Matiusu 23:5 - Ma Jou ai Demo-demo o Totobelohoka

⁵ “De ona gea manga wowango ma datoro mata-mataika yodiai la ato o nyawa yamake de yahigiriiri onangika. De naa manga datoro moi yotobadiai. Abe ngone o Yahudi ma nyawa ma oraha homaniata de nanga biaha la nanga peaino de nanga giamino homahideho-dehorino de ma ngi ma eteteke gea abe ma dolaka de ma dulihoka. De ma dulihi gea Ma Jou ai Demo-demoino. Masara ona yotobadotoko o Musa ai Paretaino de o Farisi manga doomuino, ona gea ko yapakeua ma ngi ma eteteke dika abe hoka ngone utuoli, masara to ona ihiwoata la gea ma rupa ma amoko o nyawa yamake onangoka la genangino de ato o nyawa yahigiriiri onangika.” “De naa moioli yotobadiai, abe manga baju ma barene ma lawe yodiai la ikurutuku la genangino de hoka yomahingahu abe ka onangohi yaniiki itiai Ma Jou ai Pareta abe ma titi nanga baju. De hokogea ona yodiai manga bajuika ma titi moi dika, la o nyawa yamake de yahigiriiri onangika ma titi manga hininga bari Ma Jouika dika itagi, masara tanu to ona gea manga hininga hokogenangua.”

Matiusu 23:5 ပူးပေါင်းရင်းမြစ်များ

Huhupu 13:9

O Roti ko Iwa ma Ragi ma rame-rame o hohininga ngoneika abe o tao-taongiye ka de ma oraha adono nanga rame-rame gea de ngone o Isiraele ma nyawa kiani hohininga ma titi. Abe o hohininga gea ka idadi hohiketero de o dodunguu o ukuino nanga badangoka abe ka de holega nanga bokekika gea de hohininga ma titi. Ho Ma Jou o Yawe wapake nanga rame-rame naa la o tao-taongiye ngini mata-mata niohininga ai behehongo nginika abe kiani nianiiki de nihingounu enangika. Ho ma titi gea niohininga de nimaketeade-ade ma oraha nihirame-rame, angamoi Ma Jou o Yawe winihiluasa de ai kuaha ma buturungu ka hiadono idadi naa winihihupu o Mesiiri ma tonakino.

Sosawaro 3:3

De o dora abe naga ani wowangoka kiani ka ihikaika napake imaketero hoka ani rante moi abe duru noigo la ka ihikaika naga ani tomaroka. De o kia dika nahibehehongo o nyawaika gea kiani mata-mata de ma ngodumoka la ani behehongo ma demo ma gou-goungu hiadono moioo de ko nanoaikaua abe naga ani hiningaka. Ho imaketero hoka ko noigoua la ani rante ihihanga abe naga ani tomaroka, hokogenangoo de ani dora abe ka ihikaika itagi o nyawaika, enangoo ko noigoua ihihanga. Hokogea ani datoro la nomahitaana ahi dodotoko nohitulihukuoka ani hiningaka.

Matiusu 9:20

De ahao manga dodagi ma goronaka de naga momatengo abe o ngofeka yomakamake de duru muna mokangela ma titi ami mede. De muna gea ami taongo ngimoi de hinooto ibooto mokangela. Ho ka itodokanino de muna gea moboa o Yesusu ai poretino de o Yesusu ai baju ma barenika maso,

Lukasa 16:15

De o Yesusu wotemo onangika wato, “Ngini naa duru nihitihira nia wowango ma datoro o kia dika naga la niato iti o nyawa inimake de inietongo ato ngini nitotiaioka ho nikurutiye. Masara o kia dika abe o nyawa yaetongo ato duru ikurutiye, gea duru itorou Ma Jou ai himangoka. Ho Una kiani winioluku nginika angamoi Una winihioriki ti ngini nia hininga ma dola ma dorou.”

