Matiusu 10:20 - Ma Jou ai Demo-demo o Totobelohoka

²⁰ angamoi gea tanu ko nginiua nitemo, masara gea ti ngini nia Baba Ma Jou ai Womaha abe wotemo de wapake ti ngini nia uruino.”

Matiusu 10:20 ပူးပေါင်းရင်းမြစ်များ

2 Samuele 23:2

“Ma Jou o Yawe de ai Womaha watemo o nyawaika, De wapake to ngohi ahi uru la to Una ai demo wahidoaka onangika.

Huhupu 4:12

Ho naa ngona tonihulokoli, kiani ngona noiki de ahao ngohi toniduhunu, la ma oraha notemo-temo de ani uru gea ahao Ngohi tohipareta de Ngohi ahao tonidotoko o kia notemo onangika.” Hokogea Ma Jou wihigaro.

Matiusu 6:32

Abe ngini ufa nia hiningaka itagi imaketero hoka o nyawa abe ko iwihiorikua Ma Jouika manga hininga. Angamoi ti ngini nia Baba o Horogaka Una wohiorikoka abe ma titi ngini homoi-homoi nia perelu mata-mataika, ho ngini ngaro ufa nihuha nia wowango ma hidailakoika.”

Maruku 12:36

Masara Ngohi tinileha, done sarakia hiadono nanga Mesia gea ka o nyawa biaha dika? Angamoi o Dautu una ma hirete wihiromanga de wigorakiye nanga Mesiaika gea wato, ‘Ahi Baluhu idodutu.’ Ho nako o Dautu wigorakiye o Kristusu wato ai Baluhu, gea itararono abe nako o Dautu de o Kristusu de kiani ka o Kristusohi duru wokurutiye. Angamoi abeika to Dautu ma hirete ai demo-demo abe ma dihira wotulihuku, wotemo wato, ‘Ma Jou o Yawe wotemo ahi Baluhu idodutuika wato, “Naino nogogere ahi nirakoka la ngone hohikoano mata-mataika ka hiadono ani musu gea duru manga hingounu naga Ngonaika.”’ Hokogea ma dihira o Dautu waturu to Ma Jou ai demo abe gea witemo o Dautu ai Baluhu idodutuika. De gea ko to Dautua dika ai demo, angamoi Ma Jou o Womaha wihihira-hira o Dautu hiadono ai demo gea wohitulihuku.”

Lukasa 11:13

Ho naa Ngohi tato abe nako ngini o howo-howono ma nyawa de ka idadi o hidoaka ma rahai niahidoaka ti ngini nia ngofa-ngofakika, ho Ma Jou Unangoo ka idadi wonabaluhu de ma hidoaka abe utuohi irorahai ngoneino. De hongoli nia Baba o Horogaka ka idadi winihidoaka Ma Jou o Womaha nginika iti ngini nimagahoko hokogea Unangika.” Hokogea o Yesusu ai dodotoko iwinii-niikika abe ma titi hokokia yomaniata.

Lukasa 12:12

Angamoi ma oraha gea abe ngini nimaokoino o nyawa yokurutiye manga hima-himangoka de Ma Jou o Womaha Una winidotoko abe hokokia ahao nitemo.”

Lukasa 21:15

Gea koua, masara ma oraha adonoka de ahao Ngohi tinihidoaka nginika la nia uru ma demoino de duru isosawaro. La gea nitemo ipaha de ko moiua abe inilawa-lawana ka idadi yopaluhu nia demoika ho ko idadiua inihikala nia demoino gea.”

Hidingoto 13:9

De ahao o Saulusu, abe ai romanga moioli iwifetongo o Paulusu, una gea duru iwilufungu de Ma Jou o Womaha ai kuaha. De gea duru widamaana o Elimasika de witaere wato,

Hidingoto 2:4

De duru ma oraha gea dika de ona mata-mataika yakokilufungoka de Ma Jou o Womaha, ho ona yotemo-temo de o demo utuoli abe hokokia dika Ma Jou o Womaha wahiakunu ona homoi-homoiika.

