Ibarani 1:8 - Ma Jou ai Demo-demo o Totobelohoka

⁸ Masara nako de Ma Jou ai Ngofaka gea duru yomakohowono, angamoi to Una ai kuaha ko de ma ora-orahua, masara gea ka hiado-adonika. De gea ma titi hiadono ma dodihiraino Ma Jou wotemo ai Ngofakika wato, “Ngona Jou ka hiado-adonika nogogere ani pareta ma kaderaka la nohikoano ka hiado-adonika. De Ngona duru de ani totiaioka abe nahikoano ani kokawaahaika.

Ibarani 1:8 ပူးပေါင်းရင်းမြစ်များ

2 Samuele 23:3

O Isiraele ma nyawa manga Jou Una wotemoka, Una hoka o Isiraele ma nyawa manga lokuhakaru, Abe manga buturungu de manga nganganono ihititi Unangoka. De Una wohihingahu ngohino, wato, O nyawa manga hihira abe una de o totiai wahipareta, De naga ai horomati ma modongo Ma Jouika,

Yesaya 7:14

Ho de ahao Ma Jou ma hirete winihidoaka o dodunguu moi hokonaa, ahao naga momatengo o moholehe ko yomakitigiuahi de o nauru masara muna de ami badangoka. De momagerewoto de ami ngofaka o nauru. De Una gea iwihiromanga o Imanuele.

Maleaki 3:1

De Ma Jou o Yawe abe duru Wokokurutiye Una winipaluhu nginika hokonaa wato, “Abeika nitotoihene! Ngohi naa etohidingoto ahi nyawa abe wotobahingahu-ngahu ahi demo, de una gea ahao wohidiaiohi ahi ngekomo la Ngohi toboa nginika. De gea ipaha de ahao ka itodokanino de ti ngini nia Baluhu idodutu abe naa ma dekanino niwidodamaa de niwilingiri, Una ahao woboa to Una ai Tauika. De Una gea woboa de winihingahu-ngahu ma titi ahi behehongo ma demo nginika. Ho duru igoungu Una ahao woboa nginika.

Matiusu 1:23

“Abeika, naga momatengo o moholehe abe muna ko ma iwahi yomakitigi de o nauru. De ngaro hokogea masara muna gea naga de ami badangoka. De muna ahao momagerewoto de ami ngofaka o nauru, De Una gea iwihiromanga o Imanuele.” Hokogea ma dodihiraka Ma Jou ai uru ma dodofanga wohitulihuku. De ma romanga o Imanuele gea nako o Isiraele ma nyawa manga demo ma titi, “Ma Jou ka ihikaika naga de de ngone.”

Lukasa 1:75

Abe hileleani Unangika de nanga hininga ma debi-debini, De nanga wowango ma datoro itotiai ai himangoka, Ka hiadono nanga wowango ma bahaika.”

Yohanese 10:30

De Ngohi naa de o Baba ngomi hoimoi.”

Yohanese 10:33

De ona yopaluhu ato, “Koua, ko ma titiua ani heheranga masara, ma titi ani ngelo angamoi Ngona duru o nyawa biaha dika ma gea ani demo hoka nomahidadi Ma Jou. Hokogea Ngona ningelo Ma Jou ho gea ma titi hiadono kiani nohonenge.” Hokogea ona ihititi la ato o Yesusu iwitoma.

Yohanese 20:28

De o Tomasa wipaluhu o Yesusika wato, “To ngohi ahi Baluhu de to ngohi ahi Jou!”

Roma 9:5

De moioli ma hiowa abe ma dodihiraino to ngomi mia totofora gea de Ma Jou wairiki de wagoraka ona la manga romanga idadi ikurutiye, de onangino gea ngomi o Yahudi ma nyawa midadi. De ma utumu mata-mata gea ngomi miamakeoka Ma Jouino, masara hongoli abe ma titi to ngone nanga Duduhunu o Kristusu, abe Una Ma Jou wonahibehehongoka ngoneino, Una gea womaboa ngomi o Yahudi ma nyawaino. Abe Unangoo Ma Jou Wokokurutiye, ho gea itiai ngone hihigiriiri Unangika ka hiado-adonika. Amin. De ngaro ngomi o Yahudi ma nyawa Ma Jou duru womihiutumu hokogea ngomino, masara ahi gogianongoru manga ngoe o Yahudi ma nyawaka de ona gea ka iwiolukohi Unangika abe Ma Jou wihidingoto la waduhunu. Ho mangale ma titi ona iwioluku Unangika ho hiadono kiani ona gea ahao yamake Ma Jou ai hohowono onangika. De gea ena ma titi hiadono ngohi ahi hininga ihuha de hiadono tanu ngohi toigo taturuuru ona ahi gogianongoru o Yahudi ma nyawaka, la ka idadi to onangoo manga hohowono ko yamakeuali Ma Jouino.

1 Korintusu 15:25

Abe kiani o Kristusu wohikoano ka hiadono Ma Jou o Baba wohikala ai musu mata-mataika de wakelenga ai musu gea o Kristusu ai lou ma timiuku la ihitunguu abe duru yokalaka.

Higalioli 2:37

De ma oraha gea homaketeparangi de o nyawa yowoe-woeika de ngone homahitiari la hodokaowara o Amono ma nyawa manga tonaka de ona abe yogogere o Yaboko ma akere ma datekoka de onangoli abe yogogere manga kapo-kapongoka daku o loku-lokuoka. Ma tonaka de ma ngi gea mata-mata hodokaowara dika angamoi hokogea nanga Jou o Yawe ma dihiraino de wonahulokoka, ho duru hohidodiai hahingounu to Una ai demoika.” Hokogea o Musa woade-ade.

1 Timotiusu 3:16

De naa o nyanyianga moi abe to ena ma demo o nyawa ko moiua la yodimoaka. Abe ma nyanyianga naa inahitararono hokokia ma hohailoa Ma Jou ai dodotoko abe naa ma duru wonahimatoko ngoneino. De hokonaa ma nyanyianga ma demo. Ai rupa o nyawa woboaino, De ai wowango o malaekata yolega-lega, Ai totiai Ma Jou o Womaha wihitaana, De ai abari ihihora onangika ko iwihiorikuahi Ma Jou la onangoo ka idadi yoihene, Ai dodotoko o dunia ma nyawa yangaku, De wosobo daku o Horogaiye wogoraka.

2 Peturusu 1:11

De ahao ma oraha adonoka de Ma Jou duru winidafongo de ai hininga ma sanangi de ma dora. De gea winidafongo to Una ai ngiino, abe genangoka winihigogere to Yesusu Kristusu ai kuahaka, la ma oraha gea de imahikaika nanga Baluhu idodutu de nanga Duduhunu Una wonahikoano ka hiado-adonika. Ho ngini koaho nimaribuutu la nimahitaana abe ngini niagou-goungu niwiniiki Ma Jouika.

1 Yohanese 5:20

De hohiorikoo abe Ma Jou o Ngofaka Una woboaka ngoneuku de wonahidoakoka o hiakunu nanga hiningaka la ka idadi hihioriki Ma Jou idodutuika. De ngone homanoaka Ma Jou idodutuoka angamoi ai Ngofaka o Yesusu Kristusokaoo ngone homanoa. De o Yesusu Kristusu Unangoo gea Ma Jou idodutu, de o wowango ka hiado-adonika ma titi naga Unangoka. De gea mata-mata duru tonahigaro la tato ngone duru ka idadi hohioriki de honganono enangika.