Higiriiri 34:1 - Ma Jou ai Demo-demo o Totobelohoka

¹ To ngohi ahi mau la ngohi ka ihikaika tihigiriiri Ma Jou o Yaweiye, Ahi igoka de aino tomahuba, de ahi higiriiri ma demo idoa Unangiye.

Higiriiri 34:1 ပူးပေါင်းရင်းမြစ်များ

Dodadi 20:2

De o Abarahaama ko wahingahua ma nyawa genangoka abe o ngo Sara ngoi fekata masara wato, “Muna naa ngohi firanga.” De o Geraroka manga koano ai romanga o Abimeleke, de una ahao ai huhuloko wahidingoto wato, “Ngini kiani o ngo Sara gea nimiaoino la munangoo tomihidadi ngohi fekata moioli.” De ma titi ai howono gea hiadono Ma Jou o Abimeleke de ngoi fekata mata-mataika wahikangela manga kokibadangoka la ko idadiokaua o ngofaka yomamake.

Dodadi 26:1

Naa idadiokali naga o hiwara ma dekanino o tonakoka abe o Isaka wogogere genangoka ho naga o hafini imaketero hoka ma dihirali abe ma oraha ka o Abarahaamohi. De ma titi o hafini gea hiadono o Isaka woiki doka o Gerara ma tonakika abe genangoka o Abimeleke wahikoano o Filistina ma nyawa.

Sosawaro 29:25

Nako ngone ka ihikaika hohawana abe ma titi o nyawa utu inamake sarakia, gea imakadaene dika hoka ngone homahidilikoka o modoioka. Masara ngone abe homahingano-nganono ka Ma Jou o Yaweika dika, gea Una ahao wonadatoko ho duru ko idadiua o bodito inadaene.

Hidingoto 16:25

De ma futu gea abe duru o futu gorona adonoka de o Paulusu de o Silasa ona yomaniata de o higiriiri ma nyanyianga yonyanyiohi Ma Jouiye. De abe ma nyawa utu yabuika genangoka ona mata-mata yokokiihene manga nyanyiangika.

Hidingoto 5:41

Ho o hidingoto ma nyawa yosobo ma hihira manga doomuoka de aino de manga hininga duru aomangoka de o garago, angamoi yomatemo ato, “Ngomi naa imihikangela ma titi o Yesusu ai romanga mianii-niiki, ho bote gea imipoha-poha ma titi Ma Jou duru womisanangi ngomino!” Hokogea manga garago ma titi abe manga hiningaka.

Efesusu 5:20

De ngini kiani ka ihikaika nitarimakase Ma Jou nia Babaika abe ma titi o kia dika idadi nia wowangoka. De gea nitarimakase de niafetongo nanga Baluhu idodutu o Yesusu Kristusu ai romanga. De nako nimahigunoa la Ma Jou o Womaha winihihira-hira nia wowangoka, mata-mata gea ahao idadi nginioka ma oraha nimatoomuino.

Kolose 3:17

Ho, ngaro o kia dika ngini nidiai de ngaro o kia dika ngini nitemo, ma, iti nia datorino de nia demoino gea de niwihisanangi de niwihigiriiri nanga Baluhu idodutu o Yesusika. De kiani ka ihikaika nitarimakase Ma Jou nia Babaika ma titi nia gogere nanga Baluhoka.

1 Tesalonika 5:18

de ngaro o kia dika niohimanga ma gea kiani ka ihikaika nitarimakase Ma Jouiye. De hokogea kiani ka ihikaika nidiai angamoi hokogea Ma Jou ai mau ngone mata-mataino abe hogogere o Yesusu Kristusoka, abe woigo wato ngone ka ihikaika hotarimakase Unangika.

2 Tesalonika 1:3

Mia gogianongoru, ngomi nenangoka ka ihikaika mitarimakase Ma Jouiye ma titi ngini, angamoi gea miihenoka abe ngini nia ngongaku Unangika ka idogo-dogo de nagali nia doraoo ma idogo hiadono ngini duru nimakodora. Ho gea ma titi nia ngongaku de nia dora gea hiadono ngomi miato duru itaana abe miato kiani ngomi naa mitarimakase Unangiye ma titi ngini.

2 Tesalonika 2:13

De naa, mia gogianongoru abe duru nanga Baluhu idodutu winidora, ngomi naa ka ihikaika mitarimakase Unangika ma titi ngini. De gea ngomi miato mia tarimakase ma demo itaana angamoi ma dihiraino ngini winiirikoka la wato ka idadi ngini ngaro ufa dika de nginioo niamake ma hohowono abe hoka ona gea ko yangaku-ngakua ma gou-goungika ona gea ahao kiani yamake. Ma nako ngini, winiirikoka la ahao nia baha adonoka de ka idadi winihidoaka nia utumu nginika. Abe nia utumu gea ngini homoi-homoi ahao o hidoku niaborimake ma titi to nanga Baluhu idodutu o Yesusu Kristusu ai medebini ma dararonino niamake. Ho gea ma titi ho hiadono ma dodihiraino de Una winiahoko nia ngongakuino, la gea ahao nia baha adonoka de gea ena ahao niamake. De gea winiahoko o Abari ma Rorahaiino abe ngomi ma dihira minihingahuoka genangoka. Abe ma oraha gea ngini niodafongoka o Abari ma Rorahai de gea Ma Jou waputuhoka wato ma titi Ma Jou o Womahino winitingakino la gea nidadi to Una ai nyawa de niwileleani ka Unangika dika. Ho mangale ma titi nia leleanino de nia ngongaku abe ma gou-goungino hiadono ahao ka idadi nginioo niamake ai medebini ma dararono angamoi ahao ma wange gea de ngini naga nanga Baluhu idodutuoka.

1 Samuele 21:11

Masara o Akisi ai nyawa abe manga gogere hatoli ikokurutiye ona iwigurubungu manga koanoika ma titi o Dautu. Abe ona yotemo ato, “Boteua una naa o Dautu abe wodadi ai tonaka ma koano! Abe to una ai nyawa duru iwihigiriiri unangika manga dakoro ma demoka, de gea yonyanyi ato, ‘Nako o Saulu una wahohonenge nanga musu yasana, Masara o Dautu wahohonenge nanga musu yasana ngimoi yofoloi.’ Hokogea ai nyawa iwihigiriiri unangika ho koaho ufa hihigunoa womanoa ngoneoka!”