Lukasa 20:47

De ona gea o ngo-ngofeka abe yofao yarusi abe yaora onangino manga tau de manga kiahonangoo. De gea barikua yodiaioka yofao-faoika de ipahaino ahao o nyawa manga hima-himangoka de yomaniata ma dekanoka la ato manga totiai yahimatoko o nyawa utuika. Ho gea Ngohi tato ona abe yotobadoto-dotoko o Musa ai Paretaino ahao ka to onangohi manga hohowono duru ikiria.” Hokogea o Yesusu wahitiari ona mata-mataika.

Yohanese 12:43

Hokogea manga hawana done o higiriiri o nyawaino ko yamakeokaua. Angamoi ngaro o higiriiri yamake Ma Jouino ma, ka o higiriiri o nyawainohi duru yoigo.

Yohanese 5:44

Ngini naa duru nisanangi nimakokogorakiye angamoi o nyawaino dika manga higiriiri nimalingiri. Masara ko nimalingirua o higiriiri ma gou-goungu Unangino gea abe Una dika Ma Jou. Ho nako hokogea ti ngini nia hininga, done sarakia de ka idadi nihingaku Ngohi naa?”

Yohanese 7:18

“Abe naga o nyawa utu de manga dodotoko ma demo igoungu masara, utu ko igoungua manga dodotoko ma demo. Abe ko igoungua gea to ona manga dodotoko abe ma titi to ona dika manga tobahiorikino abe ona ma hirete yomadiai la ato o nyawa yagorakiye. Masara abe manga dodotoko ma demo duru igoungu, ona gea aniiki to Una ai mau abe wahidingo-dingotino. Ho o demo ma dutu dika abe duru iwigorakiye. De angamoi nako hokogea o nyawa yadotoko ahao, ona abe yoihene manga dodotoko gea, ko iwa manga hiningaka abe ka idadi manga guru gea iwitae.”

Higalioli 11:18

“Ho ngini kiani nimahijo-joika to Una ai pareta ma demoika de ufa hiadono ka niawohangika. Kiani ka ihikaika nimahihohininga ma demo gea. Nimahideho-dehorino de ma demo gea abe ihitulihukuoka o bukuoka la idadi o hohininga ma dodunguu abe niamake o wange-wangeiye. Ho ma demo gea irahai nimahidehorino nia giamino de nia peaino.

Higalioli 6:8

De irahai ma demo gea nihitulihuku de nimahidehorino nia giamino de nia peaino la ka ihikaika idadi o hohininga la ufa hiadono ma demo gea niawohanga.

Filiipi 1:15

De igoungu, o nyawa utu naga nenangoka abe yahingahu-ngahu ma titi o Kristusu, masara yahingahu-ngahu gea ma titi ngohino ihitaleana eko ma titi ona ato yomagoraka. Masara o nyawa utuoli naga abe yahingahu-ngahu de manga hininga ma rorahai dika,

Filiipi 2:3

De ufa nitaleana de ufa o sade inihihira la hiadono nimagorakiye, masara koaho nimahitipokouku la nako o nyawa utu de ngini ma hirete, ma ka onangohi niahayanga.

2 Tesalonika 2:4

De ngaro o pangao eko naga o jou utu eko naga o kia dika abe o nyawa yomahijou enangika, ma, gea mata-mataika una gea ai wowango itotorou duru watobalawana de wahitipokouku de gea wato ka unangohi ma hirete wokurutiye. De gea una duru womagorakiye hiadono wogogere Ma Jou ai Tau ma goronaka de ahao o nyawaika womahingahu-ngahu wato, “Ngohi naa Ma Jou.” Ho nako hokogea una womahimatokoka de nagali abe o nyawa ko manga ngoe duru iwilawana Ma Jouika, gea kiani idadiokau de ahao ka idadi nanga Baluhu idodutu ai Gahe ma wange iboa.