Ho ngona de muna, o ngofeka gea, ahao ka tinihikokadohatika, muna de ngona, de to ngona ani ngofaka de ani danonguku, de to muna ami ngofaka de ami danonguku, ona ka ihikaika yomakumusu. De gea yomakumusu ka hiadono ahao woboa womatengo to muna ami toforauku, de Una gea ahao ani pea wawedere, de ngonaoo ahao ai bobooika natuduku.” Hokogea Ma Jou o Yawe ai hohowono o dodihaika.
Ibarani 2:9 - Ma Jou ai Demo-demo o Totobelohoka9 Masara ngaro to ngone o nyawa nanga kuaha ko ingodumuahi, masara nako o Yesusu, Una gea duru de ai kuahaka ma oraha naa, angamoi Una iwigorakiyeoka de iwihoromatioka, de naga de ai medebini ma dararonoka. Ho abeika, Ma Jou ai behehongo abe ngone o nyawaino ma dodihiraino gea abe wato wonahidoaka o kuaha ngoneino, gea de Una wohingodumoka ihira abe o Yesusino. De gea tonaleha, ma titi o kia hiadono o Yesusu ma oraha naa naga de ai kuahaka? De gea ma titi abe ma dodihiraino de iwihitipokouku jai-jai ma oraha Ma Jou wihidadi o nyawa, ho nako to Unangoo ai gogere o duniaka de o malaekata manga gogere, masara ma oraha gea de ka o malaekatohi manga gogere hatoli ikurutiye ma hohutulu angamoi Una wodadioka o nyawa. De hokogea Ma Jou wohiaturu la o Yesusu wodadi o nyawa la ka idadi Una wohonenge ma titi ngone mata-mata, de gea ai datorino de ngone ka idadi hamake Ma Jou ai hininga ma owa. Ho mangale ma titi o Yesusu womahigunoa la iwihitipokouku de iwihikangela ka hiadono wohonenge, ho gea ena ma titi hiadono Ma Jou duru wigorakiyeoka la ka idadi o Yesusu wamake o horomati de o medebini ma dararono. အခန်းကိုကြည့်ပါ။ |
Ibarani 2:9
39 ပူးပေါင်းရင်းမြစ်များ
Nanga koano ma dihiraino o Dautu de ai ngofa-ngofakuku de ai totoforauku ona yomaketeturuuru yodadi to ngone nanga koano, masara ahao naga ma oraha abe ko hokogenangokaua. De abe ma oraha o koano ma kuaha agoraka o Dautu manga tauoka de aino, gea imaketero hoka o gota ma amoko atolangoka de ma hou to ena ma agere dika. Masara dokenangikali de ahao naga ma oraha abe manga agere gea itorioli. De gea ma titi abe o Dautu ai totoforaukuino de naga womatengo woboa de unangoli wodadi wokoano.
“De hokogenangoo abe ma titi ti ngini nia baju. Angamoi ngaro nihuha ma titi nia baju nimahinoa-noauku, masara gea ko idadiua iniduhunu nginika. Ho naa moi tinihigaro la ufa ngini nihuha nia hiningaka. Angamoi abeika nimalega o bunga-bungaika gea abe ena ma hirete iwangoiye o dolaka de abe duru ma hohailoa. De nionganonohi abe ma titi hokokia idadi hiadono naga to ena ma hohailoa. Angamoi ena gea ko ikarajaangua de ko imadiaiua ma baju, masara abeika duru ihohailoa.”
Ka de hokogea o Yesusu wotemo de o Yahudi ma nyawa iwipaluhu Unangika ato, “Gea ho itaana ngona naa inikitokata! Ani demo hokogea de minihiorikoka! O Abarahaama wohonengoka de Ma Jou ai uru ma dodofangoo yokokihonengoka. Ho mode sarakia hiadono ngona naa nomihingahu nato nako o nyawa inihigihene gea ko yohonengua?
