Kolose 3:15 - Ma Jou ai Demo-demo o Totobelohoka

¹⁵ De ngini naa kiani nimahigunoa la o Kristusu ai hininga ma miriidi inihipareta nia kokihiningaka hiadono ngini duru nimakao irahai abe de o hininga ma miriidi gea. De gea kiani nimakao irahai abe de o hininga ma miriidi mangale ma titi ma dodihiraka nagau o Kristusu ai hininga de ai hidee nginika, abe Una winiahokoka de winihidadioka hoka o badanga moi la ngini nimakao irahai. De ka ihikaika kiani ngini nitarimakase Ma Jouika.

Kolose 3:15 ပူးပေါင်းရင်းမြစ်များ

Higiriiri 107:22

De duru itiai la ona yomahihuba manga tarimakase ma huhuba Ma Jouiye. De ihinyanyi de manga gogarago ma titi abe Una wodiai ma rorahai.

Yesaya 57:15

Abeika nitotoihene Unangika abe duru Wokokurutiye, abe Una wohikoano ka hiado-adonika de ai romanga duru ma debi-debini. Abe hokonaa to Una ai demo, wato, “Ngohi naa ahi gogere o ngioka abe duru ikokurutiye de duru itebi-tebini, masara Ngohi togogeroo o nyawa manga hidogoronaka abe manga hininga duru ihuha de abe yomahitipokouku. De gea togogere onangoka la tahiwangoro ona manga hininga ma dodipokouku, la tahigaro ona manga hininga ihu-huha hiadono manga domoroini ka ilioli.

Yesaya 57:19

De gea talaru ipaha de ahao manga hininga aturuuruoka hiadono o higiriiri ma demo ihupu manga uruoka de aino. De ngaro ona manga gurutika ekola ona manga digi-digino, masara Ngohi tahidoaka ona mata-mataika la manga hininga duru iuwinoka angamoi taduhunu manga kangela homoi-homoiino.” Hokogea o Yawe watemo ai nyawaika.

Yunusu 2:9

Ma nako ngohi, ka Ngonaika dika totarimakase, de o higiriiri tohinyanyi ma oraha tomahuba Ngonaiye, De gea abe nengokadau tonihibehehongokau tato ahao todiai, gea ngohi tagoungu ahao todiai, Angamoi ka Ngona Ma Jou o Yawe dika abe ka idadi ngomi o nyawa nomihihohe mia hohowonino.”

Yohanese 14:27

“De naa ahi hidoaka nginika gea o dame, gea to Ngohi ahi dora ma dame tinihidoaka nginika. Ahi hidoaka gea ko imakadaenua abe hoka niamake o duniaka. Ho ngaro ufa nimahigunoa nia hininga ma dumutu o huhaika, de abe ahao niaohana ngaro ufa niomodongo genangika.”

Yohanese 16:33

“Ahi hingahu mata-mata naa tinihingahu nginika la ti nginioo nia hininga de ma miriidi angamoi nigogere Ngohioka. Ho nia miriidi gea naga ngaro nigogerohi o duniaka naa, de ngaro kiani o huha niamake. Ho ufa nia hininga aliko o huhaika gea! Kiani nikokisanangi dika! O dunia ma kangela naa Ngohi tohikalaka la nginioo ka idadi nilaku.”

Roma 1:21

Ho ona abe ko iwingaku-ngakua, gea Ma Jou wahohowono onangika angamoi barikua ona iwihioriki abe Una naga, masara ona ko iwihigiriiriua Unangika abe iwitemo ato, “Ngona nagoungu Ma Jou nokokurutiye.” De duru ko iwa abe yotarimakase Unangika ato, “Mia Jou, ngomi mitarimakase Ngonaika ma titi mata-mata nodiaioka la nomiduhunu ngomi naa.” De mangale ma titi ona ka yoluku iwihigiriiri de yotarimakase Unangika, enangoo ma titi moi hiadono duru itiai Ma Jou wahohowono onangika. Ho ona gea duru ko iwa manga horomati Unangika, masara yomahohiningaiye dika abe ma titi Ma Jou Una hokokia, de manga hininga ma dodagi gea duru irehene ma gurutika ho ka parahaja dika. Ho genangino ma titi hiadono manga hininga ma homoa de gea idadi ifufutuoka.

Roma 14:17

De naga ma titi moioli hiadono ngone koaho homahidodiai done homaketetaere de nanga gogianongoru ma titi o inomo dika. Angamoi ngone homoi-homoi homahigunoa la Ma Jou wonahikoano nanga boriwowangoka. De hohioriki abe nako ngone homahigunoa la Ma Jou wonahikoano, gea ko ma titiua abe o inomo ma hiaturu haniiki eko o ngokere ma hiaturu haniiki. Masara tanu gea ihititi nanga wowango ma totiaiino, abe kiani homakao itiai de nanga gogianongoru. De nagali ihititi o garagoino abe hamake Ma Jou o Womahino. De nako gea mata-mata naga nanga hiningaka, gea hodadi o kokawaaha abe duru hiniiki nanga koano Ma Jouika.

