinootoino.”
De o Yesusu wotemo wato, “Naa tagou-goungu tinihingahu. Abe nako ngini naga de nia ngongakuoka de ko idomo-domoua, gea ahao ka idadi nginioo nidiai o heheranga ma datoro abe imaketero hoka nenangoli todiaioka. De tanu utuohi ilamoko ma heheranga ahao ngini niakunu nidiai nako de nia ngongakuoka. Abe ngaro ngini niahuloko o lokuika gea niato, ‘Nomagorakoka de nomahidulutuoka o gahiuku!’, de gea ahao idadi nako de nia ngongakuoka.
Hokogea dika aika ahi ade-ade. Ho naa tinileha nginika, nako ai ngofaka yahinootoino de onaguna iwihingounu ai babaika? Ma riaka eko ma dodoto?” De o Yahudi ma nyawa manga hohidimono gea yopaluhu ato, “Gea kiani ma riaka abe wihingounu ai babaika.” De o Yesusu wotemo onangika wato, “Gea nia bobaluhu duru niagoungu. Ho naa abeika nimafikirohi ahi hiketero ma demo ma dumutu. Angamoi nanga tonakoka naa de naga utu o nyawa iwihingounu nanga Baba Ma Jouika de utuoli abe ko iwihingounua, abe duru imaketero hoka o ria-dodoto yahinooto gea ahi ade-ade ma goronaka. Ho naa duru tagou-goungu tinihingahu. Nako o nyawa abe nengokadauino de manga wowango ma datoro itobatorou, abe hoka ona o pajaka ma tiwi yotobagaho-gahoko eko hoka o ngo-ngofeka abe yomatobafuku-fukunu manga badanga, ma ona gea ahao ka idadi Ma Jou wadafongo de wahidadi to Una ma hirete ai nyawa la wahikoano ona. De gea ka idadi Una wadafongo ona gea mangale ma titi ona yotoihene o Yohanese Wotobaohi-ohiki ai hingahu ma demoino de hiadono yotoba de manga hininga yomaduruuru hiadono manga hingounu naga Ma Jou o Babaika. Abe o Yohanese wotobadoto-dotoko ma titi o wowango ma totiai ma ngekomo, de ona gea abe ma dihiraino de manga datoro itobatorou, ona gea yaniiki de ihingounu ai demoika gea.” “Masara nako ngini naa Ma Jou ko winidafongua. Angamoi ngini abe nidadi o Yahudi ma nyawa manga hohidimono, ngini naa barikua niamakeoka abe to ona gea manga wowango ma datoro aturuuruoka ma ka niolukohi niwingaku to Yohanese ai demoika. De gea mangale ma titi ti ngini nia howo-howono ko nioporetua de ko nitobaua, ho gea ngini nimaketero dika hoka o ngofaka o dodoto abe ma ade-ade ma goronaka kanganoika abe una o dodoto wato, ‘Iya,’ masara ma bahauku de ko iwa ai hingounu ai babaika.”
“De ahao Ngohi manga Koano tahingahu onangika tato, ‘Masara ma dihiraino de naga ma oraha abe ngini niaduhunoka to Ngohi ahi nyawa-nyawaika ma oraha abe naga manga perelu. De naa tagou-goungu tinihingahu abe nako niaduhunoka to Ngohi ahi nyawaika onagona dika de gea taetongo imaketero hoka ngini nihiduhunoka Ngohi naa. Abe ngaro ahi nyawa abe manga gogere ka itipokouku de onangika niaduhunu, gea imaketero Ngohi naa ma hirete ngini nihiduhunoka!’”
“De hokogea ona yomademo, masara Ngohi ahao tapaluhu onangika tato, ‘Masara ma dihiraino de naga ma oraha abe ngini nioluku niaduhunu to Ngohi ahi nyawa-nyawaika abe ma oraha ona naga manga perelu. De naa tagou-goungu tinihingahu abe nako niolukoka niaduhunu to Ngohi ahi nyawaika onagona dika de gea taetongo imaketero hoka nginioo niolukoka nihiduhunu Ngohi naa. Abe ngaro ahi nyawa abe manga gogere ka itipokouku de nioluku onangika niaduhunu, gea imaketero Ngohi naa ma hirete niolukoka nihiduhunu!’”