De ma oraha naa Una naga daku o Horogaka wokoano de de Ma Jou abe to Una ai nirakoka wogogere. De imaketero abe hoka o Baba wohibehehongoka, Una wihidoaka Ma Jou o Womaha o Yesusika la Unangoli ka idadi womigopoa ngomiuku ai Womaha gea. De duru ena gea abe ngini niamake ngomioka o ngorumino naa, ho ngini niihenoka de niamakeoka Ma Jou o Womaha ai karajaanga to ngomi naa mia badangino hiadono nia demo homoi-homoi ka idadi niboriihene!”
Angamoi tanu ko ngominoua mia kuaha, masara to ngone nanga totofora manga Jou abe o Abarahaama de o Isaka de o Yakubu ona yomahuba-huba Unangika, nanga Jou gea to Una ai kuahaino. Abe Ma Jou Una duru wigoraka de wohilamoko ai Huhuloko o Yesusu ai romanga la wihitogumu wolugu-lugu naa ma titi o Yesusino. De o Yesusu Una gea abe ngini niwihidoaka o hohowonika de duru niwioluku o Pilatusu ai himangoka. Abe nako o Pilatusu ai hininga Unangika, una womaputuhoka wato wihihupu dika ma hohailoaika, masara ngini ko niwihigunoaua.
De abe imaketero hoka ma dodihiraka de o Adama wahowonoka de ma titi ai howono ihira-hiraino gea de ngone o nyawa mata-mata nanga hohowono inadaene, hokogenangoo de o Yesusu ai datoro moiino de naga ma hofoko inadaene ngone mata-mataino. Abe nako ma oraha o Yesusu wohonenge o gotaka, gea ai datoro ma totiai moiino dika de hiadono ngone mata-mata ka idadi Ma Jou wonahihohe nanga hohowonino la howango ka hiado-adonika.
De ngone hohioriki abe Ma Jou ai hininga ngoneino gea la ngone howango hototiai to Una ai himangoka. Masara ngaro to Una ai Pareta wonahidoaka masara ngone ko hakunua haniiki enangika ma titi nanga badanga imanoa o howono ma kuahaka. Ho ai Pareta gea tanu ko inaduhunua la howango hototiai. De gea ma titi hiadono Ma Jou Una ma hirete wonaduhunu ma titi ai Ngofakino. Abe Una wihidingoto to Una ma hirete ai Ngofaka ngone o nyawauku de wihidoaka la to Una ai badanga ma rupa imaketero abe hoka to ngone o nyawali nanga badanga ma rupa. Masara naga moi abe duru imakohowono. Abe to ngone nanga badanga gea imanoa o howono ma kuahaka, masara to Una ai badangoka gea de ko iwa o howono Unangoka. De gea Ma Jou wihidingoto ai Ngofaka gea ngoneuku la wohibinaaha o howono ma kuaha to ngone nanga bada-badangoka. Ho mangale ma titi to Una ai Ngofakino de Ma Jou wohikalaka o howono ma kuaha ngoneoka. De hokogea wodiai angamoi ma dodihirainohi de Ma Jou ai hidee nagau la wato ngone howango hototiai abe nanga datoro duru imakiniiki de abe to Una ai Pareta ma demo ma goronaka. Ho naa ngone onagona dika abe ngone ko haniikokaua nanga badanga ma hafini ma dorouika de hinii-niikoli Ma Jou o Womahika, gea ngone abe ka idadi howango hototiai to Una ai himangoka. De gea mangale ma titi Ma Jou o Womaha ai karajaangino hiadono ngone ko hamakeokauali nanga hohowono Ma Jouino.
De ngone ka idadi hohioriki abe Ma Jou Una duru ko womadumungua ma utumu eko ma duduhunu o kia dika ngoneino abe gea ena hoperelu la howango Unangika. De gea hohioriki abe Una ko womadumungua angamoi barikua to Una ma hirete ai Ngofaka ma ko womadumungua. Masara ai Ngofaka gea wahidoakika o nyawaika la iwihohonenge la wonaturuuru ngone mata-mata. Ho nako ai Ngofaka de ko womadumungua, gea iwihitaanoka abe o duduhunu eko ma utumu utuinoli o kia dika ma wosanangi la genangoo ka wonahidoaka dika ngoneino.
