De ahao Ma Jou womatemoli wato, “Ngohi toigo la o akere ma ngooto naa idadioka o regu hinooto abe imakitingaka la ma hidogoronaka naga ma hoana.” Hokogea Ma Jou waregu la o ngooto ma akere ma regu moi atumungu daku ma hoana ma lokuiye de ma akere ma regu moioli gea dau ma hoana ma timiuku. Hokogea wotemo de hokogea idadi.
Himatoko 14:6 - Ma Jou ai Demo-demo o Totobelohoka6 De ipaha de tamake o malaekata womatengoli de gea una wohoo-hoho daku ma hoanino. De o malaekata gea wohiabari o Abari ma Rorahai abe ko atoturuurua ka hiado-adonika, ho gea wahingahu-ngahu ona mata-mataika abe yogogere o dunia ma amokika, ngaro o pareta amomoiika eko o dutu amomoiika eko o nyawa manga doomu amomoiika abe manga bahasa imaketemomomoi, ma ona mata-mataika o malaekata gea wahiabari. အခန်းကိုကြည့်ပါ။ |
Himatoko 14:6
30 ပူးပေါင်းရင်းမြစ်များ
De to ngohi ahi tau Ma Jou wahiowa ma ngoe, De angamoi Una wohihibehehongo abe ahi tau wairikoka, De ai behehongo ngohino ka ihikaika ilaku ka hiado-adonika, Abe Una wohiaturu la idadi imakiniiki de ai behehongo gea, De ena gea igogere Unangoka ho gea ko idadiua wawohanga. De ngaro ahi howono naga masara ahi hohowono waofioka. De wohiduhunu la naga o lolaku ahi wowangoka, Ho o duduhunu mata-mata abe ngohi tonganono ahao idadi, Abe Una de ai hininga ma igoka de aino wohingodumu ai behehongo.
De nagali hoka o aewani muruono naga ai aridatekoka, de ena gea ma romanga o serafa. De ma serafa gea homoi-homoiika naga ma gafuufu abobutaanga. Ho to ena ma himanga imatatoko de ma gafuufu hinooto, de to ena ma lou enangoo yatatoko de ma gafuufu hinooto. De nagahi ma gafuufu hinootohi ho genangino yapake la ka idadi ihoho.
Ho ngini kiani nitomoroini hiadono ka ihikaika ahi abari niahingahu-ngahu o nyawa-nyawaika. De ngaro ahi demo abe tinihingahu ko o nyawa manga himangokaua masara ka ngini de Ngohi dika, ma gea ahi demo nihingahu-ngahu. Abe ngaro ahi dodotoko abe ka ngini dika niihene, ma kiani gea nihiabari o nyawa mata-mataika ka hiadono o dunia ma amokika!”
De naa ngone kiani hihigiriiri Ma Jouika! Angamoi Una gea ka idadi wakunu winihiputurungu nia ngongakuika. De gea winihiputurungu ma titi ai Abari ma Rorahaiino abe ngohi tahingahu-ngahu o nyawaika. De o Abari ma Rorahai gea ma hingahu abe ma titi o Yesusu Kristusu, de ma hingahu gea ma dodihiraka de aino de Ma Jou ka wagogonohi ho o nyawa duru ko ihiorikuahi ma hingahu gea.
De ma oraha gea ngini igoungu nidadioka o debi-debini ma nyawa, iti ngini naa nigila-gila niwingaku Unangika la nia ngongaku duru hoka imahingutukuku hiadono ko idomo-domoua. De ufa nimahipipidili nia nganganonino abe nengokadau niihenoka o Abari ma Rorahaioka. De o Abari ma Rorahai naa ihingahu-ngahuoka o dunia ma amokika, de ngohi naa o Paulusu todadioka to ena ma huhuloko abe ngohioo tahingahu-ngahu o nyawaika o Abari ma Rorahai gea. Ho mangale ma titi Ma Jou ai hidee gea ngoneino, ho ngone kiani duru homahigagao nanga nganganonika ka hiadono ai dulaada mata-mataika wahiketehirimoioka.
De naa minigahoko nanga Baluhu idodutu ma hirete o Yesusu Kristusu de nanga Baba Ma Jouiye. De minigahoko la Una winilaru de winihiputurungu nia kokihiningaka la hiadono nia datoro de nia demo mata-mata gea ena ka ma rorahai dika. De gea mininiata de mihioriki Ma Jou ai hininga ma owa ngoneuku, abe gea ka ma dodihirainohi de Una wonadora ngoneino. De wonahidoakoka o higaro ma totiaiika abe ko ihoa-hoanua, de wonahidoakoo nanga nganganono abe ngone ahao hamake o Horoga. De nanga nganganono gea ahao ko ikelu-kelua. Hokogea mia hininga de mia gogahoko Unangiye ma titi ngini.
