Matiusu 24:5 - Ma Jou ai Demo-demo o Totobelohoka

⁵ Angamoi de ahao o nyawa manga ngoe yoboa de ona gea yomahingahu-ngahu nginika ato, ‘Ngohi naa nia Mesia, nia Koano abe ma dodihiraino Ma Jou winihibehehongoka.’ Hokogea yomahingahu angamoi inihioriki abe ngini nia Koano gea niwidodamaa la nako woboa, gea nihioriki abe ma oraha itigioka o dunia ma bobaha. De ona gea ma titi manga hingahu ma demo hiadono o nyawa manga ngoeika ahao yabudi hiadono yafikiri ato ma bobaha adonoka. Masara ngini naa ufa inibudi. Angamoi ahao naga ma ngoe idadiohi masara gea ma bobaha ko adonuahi.”

Matiusu 24:5 ပူးပေါင်းရင်းမြစ်များ

Matiusu 24:11

“De nagali ma oraha gea o nyawa manga ngoe yoboaino de yomahingahu abe ona Ma Jou ai uru ma dodofanga, masara ona ko yagou-goungua. De ona yoboaino la ato yahirehene o nyawa, de gea igoungu ahao yahirehene o nyawa manga ngoe Ma Jouino.

Matiusu 24:24

Angamoi naga manga ngoe ahao yoboaino de yomahiromanga ato, ‘Ngohi naa ma Koano abe Ma Jou winihibehehongoka,’ eko utu ato, ‘Ngohi naa Ma Jou ai uru ma dodofanga,’ masara ona gea yotobabudi dika, ko yagou-goungua. De ona gea o heheranga ma ago-agomo yahimatoko o nyawaika la ato yomahitaana abe manga dodunguu gea Ma Jouoka de aino. Gea yodiai la ato o nyawa yabudi, de tanu yoigo ato Ma Jou ai nyawaikaoo yabudi, masara gea ko adadiua yabudi onangika gea.”

Yohanese 5:43

Ngohi naa toboa de ahi Baba ai romanga tapake abe ma titi to Una dika ai kuahaino toboa, masara ngini ko nihidafongua Ngohi. Masara de o nyawa utu yoboa nginino, ngaro de to ona dika manga kuaha, ma, ka de nia sanangi niadafongo ona gea.

Yohanese 8:24

Gea ho hidutu tinihingahu tato nako ko nihingakua de ahao ngini nihonenge nia howono ma goronaka. Abe itiai tomahingahuoka de ma romanga Ngohi Naga angamoi Ngohi Ma Jouoka de taino, nako gea ngini ko niangakua, gea itaana de ahao de nia howono nihidohonenge.”

Yohanese 8:28

Ho o Yesusu wotemo wato, “Ahao adonoka ma oraha o Nyawa ma Ngofaka niwihidoaiyeoka o gotaka, ma oraha gea de ahao ngini nihihioriki igoungu Ngohi Naga abe Ngohi Ma Jouoka de taino. Ho ma oraha gea de ahao nihihiorikoo duru ko moiua todiai abe Ngohioka dika de tomahohiningaiye, ma, totemo dika abe o Baba wohidotokoka, gea dika ahi demo.

1 Yohanese 2:18

Ahi ngofa-ngofaka, abe ma oraha naa naga hohiromanga hato ma oraha ma bobaha. De ngini ma dihirainohi de niihenoka ma abari abe o nyawaino ato, “Ahao ma oraha ma bobahaka de womatengo woboaino abe una duru witobalawana o Kristusika.” De to ona manga demo gea igoungu, de hongoli ngohi tinihingahu tato ngaro ma oraha naa masara nagau o nyawa manga ngoe abe ona gea iwitobalawana o Kristusika. De mangale ona gea hamakeoka, ho hiadono duru itaana de ka idadi hohioriki abe ma oraha ma bobaha adonoka.

1 Yohanese 2:22

De naa tonaleha, sarakia, ka onagonahi abe duru to onangohi manga ngeluku ilamoko? De gea marai onagona dika abe yahingahu o nyawaika ato o Yesusu Una gea ko nanga Koanoua abe ma dodihiraino Ma Jou wonahibehehongoka ngoneino. De nako hokogea o nyawa manga hingahu ma demo, gea ona abe iwitobalawana o Kristusika ma titi manga demoino gea. De ona gea iwiolukoka Ma Jou ai Ngofakika de ai Babaikaoo.

1 Yohanese 4:3

Masara nako o nyawa yomahiromanga ato Ma Jou ai uru ma dodofanga masara ona ko yongakua abe ma titi o Yesusu woboa o duniauku naa abe womahihawo de ngone o nyawa nanga roehe, ho ma titi gea ena ona yoluku yomahingahu, ona gea hahiorikoka abe ko Ma Jou o Womahua wotemo manga uruino. De abe yapake to ona gea manga uruino, gea ko Ma Jouokaua de aino iboa, masara gea tanu iboa o womaha utuino abe ma womaha gea imakiniiki de o nyawa manga hininga abe duru iwitobalawana o Kristusika. Abe ma dihirainohi de ka hiadono ma oraha naa de ka niihenohi abe womatengo duru witobalawana o Kristusika ahao woboa. De hoka kangano ahi demo ma goronaka de tinihingahuoka, naa tohigalioli totemo tato nagau o nyawa ko manga ngoe o duniaka naa abe to ona manga hininga ma dumutu la iwitobalawana o Kristusika, de manga hininga gea ena abe o nyawa utu yapake ma oraha yodoto-dotoko de yomahingahu ato bari manga demo Ma Jouoka de aino iboa. De gea ma titi hiadono tinihitiari nginika tato kiani niatailakohi o nyawa manga demo done inibudi ma titi manga demoino gea.

Himatoko 13:8

De gea o dunia ma nyawa mata-mata ahao yomahuba enangika, masara nako ona abe manga roma-romanga naga ihitulihukuokau o Wowango ma Bukuoka, ona gea ko ihigiriiriua enangika. Abe ma buku gea to o Domba ma Ngofaka ai Buku, abe ma dihiraino de yahohonenge ma Dombaika gea. De ona gea abe manga romanga nagau atulihuku ma bukuoka, gea manga romanga tanu duru ma dodihirakahi abe o dunia naa ko wotulaadauahi de ihitulihukuokau manga roma-romanga gea. Masara nako o nyawa utu mata-mata, ona ihigiriiri o aewanika gea abe o gahioka de aiye ihupu.