Maruku 14:41 - Ma Jou ai Demo-demo o Totobelohoka

⁴¹ De woikoli ai dingiika de womaniatoli Ma Jouiye. De womaniata ibooto de woliokali onangika hidutu ma hangeino, masara ka yakiookohi. Ho wataere onangika wato, “Mode ka nimahiainohi hiadono ka inikiookohi? Marai nia giooko ko iniwedonuahi? Abeika, Ngohi o Nyawa ma Ngofaka naa ahi gahe adonoka, abe ihihidoakoka o howo-howono ma nyawaika.

Maruku 14:41 ပူးပေါင်းရင်းမြစ်များ

1 Kokoano 18:27

Ho adonoka o wange ikorona de ahao o Elia womulaenge wamia-mia onangika wato, “Ngini kiani nia jou ena gea niahoko niamo-amokiye bote nia jou gea ka imaiduohi! Eko bote ena gea iloiki imahupuohi, eko naga moi o Baala kiani duru imafikirohi ho ko inigihenuahi! Eko nia jou gea ma karajaanga utu naga o wange naa! Abe ngohi tato bote ngini niato o Baala gea igoungu enangoo ma jou ho ena tanu naga e?”

1 Kokoano 22:15

De ipaha ma oraha woboaino de yomarihimanga de ma koano de ma koano wileha unangika wato, “Mika, sarakia, koaho irahai hoiki haparangi o Ramoto-Gileada ma kotaika eko ngaro ufa dika?” De o Mika wipaluhu wato, “Ka idadi niaparangi dika o Ramoto-Gileada ma kotaika angamoi ahao nilaku. Abe Ma Jou o Yawe ahao wahidoaka ona gea to ngona ani giamika, mia koano.”

2 Kokoano 3:13

De ona iwiadono o Elisaika de o Elisa wileha o Isiraele manga koanoika wato, “Adodoa ho ngona noboa ngohino? Koaho noiki ani baba de ngoni meme manga nyawaika. Angamoi naga manga ngoe abe yahiromanga ato o uru ma dodofanga de ona yatobaleleani ani dimonika. Ho koaho noiki nomagahoko o duduhunu onangino!” Masara ma koano o Yorama wipaluhu wato, “Ko idadiua! Angamoi maraioka Ma Jou o Yawe Una gea abe womiahoko ngomi o koano imihange naa la wato womihidoaka ngomi o Moaba ma nyawa manga giamika!”

Matiusu 26:2

“Marai ngini nihiorikoka abe hinootoka de imulaenge nanga Totilakuru ma rame-rame. De naa tinihingahu abe ma oraha gea de Ngohi o Nyawa ma Ngofaka ahao ihihidoaka o nyawa utuikali la ahao ona gea ihihohonenge abe ihihidapakuika o gota isosalioaka.” Hokogea Una womahingahu abe hokokia ahao idadi Unangika.

Maruku 14:10

De ipaha o Yudasa Isikarioto, abe una yangimoi de yahinootoino, una woiki onangika abe o hidemo ma nyawa Ma Jouiye manga hohidimono. Woiki onangika de wahingahu wato, “Ahao o Yesusu ka idadi tihidoaka nginika.”

Maruku 14:18

De ahao ona yolomo manga gogiriaka de o Yesusu wahingahu onangika wato, “Naa duru tagou-goungu tinihingahu. Naa naga nginioka womatengo wolo-olomo de Ngohi, masara una gea ahao wohihidoaka ahi musuika.”

Maruku 14:35

De o Yesusu woiki hatoli watingakika yaruange gea de womamotumuku womaniata Ma Jouiye wato, “Nako ka idadi, iti ufa gea ahi kangela abe itigioka idadi Ngohino.” De wotemohi Ma Jouiye wato,

Maruku 14:40

De wolioli onangika de ka wamake yomakokiiduokali angamoi duru yakiookohi. Ho watumomikoli masara ona duru ko ihiorikua abe hokokia yotemo o Yesusika.

Maruku 14:42

Nimaokoiye la hosobo habuhuku ona gea abe yoboaino! Abeika, una abe naa wohihidoakoka ahi musuika, abe una naa woboainoka.”

Maruku 7:9

De o Yesusu wataeroli o Farisi ma nyawaika de onangika abe yotobadoto-dotoko o Musa ai Paretaino gea wato, “Ngini naa duru nisosawaro e? Ngaro nia demoino de nimahingahu abe Ma Jou ai Pareta nianiiki, masara abe igoungu to Una ai pareta niaoluku la gea ti ngini dika nia bohono niatobaniiki!

Yohanese 12:23

Ka de manga gogahoko gea woihene de o Yesusu wahingahu ona mata-mataika wato, “Ma oraha adonoka la Ma Jou wahimatoko o nyawaika abe to Una ai medebini ma dararono itagi Ngohi o Nyawa ma Ngofakino.

Yohanese 12:27

De o Yesusu wohigila-gila wotemo wato, “Ahi hininga naa duru ihuha! Ho koaho hokokia tomagahoko ahi Babaika? Sarakia, irahai la ahi gogahokino totemo tato, ‘Baba, tomagahoko la nohihihupu ahi kangelaino naa.’ Koua, ko togahokua hokogea mangale duru ma titi Ngohi toboa la toohimanga ahi kangela. De naa ahi kangela ma oraha adonoka.”

Yohanese 17:1

Ka de o Yesusu ai behehongo gea wahingahu ona iwitobaniikika ibooto de ahao womamatagaiye o Horogaiye de womaniata wato, “Ahi Baba, ahi kangela ma oraha adonoka! Ho Ngohi ani Ngofaka naa ahi medebini ma dararono nahimatoko o nyawaika! Nodiai la gea ka idadi to Ngonali ani medebini ma dararono Ngohi ani Ngofaka tahimatoko onangika.

Yohanese 7:30

Ka de ai demo gea yoihene de o Yahudi ma nyawa genangoka duru ihitaili iwitaoko o Yesusu masara ko moiua ka idadi iwiso angamoi ma oraha ko adonuahi abe o nyawaino ka idadi iwitaoko.

Yohanese 8:20

O Yesusu ai demo-demo mata-mata naa wahingahu Ma Jou ai Tau ma loa ma honongaka abe genangoka akelenga o nyawa manga hidoaka ma tiwi ma ngi. Tanu ma oraha gea o nyawa ato iwitaoko masara ma oraha ko adonuahi abe iwihohonenge, ho ko iwihidadiuahi iwitaoko.

Hidingoto 7:52

Abeika nimahihohininga abe ma dihiraino de Ma Jou wohidingoto ai uru ma dodofanga yamuruono naga ti ngini nia totoforaika. Angamoi nia totofora gea duru yahikangela ai uru ma dodofanga mata-mataika. Moioo de ko iwa abe ko yahikangelaua! Abe ma dihiraino gea de naga ai uru ma dodofanga abe yahingahu-ngahu ato ahao nanga Mesia woboa, Una abe duru Wototiai. De ngaro ai uru ma dodofanga gea masara nia totofora ka yahohonenge onangikaoo. De nanga Mesia gea ngini abe niwihidoakika ai musuika, ho ngini niwitomaka!

Hihira 10:14

Ho abeika ngini niloiki enangika dika abe nimangiirikoka de abe nimahijou enangika la o duduhunu nimagaho-gahoko! De ahao hamake nako ena gea iniduhunu nia kangelaka de aino!” Hokogea Ma Jou duru wahiree-reeika onangika.