Ibarani 13:4 - Ma Jou ai Demo-demo o Totobelohoka4 De ngini mata-mataika kiani nimahitiari la ufa niaruwae o gogiabereki manga gogaoika. Angamoi onagona dika abe yomakitigi ko itiaiua, ona gea ahao kiani Ma Jou wahohowono onangika. De ngini onagona dika abe niilakoka, ngini kiani duru niogoana nia gogao abe ngini o giaberekioka de ufa nimakitigi de utuika. အခန်းကိုကြည့်ပါ။ |
Ibarani 13:4
33 ပူးပေါင်းရင်းမြစ်များ
Ho o Hilikia, abe manga hidemo Ma Jouika, de o Ahikama, o Akaboro, o Safana, de o Asaya ona yoiki o kapongo ma hungika abe naga o Yerusaleeme ma kota ma goronaka la ka idadi imitutumu momatengo Ma Jou ai uru ma dodofanga abe ami romanga o ngo Huda. Ona yolingiri Ma Jou ai hingahu onangika de ato, “Marai muna ka idadi monaduhunu.” O ngo Huda gea o Salumu ngoi fekata de to una ai baba o Tikawa de to unangoli ai baba o Harasa abe una wohiaturu manga pakeanga abe ona yotobaleleani Ma Jou ai Tauoka.
De Ma Jou o Yawe duru Wokokurutiye wogila-gila wotemo nginika wato, “De ma oraha gea toboa la tinihohowono nginika. Abe Ngohi ko totaka-takaua toade-ade o nyawa manga howo-howono, masara gea ka tomoroini dika totemoiye. Abe onagona dika o dodiai yotobadiai, de abe yahowono ma titi yomaidu de abe ko manga fekatua eko manga rokatua, de ona abe yomahikoboto ato bari yotemo ma gou-goungu dika masara ka yoeluku o nyawa manga himangoka, onangika mata-mata tohidaere manga howo-howono. De onangoli tohidaere manga howono abe yahikarajaanga o nyawa masara yarusi ma titi manga hewa ma tiwino, de o nyawa onagona dika abe yarusi o ngo bao-baoika eko o gohihi ma ngofaka. De onagona dika abe ka yoluku yaduhunu o homoa ma nyawa abe yadioniki nginioka, onangoli tohidaere manga howono. Angamoi o nyawa homoi-homoi abe manga datoro ma dorou hokogea, ona ko iwa manga horomati de manga modongo Ngohino.” De hokogea Ma Jou o Yawe Wokokurutiye ai hitararono ma demo ma titi ai hohowono nginika.
Ho naa ngohi tinihitiari hokonaa. Ufa ko nimakitigi abe ko itiaiua! Ma kiani nia badangoka o howono gea kiani nianoaka! De o demo moioli naga yotemo-temo nginioka ato, “O howono o kia dika ngone hodiai, de gea ko inataulinoua nanga badangino de ma howono gea ko iwa ma hofoko nanga badangoka.” Marai hokogea yotemo-temo, masara gea manga demo ko itaanua. Angamoi abe ona yomakitigi ko itiaiua, ona gea yahowonoka duru to ona ma hirete manga badangoka, de gea manga howono ma hofoko naga abe yahikatingaka ona Ma Jouino.
Ho ngini ufa nimaaduru abe hoka onangoli yotobadiai ma dorou. Ho marai ngini ka niawohanga abe o nyawa ma dorou ona gea Ma Jou ko wadafongua? Abe o nyawa hokogea ko idadiua yodadi ai kokawaaha ho Ma Jou ko idadiua wahikoano onangika. Ho ngohi tinihigaro tato ufa hiadono o nyawa inibudi nia hiningaka la niato o dorou o kia dika ka idadi nidiai de gea niato bote Ma Jou ka winidafongohi. Abe naa ona ko idadiua Ma Jou wahikoano, ona abe yomakitigi ko itiaiua, de ona yomahuba o pangaoika, de ona yoilakoka masara o nyawa utu manga fekata eko manga rokata yomagora, de ona yomakitigi o nauru de o nauru,
De mode ngomi ma oraha miloiki mitulu-tulu o kiaika dika de ngini niato bote ko idadiua mia fekata abe yongaku-ngakuoka ngomi miao? Nanga gogianongoru utu abe Ma Jou wahitagongino de o Abari ma Rorahai, hoka nanga Baluhu idodutu ai doo-dodoto, de o Peturusu, de utuoli naga, ona mata-mata, ma, ka idadi manga fekata yao.
Angamoi ngone homoi-homoi ahao kiani homakokiokoino o Yesusu Kristusu ai himangoka abe ma oraha wonatailako nanga datoro homoi-homoi abe nanga badangokahi hodiaioka. De ma oraha gea wonahibalaha ngoneino de ma rorahai ma titi nanga datoro ma rorahai abe hodiaioka. Masara abe nanga datoro ma dorou abe ngone hodiaioka, de gea ahao wonahibalaha de ma dorou ngoneino. De gea ma titi hiadono ngomi ka ihikaika mia hininga ma dumutu la miato wiwihisanangi Unangika dika.
De nako o nyawa ka yaniiki manga badanga ma hafini ma dorou, de gea ahao manga datoro duru yahitaana de itararono abe ona manga hafini ma dorou ona gea yahihira-hira. De gea manga datoro hamake hokonaa. Abe hoka o nyawa yomatengo de yomakitigi de abe ko manga fekatua eko manga rokatua, eko hoka o nyawa yomahitorou, eko hoka o nyawa abe manga gimono ma dorou duru yahipareta onangika.
