Matiusu 12:34 - Ma Jou ai Demo-demo o Totobelohoka

³⁴ Masara ngini ka nioluku nihifetongo abe to Ngohi ahi hininga ma rorahai. De genangino ma titi hiadono Ngohi tinihiromanga nginika tato nimaketero abe hoka o dodiha ma biha-biha, angamoi ngini niatobabudi-budi o nyawaika de niahitobahirehene la ma bahauku ona yokangela. De ti ngini nia demo mata-mata gea ka o demo ma dorou dika ihupuino, angamoi ka o dorou dika imanoa ti ngini nia hiningaka. Ho done sarakia ma rorahai iboa nginioka de aino? Duru ko idadiua! Abe o kia dika imanoa o nyawa manga hiningaka, gea ena ma demo abe ahao ihupu manga uruino.

Matiusu 12:34 ပူးပေါင်းရင်းမြစ်များ

Sosawaro 4:23

Mata-mata ngone hodiai ngaro ma dorou eko ngaro ma owa, ma mata-mata gea imulaenge nanga hiningaka de aino. Ho gea abe itagi nanga hiningaka ahao ihupu de imahimatoko nanga wowango ma datoroka. Ho abe ngini kiani duru ka ihikaika nimahigoana la ufa nia hininga itagi ma dorouika angamoi ngaro mata-mata utu nia wowangoka ma ka enangohi kiani niogoana.

Matiusu 12:35

De nako naga womatengo abe ai hininga irahai, una gea ai demo ihupu ma rorahai ma titi iboa ai hininga ma rorahaioka de aino. Masara abe naga o nyawa ma dorou, una gea ai demo ma dorou dika ihupu ai uruino mangale gea ai hininga ma dorouoka de aino iboa.”

Matiusu 15:18

Masara nako o demo ma dorou gea mata-mata o hininga ma dorouoka de aino iboa, de ena gea abe inahipeseke de inahihowono Ma Jouika.”

Matiusu 23:33

De ngini naa nimaketero de o dodiha ma biha-biha mangale duru ngini nitobadiai ma dorou. Ho done sarakia niato Ma Jou ai hohowono o ukuika ko inidaenua? Gea ahao kiani inikokidaene nginika!”

Matiusu 3:7

De ma oraha gea naga o Yahudi ma nyawaka o doomu moi abe yomahiromanga o Farisi ma nyawa de o doomu moioli abe yomahiromanga o Saduki ma nyawa. De ona abe ma doomu hinootoino gea onangoo yoboa o Yohanesino la ato una waohiki onangika. Masara ka de o Yohanese wamake ona gea yoboaino de duru wataere onangika wato, “Ho ngini naa done sarakia nia hiningaka hiadono niboa la niato tiniohiki nginika? Angamoi ngini nimaketero abe hoka o dodiha iloara o ukuoka de aino, angamoi ngini niato Ma Jou ai hohowono ma uku nginika ka idadi nimahitingaka genangino iti ngohi tiniohiki. Masara ngini nia hiningaka de nimadokangeluku dika ho ko nianoaua nia howo-howonino gea, ho gea ngaro nimaohiki ma ko idadiua iniduhunu Ma Jou ai himangoka ma gogohiki gea.

Lukasa 3:7

De mangale ma titi o Yohanese ai demo gea abe wahingahu-ngahu o nyawaika ho ko manga ngoe yoboa unangino la ato waohiki onangika. Masara o Yohanese una wohioriki abe ona ko mata-mataikaua yoigo yaniiki Ma Jou ai totiai ma ngekomika, ho una wataere onangika gea wato, “Ho ngini naa done sarakia nia hiningaka hiadono niboa la niato tiniohiki nginika? Angamoi ngini nimaketero abe hoka o dodiha iloara o ukuoka de aino, abe ma titi ngini niato Ma Jou ai hohowono nginika ka idadi niodokaowara nako ngohi tiniohiki.”

Lukasa 6:45

“De hokogenangoo o nyawa yororahai to ona manga wowango ma hofoko ma rorahai naga angamoi ihititi manga hininga ma rorahaioka de aino. De abe o nyawa yototorou to ona manga wowango ma hofoko itotorou angamoi manga hininga ma dodorouoka de aino iboa. Ho abe hokokia dika naga nia hininga ma dolaka, hokogenangoo ma demo abe nitemo-temo nia uruoka de aino.”

Yohanese 8:44

Igoungu, o Ibilihi idadioka ti ngini nia baba, de gea ho nioigo to ena ma mau dika nihigihene. De hokonaa o Ibilihi ma hininga. Ma dihiraino ena gea o nyawa yatobatoma. Duru ko iwa ma gou-goungu enangoka ho ioluku aniiki o kia dika abe ma gou-goungu. O Ibilihi duru itobaeluku ho ena gea o ngelu-ngeluku ma baba. Ho gea ka ihikaika ielu-eluku angamoi o ngeluku ma demo gea to Ibilihi ma demo.”

Efesusu 4:29

De nako nimakoketemo, ufa nihigunoa la o demo ma pese-peseke ihupu nia uruoka de aino. Masara nia demo mata-mataika abe nitemo, gea kiani nia demo ka idadi yaduhunu o nyawaika la hiadono ona yoaguru manga ngongakuika. De nia demo gea kiani imakiniiki de abe ona yototoihene manga perelu hokokia la nia demo idadioka o duduhunu de abe yahiutumu onangika.

Efesusu 5:4

De nako nia demo nia uruoka, enangoo kiani niogoana la ufa ihupu o demo ma pese-peseke eko o demo abe ko iwa ma titi eko o hawaliti ma demo ma dorou abe nia uruino. De gea ena ko itiaiua nihidemo-demo, masara koaho nihidemoiye de ti ngini nia tarimakase Unangiye.

1 Yohanese 3:10

De hokonaa ngone ka idadi hahikohowono o nyawa la hahioriki to onagona manga wowango ma datoro iboa Ma Jou ai hiningaka de aino de to onagonali abe manga datoro ihititi o Ibilihi ma haeke ma hiningaka. Abe onagona dika o totiai ko yanii-niikua manga wowangoka de manga gogianongoru o ngongakuoka ko yadoraua onangika, ona gea abe manga datoro ko imakiniikua de Ma Jou ai hininga abe tanu kiani imanoa ai ngofa-ngofaka homoi-homoioka. Masara to ona gea manga hininga imakadaene dika abe hoka o Ibilihi ma haekoli ma ngofa-ngofaka yodiai. Ho naa duru tinihigaro nginika la ufa nimaaduru abe hoka onangoli o Ibilihi ma haeke ma ngofa-ngofaka, masara kiani niwango nitotiai abe hoka itiai Ma Jou ai ngofa-ngofaka yowango, angamoi ngini niagoungu nidadioka to Una. Ho koaho ngini o totiai dika nianii-niiki de nia dora itagi nia gogianongoruika.

1 Samuele 24:13

Abe imaketero hoka o demo ma dulu ngoneoka itemo, ato, ‘Nako o nyawa yodiai itorou gea mangale doka manga hiningaka naga o dorou imanoa.’ De nanga demo ma dulu gea ngohi tapake la tomahitunguu abe ngona ka idadi nohihioriki ngohi ko todiaiua ngonaika ma dorou.” Hokogea o Dautu womahingahu.