Roma 15:13

De naa tinigahoko Ma Jouika abe Unangoka dika nanga nganganono ma titi. De tinigahoko Unangika la winihidoaka o garago de o hininga ma miriidi nginika mangale ma titi nia ngongaku nagau Unangika. De hokogea tinigahoko la hiadono Ma Jou o Womaha ai kuahaino de ka idogo-dogo nia nganganono Ma Jouika.

Roma 5:1

De naa Ma Jou wonaetongoka wato ngone hototiai abe ma titi nanga ngongakuino, de genangino hohioriki abe Una wonahikadameoka ngone de Ma Jou hiadono ngone ko homakalawanokaua de Una. De gea wonahikadame ma titi nanga Baluhu idodutu o Yesusu Kristusu ai datorino.

1 Korintusu 10:17

De gea o roti ka o gahumu moi dika abe hohikokodoku, masara igoungu ngone howoe-woe haolomo ka moiino dika gea. Ho gea inahitaana abe ngone naga nanga borigogao nanga gogianongoruika ona mata-mataika. Ho naa inahitaanoli abe ngone howoe-woe hodadioka o badanga moi.

1 Korintusu 7:15

Masara nako ngini abe nia fekata eko nia rokata ona ko iwingakua, de ona aputuhoka ato inidokaowara nginino, gea niahigunoa dika la ona yosobo. Angamoi nako hokogea manga putuhu, ngini niwingaku-ngaku ko iwaka nia papakiti onangika abe ko iwingaku-ngakua. Masara iti ufa nginioka ma titi la ona ato yosobo, ma kiani duru nihitaili la ufa nimakoluku. De iti nimahohininga abe Ma Jou winiirikoka de winihidadi to Una ai nyawa la wato o tobariidi winihidoaka nia hiningaka, ho ngini ufa nimakalawana ngini de nia fekata eko nia rokata, masara kiani nimakao irahai la ma riidi gea niogoana.

2 Korintusu 4:15

De ngomi naa mia kangela de mia bodito ka mimatongohono la genangino de ngini niamake ma utumu. Abe nako ngomi ka miahingahu-ngahuohi ai Abari ma Rorahai hiadono Ma Jou ai hininga ma owa utuohi ihikabarihi o nyawa-nyawaika, gea ahao to ona manga tarimakase Ma Jouika ka idogo-dogo hiadono duru iwihigiriiri Unangika.

2 Korintusu 9:11

De Ma Jou ahao Una winihidogo nginika la ahao nginioli ka idadi niahikokodoku to Una ai hidailako o nyawa yowoe-woeika. Abe ti ngini nia dora ma hidoaka ngomi ahao mitotaka o nyawaika de ona gea ka de yamake de duru yotarimakase Ma Jouika.

Efesusu 4:16

De abe ma titi ngone o gareja ma nyawa nanga haeke gea o Kristusu, Una gea ka idadi tihiketero hoka o nyawa manga pea. Abe nako womatengoani ai pea, gea ihiaturu ai badanga ma kiahonanga mata-mataika. De nako ai badanga ma kiahonanga imaniiki de ma pea ma hiaturu, gea ahao ma kiahonanga ka idadi imakokuduhunu de imakokiniiki. De gea hokogenangoo de ngone abe ai garejaka, angamoi ngone homoi-homoi hodadioka ai badanga ma kiahonanga. De Una gea wonahikaaturu ngone ai badangoka la nanga gogere homoi-homoi itiai. De gea ngone mata-mata homahiborigagao nanga gogianongoruika abe imaketero hoka o badanga ma kiahonanga mata-mata imahigagao utuika abe ma date-datekika. Ho iti abe ngone homoi-homoi hodiai nanga borikarajaanga abe Una wonahitagongoka la genangino homakokuduhunu. De gea ahao ngone homakokuduhunu nanga gogianongoruika la ka idadi hokokiaguru de hokokibaluhu Unangika abe ma titi hapake nanga doraino. De hokogea o Kristusu ai hidee ma dodihiraino hiadono o hiakunu wonahikokodoku ngone homoi-homoiino la wato genangino wonahingodumu ngone ai gareja ma nyawa hiadono ai gareja gea duru ingodu-ngodumoka.

Efesusu 4:4

Angamoi ngone naa mata-mata igoungu hodadioka hoka o badanga moi Unangoka, de abe Ma Jou o Womaha, Una gea ka womatengo dika, masara Una naga womanoa ngone homoi-homoi nanga badangoka. De ngone mata-mata nanga nganganono gea ka moi dika abe ahao dokengoka nanga utumu hakokimake.

Efesusu 5:1

Ho mangale ma titi ti ngini nia howo-howono Ma Jou waofioka, ho ngini nia wowango ma goronaka kiani nimaaduru abe hoka to Unangoli ai hininga. Angamoi ngini nidadioka to Una ai ngofa-ngofaka idodutu de duru winidora nginika, ho kiani to Una ai hininga nimaaduru nia wowangoka.

