Matiusu 2:15 - Ma Jou ai Demo-demo o Totobelohoka

¹⁵ Ho yogogere o Mesiiri ma tonakoka gea hiadono o Herodese wohonengoka de ahao yolio to ona manga tonakika. De hokogea idadi la duru imaketero hoka ma dodihiraka nanga Baluhu idodutu Ma Jou wonahingahuoka ai uru ma dodofanga o Hosea ai demoino. De gea Ma Jou wotemo wato, “Ngohi naa ahi Ngofaka tiahoko o Mesiirino.” De o Hosea ai demo gea ma titi o Yesusu wogogere jai-jai o Mesiiroka de ahao wolioli.

Matiusu 2:15 ပူးပေါင်းရင်းမြစ်များ

Huhupu 4:22

Ho kiani ngona ahao nihingahu unangika nato, ‘Hokonaa Ma Jou o Yawe ai demo ngona o koanoika: o Isiraele ma nyawa ona gea tahiromanga ahi ngofaka o domoro.

Hosea 11:1

De Ma Jou wotemo wato, “O Isiraele ma nyawa ona gea Ngohi taetongo tato ona gea yomaketero hoka ahi ngofaka ma dutu. De ma dihiraino gea abe ona ko yotedekanuahi yodadi ahi nyawa de Ngohi duru tidora ahi ngofakika gea hiadono tiahoko la tihihupu o Mesiiri ma tonakino.”

Gegetongo 24:8

“Ona ma dihira o Mesiiroka masara Ma Jou wahihupu ona o Mesiirino, Ho manga buturungu gea hoka o fuhuku ma hapi, gea yamake Unangino. O nyawa ngaro o dutu onagona dika ma ufa yatualono o Isiraele ma nyawaika, Angamoi ona ahao yahimataka o nyawa abe yalawana de yahikangela, Manga kobongo yatobi-tobikuku de yapake manga toimi onangika, De yatoimi de manga hihiipi hiadono manga badanga yawederoka.

Matiusu 1:22

De gea mata-mata kiani idadi la duru imaketero abe hoka duru ma dodihiraka Ma Jou wonahingahuokau ngone o nyawaino. Abe ai behehongo gea womatengo wihiakunu ai uru ma dodofanga la una gea wohitulihuku wato,

Matiusu 2:14

Ho o Yusupu ka de woihene gea de ngaro o futu ma goronaka ma ka wosobo dika de wao o Yesusu de ngoi meme o Mesiiri ma tonakika.

Matiusu 2:17

De gea igoungu idadi o ngofa-ngofaka manga ngoe o Beteleheemoka yakokitomaka! De gea yakokitomaka ibooto de gea idadi duru imaketero hoka Ma Jou ai Demo-demoka moi abe ma dodihiraino to Una ai uru ma dodofanga o Yeremia wohitulihukuoka. Abe ai demo gea ma titi o Beteleheeme ma nyawa manga huha hiadono manga gari ka idadi yoihene ma gurutika. Abe o Yeremia ai demo wohitulihukuokau hokonaa,

Matiusu 2:19

O Yusupu de o ngo Maria de o Yesusu ona ka yogogerohi o Mesiiri ma tonakoka de ipaha o koano o Herodese wohonengoka. Gea wohonengoka de nanga Baluhu idodutu Ma Jou to Una ai malaekata gea womahimatokoli o Yusupika ai buluhara ma goronaka.

Matiusu 2:23

De genangoka ona yogogere o Nasarete ma kapongoka. De hokogea hiadono idadi abe ma dodihiraka Ma Jou ai uru ma dodofanga inahingahuoka abe ona yotemo ma titi o Koano abe Ma Jou wonahibehehongoka. De manga demo gea ihitulihukuokau ato, “Una gea ahao iwifetongo o Nasarete ma nyawa.” De itiai iwihiromanga hokogea angamoi o Yesusu wodalamoko genangoka ho una wodadioka o Nasarete ma nyawa imaketero hoka ma dodihiraka Ma Jou wotemoka.

