Lukasa 8:54 - Ma Jou ai Demo-demo o Totobelohoka

⁵⁴ De o Yesusu de ona yamuruono naga abe wahigunoa la yomakiniiki, ona yogila-gila de imitutumu ma ngofaka gea. De Una womiso ami giamika de womitemo de ai ilingi ma amokiye wato, “Ahi ngofaka, nomomikoka!”

Lukasa 8:54 ပူးပေါင်းရင်းမြစ်များ

Matiusu 9:25

Masara ipahaino de ona ko manga ngoe yokokihupuoka, de ahao o Yesusu wowohama ami ngiika. De ahao womiso ami giamika, de muna ka momomiki de hiadono momaokoiye!

Maruku 1:31

Ho o Yesusu woiki munangika de womiso ami giamika de womiliara la momaokoino. De duru ma oraha gea dika de ami badanga ma hauku ihupuoka ho motogumoka ami kangelaino, ho hiadono muna maleleani de o inomo ona gea.

Maruku 8:23

De o Yesusu wiso de wihihupu ma hoanika, abe ma kapongino gea yohupuohi. De genangoka worafi-rafi gea ai lakoika waobiri o Yesusu, de ahao wasoika ai lakoika. Gea ibooto de ahao wileha wato, “Sarakia, nomahioriki?”

Maruku 9:27

Masara o Yesusu wiso ai giamika de wihimomikiye, de una gea duru wotogumoka.

Lukasa 8:51

De ka de yomahiadonika ai tauika gea de yogila-gilaika yowohamika. Masara o Yesusu ko wahigunoaua la iwinii-niiki mata-mata yowohamika. Ho o Peturusu, o Yohanese, o Yakobusu, de ma ngofaka ami baba de ngomi meme, ka ona dika yomakiniiki de Una munangika.

Lukasa 8:53

De o nyawa yowoe-woe gea yoihene ai demo de iwigie-giete de iwimia-mia angamoi duru ihioriki de yonganono abe ma ngofaka gea mohonengoka.

Lukasa 8:55

De duru ma oraha gea dika de ami womaha ilio munangika de momaokoino! De momaokoino de ahao o Yesusu wahuloko onangika la imihidoaka o inomo la ka idadi muna molomo.

Yohanese 11:43

Ho ka de ai gogahoko gea ipaha de o Yesusu duru waamo-amokiye wiahoko, wato, “Lasarusu nohupuino!”

Yohanese 5:21

Abeika, o nyawa yohonengoka Ma Jou o Baba ka idadi wahimomiki, abe manga honengino wahiwangoli. De duru imaketero hokogea Ngohioo naa ai Ngofaka ka idadi onagonaika dika toigo tahidoaka o wowango de ka idadi tahidoaka.

Hidingoto 9:40

De ahao o Peturusu wogahoko la ona mata-mata yokokihupu ma kamaroka de aino. De yokokihupuoka de una watilabukuku de womaniata Ma Jouiye. De womaniata ipaha de womaleloro la wohimanga ami honengika de wotemo wato, “Tabita, Nomomikiye!” Ka hokogea dika de muna ami lako mafelanga! De momalega o Peturusika de ahao momomiki de mogogeruku.

Roma 4:17

De gea duru imakiniiki de Ma Jou ai Demo-demoino moi abe ma dodihiraino de ihitulihukuoka. Abe ma demo gea ma goronaka de Ma Jou wihibehehongo moi o Abarahaamika. De gea Ma Jou wotemo wato, “Ngohi tonihidadioka o kapongo ma ngoe manga baba abe ngaro o nyawa yomakokitingakika o nuuhu homoi-homoioka hiadono manga demo imalolihowono, ma, yobaba ngonaika.” Hokogea Ma Jou wotemo ma dodihiraino, de hokogea o Abarahaama wodadioka to ngone mata-mata nanga tofora ma domoro ngaro to ngone nanga nuuhu imaketemomomoi. De gea Ma Jou Una ma hirete abe wihibehehongo o Abarahaamika wato ahao to una ai totoforauku naga ko manga ngoe. De ngaro tanu ko iwaka o Abarahaama ai nganganono ai badangino abe una ka idadi ai ngofaka womamake, masara o Abarahaama duru ka wingakuohi Ma Jouika ma titi ai behehongo ma demo gea. Angamoi ngaro una ma hirete ai badanga eko ngaro to ngoi fekata ami badanga, masara tanu duru ko iwaka ma buturungu la manga ngofaka yomamake ma titi yaperekiokaholi, ho done sarakia de yofaa-faatuku hiadono manga totoforauku yodadi ko manga ngoe? Masara ngaro hokogea manga badanga masara o Abarahaama ka wingaku Unangika. Abe una womatemo ai hiningaka wato, “Ngohi tohioriki abe Ma Jou Una ka wakunu wahimomikoli o nyawa abe yohone-honengoka. De tongakuoo abe Ma Jou ka wakunu wohidadi o kia dika abe ko idadiuahi.” Ho mangale ma titi ai ngongaku hokogea hiadono o Abarahaama wingaku abe Ma Jou ka idadi wihidoaka moi o ngofaka de ka hiadono ai totoforauku ahao womamake ko manga ngoe. De nagali wingaku abe o nyawa ko manga ngoe abe manga ngi de manga demo imalolihowono, ma gea ona mata-mata yobaba unangika. De hokogea idadioka abe o Abarahaama ai totoforauku yodadi duru ko manga ngoe abe imaketero hoka ma dodihiraino Ma Jou wihibehehongo unangika wato, “Ahao to ngona ani totoforauku ko manga ngoe imaketero hoka o murumoli daku o dihangoka duru kohangoe.”