Lukasa 19:26 - Ma Jou ai Demo-demo o Totobelohoka

²⁶ “Masara ma koano wotemo wato, ‘Koua! Kiani niwihidoaka unangika abe ma tiwi ilamoko unangoka. Angamoi onagona dika abe o tagongo moi tahidoakoka de gea manga tagongo yao irahai hiadono yamake ma utumu genangino abe ihihiutumu ngohino, onangika gea ka utuohi ilamoko ma utumu tohidogo. Masara nako o nyawa abe tahitagongoka moi onangika ma gea yao ko irahaiua hiadono ko kia-kiaua ma utumu yamake genangino de ngohioli ko tamakeua ma utumu onangino, gea ahao tagoraka onangino ma tagongo abe tahidoakoka. Abe ngaro ma hohutulu dika manga tagongo, ma gea tagoraka onangino.’”

Lukasa 19:26 ပူးပေါင်းရင်းမြစ်များ

2 Samuele 7:15

Nako o Saulu de Ngohi tihigutioka o koano ma kaderaino la ngona ka idadi nituruuru, ma oraha gea abe ahi dora ko itagiokaua unangika. Masara to ngona ani ngofaka, abe to una ai kuaha ko iwa ma bobaha, Ngohi tohibehehongo duru ko iwa ma oraha abe ahi dora ko itagiokaua unangika.

Matiusu 13:12

De onagona dika abe ma hohutulu yotoihene de ma titi yataoko itiai gea ahao idogo-dogo manga tobahioriki hiadono to ona manga tobahioriki ilamoko. Masara abe onagona dika ko yotoihenua, to ona manga tobahioriki hatoli ko iwa angamoi duru ko ilamokua. De mangale ma titi ona ko yotoihenua ho ngaro to ona manga tobahioriki naga ma hohutulu dika masara ahao enangoo ka yawohanga hiadono duru ko iwaka manga tobahioriki.

Maruku 4:25

Ho onagona dika abe ma hohutulu yotoihene de ma titi yataoko itiai ahao ka idogo-dogo manga tobahioriki. Masara onagona dika ko yotoihenua ho manga tobahioriki hatoli ko iwa, ona gea ngaro manga tobahioriki ma hohutulu dika ma ahao enangoo ka yawohanga gea.”

Lukasa 16:3

“De ahao una wotobauru-urusu o tiwi womatemo doka ai hiningaka wato, ‘Naa done sarakia ngohi todiai la tomaino-inomo, abe ahi dutu wohitogumoka ahi karajaanga unangoka? Angamoi nako o karajaanga utuoli ko takunua todiai. Abe nako tokarajaanga o nyawa manga redioka gea ahi badanga ko apoaua, de nako kiani togaho-gahoko dika o tiwi o nyawaino gea duru ihimaleke, ho ngohi naa done sarakia?’

Lukasa 19:25

“De ona yotemo ato, ‘Mia baluhu, masara una gea ani tiwi unangoka o hidoku ngimoi ibooto! Marai koaho womatengoikali nihidoaka ani tiwi o hidoku moi gea.’”

Lukasa 8:18

Ho gea Ngohi tinihigaro tato abe ahi demo niihene, gea kiani nitotoihene de nimafikiri! De nako nitotoihene, gea ahao nia tobahioriki ka idogo. Nia tobahioriki idogo de ahao ma titi utuohi ka idadi niataoko itiai. Ho onagona dika ma hohutulu yotoihene de ma titi yataoko itiai ahao ka idogo-dogo manga tobahioriki. Masara naga utu abe barikua ko yotoihenua ahi demoino ma ona yomahiromanga ato manga tobahioriki naga ma hohutulu. De mangale ma titi ko yotoihenua ho ipahaino de manga tobahioriki gea ka yawohanga ho ma bahauku de manga tobahioriki duru ko iwaka.”

Hidingoto 1:20

De o Peturusu una wogila-gila wotemo wato, “De duru ena gea abe ma dodihirainohi de o Dautu wonahingahu abe ahao idadi o Yudasika. Abe o Dautu wohitulihuku ai higiriiri ma bukuoka wato, ‘Ahao to una ai ngi o nyawa ko moiokaua yogogere genangoka.’ De naa ai demo moioli wotulihuku wato, ‘Ahao to una ai tagongo de ai gogere kiani womatengoli iwigoraka la wituruuru.’

2 Yohanese 1:8

De gea ngini kiani nimahidodiai la ufa to ona gea manga rerehene ma dodotoko nianiiki done ti ngini nia hadia, abe ma titi ma dihiraino nanga karajaanga nginioka, de gea ena done ahao ihihanga ho ko niamakeokauali. Masara nako nimahidodiai de ko nirehenua, gea ti ngini nia hadia Unangoka ahao niamake de gea niamake duru ingodu-ngodumoka.

Himatoko 2:3

De Ngohi tinihioriki abe ngini naga de nia dongohonoka, angamoi inihikangela nginika ma titi Ngohi, masara ngini ko nirehenua nia ngongakuino.

Himatoko 3:11

De naa ko itedekanokaua de Ngohi toboali, ho ngini kiani nigila-gila nimahigagao nia ngongakuika la gea nianiikohi done ahao ngini ko niamakeuali ti ngini nia lalaku ma hadia Ngohino.”

1 Samuele 15:28

De o Samuele wihingahu, wato, “Abeika, imaketero hoka ngona ahi baju natoaka, de hokogenangoo o koano ma karajaanga Ma Jou o Yawe watoakoka ngonaino! De o koano ma karajaanga gea Ma Jou wihidoaka o nauru moiikali, abe womatengo gea nako ngona de una ka unangohi ai wowango ma datoro itiai.

1 Samuele 2:30

“Ngohi Ma Jou o Yawe, o Isiraele ma nyawa manga Jou de ma dihiraino tahibehehongo ani doomu ma famika, abe o Lewi ma dutuino, tato ahao ngini ka idadi nihileleani Ngohi ka hiado-adonika. Masara ko idadiokaua hokogea angamoi ahi behehongo gea ngini inihange naa niaolukoka! Ngohi de ahi horomati tomalega onangika abe manga horomati naga Ngohino. Masara ona abe ihiemono Ngohino, kiani Ngohioo taoluku ona gea.