Lukasa 16:2 - Ma Jou ai Demo-demo o Totobelohoka

² Ho ai dutu abe wokaya-kaya wiahokino de witaere unangika wato, ‘Naa ma titi o kia hiadono toihenino o dadae ma demo abe ihidumutu ngonaika? Abe ona ato bari ngona naa ka naumo dika ahi tiwi! Ho naa tonihuloko la ngona nohiaturoka ahi tiwi ma gegetongo ma buku mata-mataika la ka idadi nohihingahu ahi tiwi hokokiahi ma oraha naa naga. De nako hiadono gea nohihingahuoka de ahao ani karajaanga ibooto ngohioka, ko idadiokaua naurusu to ngohi ahi tiwi.’”

Lukasa 16:2 ပူးပေါင်းရင်းမြစ်များ

Tobadotoko 12:14

De gea ufa hawohanga abe ahao nanga wowango ma datoro mata-mata de Una watailako homoi-homoiika. Abe nanga datoro ma rorahai de abe ma dorou, de ngaro nanga datoro abe homatohiki hodiai, masara gea mata-mata Una ahao watailako. Ho irahai la ngone hotobahingounu to Una ai mauika.

Matiusu 12:36

“De naa tinihingahuohi nginika abe ahao dokengika ma oraha Una winitailako ti ngini homoi-homoi nia wowango, de ma wangeoka gea kiani nimahitararono Unangika ma titi nia demo mata-mata abe ka nifeto-feto dika ma oraha nia wowangoino naa de nitemo-temo.

Matiusu 20:8

“De o wange ihumuririhuku ho ma dutu wahuloko ai duduhunu abe wahitobahiaturu ona yotobakarajaanga wato, ‘Abe ona yokarajaanga o wange naa, ona mata-mata nahokino de manga karajaanga ma hasili nahikokidoaka onangika gea. De ihira-hira nahokino ona abe ahao kangano o takoro motoa de tahikarajaanga. De ahao ona abe o takoro hange de ahao yomulaenge yokarajaanga, onangoli nahokino. De ka hokogea dika hiadono ona abe yohira-hira yokarajaanga, ona ma bobahaka de ahao nahokino de nahidoaka manga karajaanga ma hasili.’ Hokogea wihuloko ai duduhunika.”

Lukasa 12:20

“Masara de ahao Ma Jou witaere unangika wato, ‘Ngona duru nobodo! Angamoi duru o futu naa dika de ani bobaha adonoka. Ho bote onagona ahao yamake to ngona ani kiahonanga mata-mata abe ka nomatobatoomuino ngonaika?’ Hokogea Ma Jou ai demo wokaya-kayaika.”

Lukasa 12:42

De o Yesusu wopaluhu wato ai demo ma dumutu onagonaika dika abe yodadi to Una ai duduhunu ma gou-goungu. Abe Una wohitararono wato, “De naga o tau ma dutu ai duduhunu womatengo abe ai karajaanga wao duru irahai ma dutu ai tauoka. Ho ma dutu gea widosanangi unangika ma titi ai tagongo mata-mata wodiai irahai, abe hoka ma duduhunu gea wahiaturu ma duduhunu ma nyawa utuoli manga karajaanga ma tauoka gea, de wohiaturoo abe manga inomo o kia yaolomo o tau ma goronaka gea.”

Lukasa 16:1

De ahao o Yesusu wadotoko abe iwinii-niikika ma titi o tiwi wato, “Naga womatengo wokaya-kaya, de una wihikarajaanga womatengoli la wotobauru-urusu ai tiwi mata-mata. De ipahaino de ahao naga abe iwitae wotobauru-urusika ato bari ko wohidodiaiua de ai dutu ai tiwi ho ka waumo dika.

Lukasa 16:3

“De ahao una wotobauru-urusu o tiwi womatemo doka ai hiningaka wato, ‘Naa done sarakia ngohi todiai la tomaino-inomo, abe ahi dutu wohitogumoka ahi karajaanga unangoka? Angamoi nako o karajaanga utuoli ko takunua todiai. Abe nako tokarajaanga o nyawa manga redioka gea ahi badanga ko apoaua, de nako kiani togaho-gahoko dika o tiwi o nyawaino gea duru ihimaleke, ho ngohi naa done sarakia?’

Roma 14:12

De ai demoino gea de itararono abe ahao ngone homoi-homoi kiani homahitararono Ma Jouika abe ma titi nanga wowango ma datoro la ahao Una dika womaputuhu ma titi ngone.

1 Korintusu 1:11

Hokogea togahoko angamoi naga o ngo Koloe ami ria-dodotino abe ihihingahu ngohino ma titi ngini. De ona gea ato bari naga o ribuutu nginioka.

1 Korintusu 4:2

De abe ma titi Una womihitagongo ngomino, naa o demo moi abe duru igoungu ato, onagona dika abe o nyawa utu yahitagongo moi onangika, ona gea kiani yomahitaana de yatobagou-goungu abe manga tagongo gea yodiai itiai.

