De o taongo ngimoi de hange ipahaika de o Abaraama ai ngumuru adonoka ai taongo morihiwo de hiwo. De ahao Ma Jou o Yawe womahimatokoli unangika de wihingahu wato, “Abaraama, Ngohi naa Ma Jou Tokokurutiye abe o kia dika tato todiai gea ka idadi todiai. Ngona ahi himangoka kiani nowango itiai la ko iwa moi tamake ani datoroka abe ka idadi tonitaere.
Himatoko 1:8 - Ma Jou ai Demo-demo o Totobelohoka8 De naa nanga Baluhu idodutu Ma Jou wotemo wato, “Ngohi naa ko kia-kiauahi idadi de Ngohi nagau. De Ngohi duru ko iwa ahi bobaha. De Ngohi naga abe Ngohi naga, de ngaro ka hiado-adonino ma Ngohi nagau, de ngaro ka hiado-adonika ma Ngohi ka towangohi. De Ngohi naa de utu mata-mataika, ma ka Ngohiohi duru de ahi kuaha kohaamoko.” အခန်းကိုကြည့်ပါ။ |
Himatoko 1:8
29 ပူးပေါင်းရင်းမြစ်များ
De Ma Jou wohigila-gila wotemo o Isiraelika wato, “Ngohi Ma Jou Tokokurutiye abe mata-mataika naga ahi kuahaka de naa tonihibehehongo la ngini nifaa-faatuku la o dunia niaomangoka de o nyawa. To Ngohi ahi mau la ngini abe nimahiromanga o Isiraele ma nyawa nidadi o dutu moi ma amoko o duniaka. De ahao ngona o Isiraele naga o dutu manga ngoeoli yomaboa de hiadono naga o kokoano abe yomaboa to ngona ani totoforaukuino.
De ngone duru honganono la Ma Jou Wokokurutiye winiduhunu la ma oraha niwihimanga o Mesiiri ma popareta gea de una winisanangi nginika hiadono o Simeono wihigilio nginika de o Benyamini ko witumungua genangoka la ka idadi ngini nikokilioli nenangino. Masara nako yohonenge de gea ahi hininga ma huha ngaro kohadubuho masara ka tamoku dika.” Hokogea o Yakubu ai behehongo o Yehudaika de ai ria-dodotika.
De Una ahao wonahikoano de ai kuaha duru ikokurutiye, abe imaketero hoka ma dihiraino ai tofora o Dautu wonahikoano. De ai tonaka abe idadi ai giamoka, ena ka ihikaika idadi ilamoko, de ko ibobahaua abe wohikoano masara ka hiado-adonika naga ai kuaha. De gea wohikoano de duru itagi irahai mata-mataika ai kokawaaha ma goronaka. De mangale ma titi Ma Jou o Yawe duru wadora ai nyawaika, ho ka idadi wahikoano irahai naa de ka hiado-adonika.
“De ahao Ngohi todadi ti ngini nia Baba ho ngini ahi ngofa-ngofaka o nau-nauru de o ngo-ngofeka.” Hokogea ma dodihiraino ihitulihukuoka to Ma Jou Wokokurutiye ai demo abe wotemoka. Ho to ngohioo ahi demo imakiniiki de to Unangoli, abe duru tinihitiari tato ufa nimahidiliko onangika abe ko iwingaku-ngakua.
De ma ilingi gea itemo ngohino ato, “Abe naa bootino namake de ani lako, gea kiani nohitulihuku o buku moiuku de gea nohidingoto abe o gareja ma doomu tumidika. De gea ma gareja ma doomu moi o Efesusu ma kotaika nohidingoto, de o gareja moiikali abe o Semirna ma kotaka, de o gareja moioli abe o Peregamusu ma kotaka, de naga moioli abe o Tiatira ma kotaka, de nagali abe o Saridisi ma kotaka, de nagali abe o Filadelfia ma kotaka, de naga moiohi abe o Laodikia ma kotaka. Ho gea ma buku ahao kiani nohidingoto ma gareja tumidika gea.”
De naa ngohi o Yohanese tinihurata abe ngini ahi gogianongoru o gareja tumidika, de abe nia gareja ma doomu tumidi gea naga nimanoa o Asia ma propinsioka. De ngohi tinigahoko Ma Jouiye de tonganono la to Una ai owa de ai hininga ma miriidi winihidoaka nginika. De Una gea abe ma oraha naa Una nagahi, de Una ngaro ka hiado-adonino ma Una nagau, de ngaro ka hiado-adonika ma Una gea ka wowangohi. De to Una ai kadera duru ma hohailoa ma himangoka de naga genangoka Ma Jou o Womaha ko wokurangua ma duru wongodu-ngodumu.
De ona yotemo ato, “Ngomi naa duru mitarimakase Ngonaika, angamoi Ngona mia Baluhu idodutu de mia Jou abe ngaro mata-mataika ma ka Ngonahi duru de ani kuaha kohaamoko. De Ngona naga abe Ngona naga, de ngaro ka hiado-adonino ma Ngona nagau. De gea mitarimakase Ngonaika angamoi ani kuaha kohaamoko gea nagorakiye la nomulaengoka o dunia duru nahipareta enangika!
