Lukasa 3:3 - Ma Jou ai Demo-demo o Totobelohoka

³ De o Yohanese una wohingounu Ma Jou ai behehongika ho una woiki wotagi-tagi o Yorodani ma akere ma dolaka de gea wotulu-tulu o kapo-kapongoka de wahingahu-ngahu wato, “Ngini kiani nitoba nia howo-howonino la ka idadi Ma Jou winiapongo de waofi nia howono gea. De ahao kiani iniohiki la genangino nimahitunguu o nyawa manga hima-himangoka abe ngini nioporetoka nia howo-howono gea.”

Lukasa 3:3 ပူးပေါင်းရင်းမြစ်များ

Matiusu 3:11

De o Yohanese wogila-gilali wotemo o nyawaika wato, “De ngohi naa tinihiohiki ka de o akere dika la genangino idadi o dodunguu moi abe ngini nitobaka de nianoaka ti ngini nia howo-howonino gea. Masara ko itedekanokaua de naga womatengo woboaino abe nako Una de ngohi, duru ka Unangohi de ai kuahaka ikurutiye. De ai kuaha hokogea ma gurutiye hiadono ngohi naa tamao abe ko takunua todadi to Una ai gilaongo, ho ngaro toigo tileleani Unangika masara tamao ko takunua angamoi to Una ai kuaha kohagurutiye.” “De igoungu ngohi tinihiohiki de tinihidumunu o akeruku dika, masara Una gea woboaino de ahao o gogohiki utuoli winihipake nginika. Abe ngini utu nia gogohiki ahao niamake abe winihingohama Ma Jou o Womaha ai kuaha ma goronaika, de naga ngini utuoli abe winihingohama o uku ma goronaika la nia hohowono niamake genangoka.”

Lukasa 1:16

De o malaekata o Gabiriele gea ka wihingahuohi o Sakariaika wato, “De ani ngofaka o Yohanese una ahao o Isiraele ma nyawa manga ngoe wahigilio to ona manga Jouika manga Baluhu Wokokurutiyeika.

Lukasa 1:77

Abe ma titi ngona nahingahu-ngahuohi to Una ai nyawaika la hiadono ona ihioriki ma titi o duduhunu ma ngekomo, Abe ma ngekomo genangika ka idadi yaniiki la ahao manga howono Una waofi.

Lukasa 4:1

De o Yesusu iwiohiki ipahaino de Una duru iwilufungu de Ma Jou o Womaha. Ho Una wanoaika o Yorodani ma akere de Ma Jou o Womaha wihihira-hira o tonaka ma kakaahaika abe genangoka ko iwa o nyawa.

Yohanese 1:28

De mata-mata gea idadi o Betania ma kapongoka abe naga doka o Yorodani ma akere ma honongaka, genangoka o Yohanese ma oraha gea o nyawa watobaohiki.

Yohanese 3:26

Ho yomaketeribuutu ibooto de ahao ona abe o Yohanese iwitobaniiki gea yoboa unangino de iwihingahu unangika ato, “Mia guru, minihingahu moi ma titi o Yesusu. Abe Una gea nengokadau o Yorodani ma honongakahi Una de ngona naga genangoka de duru nihikurutiye mia himangoka. Masara ma oraha naa Unangoo womulaenge o nyawa waohiki. De gea hiadono o nyawa mata-mata yokokiloiki Unangika dika!”

Hidingoto 13:24

De o Yesusu Una ko woboauahi de naga o Yohanese abe wotobaohi-ohiki o nyawaika, abe una wohira woboa de wahingahu-ngahu o nyawaika abe wato o Isiraele ma nyawa mata-mata kiani yotoba de yoporete manga howo-howonika de yomangali Ma Jouika de yomaohiki.

Hidingoto 19:4

De o Paulusu wato, “O Yohanese ai gogohiki gea ma dumutu la o nyawa yomahingahu abe yoigo manga howo-howono yoporete de yomangali Ma Jouika. Masara o Yohanese unangoo ma hirete wahigaro o nyawa-nyawaika la iwingaku o Yesusika, abe Una gea wihidoduruino o Yohanesino.”

Hidingoto 22:16

Ho naa adodoa ho ko nomasikaauahi? Kiani nomahiburahiye la toniohiki ngonaika. De kiani nomaniata de nomagahoko Unangiye la ka idadi ani howo-howono waofioka!’ De hokogea ahi dodiawo o Ananiasa ai higaro ma demo ngohino.”