Ibarani 9:22 - Ma Jou ai Demo-demo o Totobelohoka

²² Ho igoungu abe nako haniiki Ma Jou ai Pareta, gea ngade-ngade mata-mataika kiani ihitebini ma titi o awunino. De nako o howono la aofioka, gea kiani o awunu iuihi. Angamoi nako ko iuihua o awunu, gea duru ko idadiua o howono aofi. De kiani hokogea idadi angamoi o howono ma ngongofi gea kiani naga moi ihonenge, de o awunu gea ma dodunguu abe o hohonenge idadioka. Ho genangino ka idadi hamake abe ngaro o behehongo ihira-hiraika eko ngaro o behehongo ma hungioli, masara ma behehongo hinootoo ihititi o awunino.

Ibarani 9:22 ပူးပေါင်းရင်းမြစ်များ

Gogao 4:20

Abe una wodiai kiani waniiki imaketero abe hoka ona o hohidemo ma hirete yodiai de to ona manga howono ma huhuba. Ho una wodiai imakadaene la gea o Isiraele ma nyawa wahitebini Ma Jou ai himangoka la Ma Jou manga howono gea wahiapongo.

Gogao 4:26

De o Isiraele ma nyawa manga dimono ai howono ma huhuba ma kabingi ma haki mata-mata, kiani una o hidemo wohidaulu gea daku o haro-harongo ma huhuba ma lokuoka. Hokogea ma hiaturu o hidemo waniiki la manga hihira ai howono ma huhuba wodiai de ma hiaturu gea duru imaketero hoka ena waniiki de o gogao ma huhuba abe yodaulu de o uku. Hokogea ma hiaturu la ka idadi o hidemo gea nia hihiraika wihitebini ai howonino la ka idadi Ma Jou ai howono gea wihiapongoka.”

Gogao 4:35

De ahao una kiani o domba ma haki mata-mata ma pokoro ma goronaka wagoraka imakadaene hoka yodiai de o gogao ma huhuba ma aewani. De ahao ma hidemo wale ma haki gea de wakelenga wohiloku-loku o huhuba utu abe kanganoinohi wakelengaka o Haro-harongo ma Huhuba ma Ngi ma lokuoka la ka idadi o howono ma huhuba mata-mata gea wohidaulu. De hokogea o hidemo wohihuba de o uku o nyawa ai howono ma huhuba Ma Jou o Yaweiye. Abe ka de ma hiaturu gea o hidemo waniiki itiai de o nyawa gea wahitebini manga howonino abe yahitamunu de manga huhuba gea la ka idadi Ngohi Ma Jou tahiapongo.” Hokogea Ma Jou o Yawe wihidoaka o Musaika o Isiraele ma nyawa manga ngekomo la manga howono Ma Jouika waofi.

Gogao 5:10

De o kuumu-kuumu eko o namodaara utu wohihuba de o uku la de o huhuba iharo-harongo gea manga howono watamunu imaketero hoka Ma Jou ai hiaturu ma pareta itemo. De hokogea wodiai la ona wahitebini Ma Jouika abe manga howono watamunoka la Ma Jou ka idadi wahiapongo.”

Gogao 5:11

De Ma Jou o Yawe wogila-gila de ai hingahu o Musaika, wato, “Masara naga o nyawa utu abe ngaro o kuumu-kuumu eko o namodaara ma enangoo ko yapoaua yomaija ho kiani manga huhuba o gandumu abe idadioka o tarigu abe duru ialuhu. Ho ona abe yoboa manga hidemo Ma Jouika de manga howono ma huhuba gea kiani o tarigu o supa hinooto ma amoko. De angamoi gea o howono ma huhuba ho ko idadiua naga ma hisapuru o saitunu ma minya eko ma hisapuru o manyanyi.

Gogao 5:12

Ho yomahiadono nia hidemoika de una wale manga tariguino o okutu moi abe idadi o hohininga ma huhuba abe wohihuba Ma Jou o Yaweika de o uku. Ho wohidaulu hiadono itinoka o huhuba iharo-harongo ma ngi ma lokuoka duru imaketero abe wodiai de o huhuba iharo-harongo utu. De gea ena idadi to ona manga howono ma huhuba.

Gogao 5:18

Ho onangoo kiani manga huhuba o duduonino o domba ma nauru ma baluhu abe ko iwa ma heluku eko ma nabo ma badangoka. De o huhuba ma domba gea kiani ma ija yaetongo itiai. De hokogea ma ngekomo la nia hidemo manga howono ma huhuba wahihuba ibooto de una wahitebini ona Ma Jou ai himangoka abe manga howono watamunoka la Ma Jou ka idadi wahiapongo.

Gogao 6:7

De ahao una o hidemo wahihuba manga huhuba gea ma titi manga howono de hokogea wahitebini Ma Jou ai himangoka angamoi manga howono yatamunoka ho Ma Jou ka idadi de manga huhuba gea wahiapongo.” Hokogea Ma Jou o Yawe ai hiaturu la o Isiraele ma nyawa ka idadi yapaliara itiai manga gogao Unangika de o nyawaika.