De ona gea mata-mata yonyanyi de iwihigiriiri Ma Jouika ma titi abe hokokia nengokadauino wokarajaanga ai huhuloko o Musaika de ma titioo abe hokokia wokarajaanga ai Domba ma Ngofakika. De gea ma nyanyianga ihiromanga ato, “O Musa de o Domba ma Ngofaka ma nyanyianga.” De gea ma nyanyianga ma demo yonyanyi ato, “To Ngona dika Jou ani karajaanga duru ikurutiye de duru inahiheranga! Ngona dika Jou to ngomi mia Baluhu idodutu abe ngaro mata-mataika ma ka to Ngonahi ani kuaha duru kohaamoko. To Ngona ani hininga de ani ngekomo duru ka itotiai de itobagou-goungu dika. Ngona nodadi o dunia ma popareta mata-mata manga Koano nokokurutiye!
De ma tokata ma dorou o gahumu hange gea naga de ma kuahaka la o heheranga ma dodunguu ka yakunu yodiai. De ena gea isobo itagi o dunia ma amokika la ato yahigaro o kokoano mata-mataika de hiadono yatoomuino o parangi ma ngioka la ahao ka idadi yomakokuduhunu iwikokilawana Ma Jouika. Angamoi ahao naga ma wange adonoka de ahao Ma Jou abe ka to Unangohi ai kuaha duru kohaamoko, Una ahao ai hohowono wahipoha onanguku abe ka iwilawa-lawanohi. De to Una ai Hohowono ma wange gea de ahao yomarihimanga de Ma Jou ona mata-mata abe yomatoomuinoka la yomakokuduhunu iwiparangi Unangika.
De ahao o ilingi moioli toihene abe o huhuba ma ngioka de aino ipaluhu ato, “Ma demo gea igoungu. Mia Baluhu idodutu, Ngona mia Jou abe ngaro mata-mataika ma ka to Ngonahi ani kuaha duru kohaamoko. De to Ngona ani putuhu de ani hohowono mata-mata gea duru itotiai de itaana.” Hokogea ma ilingi itemo.
De Una gea ai uruoka de aino naga ihupu o humaranga o dopo-dopoino abe duru idoto, de ai humaranga gea wapake la wahikala o dunia ma nyawa mata-mataika. De onangika gea ahao duru wahipareta de ma dubuho abe imaketero hoka wapake de o behi. De gea Ma Jou ai ngamo ma hohowono duru ikiria ai musuika ho imaketero hoka o angguru ma hofoko wakokitoomuinoka abe o ngengedere ma ngioka la genangoka duru wawede-wederuku ma hofoko gea. De hokogenangoo ahao idadi ona iwilawa-lawanika, angamoi ngaro mata-mataika ma ka Ma Jouohi duru de ai kuaha kohaamoko, de ai ngamo ma hohowono duru kohagiria onangika.
De gea ipaha de ahao ngohi toihene o ilingi moi duru ma amokiye, abe marai ma ilingi gea hoka o nyawa ko manga ngoe manga hagaaga ma ilingi eko marai hoka o moku-moku ma ngoe ihohe ma koroongo, ekola marai hoka yokuruuhu duru ilamokiye de yoliarika ma ilingi. De gea ma ilingi ma demo toihene itemo ato, “Haleluya! Hihigiriiri nanga Baluhu idodutu de nanga Jouika! Una ngaro mata-mataika ma ka Unangohi duru de ai kuaha kohaamoko! Hihigiriiri Unangika angamoi naa womulaengoka la o dunia duru wahipareta!
De ahao Una gea wohihulokoli wato, “Naa ngona nohitulihuku ahi demo naa abe o Semirna ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ko kia-kiauahi idadi de Ngohi nagau, de Ngohi duru ko iwa ahi bobaha. De Ngohi nengokadau tohonengoka masara naa Ngohi towangokali.’” Hokogea Una womahingahu.
De o kota ma goronaka gea de ngohi tamake abe ko iwa Ma Jou ai Tau genangoka, angamoi nanga Baluhu idodutu Ma Jou abe ngaro mata-mataika ma ka Unangohi duru de ai kuaha kohaamoko, Una de o Domba ma Ngofaka Ona yodadioka hoka Ma Jou ai Tau ma kotaka gea. Abe ma titi ai nyawa o kiaka dika o kota ma goronaka gea de ka genangoka dika ona ka idadi iwihigiriiri Unangika, ho ngaro ufa dika yoiki Ma Jou ai Tau ma goronaika la iwihigiriiri.
De ahao ka wotemohi wato, “Naa tabootokau ahi karajaanga abe ma dodihiraka de tohideeokau! De Ngohi naa ko kia-kiauahi idadi de Ngohi nagau, de Ngohi duru ko iwa ahi bobaha. De onagona dika abe manga ngomaha yodudungoka, onangika gea ahao Ngohi tahiokere o jobuubuino abe nako ma akere genangino yaokere, de gea yamake o wowango genangino. De gea tahiokere onangika masara ngaro ufa de yofangu angamoi Ngohi ka tahidoaka dika onangika.
De nako ma aewani ma ngango iata, gea amomoiika naga de ma gafuufuoka abobutaangaka. De gea ngaro to ena ma gafuufu dau ma timiye eko ngaro ma badanga ma amokika, ma gea akokitamunoka de ma lako. De ma aewani ena gea o futu de o wange duru ka ihikaika inyanyi ma higiriiri ma demo naa, itemo ato, “Una gea wotebini, Una duru wotebini, nanga Baluhu Ma Jou abe ngaro mata-mataika ma ka to Unangohi ai kuaha duru kohaamoko. Una gea ngaro ka hiado-adonino ma Una nagau, de Una gea abe ma oraha naa Una nagahi, de ngaro ka hiado-adonika ma Una gea ka wowangohi. Ho Una gea duru wotebi-tebini.” Hokogea iwihigiriiri Unangika.
ကြော်ငြာတွေ