Matiusu 21:4

De wahuloko ibooto de ona yahinooto yoiki genangika de duru yaniiki to Una ai demo onangika. Ho o keledai ma aewani gea ona yaoino o Yesusino de ahao manga baju ma gogurutuku ihinao o keledai ma ngofaka ma poretoka. De ihinaoika de ahao o Yesusu wobarenuku. De naga o nyawa manga ngoe ato iwibuhuku o Yesusu ho ihinao manga baju de manga ngoere ma ngekomika gea la idadi manga horomati ma dodunguu abe ma titi o nyawa yokokurutiye yoboa. De o nyawa utuoli yoiki manga dumuleika de atobiki ma tage ma ngoe abe ma rupa hoka o biso ma tage, de gea ihinao o ngekomika. De gea mata-mata yodiai de duru yogogarago ma titi manga horomati o Yesusika. De abe o Yesusu wobarene o keledai ma ngofaka ma poretuku de o nyawa duru iwidafongo irahai, gea duru imaketero de Ma Jou ai Demo-demoka moi abe ma dodihiraino to Una ai uru ma dodofanga wohitulihukuoka. De gea ma demo ato, “Nahingahu onangika abe o Yerusaleeme ma kotaka yogogere nato, ‘Abeika ti ngini nia Koano naga woboa nginino. De abeika ai hininga ma dodipokouku, angamoi Una ka o keledai dika abe wobarenuku. De ma keledai gea ka ma ngofakohi wobarene.’” Hokogea Ma Jou ai uru ma dodofanga ai demo ma dihiraino, de hokogea idadi abe ma oraha o Yesusu womahitigi o Yerusaleeme ma kotaika.

Matiusu 26:54

Masara nako hoka Ngohi tomagahoko la o malaekata ihidatoko ahi kangelaino, gea ahao done sarakia de idadi Ngohino abe imaketero hoka ihitulihukuoka Ma Jou ai Demo-demoino? Ho gea ma titi hiadono Ngohi tahigunoa ona naa la ihitaoko de ihiaoika, la ahao idadi duru imakadaene de abe Ma Jou ai Demo-demoka ihitulihukuoka.”

Matiusu 26:56

Ma gea adodoaua, angamoi kiani idadi hokonaa la ingodumoka gea abe Ma Jou ai uru ma dodofanga ihitulihukuokau to Una ai Bukuoka.” De gea o Yesusu iwinii-niiki yokokiloaroka ho ka iwidogunoaika.

Matiusu 27:35

De ahao o Yesusu iwihidapakuika o gota isosalioaka. De iwihidapakuika ibooto de ma tentara gea yomaketebobataru la ato ahao ihioriki hokokia yomahikodoku o Yesusu ai baju mata-mata abe kangano ahuputoka Unangino.

Matiusu 8:17

De o Yesusu ai datoro gea idadi duru imaketero abe hoka ma dodihiraino Ma Jou ai uru ma dodofanga o Yesaya wonahingahuoka abe wato gea ahao ma Mesia wodiai. De gea ma dodihiraino de o Yesaya wohitulihuku ai demo wato, “To ngone nanga badanga ma kangela Una wagorakoka ngoneino, de to ngone nanga popanyake wonahitogumoka.” Hokogea o Yesaya ai demo ma dodihiraino.

Lukasa 24:44

De ahao wotemo wato, “Naa abe idadioka Ngohino duru imaketero dika hoka tinihingahuoka ma dihiraino abe ngone ka homakiniikohi de totobadotoko. Abe ma dihiraino gea tato mata-mata abe ma dekanoka de ihitulihukuoka ma titi Ngohi, gea mata-mata kiani idadi Ngohino. Abe ngaro o Musa ai Paretaka ma demo abe ihidumutu Ngohino, de abe Ma Jou ai uru ma dodofanga manga demoka, de abe ma demo utuino hohiromanga o Higiriiri ma Nyanyianga ma bukuoka de ihidumutu Ngohino, gea ma dihiraino de tinihingahuoka abe ma demo gea mata-mata kiani ihingodumu ahi wowangoino. De ma oraha naa ka idadi nihioriki abe ma demo gea mata-mata ihingodumoka Ngohioka.”

Yohanese 19:28

Ka de wahibehehongoka onangika ibooto de o Yesusu wohiorikoka ai karajaanga abe o nyawa waduhunu, naa mata-mata wabootoka. De naa o Yesusu wotemo de ai demo duru imakadaene abe ma dihira Ma Jou ai uru ma dodofanga ihitulihukuoka Ma Jou ai Demo-demoka, abe wotemo wato, “Ngohi ahi ngomaha yodudungu.”

Yohanese 19:36

De mata-mata naa idadi duru imakadaene abe ma dihira Ma Jou ai uru ma dodofanga ihitulihukuoka Ma Jou ai Bukuoka ato, “Ai kobongo moioo de ko yatobikua.”

Hidingoto 1:16

“Ahi gogianongoru, abe idadioka naa ma duru o Yudasika, gea kiani idadi unangika duru imaketero abe hoka Ma Jou o Womaha wonahingahuoka to Una ai Demo-demoino. Abe duru ma dodihiraka nanga tofora o Dautu ai uruino wonahingahu ma titi gea. Abe o Yudasa una wodadi to ona manga hihira abe ma doomu gea yoboaino de iwitaoko o Yesusu de iwiaoika.