Matiusu 21:10 - Ma Jou ai Demo-demo o Totobelohoka

¹⁰ De hokogea ona yokokipoaka hiadono o Yesusu womahiadonoka o Yerusaleeme ma kota ma goronaika. Ho o Yerusaleeme ma nyawa o kota ma amokika yamake de yoihene abe ma oraha Una woboaino angamoi o nyawa gea duru yohagaaga ho ona yomakokeleha ato, “Gea ka onaguna hiadono hokogea manga gigoro?”

Matiusu 21:10 ပူးပေါင်းရင်းမြစ်များ

Matiusu 2:3

De ahao naga o nyawa iwihingahu manga koano o Herodesika ato, “Naga o nyawa yoboaino nanga kotaino naa abe ona yosoo-sosawaro o murumu ma dodagi ma titi. De ona yato bari naga o ngofaka womaboaka ngoneoka naa abe yamake ma dodunguu o murumoka gea la ka idadi ihioriki abe una gea ahao wodadi nanga koano. De o ngofaka gea iwilingiri la ka idadi yomahuba Unangika.” Ka de o Herodese woihene manga hingahu gea de duru iwitodokana ho wato done ko wahikoanokaua genangoka. De ai kokawaaha o Yerusaleemoka onangoo manga hininga ihuha.

Matiusu 21:11

De o Yerusaleeme ma nyawa utuoli abe iwibuhuku de iwihigilolitino o Yesusu ona yopaluhu ato, “Naa Una o Yesusu, Ma Jou ai uru ma dodofanga abe o Nasaretino woboa abe gea o Galilea ma tonakoka.” Hokogea to ona manga hininga ma sanangi ma demo ma oraha iwidafongo o Yesusu.

Matiusu 21:9

Ho o Yesusu wobarenuku de ma keledai ma ngofaka iwihidagi-dagi o Yerusaleemika de o nyawa naga utu ai himangokahi, masara naga utu iwihidoduru ai poretino. De o nyawa ko manga ngoe gea duru yogogarago hiadono yokokipoaka ato, “Hihigogiriiri Una woboaino naa, nanga tofora o Dautu ai totoforaukuino abe ma dodihiraino de Ma Jou wonahibehehongo wato ahao wonahikoano! De naa adonoka ma oraha abe Una naa wonahikoano hoka ma dodihiraka abe nanga tofora o Dautu wonahikoano! Hihigogiriiri nanga Jou o Horogaka!”

Lukasa 20:2

De ona yoboa o Yesusino de iwitemo Unangika ato, “O kiaino ani kuaha la hiadono kanugono o nyawa naduhu abe yotobafuku-fukunu Ma Jou ai Tauoka? De onagona honanga inihidoaka manga kuaha Ngonaika la gea ka idadi nodiai?”

Lukasa 5:21

De abe yotobadoto-dotoko o Musa ai Paretaino de o Farisi ma nyawa genangoka ona yomatemo manga hiningaka ato, “Una naa done onagona abe womahitouna to Ma Jou dika ai karajaanga la wato o nyawa manga howono waofi? De Una naa wingelo Ma Jouika ma titi ai demoino, angamoi ko moiua wakunu waofi o howono masara ka Una dika Ma Jou!”

Lukasa 7:49

De ona abe yomakutuono yolomo de de Una yomakoketemo ato, “Abeika naa Una womahitouna dika to Ma Jou ai karajaanga hiadono wato ka idadi waofi o nyawa manga howo-howono! Gea Ma Jou dika abe wakunu o howono waofi!”

Lukasa 9:9

De manga demo gea o Herodese woihene masara ka wopusingohi ai hiningaka de wato, “Masara nako o Yohanese una gea titomaka abe ai pea yaleokau, ho naa done onaguna abe ai datoro duru o fara moi gea toihenino?” Hokogea o Herodese ai demo. Ho una duru woigo witutumu unangika abe o heheranga wotobadiai.

Yohanese 2:18

Hokogea o Yesusu wakiniiki ibootino de naga o Yahudi ma nyawa manga balu-baluhu yomarihimanga de o Yesusu de iwileha, ato, “Sarakia ngona naa hiadono hokogea nodiai? Nako Ma Jou wonihigunoa ngona nodiai hokogea ngomi miato kiani nomihimatoko o dodunguu la nomahitaana la gea minihioriki ngona de ani kuahaka.”

Hidingoto 9:5

De una wato, “Masara ahi baluhu, ngona naa onaguna?” De ma ilingi iwipaluhu ato, “Ngohi naa o Yesusu, abe ngona nohihikangela Ngohino!

Ruutu 1:19

Ho o ngo Orpa molio ho yomakitingaka de o ngo Naomi de o ngo Ruutu ho ona yahinooto dika yogila-gila hiadono yoboa o Beteleheeme ma kotaika. De ka de yomahiadonoka o Beteleheeme ma kotaka de o Beteleheeme ma nyawa duru yoheranga ma oraha imimake o ngo Naomi. De o ngo-ngofeka abe ma dihira imitobadodiawo munangika yomakokeleha ato, “Igoungu, naa muna o ngo Tobasanangi moboaka?”

1 Samuele 16:4

Ho o Samuele ai behehongo Ma Jou o Yaweino gea waniiki itiai. Masara ma oraha woboa o Beteleheemino de o kota ma dimo-dimono ka de iwimake o Samuele de yohawana ho iwileha o Samuelika, ato, “Mia baluhu, o kia ma howono nenangoka hiadono naa noboa nomitutumu? Eko sarakia, ngona naa noboa o dame dika nomigao?” Hokogea yotemo de manga hininga ma hawanoka.