Lukasa 23:9 - Ma Jou ai Demo-demo o Totobelohoka

⁹ De o Herodese duru wileha o Yesusika de o leleha ma ngoe, masara moioo de ko iwa abe o Yesusu wopaluhu unangika.

Lukasa 23:9 ပူးပေါင်းရင်းမြစ်များ

Yesaya 53:7

De ngaro una hokogea iwihikangela de to ngone nanga hohowono iwidaenoka masara una ko womademoua de ko womaduhunua. Una wodadi imaketero hoka o domba ma ngofaka abe duru idaana ho duru iriidi ma oraha yao de yatoma. De to una ai miriidi imaketero hoka o domba abe ko imaruwaeua ma oraha ma gogo o nyawa akulu, ho imarii-riidoka dika. De unangoo hokogenangoli womarii-riidoka dika ma oraha to ngone nanga hohowono ma kangela iwidaene.

Matiusu 27:12

De ahao o Yahudi ma nyawa manga hohidimono, abe utu onangino manga hidemo Ma Jouiye manga hohidimono yokokurutiye, ona yoboaino de iwitae-tae o Yesusika. Masara o Yesusu ka womarii-riidoka dika, ko wopaluhua.

Matiusu 27:14

Masara o Yesusu duru ko kia-kiaua wotemo, ho ma gubernuuru o Pilatusu duru wiheranga Unangika.

Matiusu 7:6

De o Yesusu ka wadotokohi wato, “Nako ngini niadotoko Ma Jou ai Demo-demo o nyawaika, masara ona gea ko yodafongua de ka yahohedu dika enangika, gea ngini ibootohi niahingahu onangika gea. Angamoi ai Demo-demo gea duru de ma medebinoka Ma Jou ai himangoka, ho ufa niahidoaka onangika gea abe ka yaoluku dika. Angamoi ona gea tahiketero abe hoka o fuhuku ma kaho eko abe hoka o ode. Abe ngaro o inomo ma rorahai hohitoofo o fuhuku ma kahoika ma yaoluku ho ko yaolomua, de hongoli ka idadiohi ma kaho inaorutu ngone. De ngaro naga o biagaro ma hakaru moi abe ena gea duru de ma ijaka la gea hato hohidoaka o odeika. Masara abe ma hali-hali gea ma ode ka yaoluku ho adoko-doko dika o pesekoka. Ho ngini nako niadotoko o nyawaika to Una ai Demo-demoino abe duru ikurutiye masara ona ka yoluku dika, gea ibootohi de niadotoko onangika.”

Maruku 15:5

Masara o Yesusu ma moioo de ko wopaluhua, hiadono o Pilatusu duru wiheranga.

Lukasa 13:32

De o Yesusu wapaluhu onangika wato, “Ngini niloiki o Herodesika gea abe wotobabudi o nyawa de niwihingahu unangika abe Ngohi nagahi ahi karajaanga nenangoka. Ho ma oraha naa de tohigila-gilahi abe o tokata takokititoko de o nyawa manga popanyakeino tahitogumu. De ahao naga ma oraha ahi gahe adono de ahi karajaanga ka idadi tamata, de ahao ma oraha gea de tanoa o Herodese ai tonaka.

Lukasa 23:10

De ma oraha wileha-leha de o hidemo ma nyawa manga hohidimono de ona abe o Musa ai Pareta yotobadotoko ona yomahitigika. De gea manga hininga ma ngamoino de ona iwitae-tae o Yesusika de manga demo ma bobuturungu.

Yohanese 19:9

Ho wowohamokali ai tau ma goronaika gea de wileha o Yesusika wato, “Ngona naa o kiaino?” Masara o Yesusu ko wopaluhua.

Hidingoto 8:32

De hokonaa Ma Jou ai Demo-demo ma hidoku abe una kanganoinohi de wobasa. De gea ma demo itemo ato, “Una gea iwituda o hohonenge ma ngiika abe imaketero hoka o domba yatudaika. De imaketero hoka o domba imarii-riidoka dika abe ma oraha to ena ma gogo yaguti, Ho unangoo duru womarii-riidoka dika.

1 Peturusu 2:23

De ma oraha iwingelo Unangika masara Una ko womahibalahua de o ngelo ma demo ma dorou onangika. De ma oraha iwihikangela Unangika de Una ko wadoanua de ko wahibehehongua onangika wato, “Ahao Ngohi tomahibalaha nginika.” Hokogenangua ai hininga, masara wanoaika dika de womahidoaka dika Ma Jouika. Angamoi Una womatemo ai hiningaka wato, “Ngohi tihioriki abe ma oraha Una wonatailako nanga datoro homoi-homoi de gea ai putuhu duru itotiai.” Ho o Kristusu Una wohioriki abe ahao Ma Jou dika ma hirete wahohowono onangika abe iwihikangela Unangika, ho Una ko womahibalahua onangika.