Matiusu 13:35 - Ma Jou ai Demo-demo o Totobelohoka

³⁵ De abe o Yesusu ka ihikaika wadotoko de o hiketero ma ade-ade, genangino de duru imakiniiki de ihingodumu moi Ma Jou ai Demo-demoino abe duru ma dodihiraino de atulihukuoka. De ai demoka gea de itemo ato, “De Ngohi ahao totemo-temo nginika de o hiketero ma ade-adeino. De genangino Ngohi ahao tinihitararono nginika o dogogono ma titi, abe ma dogogono gea ngaro ma dodihirainohi abe ahao Ma Jou watulaada o dunia naa de ka hiadono ma oraha naa ma o nyawa duru ko ihiorikuahi ma titi genangino. Ho ma dogogono ma titi ahao tinihitararono ahi hiketero ma ade-adeino.” De hokogea Ma Jou ai demo ma dodihiraino abe ma demo gea ma hidumutu duru o Yesusu ai dodotokika.

Matiusu 13:35 ပူးပေါင်းရင်းမြစ်များ

Matiusu 13:14

De ma nyawaino gea de ihingodumu to Ma Jou ai demo abe duru ma dodihiraino de o Yesaya wohitulihuku. De ai demoka gea Ma Jou wotemo wato, ‘Ngaro ngini nihigali-gali nihigihene ahi demoino masara ngini ko nihiorikua, De ngini gea ngaro nihigali-gali niolega ahi datorino masara gea ngini ko nihiorikua ma titi genangino.

Matiusu 13:3

De naga ma titi ma ngoe o Yesusu wadotoko o nyawaika abe wapake o hiketero ma ade-adeino. De naa moi ai ade-ade abe wadotoko ona manga ngoe-ngoeika, wato, “Abeika nitotoihene ahi ade-ade naa. De naga womatengo wotobaredi-redi woiki wohibarihi o bibiti.

Matiusu 25:34

“De gea tahikatingaka ibooto de ahao Ngohi manga Koano ahao tahoko ona ahi nirakoka tato, ‘Niaino la niamake nia hiowa ma hidoaka ahi Babaka de aino, angamoi naa adonoka ma oraha la Ngomi miahikoano to Ngomi mia nyawaika. De nia hiowa ma hidoaka gea duru ma dodihirakahi abe o dunia ko idadiuahi de inihidiaiokau la ngini to Ngomi mia nyawa ahao niamake abe ma oraha minihikoano ngini.’

Matiusu 5:2

De ahao Una womulaenge wadotoko onangika ma titi o nyawa abe yamake ma hiowa Ma Jouoka de aino gea. Ho o Yesusu wadotoko wato,

Lukasa 10:14

Ho naa tinihingahuohi nginika abe ahao dokengika o hohowono ma wangeoka de nako ngini de ona abe o Tirusu de o Sidonoka, ma ka ti nginiohi nia hohowono duru itubuho nginika ma titi ko nitobaua.” De hokogea o Yesusu ai demo abe ma titi o Korasimi de o Besaida ma nyawa.

Yohanese 17:24

“O Baba, ona gea nohihidoakoka Ngohino duru toigo la ngaro o kiaka dika Ngohi naga ma onangoo naga genangoka. De Ngohi duru toigo la ona ahao ihimake Ngohi de ahi medebini de ma dararonoka. Abe o dunia ko idadiuahi de duru nohidoraka hiadono nohihidoaka Ngohino ani medebini de ma daronoka gea.”

Hidingoto 15:18

Abe duru ma dodihiraka de tinihingahuokau nginika.’ Hokogea Ma Jou ai Demo-demo abe ma dodihiraino ihitulihukuoka.”

1 Korintusu 2:7

Masara ma sosawaro abe ngomi naa mitemo-temo, abe ma titi o Yesusu Ma Jou wihidadi la nanga howonino wonaduhunu, ena gea Ma Jou ai sosawaro ma dogogono abe ka ma dodihirainohi wagogonohi. Duru ma dodihiraka abe ko kia-kiauahi wotulaada Ma Jou de to Una ai sosawaro naa wohideeokau ho ma oraha naa naga de ka idadi wonahidoaka ngoneino nanga utumu kohaamoko.

