Lukasa 5:15 - Ma Jou ai Demo-demo o Totobelohoka

¹⁵ Masara hadongoo de wihibehehongoka unangika gea, masara ma ade-ade abe ma titi o Yesusu ai kuaha utuohi imahora-hora o nyawa-nyawaika. De genangino ma titi hiadono o nyawa duru ko manga ngoe yokokiboaino Unangino la yototoihene ai demoino de abe yomagahoko o duduhunu la ato manga popanyake wahikokitogumoka.

Lukasa 5:15 ပူးပေါင်းရင်းမြစ်များ

Matiusu 9:26

De gea womihimomiki ibooto ami honengino de ma nyawa genangoka duru yomaketeade-ade ma titi ma heheranga gea hiadono ihiabari o tonaka gea ma amokika.

Matiusu 9:31

Masara ona gea yosobo de ihiabari o nyawa mata-mataika ma titi o Yesusu ai kuaha, ho hiadono ma tonaka ma amokika gea de o nyawa mata-mata iwihioriki.

Maruku 1:28

Ho ma abari abe ma titi to Una ai datoro gea duru imataiti imahora-hora hiadono ihikabarihi o Galilea ma tonaka ma amokika.

Maruku 1:45

Masara o nyawa gea ka de wohupu de waade-adeoka o nyawaika. Ho ai ade-ade gea wohikabarihoka hiadono o Yesusu ko idadiokaua wowohama o kapo-kapongika done o nyawa ko manga ngoe iwihideefotino. Ho kiani womahidodogumu ma hoa-hoanoka abe ko iwa o nyawa genangoka. Ma ngaro o Yesusu womatingakika hokogea ma ka ihikaika nagahi o nyawa o kia-kiaino dika yoboaino Unangino.

Maruku 3:7

De o Yesusu de iwinii-niiki ona yosobo yanoaika ma ngi gea de yoikoli o akere ma ngootikali. De naga o Galilea ma nyawa duru ko manga ngoe yoboaino de iwiniiki Unangika hiadono yomakutuono yomakiniiki. De naga o nyawa utuoli ko manga ngoe yoboaino o Yesusino. Abe o Yorodani ma akere doka ma honongaino yoboa Unangino de o Yudea ma tonakino yoboa de nagali o Yerusaleeme ma kotaino yoboaino. De nagaoo abe o Idumea ma tonakino yoboaino de hiadono ona yogogere o Tirusu de o Sidono ma kota ma datekoka, onangoo mata-mata yokokiboaino. Ona gea mata-mata yokokiboaino o Yesusino angamoi yoihenoka o Yesusu ai ade-ade ma ngoe abe o heheranga wodiaioka.

Lukasa 12:1

De ma oraha gea ona abe yoboa o Yesusino duru yodogo-dogo hiadono duru yosana, ho ona gea yomakodoko manga louuku angamoi yomahideefotinoholi. De Una womulaenge wotemo iwinii-niikika de wahitiari wato, “Ngini kiani nihidodiai o Farisi ma nyawa manga hininga abe gea tohiromanga to ona manga ragi, angamoi done manga hininga gea imahora nginika de inihirehene genangino. Abe ahi demo gea ma titi kiani nihidodiai ma titi to ona gea manga hininga angamoi ona yomadokangeluku dika ato yomahinganono Ma Jouika masara tanu ko Unangikaua manga hininga itagi. Ho iti ufa ngini nimaaduru abe hoka onangoli manga hininga.

Lukasa 14:25

De ma oraha gea naga o nyawa duru ko manga ngoe iwinii-niiki o Yesusika. De Una womadogilioro de wotemo onangika wato,

1 Timotiusu 5:25

De duru imaketero hokogea de o nyawa manga datoro ma rorahai. Abe manga datoro ma rorahai utu igapanga hamake, masara utuoli ikangela hamake. De ngaro manga datoro ma rorahai abe ikangela hamake, ma, enangoo ika-ika de ahao inahimatoko ngoneino. Ho, duru ena gea ma titi hiadono tonihitiari tato ufa nomataitiholi nafokumu o nyawa, ma kiani nodamaa hiadono nahioriki igou-goungu manga wowango ma datoro hokokia, de ahao gea ka idadi nagoraka la yodadi o gareja ma hihira.