De naa ngohioo tinigahoko Ma Jouiye ma titi ngini, abe ka Una dika ka idadi wonahiriidi to ngone nanga hiningaka la hiadono nanga hininga iriidi Unangoka. De nako Una gea, Unangoo Ma Jou abe wodafongo nanga Baluhu idodutu o Yesusu ai awunu abe Una womahihubaka. De gea ai huhuba ipahaino de ahao wihimomiki o Yesusu ai honengino. De ai momomikino gea de wohitunguu abe to Una ai behehongo ma hungi imulaengoka, abe ai behehongo ngoneino gea ko ihibobahaua masara naa de ka hiado-adonika. De gea wigorakoka o Yesusu la wodadi to ngone nanga hihira de nanga gogoana wokokurutiye, abe ka idadi homahiketero ngone naa abe ngone hoka ai domba o duduono moi ho Unangika ka idadi hihiromanga nanga Domba ma Gogoana abe duru wokokurutiye. De Unangika gea abe ngohi tinigahoko ma titi ngini.
Masara nako nanga Baluhu idodutu ai Demo-demo ena gea itongohono ka hiado-adonika.” Hokogea ai demo ma dodihiraino, de gea igoungu abe ai Demo-demo duru itongohono. De to Una ai Demo-demo gea ena o Abari ma Rorahai abe nengokadauino inihingahu-ngahuoka nginika. De genangino de ngini ka idadi nihioriki abe nia wowango ma hungi Unangoka, enangoo itongohono ka hiado-adonika angamoi gea ihititi to Una ai Demo-demoino. Ho mangale ma titi nia wowango ma hungi gea ho ngini kiani duru nimakodora de nia hininga ma gahumu.
De ahao naga ihitemoli ngohino ato, “Ngona kiani ma moioli nahingahu o nyawaika abe ma titi hokokia ahao idadi ma oraha dokengoka. De gea ngonaika ahao inihimatoko la nohioriki abe hokokia ika-ika ahao idadi o dunia ma nyawa yowoe-woeika. De ngaro ona o dutu amomoiika de manga paretaoo yomaketemomoiika de manga bahasaoo yomaketemomomoi, ma ahao naga ma hingahu inihimatoko ngonaika ma titi ma nyawa gea de manga kokoanoo homoi-homoiika. De ena gea abe inihimatokoka de ahao kiani ngonali nadofanga ma demo gea o nyawaika.” Hokogea ihitemo ngohino.
De ena gea ihigunoa la ka idadi yaparangi de yahikala Ma Jou ai nyawaika abe o duniakahi, de ihigunoaoo la yahipareta o nyawa mata-mataika, abe ngaro o dutu amomoiika de ngaro ona manga doomu amomoiika abe yomahibetongo moi, de ngaro o pareta ma kokawaaha amomoiika, ma ona mata-mataika ka idadi ma aewanioli yahipareta onangika.
“De ngini ngaro nia kangela ma goronaka ma nimatongohono nia ngongakuoka de ko nirehenua genangino, abe gea imaketero hoka ma dihiraino tinihulokoka la nimatongohono. Ho ma titi nia dongohono gea ho Ngohi ahao tinidatoko o kangelaino abe ko itedekanokaua de o kangela ma amoko yadaene o nyawa mata-mata o dunia ma amokika. Angamoi ma oraha gea o dunia ma nyawa mata-mataika yataili manga ngongaku ma hidumutu gea o kiaika. Masara gea ngini tinidatoko genangino.
De ahao ma aewani iata de ma dimono yamonaoko de yaiata ona gea yomulaenge yonyanyi o nyanyianga ma hungi abe ma Domba ma Ngofakika iwihigiriiri de gea yonyanyi ato, “To Ngona naga de ani kuahaka la ma buku ma lulu gea nodafongo de nafelenga to ena ma dabi ma guihi. De gea angamoi ma dihiraino Ngona inihihubaka la genangino nabangu o nyawa manga ngoe manga bobangu! De ma titi to Ngona ani awunino hiadono o nyawa manga ngoe yodadi to Ma Jou ai nyawa. De ona abe nabanguoka, ona gea o dutu amomoiino de o bahasa amomoiino de o pareta amomoi manga kokawaahaino, ho gea o dunia ma amokika Ngona nabangu!”
De gea ipaha de ahao ngohi tomamatagaiye de o koloba moi tamake daku ma hoanino ihoho. De ma koloba gea ipoaka de ma ilingi ma amokiye ato, “O bodito! O bodito! O bodito naga iboa onanguku yogoo-gogere o duniaka, de ma bodito gea ma titi abe ma malaekata hangeokahi gea ahao manga guguli yawuwu, de naa ona yomahidiaioka la yawuwu.”
ကြော်ငြာတွေ