Lukasa 22:36 - Ma Jou ai Demo-demo o Totobelohoka

³⁶ De ahao o Yesusu wotemo onangika wato, “Masara abe ma oraha naa imakohowonoka. Ho nako naga nia tiwi nia popojeoka de nia beta-beta la nia kiahonanga nihilulu genangino, gea kiani nimagao la nimahidailako. De hokogenangoo ngini onagona dika abe ko iwa nia humaranga koaho nia baju moiani nifukunu la genangino ma tiwi de ka idadi o humaranga nimaijaino.

Lukasa 22:36 ပူးပေါင်းရင်းမြစ်များ

Matiusu 10:10

De ngaro ufa dika nia beta-beta niao abe biaha nihilulu nia kiahonanga genangino. De ka idadi nimasandaaliye, de ka idadi nimahinoauku dika nia baju abe ka nia kokiroehoka, masara nako nia doduruuru eko nia sandaala ma duruuru, gea ngaro ufa dika de niao. De ngaro nia tutukunu masara gea moi dika nimagao. De ngaro ufa niao mata-mata gea angamoi ti ngini nia perelu gea ahao Ma Jou winihidailako o wange-wangeiye, abe imaketero hoka o nyawa hahewa la ona yokarajaanga nanga redioka de ngone kiani hahidailako manga karajaanga ma hibalaha abe hoka manga perelu o inomo. Ho hokogenangoo ti ngini nia perelu Una ahao winihidailako angamoi duru Una gea abe winihikarajaanga ngini.”

Lukasa 22:35

De ahao o Yesusu waleha iwinii-niikika wato, “Ma dodihiraino ma oraha tinihidingoto la o Abari ma Rorahai niahingahu-ngahu de ma oraha gea naga nia kuranga? Abe ma dihiraino gea tinihibehehongo la ufa nia tiwi nia popojeuku nimagao, de ufa niao nia beta-beta abe biaha nia kiahonanga nihilulu genangino, de o sandaala ufa ma doduruuru nimagao. Ho nia dodagi gea de naga nia kuranga?” De ona yopaluhu ato, “Koua. Mia kuranga duru ko iwa.”

Lukasa 22:37

Angamoi ahao o nyawa inatae de inahiromanga ngoneino ato ngone o dorou ma nyawa, de manga demoino gea ihingodumu abe ma dodihiraino atulihukuoka Ma Jou ai Demo-demoka ma titi Ngohi. Abe ma demo gea itemo ato, ‘O nyawa yatae Unangika ato Una ka wotobalawana ma paretaika.’ De igoungu ahao gea kiani ihingodumoka angamoi ma oraha naa de Ma Jou ai Demo-demoino mata-mata abe ihidumutu Ngohino, gea imulaengoka ihingodumu mata-mata.”

Lukasa 22:38

De ona yotemo Unangika ato, “Mia Baluhu, ngomioka naga mia humaranga o gahumu hinooto.” De Una wopaluhu wato, “Gea iniwedono.”

Yohanese 15:20

Ho ufa niawohanga ahi demo nginika abe tato, nako o huhuloko de o huhuloko ai dutu, ko idadiua o huhuloko gea wato ka unangohi wokurutiye. De naga ahi demo moioli abe ma titi nako Ngohi todadioka ti ngini nia Baluhu de o kangela ihidaene, ufa niafikiri nginika ko inidaenua, angamoi nginioo ahao inihikangela. Abe nako naga o nyawa ko ihihigihenua Ngohi, gea ti nginioo nia demo ko ihigihenua.

Yohanese 16:33

“Ahi hingahu mata-mata naa tinihingahu nginika la ti nginioo nia hininga de ma miriidi angamoi nigogere Ngohioka. Ho nia miriidi gea naga ngaro nigogerohi o duniaka naa, de ngaro kiani o huha niamake. Ho ufa nia hininga aliko o huhaika gea! Kiani nikokisanangi dika! O dunia ma kangela naa Ngohi tohikalaka la nginioo ka idadi nilaku.”

1 Tesalonika 3:4

Angamoi nengokadau ma oraha ngomi nagahi nginioka de gea ma muruono ibooto minihingahu miato ahao kiani idadi abe o nyawa inahikangela ngoneino. De gea mia demo nginika itaanoka, angamoi idadioka nanga kangela, de gea ena ngini duru nihioriki.

1 Peturusu 4:1

Ho mangale ma titi ma dihiraino de o Kristusu duru iwihikangela abe Una naga de ai badangokahi, ho nginioo kiani nimahinoauku de to Unangoli ai hininga, ho ufa niato o kangela niodokaowara dika. Angamoi onagona dika ma titi Una hiadono o nyawa yahikangela, masara ona ka yodafongo dika abe yahikangela manga badangika, ona gea yomahitaanoka abe yahitihira manga hingounu Ma Jouika de o howono ko yahiparetakaua manga wowangoka.