1 Korintusu 4:5

Ho ngaro ufa ma oraha naa de ngini nimitailako ngomi naa, angamoi o hitailako ma oraha ko adonuahi. Masara koaho niodamaa dika hiadono nanga Baluhu idodutu woboali, angamoi ma oraha gea de ahao Una o kia dika agogonika o fufutuika, gea Una wale de wao ma dodawangeino. Abe ma oraha gea Una o nyawa manga hininga de manga hidee watailako de wahimatoko. De ahao o nyawa homoi-homoi yamake ma higiriiri Ma Jouino abe itiai yamake.

2 Korintusu 5:10

Angamoi ngone homoi-homoi ahao kiani homakokiokoino o Yesusu Kristusu ai himangoka abe ma oraha wonatailako nanga datoro homoi-homoi abe nanga badangokahi hodiaioka. De ma oraha gea wonahibalaha ngoneino de ma rorahai ma titi nanga datoro ma rorahai abe hodiaioka. Masara abe nanga datoro ma dorou abe ngone hodiaioka, de gea ahao wonahibalaha de ma dorou ngoneino. De gea ma titi hiadono ngomi ka ihikaika mia hininga ma dumutu la miato wiwihisanangi Unangika dika.

1 Timotiusu 4:14

De ufa ani hiakunu Ma Jouoka de aino gea ufa nodogunoaika. Abe nengokadau ani hiakunu gea namake ma oraha ona o gareja ma hihira inifokumu de initingakoka Ma Jou ai karajaangika. Abe ma oraha gea inifokumu de Ma Jou o Womaha wahimatoko de wahitararono abe hokokia wonihiakunu ngona. Ho ufa namalaika ani hiakunu gea.

1 Timotiusu 5:24

Ho naa tohigalioli ahi behehongika kangano, abe ma titi kiani nohidodiai nairiki de nafokumu o gareja ma hihira. Angamoi ma oraha nairiki de kiani nomahohininga abe o nyawa utu manga howono duru itararono hamake, de ngaro ona ko yamakeuahi manga hohowono ma titi manga howonino, ma, ngone hohiorikoka ahao kiani amake. De masara naga o nyawa utuoli abe ihuha hamake to ona manga howono, de hatoli ma dekana ipahaika de ahao ngone hahioriki manga datoro hokokia.

1 Peturusu 4:10

De ngini homoi-homoi niaborimakeoka nia hiakunu Ma Jouino abe Una winihidoakoka la ngini nimakokuduhunu nia doomuoka. De tanu nia hiakunu gea ka moiua dika masara naga irupa-rupa ma hiakunu, de ma hiakunu gea Ma Jou ai hiowa nginiuku. De gea nia hiakunu abe niaborimakeoka, gea ngini homoi-homoi kiani niapake nia doomu ma goronaka la nimaketeleleani nia gogianongoruoka. De abe ngini niaboripake nia hiakunu, gea nianiiki itiai Ma Jou ai gareja ma hiaturu ma titi ngone ai nyawaino.

1 Peturusu 4:5

Masara ufa niawohanga abe ona ahao dokengika de kiani yomahitararono Ma Jouika ma titi manga datoro homoi-homoi abe yodiaioka. De Una gea womahidiaioka la watailako de waputuhu ma titi o nyawa mata-mataika manga wowango ma datoro, abe ngaro o nyawa abe ma oraha naa ka yowangohi eko ona abe yohone-honengoka.

Himatoko 20:12

De ahao tamake o nyawa mata-mata abe yohone-honengoka yoboaino ma kadera ma gare-garehino gea la genangoka yomaokoino. De gea o nyawa abe ma dihira ngaro manga wowango ma gogere hatoli ikurutiye eko ngaro ka itipokouku dika, de ngaro ona abe nengokadau de yohonenge o gahi ma lukuoka eko ngaro o tonakoka yohonenge, ma ona duru mata-mataika abe o hone-honenge ma ngioka ona yokokiboaino to Una ai kadera ma gare-garehino. De genangoka ona yomakokiokoinoka de ahao Ma Jou wohiaturu la o buku muruono naga yaoino abe gea ma dola o nyawa gea manga wowango ma datoro homoi-homoiika yodiaioka, ho gea mata-mata ihikokitulihukuoka abe ma buku gea ma goronaka. De ma buku gea yafelenga de ahao o nyawa gea homoi-homoiika yaboriurusu ma titi to ona manga datoro hokokia naga ihitulihuku ma buku ma goronaka, la genangino ahao ihioriki manga hohowono homoi-homoiika kiani hokokia. De hokogea Ma Jou wohikaaturu la mata-mata duru ihioriki itararono abe to ona gea manga hohowono duru itiai yamake angamoi duru itaana de to ona manga wowango ma datoro. De genangoka naga o buku moioli abe enangoo yafelengaika, de gea o Wowango ma Buku. Abe ma buku ma dolauku gea naga manga romanga abe onagona dika naga genangoka, ona gea yamakeoka o wowango ka hiado-adonika.