Matiusu 2:16 - Ma Jou ai Demo-demo o Totobelohoka

¹⁶ De igoungu ona yososawaro ko aniikua o koano o Herodese ai demo onangika. Ho ko iwihingahua unangika abe o Yesusu o kiaka ai ngi, angamoi ona ka iwirehenoka ho ka yogila-gila dika yolio. Ho ka de o Herodese wohioriki yososawaro gea iwibudi dika de duru iwihidafaeoka de ai ngamo ai hiningaka! Angamoi una duru woigo wihioriki ma ngofaka gea onaguna de ai ngi o kiaka la ka idadi iwitoma. De ahao una wohininga ona yososawaro manga demo abe iwihingahuokau ka furuono yamake ma murumu gea abe idadi o Koano ma hungi ai dodunguu. Ho mangale ma titi manga demo gea hiadono naa wahuloko ai tentaraika wato, “Niloiki o Beteleheeme ma kapongika de ma tonaka gea abe ihigilolitino de niakokitomaka to ona manga ngofa-ngofaka o nau-nauru mata-mataika abe gea manga ngumuru o taongo hinooto de imahikauku!” Hokogea o Herodese wahuloko onangika la wato ma ngofaka gea kiani Unangoo iwidaene.

Matiusu 2:16 ပူးပေါင်းရင်းမြစ်များ

Dodadi 39:14

De muna momulaenge de ami boi ma dohata mohiboa-boaka hiadono manga duduhunu o nau-nauru manga ngoe yomapopaata yoboaino la ato imiduhunu. De muna hadongoo de imihowo-howo mato, “Abeika ai dorou una o huhuloko o Ibarani ma nyawaino gea! Ahi rokata una gea wiaoino de wonahimaleke. Una wohiribuutu ngohi la wato mimakitigi masara ngohi duru toluku ho hiadono topoa-poaka.

Dodadi 39:17

De ahao miade-adeoli ami rokatika mato, “Ngohi naa ngoni fekata tohuha ma titi una o huhuloko o Ibarani ma nyawa gea abe nipaliarino, una gea wohihimaleke ngohi.

Dodadi 49:7

O sadeino manga ngamo ho tahidohohowono angamoi ihaukuholi, De manga dohata tahidohohowono angamoi yotualonoholi, Ho gea manga totoforauku ahao tahikokabarihika, Hiadono yogogere o Isiraele ma tonaka mata-mataika.

Gegetongo 22:29

De o Bileama wopaluhu ai keledaiika wato, “Ngona nohihiona-ona ho hiadono nohihimaleke ho hiadono tonipoha! Ngona o aewani dika de nako ahi dia naga ahi giamoka koaho tonitomaka dika!”

Gegetongo 24:10

De gea o Balaka woihene de duru ai ngamo ihauku o Bileamika ho hiadono duru wopokahoata de wato, “Ngona, done sarakia hiadono hokogea notemo! Ngohi toniahokino la nohiduhunu talawana onangika abe ihimusu naa, ho kiani naagahoko ma kokangela onangika! Masara abeika ngona! Naa ma hangeou ngona nahiowa de ani hiowa ma demo onangika.

Matiusu 2:1

De abe ma oraha o Yesusu womaboa o Beteleheeme ma kapongoka abe o Yudea ma tonakoka, de naga manga koano o Herodese abe wahikoano ma tonakoka gea. Ho o Yesusu womaboaka de ipahaika o wange moiuku naga o nau-nauru abe yoboa o wange ma hiwaroka de yaiha. De ona gea manga tonaka imakitingaka de o Isiraele ma tonaka ma gurutika. De ona duru yosoo-sosawaro o murumu ma dodagi abe gea naga de ma titioka. De ona ma oraha abe ka manga tonakokahi de naga yamake o murumu moi abe genangino de duru ihioriki o koano womaboa ma dodunguu. Ho ona naa yoboa o Yerusaleeme ma kotaino abe genangoka o Isiraele ma nyawa manga balu-baluhu yogogere la ka idadi o ngofaka gea iwilingiri o kotaka gea. Ho ahao yomahiadono o Yerusaleeme ma kotaka de o nyawaika yaleha ma titi o ngofaka gea ato, “Ho gea Una o kiaka abe naa ma duruika de ahao womaboa la wodadi o Yahudi ma nyawa manga koano? Ngomi doka mia tonakoka o wange ma hiwaroka de o murumu moi miamake o dihangoka abe miato gea to Una ai dodunguu womaboaka. Ho ngomi naa miboaino wiwilingiri la Unangika mimahuba.” Hokogea manga demo yosoo-sosawaro gea.

Matiusu 2:17

De gea igoungu idadi o ngofa-ngofaka manga ngoe o Beteleheemoka yakokitomaka! De gea yakokitomaka ibooto de gea idadi duru imaketero hoka Ma Jou ai Demo-demoka moi abe ma dodihiraino to Una ai uru ma dodofanga o Yeremia wohitulihukuoka. Abe ai demo gea ma titi o Beteleheeme ma nyawa manga huha hiadono manga gari ka idadi yoihene ma gurutika. Abe o Yeremia ai demo wohitulihukuokau hokonaa,

Matiusu 2:7

Ho ka de manga demo ipaha gea o Herodese woihenoka de ahao ona abe yosoo-sosawaro ma titi o murumu ma dodagi gea o Herodese wahidohikika wabehehongo la ka idadi ona yoboa iwihimanga unangika. Ho ona gea yoboaka de wabole ma goa-goa watemo onangika wato, “Ngohi toigo tohioriki ka furuono ngini niamakeoka o murumu gea abe niato bote o Koano ma hungi ai dodunguu?”

Himatoko 12:4

De o naga ma bikini gea yapake la ihiparihi o murumu la ipuraraha ma dihangoka de auku dau o duniauku. Abe nako o murumu mata-mata ma dihangoka haetongo de haregu hange, gea o regu moi ma aewani akokipurarahoka naa o duniauku. De ahao ma naga gea iloiki ma ngofekaika gea abe ami gahe itigioka la momagerewoto de imaokoino ami himangoka la ato nako hiadono momaguwinoka de ahao ami ngofaka gea ka idadi iwile de iwilahiroka dika.

Himatoko 17:6

De ngohi tomimake de ka idadi tomihioriki muna imidalukoka, de gea imidaluku ko de o dalukua masara de Ma Jou ai nyawa manga awunu. Abe ona gea yahingahu-ngahu o nyawa utuika ma titi o Yesusu, ona gea muna matomaka ho naa imidalukoka de to ona gea manga awunu. De gea tomimake de duru tomiheranga.

Hihira 16:10

De ahao o ngo Delila gea mitemo unangika mato, “Adoo! Abeika nohihibodo ngohi! De gea ngona nohieluku angamoi ani hingahu ngohino ko igoungua.” De ahao de ami hininga ma dora mato, “Simsono, de naa togahoko ufa nohieluku ho duru togahoko la nohihingahu abe hokokia o nyawa ka idadi inipakiti hiadono ko idadiua nomaduhunu.” Hokogea o ngo Delila mibole ma goa-goa unangika.