Hidingoto 28:25

De onangoka naga abe yomaketeloliliara ma titi o Paulusu ai dodotoko ma demoino, de hatoli manga dekana yomakoketemo de yomaketeribuutu. De ma bahauku de o Paulusu wahingahu onangika o demo moiokahi abe wahitiari wato, “Ma dodihiraka de Ma Jou o Womaha duru wagoungu abe ma titi ngini utu nia pea ma dogowini. Abe ma oraha gea Una wotemo Ma Jou ai uru ma dodofanga o Yesaya ai uruino. De ma oraha gea Ma Jou o Womaha wotemo nanga totoforaika wato,

Hidingoto 4:8

De ahao o Peturusu iwilufungu de Ma Jou o Womaha de wopaluhu onangika wato, “Ahi balu-baluhu de ngini abe nimihihira ngomi nia kokawaaha, naa moi tinileha.

Hidingoto 6:10

De ngaro yomaketeribuutu masara moioo de ko iwa abe ka idadi iwihikala o Setefanusu ma titi ai demoino angamoi una iwihipareta de Ma Jou o Womaha ho duru wososawaro wotemo.

2 Korintusu 13:3

De ipahaino abe niamake manga dodotoko gea de ahao ngini ka idadi nihioriki abe duru igoungu o Yesusu Kristusu wotobatemo to ngohi naa ahi uruino. De nako o Yesusu Kristusu ai demo nginika gea ko winibole-boleua winidotoko, masara Una gea ahao winidotoko de ai kuaha ma amoko, angamoi ai kuaha duru ilamoko nginika.

1 Tesalonika 2:13

De naga ma titi moioli hiadono ngomi ka ihikaika mitarimakase Ma Jouika ma titi ngini. De gea mitarimakase Unangika mangale ma dihira gea ngini duru niodafongo Ma Jou ai demo abe ngomi minihingahu nginika. Abe ma oraha mia demo gea niihene de niato, “Gea igoungu Ma Jou ai Demo-demo de gea ko to nyawaua manga demo inahingahu ngoneino.” De gea nia demoka duru itaana angamoi igoungu ma abari gea Ma Jou ai Demo-demo. De ai Demo-demo gea hiadono naa ka ikarajaangohi nia kokihiningaka abe ngini niwingaku-ngakuoka.

1 Peturusu 1:12

De ngaro ona tanu duru yoigo yamake ai hidee abe hokokia wonaduhunu nanga howonino masara gea Ma Jou wahitararono onangika abe ona ko yadaenua de yohonengoka. Ho gea ai uru ma dodofanga yohonengoka de ipahaino de ahao ai hidee idadi abe ma oraha ngoneuku naa, ho ngoneoli naa abe hadaene ai hidee. Abe naa ma duruika de ngini niihenoka ai hidee gea o Abari ma Rorahaiino la ka idadi niongaku enangika. De o Abari ma Rorahai gea o nyawa inihitobahingahu-ngahu nginika ma titi Ma Jou o Womaha ai kuahaino, abe Una o Horogaka de wauku woboa. Ho gea kiani niwihigiriiri Unangika! De Ma Jou ai hidee de ai hininga ma owa ngoneuku, ena gea duru ihohailoaholi hiadono ka Ma Jou ai uru ma dodofangua dika abe yoigo ihioriki, masara ngaro Ma Jou ai momalaekatoo, onangoo duru yoigo yamake la ihioriki ai hidee gea abe ngone naa hamakeoka. Abe ona yomakokeleha ato, “Bote hokokia ma ngekomo Ma Jou ahao wapake la waduhunu o nyawa gea manga howo-howonino? Marai ai ngekomo gea kiani duru ihohailoa!” Hokogea ona duru yoigo ihioriki, de abeika, ngone naa abe ka idadi hamake ai ngekomo gea. Ho ngoneoo abe hamake hokokia ma amoko Ma Jou ai hiowa ngoneuku abe wonaduhunu nanga howonino. Ho ngone naa kiani duru hihigiriiri nanga Jouika ma titi ai duduhunu ngoneino de abe nanga utumu wonahidoaka ai hininga ma owaka de aino.

2 Peturusu 1:21

Angamoi nako Ma Jou ai hingahu ma demo, gea duru ko moiua la o nyawa manga mauoka de aino iboa, masara gea mata-mata Ma Jou o Womaha abe wahilufungu o nyawa manga hiningaka de ai kuaha de wahingahu ai demo onangika, de ahao onangoli yadofanga o nyawaika, de hokogea Ma Jou wotemo manga uruoka de aino. Ho koaho ngini duru nitotoihene ma demoino gea.