Himatoko 16:21 - Ma Jou ai Demo-demo o Totobelohoka

²¹ De nagali idadi o es ma awana ma dodogowini ipurarahuku dau o dunia ma nyawauku. De gea o es ma awana duru kohaago-agomo de duru ma dodubuho, abe amomoiika ma dubuho ngade-ngade o kilo moruata. De gea o nyawa yamao duru itubuhoholi manga kangela gea abe yadaenoka, ho hiadono ona iwidoa-doana de iwingelo Ma Jouika.

Himatoko 16:21 ပူးပေါင်းရင်းမြစ်များ

Huhupu 9:18

Ho abeika idadi itebini! O takoro hokonaa de Ngohi tohiboa o es ma awana abe ngaro ma dodihiraka de hiadono naa ko ma moiuahi naga o Mesiiroka o es ma awana hokogea de ma buturungoka.

Huhupu 9:22

De ahao Ma Jou o Yawe wihulokoli o Musaika wato, “Musa ani tutukunu ahao nagoraka de nohitumutu o dihangiye de ahao Ngohi tohiboa o es ma awana. Abe ka de hokogea ahao nodiai de o es ma awana gea ahao yadopuraraha o aewaniuku de o nyawauku de to ona manga redi-rediuku hiadono manga dato-datomo enangoo yadaene o Mesiiri ma tonaka ma amokika.”

Yesaya 8:21

De Ma Jou ka wohitemohi ma titi ena gea abe wato, “De ahi nyawa yatao-taokino gea ahao yoparadidu / yohuruputu aika aino ma tonakoka gea de duru yohafini de yohu-huha. De manga hafini gea yahidadi la duru yongamo hiadono o doana ma demo ihupu manga uruino. Abe gea iwidoana ma koanoika de ngaro Ngohioo manga Jouino masara yomamatagaiye de ihidoana Ngohino.

Yosua 10:11

De abe ma oraha ona yoara manga gogiriaka o Betehoronoka de yauku ka hiadono o Asekauku, Ma Jou o Yawe wadopuraraha de o es ma awana duru ikiria ma dihangoka de auku onanguku. Ho nako hahidotelega manga ngoe abe o Isiraele ma nyawa yahohonenge de manga humaranga de manga ngoe abe yohonenge ma titi o es ma awana, masara ka onangohi yowoe abe o es ma awana yahohonenge onangika.

Himatoko 11:19

De ahao daku o Horogaka ifelenga Ma Jou ai Tau ma hohailoa de gea ngohi ka idadi tamake gea ma goronaka naga Ma Jou ai Behehongo ma Peti, de ma peti gea idadi o hohininga abe ma titi to Una ai behehongo ai nyawaika. De ahao ka itodokanino de yoleletongo ma ngoeika de yokuruuhu duru yoliarika, de naga ma tonakoo ihikelu-kelu, de nagali o es ma awana ma dodogowini ipurarahuku dau o duniauku.

Himatoko 16:11

De ona gea ka iwingelohi de iwidoa-doanohi Ma Jouika o Horogaka ma titi manga badanga ma odiri ma ngoe de manga boro-boroho o bara, de gea ko yotobauahi manga datoro ma dorouino.

Himatoko 16:9

De o nyawa yakokiuku ma titi o wange ma hauku kohagiria gea, ho hiadono ona duru iwingelo-ngelo Ma Jou ai romangika. De gea to Una ai kuahaka abe ma hohowono ma kokangela gea yadaene o dunia ma nyawaika. De ngaro hokogea masara ona iwingelo Unangika, de ka yoluku yotoba manga datorino de yoluku iwihigiriiri Unangika.

Himatoko 8:7

De ma malaekata wohira-hira ai guguli wawuwu, de ahao naga o es ma awana ma dodogowini abe ipuraraha dau ma duniauku hoka o awana koharikimi. De nagali o uku abe imakasapuroka de o awunu, de enangoo ipuraraha dau ma duniauku. De gea nako o dunia naa haregu hange, gea ma regu moi youku hiadono ma regu gea ma gota-gota de ma ruruubu mata-mata akokitinoka.