De gea naga manga hiningaka ma daleana ma hofoko o nyawa utuika. De utuoli manga datoro naga abe hoka yatobadaluku, de duru yoigo yaniiki o rame-rame abe genangoka o nyawa yadalu-daluku de gea hiadono manga badanga ma hafini ho ona ko yomahiparetakaua. De gea naga utuohi ma datoro manga badanga ma hafini ma dorouino abe naa ngohi ko tafetonguahi. De igoungu abe ma dihirainohi de ngohi tinihitiarioka ma titi naa ena, masara naa de tinihitiarioli tato onagona dika abe manga wowangoka hokogea ma datoro biaha yanii-niiki, ona gea ahao duru ko yamakeua manga utumu Ma Jouoka de aino abe ahao ma oraha Una wonahikoano ngone mata-mataika ai nyawa.
De angamoi naa duru itararonoka ngoneino de duru hohiorikoka abe onagona dika yatobahowono de yomakitigi de abe ko manga fekatua eko manga rokatua, eko onagona dika yomahitobahitorou, ona gea ahao ko yamakeua manga gogere o Kristusu ai kuaha ma goronaka, abe ma oraha gea Ma Jou wonahigogere de to Una ai kuahaka la Una de o Kristusu wonahikoano ngone. De abe ona ka ihikaika naga manga horoodo o kiahonangika, gea onangoo ko yamakeua manga gogere o Kristusu ai kuaha ma goronaka. Ko yamakeua angamoi manga horoodo gea imaketero hoka yomahijou o kiahonangika de ko Ma Jouikaua.
De gea kiani hokogea nimahipareta done niahowono nia gianongoruika de nimagora manga fekata eko manga rokata eko manga ngofaka eko manga dutu onagona dika. De nako hiadono idadi hokogea nginioka, gea ahao nanga Baluhu idodutu wahohowono ona abe yahowo-howonika, de gea wahohowono abe imaketero hoka ngomi nengokadau minihingahuoka de minihitiarioka miato ahao hokogea kiani wahohowono.
Masara ona gea kiani o nyawa abe manga wowangoka ko iwa manga datoro la hiadono o nyawa utu ka idadi yatae-tae onangika. Abe una duga-duga ngoi fekata ka momatengo dika. De kiani una ka wakunu womatongohono, de kiani ai hininga ma totiai iwihihira-hira, de kiani o nyawa utu naga iwihayanga unangika, de nako hiadono o nyawa iwirekata unangika, gea kiani wadafongo de wao irahai abe iwirekatino. De una kiani naga ai hiakunu la o nyawaika wadotoko.
Gea ho hiadono ngohi tomihigaro munangika tato, koaho muna moilakoli la ka idadi o ngofaka momamakeoli, de hiadono to muna ma hirete ami tauokahi ka idadi mohikaaturu. De nako hokogea modiai, ahao ona abe inatobalawana ko yamakeua ma titi hiadono ka idadi inahohowono ngoneino ma titi o ngofeka yofao-faoino gea.
Abe nairiki o nau-nauru la yodadi o gareja ma hihira, ona gea kiani manga wowango hokonaa. Ona gea manga wowangoino ko iwa manga datoro la hiadono o nyawa utu ka idadi yatae-tae onangika. Abe una kiani watobagou-goungu ngoi fekatika abe ma titi ko wahowonua de o ngofeka utuika. De abe nako to una gea ai ngofa-ngofaka, ona gea kiani naga manga higihene yatobagou-goungu manga dimonika, de ufa to una ai ngofa-ngofaka gea ka yomahisosanangi dika abe manga higihene ko iwa manga dimonika. Ho nako womatengoani abe ai ngofa-ngofaka o nyawa yahioriki abe ona manga datoro ko itiaiua de yatobalawana o nyawaika, to ona manga dimono gea ko idadiua nigoraka la wodadi o hihira o garejaka.
De nimahiketehitiari done ngini utu nirehene abe nimakitigi ko itiaiua. Eko done ngini utu nirehene de hiadono nia horomati Ma Jouika ihutuloka de ko niolegaikakauali to Una ai hiningaika. Angamoi nako hokogea ngini nia hininga, gea imaketero dika abe hoka o Esau ma dodihiraino, abe gea una tanu ahao ka idadiohi wamake ai hiowa moi Ma Jouoka de aino nako hoka wanii-niiki ai baba ai behehongika. Masara una gea wohituruuru to una ai oara ma kuaha la genangino wamake o inomo abe ma moi dika waolomo. De gea ai oara abe tanu kiani una ma riaka wamake ma oraha ai baba wohonenge, masara gea ko wolegaikaua ho hiadono wohituruuruoka.
Masara nako ona utu abe yotobadiai itorou, ona gea ahao ko yowohamua ma kota ma goronaika. Abe ona gea ka ihikaika yaniiki manga dodiai, eko ngaro ona abe yomakitigi ko itiaiua, eko ngaro ona yatomaka o nyawa, eko ngaro ona abe yomahuba-huba o popangaoika, eko ngaro ona abe manga hiningaka duru yosanangi la o ngelu-ngeluku yaniiki, ma ona mata-mata gea duru ko idadiua Ma Jou ai kotaika yowohamika masara to ona manga ngi, gea hatoli imakitingakika.”
ကြော်ငြာတွေ