Ibarani 9:19 - Ma Jou ai Demo-demo o Totobelohoka

¹⁹ Abe duru ma dodihiraino de o Musa wadofanga Ma Jou ai Pareta mata-mata o Isiraele ma nyawaika. De gea wadofanga ibooto de ahao wale o hapi ma ngofaka ma awunu de o kabingi ma awunu de gea wohikasapuru de o akere. De ahao o hisopo ma jaga muruono naga de o ngoere ma doka-dokara abe o domba ma gogoino yodiai, de enangoo gea waleino de wapake la ma awunu wohibarihi Ma Jou ai Pareta ma bukuku de ma nyawaikaoo mata-mataika.

Ibarani 9:19 ပူးပေါင်းရင်းမြစ်များ

Higiriiri 51:7

Duru tomatoduba de tonganono la Ngona Ma Jou nohihitebini ahi howonino, Ngaro de o huhuba ma awunu napake la ahi peseke nohihihanga. Nohihiohiki ngohi hoka ona abe yapado nahitebini manga panyakeino, De ahao to ngohi ahi medebini imaketero hoka o gotoaka ma gogo ma magarehe.

Huhupu 12:22

De nia domba ma awunu niatakunu o bokoluku de gea ena niapake la nia dodunguu abe nia totilakuru ma domba niatomaka. Ho nia gegehe nimale o hisopo ma jagaino de ena gea niatono-tonouku nia bokolo homoi-homoiuku de ahao nia domba ma awunu gea nihiehe nia ngorana ma liateiye arihonongaiye de dakea ma dukurino. De o futu moiino gea ufa ngini nihupu nia tauino ka hiadono o ngorumino o wange ipotokaiha.

Yesaya 52:15

De naga ma oraha ahao iboa abe ma moioli Una wahitodokana o nyawaika. De gea o dunia ma nyawa de o kokoano ma ngoeika duru wahitodokana ma titi ai gogere ma gogurutiye. De o kokoano gea ko kia-kiaua yotemo ai himangoka. Angamoi gea de ahao ona yamake de yataoko to Una ai hininga ma dumutu abe ma dodihirainohi de ko ma moiuahi yoihene. Ho ma dihiraino ona duru ko ihiorikuahi ai hininga, masara gea de ahao ka idadi yataoko itiai.” Hokogea Ma Jou ai hingahu ma titi ai Huhuloko.

Gogao 1:10

“De nako manga huhuba iharo-harongo yomahihuba o aewani utu, abe o domba eko o kabingi, enangoo kiani yale manga duduonino ma nauru abe duru ko iwa ma heluku eko ma nabo.

Gogao 3:6

“De nako nia hininga la nia gogao ma baliarino ma huhuba nia domba eko nia kabingi, de ko nia hapiua, ma gea ka idadi de ngaro ma nauru eko ma beka ma ka idadi. Masara kiani nihidodiai niairiki ma domba eko ma kabingi la ena gea ko iwa ma heluku eko ma nabo ma badangoka.

Matiusu 27:28

De ahao to Yesusu ai baju yahuputohi de iwihinoauku o Yesusuku de o baju ma doka-dokara ma koo-kokihi duru ma rorahai abe manga biaha o kokoano yomahitobahinoa-noa, de gea iwimia-mia ato, “Naa ani baju, koano!”

Maruku 15:17

De ahao moi o baju ma wuu-wuu duru ma rorahai abe manga biaha o kokoano yomahinoa-noa de ena gea iwihinoauku o Yesusuku de iwimia-mia ato, “Naa ani baju, koano!” De ahao aleino o gumi-gumini de ma hihikaka de agale-galeino de iwihinoauku ai peauku de iwimia-miali ato, “Ani koano ma sapeo naa minihinoauku!”

Maruku 15:20

De iwimia-mia ibooto de ahao ma baju ma wuu-wuu ma rorahai gea ahuputoka de iwihinoaukuoli to Una ai baju. De ahao manga tentara gea iwiaoika o Yesusu la ato iwihidapaku o gota isosalioaika.

Yohanese 19:2

De gea o Roma manga tentara iwipoha ibooto de ahao o gumi-gumini abe de ma hihikaka agale-galeino la iwihinoauku ai peauku. Ho ma gumi-guminino gea yodiai hoka o kokoano manga sapeo. De ahao iwihinoaukuoli o baju moi ma wuu-wuu la ato iwihidadi hoka o koanoli ai rupa.

Yohanese 19:5

Ho ka de o Yesusu wohupuino de ona iwimake de ai sapeo o hihikaino de ai baju ma wuu-wuu. De o Pilatusu ko waniikua manga hininga ho wotemo la wato ngaro ufa iwitoma wato, “Abeika niwimake o nauru naa, ai buturungu duru ko iwa!”