De gea ma titi o kia hiadono Una wohonenge? Gea wohonenge la wato ngone abe naga de nanga wowango ma hungioka ka idadi nanga hininga ma dumutu waturuuruoka. Abe o Yesusu Una woigo la ngone ma oraha o duniakahi naa de ko holegaikaua to ngone ma hirete dika nanga pereluika. Masara ai hininga ma dumutu la ngone howango ka Unangika dika, angamoi Una wohonenge de iwihimomiki ai honengino la wonaduhunu ngone.
De ka idadi o nyawa yomakadame de Ma Jou angamoi to ngone nanga howo-howono Ma Jou wagoraka ngoneoka de aino de wihinoauku o Yesusu Kristusuku. Abe ngaro to Yesusu Kristusu ma hirete ai howono duru ko iwa, masara Ma Jou wihitagongo to ngone nanga howono o Yesusu Kristusika la gea imaketero hoka Una wodadi to ngone nanga howono. De ai datorino gea de ka idadi Ma Jou ai totiai wonahidoaka ngoneino la imaketero hoka wonahinoauku ai totiai ngoneuku.
De Una gea ai wowango womahidoaka la ai datorino gea de womahidadi ngone o nyawa mata-mata nanga hiluasa ma bobangu. Abe gea imaketero hoka ngone o gogilaongo de Una wonabangu la wonahiluasa nanga kangelaino. De ai hohonenge gea idadi duru ma gaheoka abe hoka ma dihira Ma Jou wahibehehongoka. Ho ma wangeoka gea de Ma Jou womahitaana abe duru woigo la wato o nyawa mata-mataika wakokiduhunu manga howonino. Hokogea ma gou-goungu abe Ma Jou woigo la o nyawa mata-mataika ihioriki de yataoko itiai.
Masara Ngona duru nosanangi o totiaiika masara nako o dorouika gea Ngona duru nodohata. De mangale ma titi ani hininga ma totiai ho hiadono Ngohi ani Jou tonigoraka de tonihidoaka moi Ngonaika o kuaha la ani gogere duru ikurutiye, de genangino Ngona duru nosanangiholi. Abe ngaro to Ngona ani dodiawo onangoo yosanangi, masara ka Ngonahi duru nososanangiholi!” Hokogea ma dodihiraino ihitulihukuoka.
De gea ma titi hiadono ma dihiraino ma oraha o Kristusu woboa o duniauku naa de witemo ai Babaika wato, “Baba, Ngohi naa tonihioriki ani hininga, abe nako to Ngona ani mau gea ko o nyawa manga hidoakinoua Ngonaika de ko o aewani ma huhubainoua abe Ngona noigo. De ngaro o huhuba iharo-harongo eko o huhuba utuino abe o nyawa yaoino la ato genangino de manga howono atamunu, masara hokogenangua abe inihisanangi Ngonaika. Masara abe Ngona duru noigo la to Ngohi ahi badanga ahao idadi o huhuba Ngonaika, de gea ma titi hiadono o nyawa manga badanga nohihidiai la gea ka idadi tapake.”
De nako o Henoko, mangale unangoo wingaku Ma Jouika ho ko wohonengua masara hokogea dika de ka iwigorakiye. Abe o wange moiuku de ka itodokanino de ko iwiwaka angamoi Ma Jou wigorakoka. De naga ma hingahu Ma Jou ai Demo-demoka abe inahingahu ngoneino abe ko wigorakuahi de o Henoko duru wihisanangi Ma Jouika ai ngongakuino.