Efesusu 3:5

De gea ena ma dodihiraino o nyawa ko ihiorikua angamoi Ma Jou ka wagogonohi o nyawaino la ufa ihioriki. Masara ma oraha naa Una womihimatokoka ma dogogono gea ngomino abe womihitago-tagongino ai garejaka. Abe ngomi utu womitinga-tingakoka Unangino de womihidadi ai hidingoto ma nyawa, de naga utuoli womihitagongo la wato ngomi mihidemoiye to Una ai Demo-demo o nyawaika abe o gogareja ma goronaka. Ho ngomi mia doomu hinootoino naa womihimatoko ai hidee ma dogogono gea, de gea womihimatoko de wipake Ma Jou o Womahino. De gea ai hininga ma dumutu wato ngomi ahao ka idadi miodofanga ai hidee ma dogogono nginikali la nginioo nihioriki.

Efesusu 3:9

De gea Ma Jou ai mauoo la gea ngohi tahitararono o nyawa mata-mataika abe ma titi hokokia wodiai ai hidee ma dogogono gea abe ma dodihiraino de ka wagogonohi o nyawaino. Angamoi Ma Jou, Una mata-mataika wotobatulaada, de ngaro duru ma dodihirakahi gea, masara nagau ai hiningaka ai hidee naa abe wato ahao wodiai. Masara gea duru ma deka-dekanuku wagogono ai hidee ma dogogono gea ka Unangoka dika.

Ibarani 1:1

Duru ma deka-dekanuku abe nanga totofora nagahi de ma ngoe Ma Jou wotemo onangika abe wapake ai uru ma dodofanga la ai hingahu ma demo ona ahao yadofanga nanga totofora utuikali. De to Una ai hingahu ma demo nanga totoforaika, gea ka moiua dika ma rupa, masara ma rupa imaketemomomoi ai hingahuino wapake la ai hingahu ma demo gea wahingahu nanga totoforaika ma dodihiraino gea.

Himatoko 13:8

De gea o dunia ma nyawa mata-mata ahao yomahuba enangika, masara nako ona abe manga roma-romanga naga ihitulihukuokau o Wowango ma Bukuoka, ona gea ko ihigiriiriua enangika. Abe ma buku gea to o Domba ma Ngofaka ai Buku, abe ma dihiraino de yahohonenge ma Dombaika gea. De ona gea abe manga romanga nagau atulihuku ma bukuoka, gea manga romanga tanu duru ma dodihirakahi abe o dunia naa ko wotulaadauahi de ihitulihukuokau manga roma-romanga gea. Masara nako o nyawa utu mata-mata, ona ihigiriiri o aewanika gea abe o gahioka de aiye ihupu.

Himatoko 17:8

De ma aewani gea abe ahao naa ngona namake, gea nengokadau ka iwangohi masara naa ihonengoka. De gea ma aewani ahao kiani o haaroka de aiye ihupu, abe ma haara gea duru kohagurutuku. De o dunia ma nyawa ma oraha gea ahao duru yokokiheranga ma titi ma aewani gea iboali. De abe ma titi o dunia ma nyawa, gea ona abe manga roma-romanga ko iwa o Wowango ma Buku ma goronaka. Abe ma buku gea o dunia naa ko wotulaadauahi de ihitulihukuokau manga roma-romanga onagona dika abe ahao o wowango ma ngango amake. Masara nako ona ko iwingaku-ngakua to ona gea manga roma-romanga ko itulihukua genanguku. Ho ma oraha gea de ma aewani abe nengokadauino ihonengokau masara naa iboali, de gea o dunia ma nyawa duru yokokiheranga ma titi ma aewani gea. Masara gea ipahaika de ahao ma aewani gea ibinaahaka ka hiado-adonika.”