De nako hiadono inibuioka, gea ahao marai nia dekana o bui ma tau ma goronaka. Angamoi kiani nimabanguokahi nia bobangu ma gahumu de ahao inihihupuoli ma rorahaiika. Ho nako nikangela nifangu gea nimagoo-gogere dika nia dekana o bui ma tauoka. Ho irahai ngini nimataiti nimahikaaturu la ufa o hininga ma ngamo ilaku nginioka.”
De o Yesusu wogila-gilali wadotoko ona manga ngoeika wato, “De ma moi ma moi ngini ka idadi nipuaha la ti ngini nia hininga ma dumutu duru Ma Jouika dika, de gea nia datoro irahai. Masara abe ma oraha ngini nipuaha, de ufa nimaaduru abe hoka onangoli yomadokangeluku dika ma titi manga gogao Unangika. Abe ona gea manga himanga itafukuoka o nyawa manga hima-himangoka la ihioriki abe ona yomatongohono abe ma titi ko yaolomua o inomo. De gea manga rupa yodiai la duru ingaliokali hiadono ka de o nyawa yamake de yotemo ato, ‘Abeika ona gea yopuaha!’ Ho ona gea yoigo yamake o higiriiri o nyawaino ma titi ona yopuaha. De naa Ngohi tagou-goungu tinihingahu abe to ona manga utumu manga puahaino gea o nyawaka dika de aino manga higiriiri. Angamoi nako Ma Jouoka de aino duru ko yamakeua o higiriiri eko o utumu mangale ma titi to ona manga hininga la yomagorakiye dika.”
“Ho nako ngini nioigo o hu-huha ma nyawa niaduhunu, gea ko idadiua nimaaduru abe hoka ona utu yomadokangeluku dika ma titi manga gogao Ma Jouika. Abe ona gea yopoa-poaka o ngekomoka eko nia dodotoko ma tau-tauoka de yomahingahu o nyawa mata-mataika ma titi manga hidoaka gea abe o huha ma nyawaika yahidoaka. De gea yopoaka o nyawa manga hima-himangoka la ato mata-mata yahioriki manga datoro ma rahai hiadono yahigiriiri onangika. De gea Ngohi tagou-goungu tinihingahu abe to ona manga hadia manga datorino, gea o nyawaino dika manga higiriiri. Angamoi nako Ma Jouoka de aino duru ko yamakeua o higiriiri eko o hidoaka mangale ma titi to ona manga hininga la yomagorakiye.”
Ka de o Yesusu woihenino ma tentara manga haeke ai demo gea de Una duru woheranga ma titi ma haeke gea ai ngongaku. De o Yesusu wotemo onangika abe iwinii-niiki wato, “Naa tagou-goungu tinihingahu abe nako to una naa ai ngongaku de o Isiraele ma nyawa manga ngongaku masara ka to unangohi iputurungu ai ngongaku. De abe naa ahi dekanino o Isiraele ma tonakoka ma ko tamakeuahi abe o nyawa manga ngongaku iputurungu abe imaketero hoka o homoaino ma nyawa naa to una ai ngongaku!
Abe Ngohi duru tagou-goungu tinihingahu nginika, onagona dika yato yodadi Ma Jou ai kawaaha abe ma oraha wahikoano o nyawa, ona gea kiani iwidafongo Ma Jou la Una wodadi manga Koano. De gea iwidafongo abe imaketero hoka o ngofa-ngofakoli naa iwidafongo de manga hininga ma dodipokouku. Ho onagona dika yomaaduru abe hoka o ngofa-ngofakoli naa, ona gea ahao Ma Jou wadafongo. Masara nako ko yomahigunoaua la Ma Jou wahikoano onangika, ona gea ahao Ma Jou Unangoli onangika ko wadafongua.”