Efesusu 5:20

De ngini kiani ka ihikaika nitarimakase Ma Jou nia Babaika abe ma titi o kia dika idadi nia wowangoka. De gea nitarimakase de niafetongo nanga Baluhu idodutu o Yesusu Kristusu ai romanga. De nako nimahigunoa la Ma Jou o Womaha winihihira-hira nia wowangoka, mata-mata gea ahao idadi nginioka ma oraha nimatoomuino.

Kolose 1:12

De moiohi minigahoko, la ngini ka ihikaika nitarimakase nanga Babaiye angamoi Una winihigunoa la nginioo ai owa ma hidoku niamake Unangoka de aino. Abe Ma Jou ai kokawaaha mata-mataika Una wahikokodokuoka ai owa onangika, de ona yokokigogere ai dararonoka. De naa nginikaoo winihikodoku ai owa la hiadono nginioo ai owa niamakeoka de nigogere ai dararonoka. Ho ma titi ena gea hiadono koaho nitarimakase Unangiye. Ho ngomi naa ka ihikaika minigahoko Ma Jouiye la ngini ka idadi nioaguru ai mau ma goronaika.

Kolose 2:7

Abe ngini kiani nimahingutuku Unangoka de kiani ka ihikaika niwango de nioaguru Unangika hiadono nia buturungu ka idogo-dogo nia ngongakuika. Abe gea duru imakadaene de ma dodotoko abe hoka nengokadau inidotokokau. De moioli kiani nidiai, de gea nia hiningaka ma tarimakase kiani naga de ma boloioka hiadono ka ihikaika nitarimakase Ma Jouiye.

Kolose 3:17

Ho, ngaro o kia dika ngini nidiai de ngaro o kia dika ngini nitemo, ma, iti nia datorino de nia demoino gea de niwihisanangi de niwihigiriiri nanga Baluhu idodutu o Yesusika. De kiani ka ihikaika nitarimakase Ma Jou nia Babaika ma titi nia gogere nanga Baluhoka.

1 Tesalonika 5:18

de ngaro o kia dika niohimanga ma gea kiani ka ihikaika nitarimakase Ma Jouiye. De hokogea kiani ka ihikaika nidiai angamoi hokogea Ma Jou ai mau ngone mata-mataino abe hogogere o Yesusu Kristusoka, abe woigo wato ngone ka ihikaika hotarimakase Unangika.

1 Timotiusu 2:1

Ho naa, ahi ngofaka, abe ma titi ani karajaanga o garejaka, duru ihira ngohi tonihigaro la ngini niwingaku-ngaku nimaniata de o nyawa mata-mataika niagahoko Ma Jouiye. Abe kiani ona niagahoko Ma Jouiye la to Una ai owa de ai duduhunu ona yamake, de abe ma oraha nimaniata de kiani nitarimakaseoo Ma Jouika ma titi ona.

1 Timotiusu 6:12

Abe ma dihira Ma Jou woniahoko ai wowangoino gea abe ma oraha nomahingahu o nyawa manga ngoe manga himangoka nato, “Ngohi naa tingaku nanga Baluhu idodutuika o Kristusika.” Ho gea ma oraha abe ahao ningaku de woniahoko ai wowangoino de ka hiadono ahao ani wowango ma baha o duniaka, gea tohiketero abe hoka o nyawa yomaketejai-jai yomapopaata de yomaribuutu la ato ka idadi yolaku. Abe ngonaoo ma kiani ani wowango ma dodagi ma goronaka de kiani nomaribuutu la hiadono ani ngongaku ka idadi ilaku ani wowangoka, de gea ani wowango ma baha adonoka de ahao nomahitongonaka abe gea ani hadia ani wowango ma ngangoino. Abe ma dihira de Ma Jou woniahoko, gea woniahoko la ma bahaika de ka idadi nasoino ani hadia ani wowango ma ngangoino gea.

Ibarani 13:15

Ho ngone naa irahai ka ihikaika hihigiriiri Ma Jouika abe ma titi o Yesusu nanga Duduhunino ho hiadono itagi nanga higiriiri Ma Jou o Babaika. De gea nanga higiriiri ma demo Unangika ahao Ma Jou wamake imaketero hoka nanga huhuba eko nanga hidoaka moi Unangiye. Abe ngaro o aewani ko homahihubakaua Unangiye masara abe ma oraha ngone hihigiriiri Ma Jouika de hifetongo to Una ai romanga, de gea ena nanga uruino ma hofoko abe ka idadi ka ihikaika hihidoaka Unangiye la gea idadi hoka nanga huhuba Ma Jouika.

Himatoko 7:12

“Amin! Gea duru igoungu o nyawa manga higiriiri ma demo gea Unangika! To ngone nanga Jou, Una gea duru wososawaro! Una duru de ai kuahaka ma amoko de duru ko ai buturungu! Ho kiani hihigiriiri Unangika ka hiado-adonika! To Una ai romanga kiani hohilamoko! De nanga tarimakase de nanga horomati kiani Unangika dika hihidoaka naa de ka hiado-adonika! Amin!” Hokogea ma malaekata manga higiriiri ma demo Unangika.