Hihira 2:14 - Ma Jou ai Demo-demo o Totobelohoka

¹⁴ De angamoi yomahuba o popangaoika gea Ma Jou o Yawe ai ngamo duru ihauku o Isiraele ma nyawaika ka hiadono wahidoaka o nyawa utu manga giamika abe ka ihikaika wahidogunoaika la yahikangela o Isiraele ma nyawaika abe yotobaboaino de yomagora-gora manga kiahonanga. De mangale ma titi Ma Jou o Yawe ma hirete wafukunu manga musu arihonongaika ho ko itedekanua de o Isiraele ma nyawa manga buturungu ko iwaka. Ho ngaro o Isiraele ma nyawa yomaduhunu ma oraha manga musu yoboa yahikangela masara ko yolakuokaua.

Hihira 2:14 ပူးပေါင်းရင်းမြစ်များ

2 Samuele 7:11

Abe ngaro ma dihira abe Ngohi ma oraha tomulaenge tahidoaka onangika manga hihira, abe yototuruuru yahihira-hira o Isiraele ma nyawa, de naga manga musu ka ihikaika yahikangela. Masara ngona o Dautu ani musu ahao ko hokogenangokaua inihihuha hoka ma dihira de ma dubuho inihihuha.”’ ‘“De nenangoo Ngohi, Ma Jou o Yawe tonihibehehongo abe ma titi to ngona ani tauika. Ngohi ahao tohiaturu la to ngona ani ngofakoka de imahikauku naga o nauru manga ngoe abe tahidadi o koano abe inituruuruoli.

2 Kokoano 17:20

Ho ma oraha gea ahao o Isiraele to una ai totoforauku mata-mataika Ma Jou o Yawe waoluku ka hiadono wakokihohowono. De Una wapake abe manga musu wahigunoa la o Isiraele ma nyawa ona yahiofi hiadono yahihupu to Una ai himangino.

Gegetongo 32:13

De o Musa wohigila-gila ai demo wato, “De mangale ma titi nia totofora gea hiadono Ma Jou o Yawe ai hininga ma ngamo duru ifae o Isiraele ma nyawaika hiadono wahiaturu la ona kiani yotagi-tagi yaika yaino o tonaka ma kakaahaka abe manga taongo moruatino ma dekana. Abe ka hokogea dika kiani yotagi-tagi hiadono manga lape moi gea abe yobaluhoka, abe ma dihiraino de manga datoro itorou Unangika, ona mata-mata yokokihonengoka.

Gegetongo 32:14

Ho abeika, ngini naa duru niaturuuruoka nia totofora gea, abe ma titi nginioo niatobahowo-howono Unangika! De ma hofoko nia howonino genangoo imaketero dika de to ona ma dihiraino, abe mangale ma titi ngini ho hiadono to Una ai hininga ma ngamo duru ifae o Isiraele ma nyawaika.

Higalioli 32:30

De abeika manga bodo, angamoi ngaro ona yamake manga musu yomatengo dika de yapoa yakiniiki manga gogianongoru yasana moi, masara ko yataokua abe gea idadi mangale ma titi Ngohi manga dadatoko tafukunoka manga musuika. De done sarakia ka idadi manga musu yahinooto dika de manga gogianongoru yasana ngimoi ka yoara dika? Gea ma titi moi dika, abe manga Jou yahidoakoka manga musuika gea.

Yosua 23:16

“Ho ufa ngini niawohanga Ma Jou o Yawe ai pareta ma behehongo abe winihitagongoka. Ena gea kiani nihingounu angamoi nako ahao idadi ai pareta gea niatilakuru hiadono nimahuba o jou-jou utuika, de ka hiadono nioleleani to ena ma pangaoika de hiadono nimaponuku enangika, gea ahao Ma Jou ai ngamo duru ifae nginika. De nako Ma Jou o Yawe ai ngamo itagi nginika hiadono winihohowono de gea duru itaiti de ngini winihiofioka nia tonaka duru ma rorahaiino naa abe winihidoakoka.” Hokogea o Yosua ai higaro de ai hitiari ma demo ai gogianongoruika.

Hihira 1:19

De ma oraha gea Ma Jou o Yawe Una naga de de o Yehuda ma nyawa gea de waduhunu la ka idadi yahikala o nyawa abe o loku-lokuoka de manga tonaka gea ka idadi yomahitoona. Masara o Yehuda ma nyawa ko akunua yahikala o nyawa abe yogogere o tonaka ma dola-dolaka, angamoi ma nyawa gea naga de manga goroba parangi. De manga goroba gea duru irahai, abe naga ma roda yodiai o behino.

Hihira 1:34

De nako o Daana ma nyawa manga tonakoka ona duru yokangela yomahitoona ma tonaka abe ihikodoku onangika. Angamoi naga o Amori ma nyawa genangoka abe duru yomaribuutu yomadatoko manga ngi-ngi o tonaka ma dolaka abe ma romanga o Ayalono de o Sabimi de o Herese ma lokuoka. Ho ona yomaketeribuutu de o Daana ma nyawa de duru yalawana ka hiadono o Daana ma nyawa kiani yomadohuku manga poretoko de ka yolio daku o loku-lokuiye de yomanoa dakenangoka. Masara ipahaino abe ma oraha manga gogianongoru o Yusupu ai totoforauku manga kuaha idogo ilamoko de yoboa la yomakuduhunu. Ho gea de ahao ka idadi yaribuutu o Amori ma nyawa gea la yodadi manga gogilaongo.

Hihira 10:7

De mangale ma titi manga datoro gea ho Una duru wangamo ai nyawaika hiadono wahidoaka ona o Filistina de o Amono ma nyawa manga kuahaika.

Hihira 2:20

Ho Ma Jou o Yawe duru wangamo o Isiraele ma nyawaika de wotemo wato, “Ona ko taduhunokaua ka hiadono manga musu taduhu manga tonakino angamoi ona o nyawa nenanga ko ihihigihenua de yatilakuru o behehongo gea abe ma dihira to ona manga totofora de Ngohi mimahiketehibehehongoka. Ho ngaro ma oraha gea o Yosua wohonenge de naga o nyawa o dutu ma ngoeohi abe una ko waparangiuahi, masara Ngohi ahi nyawa ko taduhunokaua la manga musu gea takiniiki manga tonakino.

Hihira 3:12

Ho manga hihira Ma Jouino gea wohonengoka de ahao o Isiraele ma nyawa yomulaengoli yodiai itorou Ma Jou o Yawe ai himangoka ho wahohowonoli. De angamoi yotobadiaioli itorou ho Ma Jou o Yawe wihiputurungu o Moaba ma nyawa manga koano o Egono hiadono unangoli wapareta o Isiraele ma nyawaika.

Hihira 4:2

Ho ma titi gea hiadono o Isiraele ma nyawa Ma Jou o Yawe wafukunoli de naa wafukunu o koano womatengoika ai romanga o Yabini, abe wahikoano o Kanani ma nyawa manga ngoe de to una ai tau de ai kadera o Hasoro ma kotaka. De ma koano gea ai tentara ma dimono o Sisera masara una de o tentara abe wahihira yogogere o kota moiokali abe yakurunga de o dadaduhu de o kota gea ma romanga o Harosete-hagoimi.