Lukasa 6:17 - Ma Jou ai Demo-demo o Totobelohoka

¹⁷ De wairiki ibooto de ona yomakutuono youti ma geleforino ka hiadono o tonaka ma dolauku yomahiadonoka abe duru itiaiika ma tonaka genangoka. De naga Unangoka ona abe iwinii-niiki de o nyawa utu yowoe-woeoka. Abe naga o Yudea ma kapo-kapongino mata-mata yoboaino, de nagali o Yerusaleeme ma kotaino, de utuoli dai o gahi ma ngigoroka de yaiha yoboa abe ona gea o Tirusu de o Sidono ma kotaka ma nyawa.

Lukasa 6:17 ပူးပေါင်းရင်းမြစ်များ

Higiriiri 103:3

“Una woigo wohihiapongo hiadono ka ihikaika ahi howono Unangika waofi, De ma oraha topanyake Una abe ka ihikaika wohihitogumu ahi popanyakeino.

Matiusu 11:21

De o Yesusu wotemo wato, “Abeika niatotoihene ahi demoino, ngini abe o Korasimi de o Besaida ma kapo-kapongoka nigogere! De ngini ahao nia hohowono kohaamoko niamake abe ma titi ngaro niamakeoka ma heheranga abe Ngohi todiaioka nginioka masara ko nitobaua nia howo-howonino.” “De naa ka idadi tinihikohowonoli ngini de ona abe yogogere o Tirusu de o Sidono ma kapongoka abe ona genangoka ko o Yahudi ma nyawaua. Abe genangoka ko todiaiuahi o heheranga, masara Ngohi ka idadi tohioriki abe nako hoka ahi heheranga todiai onangoka, ma nyawa gea ka de yamake ahi heheranga de ahao ka idadi yotoba manga howonino ho iwiniiki Ma Jouika. De manga toba gea ahao yomahitunguu abe yomahinoaukuoka de o pakeanga ma kokekekere abe o karongino yodiai, de nagali abe o uku ma kafo yomadoburaraha manga peauku ma titi manga toba ihitunguu. Masara ngini naa ko nitobaua ngaro ahi heheranga niamakeoka nia hidogoronaka!

Matiusu 12:15

De o Yesusu wahiorikoka o Farisi ma nyawa gea manga hininga de manga hidee ma dorou abe Unangika, ho Una wosobo wanoaika ma kapongo gea. De o nyawa manga ngoe iwiniiki Una. De abe onagona dika onangino yopopanyake, ona gea o Yesusu wahikokitogumu.

Matiusu 14:14

De o Yesusu ona yomahiadonikaka de nagau o nyawa ko manga ngoe genangoka iwidodamaa. De Una ma ngotiroka de wouti de wofarene ma ngigoriye de ai hininga ma dora duru itagi o nyawa yowoe-woeika gea, ho abe yopopanyake ona o Yesusu wahikokitogumu manga popanyakeino.

Matiusu 15:21

De ipaha de wosobo o Yesusu de woiki o Tirusu de o Sidono ma tonakika.

Matiusu 5:1

De o Yesusu wamake o nyawa duru ko manga ngoe gea abe yoboaka Unangino ma ngioka gea, ho Una wodoaiye ma hohutulu o loku ma geleforoka de genangoka wogogeruku. De ona abe iwinii-niiki yomatoomuino Unangoka.

Lukasa 5:15

Masara hadongoo de wihibehehongoka unangika gea, masara ma ade-ade abe ma titi o Yesusu ai kuaha utuohi imahora-hora o nyawa-nyawaika. De genangino ma titi hiadono o nyawa duru ko manga ngoe yokokiboaino Unangino la yototoihene ai demoino de abe yomagahoko o duduhunu la ato manga popanyake wahikokitogumoka.

Lukasa 6:12

De ipahainoli de o Yesusu woiki wodoa o loku moiiye la dakenangoka womaniata. De Una ka iwihidetebiniye abe ko wotogu-togumua womaniata Ma Jouiye.

Lukasa 6:16

De nagahi o Yudasa abe ai baba o Yakobusu womatengoli, de nagali o Yudasa Isikarioto, una gea abe ahao wihidoaka o Yesusu o nyawaika la iwitoma. De hokogea to ona yangimoi de yahinooto manga roma-romanga abe o Yesusu wairiki de wahidadi ai hidingoto ma nyawa.

Lukasa 6:18

De ona mata-mata yokokiboaino la ato yotoihene ai demoino de la wahitogumu manga popanyakeino. De naga yamuruono naga onangoka abe yakokitokata, de o Yesusu wakokiditoko ma tokata gea ho wahitogumoka.