Abe naa tagou-goungu tinihingahu, onagona dika duru iwingaku Ma Jouika abe manga ngongaku ko idomo-domoua, ona gea manga gogahoko o kia dika de gea Ma Jou wahidoaka onangika. Abe ngaro ona yahuloko o lokuika gea ato, ‘Nomagorakoka de nomahidulutuoka o gahiuku!’ De nako manga huhuloko ma demo yangaku abe ahao idadi, gea ahao Ma Jou o loku gea wagoraka de wahidulutuoka.
“De naa moi tagou-goungu tinihingahu. Abe ma dodunguu tinihingahuoka naa, gea mata-mata, abe ngaro ma dodunguu ihira-hira ka hiadono ma dodunguu duru itoturuino, masara gea mata-mata ko itedekanokaua de idadioka. Abe ma titi nako o nyawa yowango ma oraha naa naga, ona utu ko yohonenguahi de yadaene mata-mata ma dodunguu de ma kokangela gea.
Masara nako idadi abe o kapongo moi ko inidafongua de ko inihigihenua, gea nihupu dika ma kapongino gea, de kiani nia lou niafureereoka la ma tonaka ma kuhuhunu gea ireroka. Abe gea idadioka o hohowono ma dodunguu onangika angamoi ko inidafongua, la genangino de ka idadi ihioriki abe ahao yamake manga hohowono.” Hokogea o Yesusu ai behehongo iwinii-niikika.
Abe ngaro duru ma dodihiraka o Habele ai awunu ikopoa de ino ino ka hiadono Ma Jou ai uru ma dodofanga womatengoli abe ai romanga o Sakaria unangoo iwitoma Ma Jou ai Tau ma loaka, de gea idadi ma huhuba ma ngi de Ma Jou ai Tau ma hidogoronaka genangoka iwitoma. Ho to ona mata-mata manga awunu idadioka ti ngini naa nia tagongo Ma Jou ai himangoka.”
De ngini ahi duduhunu abe nako nimahidiaioka de nihigoa-goana ma titi Ngohi nia dutu ahi boa, ngini gea ahao duru nia hininga isanangi. De gea ka idadi tinihingahu abe ahao duru nisanangi angamoi gea Ngohi nia tau ma dutu Ngohi ma hirete ahao tinileleani nginika. Abe Ngohi ahao taturuuru ahi baju la o duduhunu ma bajuoli tomahinoauku de toboa nginika de tinileleani de o inomo de o ngokere nginika.
“De naa abeika nitotoihene ahi demoino, angamoi tinihingahu abe ahao naga ma oraha nia kota ma amokika naa de hiadono Ma Jou ai Tauoo, gea mata-mata ahao Ma Jou wanoaka, ho duru ihomoakahi dika nia kota.” “De naa moioli tinihingahuohi nginika, abe ma oraha nginioka de Ngohi tosobo de ahao duru ma dekana ipahaikahi de ahao nihimakeoli Ngohi. De gea kiani ihira ngini nihidafongohi Ngohi abe niato, ‘Una woboaino naa, Una nanga koano woboaka. Ho naa adonoka ma oraha abe Una naa wonahikoano hoka ma dodihiraka nanga tofora o Dautu wonahikoano, ho hihigiriiri Unangika!’ Ho nako hiadono ngini nihidafongo de nia demo Ngohino hokogea, gea de ahao adonoka ma oraha abe ngini ka idadi nihimakeoli Ngohi naa.” De hokogea o Yesusu ai hininga ma huha ma demo o Yahudi ma nyawaika angamoi ona yowoe-woe iwiolukoka, de Una wohiorikoka abe ahao manga hohowono kohadubuho yamake ma titi manga ngo-ngolukino gea.
Abe Ngohi duru tagou-goungu tinihingahu nginika, onagona dika yoigo yodadi Ma Jou ai kawaaha abe ma oraha wahikoano o nyawa, ona gea kiani iwidafongo Ma Jou la Una wodadi manga koano abe imaketero hoka o ngofa-ngofakoli naa iwidafongo de manga hininga ma dodipokouku. Ho onagona dika yomaaduru abe hoka o ngofa-ngofakoli naa, ona gea ahao Ma Jou wadafongo. Masara abe nako ko yomahigunoaua Ma Jou wahikoano, ona gea ahao Ma Jou ko wadafongua.”
