Lukasa 2:9 - Ma Jou ai Demo-demo o Totobelohoka

⁹ De ka itodokanino naga nanga Baluhu Wokokurutiye ai malaekata womatengo womahimatoko o domba ma gogoanika gea. De ona duru yahidatararonuku de Ma Jou ai medebini ma dararono ho hiadono duru yohawana.

Lukasa 2:9 ပူးပေါင်းရင်းမြစ်များ

Huhupu 16:10

Ho o Harunu watoomuino o Isiraele ma nyawa gea de ma oraha ka watemohi onangika de yolega doka o tonaka ma kakaahaika abe genangoka o lobi ma lou abe yahihira-hira. De duru manga lako ma dumutu ka enangika dika angamoi o lobi gea duru ihailoa de ma dararono angamoi Ma Jou o Yawe ai medebini ma dararono wohipootekika o lobi ma goronaka gea.

Huhupu 16:7

De ahao o ngorumino de ngini niakokimake Ma Jou o Yawe ai medebini ma dararono abe wonahimatoko ngoneino. Ngini nimihigurubungu ngomino masara ngini o wange naa nenangoka ko ma titiua ngomioka de aino. Ho igoungu nia gurubungu ma demo ma dumutu Ma Jou o Yaweika angamoi gea Una winiao nenangino de nia gurubungu ma demo gea woihene.

Yesaya 40:5

De abe ma oraha niwihidiaioka ai ngekomo de ipahaino ahao Ma Jou o Yawe womahimatoko to Una ai medebini ma dararono la o nyawa mata-mata ka yomataimakeika. De gea ahao kiani idadi angamoi gea abe Ma Jou o Yawe wotemoka!’”

Matiusu 1:20

Masara o Yusupu ai hininga ma hidee gea ka womahohiningahi de o Yusupu wobuluhara. De ai buluhara ma goronaka de naga Ma Jou ai malaekata womatengo womahimatoko de witemo unangika wato, “Yusupu, to Dautu ai toforauku, ngaro ufa nahuha nomile o ngo Maria gea. Angamoi o ngofaka gea ami pokoroka ko o nyawainoua masara gea Ma Jou o Womaha abe womihidadi de ai kuahaino hiadono ami ngofaka idadi.

Lukasa 1:28

De o malaekata gea woboaino womahimatoko o ngo Mariaika de womihingahu wato, “Maria, nanga Baluhu Ma Jou naga ngonaka! De ngona duru namakeoka ma hiowa Ma Jouino!”

Lukasa 2:8

De o futu gea womaboa de doka o Beteleheeme ma kota ma hoanoka yamuruono naga o domba ma gogoana angamoi manga domba ma duduono yogoana genangoka.

Lukasa 24:4

De manga hiningaka yolilifangoka, masara ka itodokanino naga o nyawa yahinooto yomaokoino manga datekoka de manga baju duru iareheholi hiadono yahidotararono onangika.

Yohanese 12:41

Hokogea o Yesaya wotemo angamoi ma oraha ma dihira gea de wamakeoka o Yesusu duru de ai medebini ma dararonoka, ho hiadono wotemo.

Hidingoto 12:7

Ho ai giooko ma gogiriaka de ka itodokanino naga ai ngioka gea o dararono abe duru kohadararono. De naga o Peturusu ai himangoka Ma Jou ai malaekata womatengo womaokoino genangoka. De ma malaekata gea witubuku ai gumurukika la witumomiki. Ho womamaoino de ma malaekata wihuloko wato, “Nomataiti nomomiki!” Ka de wotemo hokogea de ma rante iotakuku ai giamoka de auku.

Hidingoto 27:23

De hokogea tinihingahu angamoi o futuika de ahi Jou ai malaekata womatengo woboa ngohino. Abe to ngohi ahi Jou abe titobaleleani Unangika, Una gea wihidingoto ai malaekata ngohino de woboa womaokoino duru ahi datekoka.

Hidingoto 5:19

Masara ipaha yofutuku de nanga Baluhu idodutu ai malaekata womatengo naga woboaino de wafelengaika o bui ma tau ma ngorana de ahao wahihupu ona ma hoanika. Wahihupuoka de ahao ma malaekata wahuloko wato,

2 Korintusu 3:18

De ma demoino gea de ka idadi hamake abe ngone mata-mata abe hingaku-ngakuoka ko iwaka nanga hiningaino ma dadatoko. De nako ngone homahiketero de o Musa, una igoungu womatatoko ai himanga ma titi Ma Jou ai medebini ma dararono naga ai himangoka. Masara nako to ngone nanga himangoka gea ko iwa ma dadatoko, ho nanga Baluhu idodutu ai medebini ma dararono ka idadi ihabaka nanga himangino la o nyawa utu yamake nanga Baluhu ai medebini ma dararono ngoneoka. De mangale nanga Baluhu ai Womaha ka ihikaika wokarajaanga nanga kokihiningaka, ho ka ihikaika wohidogo ai medebini ma dararono ngoneino. De hokogea wohidogo ai medebini ma dararono ngoneino ka hiadono utuohi imakiniiki to ngone nanga hininga de to Unangoli ai hininga la ka idadi homaketehiningamoi de Una. De hokogea ma behehongo ma hungi ma abari duru kohagurutiye abe Ma Jou womihitagongo ngomino la miahingahu-ngahu o nyawaika, ho gea ngomi duru mitomoroini mihiabari arihonongaika!

1 Timotiusu 3:16

De naa o nyanyianga moi abe to ena ma demo o nyawa ko moiua la yodimoaka. Abe ma nyanyianga naa inahitararono hokokia ma hohailoa Ma Jou ai dodotoko abe naa ma duru wonahimatoko ngoneino. De hokonaa ma nyanyianga ma demo. Ai rupa o nyawa woboaino, De ai wowango o malaekata yolega-lega, Ai totiai Ma Jou o Womaha wihitaana, De ai abari ihihora onangika ko iwihiorikuahi Ma Jou la onangoo ka idadi yoihene, Ai dodotoko o dunia ma nyawa yangaku, De wosobo daku o Horogaiye wogoraka.

Ibarani 12:21

De igoungu ma oraha gea duru o hawana ma amoko idadioka ma lokuoka gea hiadono ngaro o Musa ma unangoo duru wohawana hiadono womahingahu wato, “Ngohi naa duru ihiporohono hiadono tofafara.” Hokogea ma dihiraino o Musa ai demo.

Himatoko 18:1

De gea ipaha de ahao o malaekata womatengoli timake wouti daku o Horogaka de wauku, de una naga de ai kuahaka duru ma amoko. De una gea naga de ai dararonoka kohadararono de gea hiadono naa o duniauku duru yodararonuku abe ma titi unangino.

Himatoko 20:11

De gea ipaha de ahao ngohi tamake o pareta ma kadera ma hohailoa moi ma gare-garehe abe duru kohaamoko. De Una abe naga wogogerukuoka ma kaderauku, Unangoo timake. De ka itodokanino de o dunia de ma dihangoo ka aiaho de ko iliokaua, abe gea hoka iloara Ma Jou ai himangoka de aino.