Matiusu 10:26 - Ma Jou ai Demo-demo o Totobelohoka

²⁶ “De naa tinihingahu abe ahao naga ma oraha abe o nyawa homoi-homoi manga hininga ma dola Ma Jou wahikokimatoko o nyawa mata-mataika. De ma oraha gea Ma Jou wahimatokoo to ona manga hininga abe inihikangela nginika de gea ona ahao yamake ma hibalaha abe ma oraha Una wahohowono onangika. Ho gea hiadono Ngohi tato ngini ngaro ufa niamodongo onangika abe inihikangela, angamoi ngini naa abe ahao nilaku de ona ahao yokala ma titi manga hohowono amake Ma Jouino.

Matiusu 10:26 ပူးပေါင်းရင်းမြစ်များ

Sosawaro 10:9

Ona gea abe manga demo ma gou-goungu hiadono ka idadi hongaku manga behehongika ona ko yorubaua de ko yorehenua arihonongaika. Masara ona abe ka ihikaika ma gou-goungu yodokaowara, ona gea ka ihikaika yoruba ma dorouika de o nyawa utu yahioriki abe yotobadiai ma dorou.

Sosawaro 29:25

Nako ngone ka ihikaika hohawana abe ma titi o nyawa utu inamake sarakia, gea imakadaene dika hoka ngone homahidilikoka o modoioka. Masara ngone abe homahingano-nganono ka Ma Jou o Yaweika dika, gea Una ahao wonadatoko ho duru ko idadiua o bodito inadaene.

Tobadotoko 12:14

De gea ufa hawohanga abe ahao nanga wowango ma datoro mata-mata de Una watailako homoi-homoiika. Abe nanga datoro ma rorahai de abe ma dorou, de ngaro nanga datoro abe homatohiki hodiai, masara gea mata-mata Una ahao watailako. Ho irahai la ngone hotobahingounu to Una ai mauika.

Matiusu 10:28

De to Una ai demo o Yesusu wohigila-gilahi wato, “De naa tohigalioli ahi demo abe tato ufa niamodongo o nyawaika. Angamoi ngaro o nyawa inihikangela nginika de inihidee la ato initoma, ma gea ti ngini nia badanga dika abe ka idadi yatoma. De nako ti ngini nia jiwa, gea o nyawa ko yakunua yahohonenge enangika, masara abe nako Ma Jou, Una dika ka idadi wahibinaaha o nyawa manga badangoo de manga jiwaoo o Naraka ma ukuika. Ho koaho niwimodongo Unangika dika de niwihoromati ma titi ai kuaha kohaamoko gea.”

Maruku 4:22

Abe ma oraha naa bote nagahi abe Ma Jou ko wohimatokuahi nginika, masara ika-ika de ahao wohimatoko ena gea. Abe o kia dika atamunohi de ifufutuohi nia hiningaka, ahao naga ma oraha Una wafelenga la ka idadi niataoko ma titi gea.

Lukasa 24:47

De ahi abari gea kiani o nyawa yahingahu-ngahu o dunia ma nyawa mata-mataika, de gea yahingahu-ngahu de to Ngohi ahi kuaha. Abe imulaenge o Yerusaleeme ma kotaka naa de imahora-hora o dunia ma amokika. De ma abari gea ma titi abe onagona dika yotoba de yoporete manga howo-howonino, ona gea ahao Ma Jou waofi manga howono gea.

Lukasa 8:17

Abe ma oraha naa nagahi abe Ma Jou ko winihimatokuahi nginika, masara ika-ika de ahao ena gea mata-mata nginika winihimatoko. Abe o kia dika atamunokahi de ifufutuokahi nia hiningaka, ahao naga ma oraha Una wafelenga la ka idadi niataoko ma titi gea.

Hidingoto 1:8

Masara naa moi ka idadi tinihingahu, abe ahao ma oraha ngini naa inilufungu de Ma Jou o Womaha de gea duru niamake ai kuaha la ka idadi niahingahu-ngahu o nyawa mata-mataika ma titi Ngohi. Abe ngaro o kia-kiaka dika yogogere, abe ngaro o Yerusaleemoka ma nyawa, de ona abe o Yudea ma tonakoka yomanoa, de ngaro ona abe o Samaria ma tonakoka, de ka hiadono o dunia ma bobahaika, ma ona mata-mataika ka idadi ngini nihiabari ma titi Ngohi!”

Hidingoto 4:13

De ahao manga hihira ma doomu gea ona duru yoheranga ma titi o Peturusu de o Yohanese manga domoroini abe manga demoino, angamoi yahioriki abe ona yahinooto ka o nyawa biaha dika abe ko yohakolaua. De ahao yongano-nganono abe ma titi ona yahinooto nengokadauino de ka ihikaika yomakiniiki de o Yesusu.

Hidingoto 4:19

Masara o Peturusu de o Yohanese ona yopaluhu ato, “Abeika ngini ma hirete nimafikiri de nimaleha ma titi nia huhuloko ma demoino gea. Bote Ma Jou ai mau la ngomi naa mininiiki ti ngini nia demo ekola koaho wiwihigihene to Una dika ai demo ngomino? Nako ngini niataoko sarakia?

1 Korintusu 4:5

Ho ngaro ufa ma oraha naa de ngini nimitailako ngomi naa, angamoi o hitailako ma oraha ko adonuahi. Masara koaho niodamaa dika hiadono nanga Baluhu idodutu woboali, angamoi ma oraha gea de ahao Una o kia dika agogonika o fufutuika, gea Una wale de wao ma dodawangeino. Abe ma oraha gea Una o nyawa manga hininga de manga hidee watailako de wahimatoko. De ahao o nyawa homoi-homoi yamake ma higiriiri Ma Jouino abe itiai yamake.

1 Peturusu 3:14

Abe ngaro ona inihikangela ma titi ngini nidiai o wowango ma datoro ma totiai, masara ka idadiohi ngini niamao Ma Jou ai owa ti ngini nia hiningaka. Ho gea ngaro ufa dika de ngini niamodongo onangika, de ufa nia hininga ihuha.