De wipaluhu wato, “Naa duru tagou-goungu tinihingahu, abe onagona dika manga tau yanoaka, eko manga fekata yanoaika, eko manga roria-dodoto eko manga dimono eko manga ngofa-ngofaka yanoaika la ato manga wowango yomahidoaka. Ho onagona dika abe hokogea manga hininga la ato Ma Jou ka idadi wahikoano ai nyawaika,
De ahao Una watemo onangika wato, “Masara naa duru tagou-goungu tinihingahu nginika tato abe Ma Jou ai uru ma dodofanga, o nyawa o kia-kiaka dika ma naga manga horomati onangika gea. Masara nako to ona manga nyawa abe yomahikapongo moi de de una, ona dika ko iwa manga horomati ai uru ma dodofangika gea.”
O Yesusu wohiketero wotemo wato, “Naa duru tagou-goungu tinihingahu nginika, o nyawa abe o domba ma kurungaika yowohama ma, ko ma kurunga ma ngoraninoua yowohama, ona gea ko yodadiua o domba ma gogoana. Abe ona ma homoaino dika yoboa hiadono ma goronaika yowohama ho o nyawa gea yotobatohiki de yotobaora-ora.
Naa duru tagou-goungu tinihingahu, o nyawa abe yodadioka o huhuloko ko idadiua yotemo ato, ‘Nako ngohi de una gea wohihuloko, ka ngohiohi tokurutiye,’ ko idadiua hokogea yotemo. De hokogenangoli o nyawa yahuloko manga dodiawoika ato, ‘Noiki ahi demo nototaka la nahingahu onangika hoka tonihibehehongoka,’ ho una abe woiki wohingahu ko idadiua ahao womagoraka wato nako o demo ma dutu de una, ka unangohi wokurutiye.
Ho o wange gea homakamakeokali de nia leleha Ngohino ko iwaka angamoi nigaragokaholi. De gea nigarago angamoi ka idadiou ngini ma hirete nimagahoko o Babaiye abe de ahi romanga niapake. Ma dihira ko ma moiuahi nimagahoko de ahi romanga niapake ma naa ka idadi angamoi ngini nihingakuoka. De Ngohi naa duru tagou-goungu tinihingahu nginika ngaro o kia dika nimagahoko de to Ngohi ahi romanga niapake gea ahao ahi Baba winihidoaka la gea nia garago duru ingodumoka.”
De o Yesusu ka wihingahuohi wato, “Peturusu, naa duru tagou-goungu tonihingahu, ma dihira abe ma oraha ngona ka o goohi, de ngona ma hirete ani baju nomahidapakitino, de ngona nomaputuhu o kiaika notagi-tagika. Masara ahao naga ma oraha abe iniperekioka, de gea ani giama ahao nadoakika o nyawaika, de ona gea inihidapakitika, abe iniao genangoka abe ko noigoua noiki.”
De ahao o Yesusu wapaluhu onangika wato, “Naa duru tagou-goungu tinihingahu, ko moiua Ngohioka de tomahohiningaiye dika de todiai. Masara gea ena abe ahi Baba wodiai hokogenangoo imakadaene Ngohi naa todiai. Nako Ngohi dika ahi mau de todiai, gea ko todiaiua angamoi gea tamake o Baba wodiai, gea dika ka idadi Ngohioo todiai.
Masara nako nanga Baluhu idodutu ai Demo-demo ena gea itongohono ka hiado-adonika.” Hokogea ai demo ma dodihiraino, de gea igoungu abe ai Demo-demo duru itongohono. De to Una ai Demo-demo gea ena o Abari ma Rorahai abe nengokadauino inihingahu-ngahuoka nginika. De genangino de ngini ka idadi nihioriki abe nia wowango ma hungi Unangoka, enangoo itongohono ka hiado-adonika angamoi gea ihititi to Una ai Demo-demoino. Ho mangale ma titi nia wowango ma hungi gea ho ngini kiani duru nimakodora de nia hininga ma gahumu.
ကြော်ငြာတွေ