De gea nanga popaata ma goronaka de kiani ka ihikaika homalega ka o Yesusika dika, angamoi Una gea ka idadi hihiromanga hato Una to ngone nanga ngongaku ma lifunu de ma dekaroo. Abe ma romanga gea ma titi hokonaa. Nako to ngone nanga ngongaku gea imulaenge Unangoka. De nako ahao ma oraha nanga roreebe ma batingika homahiadonikaka, Unangoo naga genangoka la ka idadi nanga ngongaku duru wohingodu-ngodumoka abe ma oraha homahiadono Unangika. Ho ngone naa ka idadi homaaduru abe hoka o Yesusoli ai hininga, angamoi Una ma dihiraino de ngaro o himaleke wohimanga abe kiani wohonenge o gota isosalioaka, masara ko iwitukorua de gea ena ai ngekomino. De gea Una ka wogila-gila dika de ai dongohono ka hiadono womahiadonika ma batingika angamoi genangoka de ahao wamake ai hadia o garago ma amoko Unangika. De gea womahiadonika de ahao wogogerukuoka Ma Jou o Baba ai kadera ma hohailoa ma nirakoka la genangoka Una de ai Baba yokoano.
De ngaro hokogea ngomi, masara Ngona ani hiningaka nohiaturu la to ngomi mia gogere ngade-ngade hoka o malaekatoli manga gogere ma gurutiye, masara ka to onangohi hatoli ikurutiye ma hohutulu. De gea ngomi duru nomigorakiye hiadono ngomi o nyawa naga de mia horomatioka, de nagali mia medebini ma dararonoka,
Ho onagona dika ngoneino abe hato hoboa la homahitigi Ma Jouino de homahinganono o Yesusika, ngone gea mata-mata ka idadi o Yesusu wonaduhunu de gea ai duduhunino abe duru ingodu-ngodumoka, de gea ma titi Una wowango ka hiado-adonika ho Una gea ka idadi ka ihikaika wonahidemo Ma Jouika ma titi ngone. De mangale ma titi Una wodadioka nanga Hidemo ka hiado-adonika Ma Jouika de ko iwa ma baha abe wonahidemo, ho Una ka wakunu wonaduhunu nanga howo-howonino ho ai duduhunino gea duru ko iwa ma kuranga masara duru ingodu-ngodumu.
De gea igoungu abe o hidemo wokokurutiye homoi-homoiika naga manga tagongo Ma Jouika. De manga tagongo gea la o nyawa manga hidoaka de manga huhuba iwihitobahidoaka Ma Jouika. De hokogenangoo o Yesusu kiani naga de ai huhubaka, angamoi Unangoo o Hidemo Ma Jouika. Ho ngaro to ngoneoli naa nanga Hidemo wokokurutiye, masara to Unangoli kiani naga ai huhuba la gea wihidoaka Ma Jouika.
De Una gea abe wodadioka nanga howono ma bobangu la Unangino nanga howono Ma Jou waofioka. De gea ka to ngoneua dika nanga howono wobanguoka, masara o nyawa duru mata-mataika o duniaka naa de to onangoo manga howono Una wobanguoka. Ho, ahi ngofa-ngofaka o ngongakuoka, ngohi duru toigo la tato ibootohi ngini niahowono.
De to Una ai lako duru de ma dararonoka abe hoka o uku ma dokara ma dararono. De to Una ai peauku naga womahisapeouku de o koano ma sapeo duru ma ngoe. De nagali Unangoka ai romanga moi abe iwihitulihika Unangoka, masara ka Una dika ma hirete wohioriki ai romanga gea ma titi, ho utu ko moiua ihioriki.
De ahao ma aewani iata de ma dimono yamonaoko de yaiata ona gea yomulaenge yonyanyi o nyanyianga ma hungi abe ma Domba ma Ngofakika iwihigiriiri de gea yonyanyi ato, “To Ngona naga de ani kuahaka la ma buku ma lulu gea nodafongo de nafelenga to ena ma dabi ma guihi. De gea angamoi ma dihiraino Ngona inihihubaka la genangino nabangu o nyawa manga ngoe manga bobangu! De ma titi to Ngona ani awunino hiadono o nyawa manga ngoe yodadi to Ma Jou ai nyawa. De ona abe nabanguoka, ona gea o dutu amomoiino de o bahasa amomoiino de o pareta amomoi manga kokawaahaino, ho gea o dunia ma amokika Ngona nabangu!”
ကြော်ငြာတွေ