Ibarani 1:1

Duru ma deka-dekanuku abe nanga totofora nagahi de ma ngoe Ma Jou wotemo onangika abe wapake ai uru ma dodofanga la ai hingahu ma demo ona ahao yadofanga nanga totofora utuikali. De to Una ai hingahu ma demo nanga totoforaika, gea ka moiua dika ma rupa, masara ma rupa imaketemomomoi ai hingahuino wapake la ai hingahu ma demo gea wahingahu nanga totoforaika ma dodihiraino gea.

Ibarani 10:22

Ho abeika ngone ngaro ka homahitigi Ma Jouika! Angamoi nako to ngone nanga hininga, gea ena ihitebinoka ma titi o Kristusu ai awunino hiadono ma dorou ko iwaka genangoka, ho gea ko hohawanokaua o hohowonika. De gea ngone ngade-ngade homaketero abe hoka ona o hohidemo Ma Jouika abe ona gea yomahiohikoka de o akere duru ma debi-debini hiadono manga peseke duru ko iwaka onangoka. Ho ma oraha naa duru ko iwaka nanga ngekomo ma hungi ma goronaka yodurutukuku, ho abeika ngone ngaro ka homahitigi Ma Jouika de nanga hininga ma gahumu, de nanga ngongakuoo ma gahumu Unangika, angamoi ngone hagou-goungu homahinganono to Una ai karajaangika abe Una womahidoaka ma titi ngone.

Ibarani 10:4

De hokogea itagi manga hiningaka angamoi ngaro o hapi ma awunu eko o kabingi ma awunu, ma gea mata-mata duru ko yakunua nanga howono aofi.

Ibarani 12:24

De ngone ko homakitingakikaua de Ma Jou angamoi ngone homahitiginokau o Yesusino, abe Una gea nanga Hidemo Ma Jouika ma titi nanga behehongo ma hungioka naa. De Unangino gea de hamakeoka ma awunu abe ka de inadaene ngoneino de nanga howo-howono Ma Jouika ihiofioka. De nako to Una ai awunu de to Habele ai awunu ma dodihiraino, ma ka to Yesusohi duru de ma utumoka. Angamoi nako to Habele ai awunu, ena gea hoka imagahoko o hibalaha. Masara nako to Yesusu ai awunu, ena gea inahidoaka ngoneino o ngongofi nanga howo-howonika. Ho gea mata-mata inahimatoko ngoneino abe nako to ngone nanga behehongo ma hungi naa de abe ma behehongo ma dihiraino, masara duru ka ma hungiohi naa ihohailoa de ikurutiye.

Ibarani 9:12

De ma oraha wowohama Ma Jou ai Ngi duru Kohamedebini ma goronaika o Horogaka de ko o kabingua ma awunu wao de ko o hapiua ma awunu, masara gea to Una ma hirete ai awunu abe wao doka ma goronaika angamoi genangino wonabangu ngone de wonahihohe nanga howo-howonino naa de ka hiado-adonika. Ho gea ma moi dika abe Una wowohamika genangika angamoi to Una ai huhuba ai awunino, gea ena ilaku ka hiado-adonika. Ho ngaro ufa dika Una wohigali-galioli wowohama de o huhuba wao doka ma goronaika, masara ma moi dika.

Ibarani 9:13

De nako o behehongo ihira-hiraika ma hiaturoka, de gea igoungu abe o nyawa onagona dika ko yotebinua Ma Jou ai himangoka ho ona gea duru ko idadiua yowohama ai Tauika la yomahuba Unangika. De ona gea kiani ihira yadereroukuohi onangika de o kabingi ma awunu eko o hapi ma awunu. De utu kiani o hapi ma ngofaka ma dukuuru abe gea ihihubaka, de gea kiani yadopurarahukuohi onangika la yodadioli yotebini ai himangoka de ka idadioli yomahuba Unangika.

Ibarani 9:18

De tanu hokogenangoo Ma Jou ai behehongo ihira-hiraika wohiaturu la enangoo gea ka ilaku ma titi o awunino. De gea nako o awunu naga, gea hohioriki abe o hohonenge o domaino idadioka.

1 Peturusu 1:2

De ngini naa duru ma dodihiraka de Ma Jou o Baba winihiorikokau abe ngini ahao nidadi to Una ai nyawa duru ma hohailoa. De ipahaino de idadi hokogea, abe Ma Jou o Womaha winitingaka ngini o nyawa manga hidogoronaka de aino. De abe Una winitingaka ngini, gea to Una ai hininga ma dumutu la ngini duru niwihingounu Unangika. De ufa ngini niawohanga abe o Yesusu Kristusu womahidoaka la ai awunino de ngini ka idadi niwiniiki de niwihingounu Unangika. De hokogea Ma Jou winiao nginika ma titi ma dodihirakahi de ngini winihiorikokau abe ahao nidadi to Una ai nyawa duru ma hohailoa. De ngini naa to Una ai nyawa abe tinihurata nginika. De naa ngohi tinigahoko Unangiye la ahao to Una ai hininga ma owa de ai hininga ma miriidi gea duru ma amoko winihidoaka nginika.