Higalioli 33:8 - Ma Jou ai Demo-demo o Totobelohoka8 De o Musa ai hiowa ma demo ma titi o Lewi ma nyawa hokonaa, wato, “Ma Jou o Yawe, Ngona nahidoakoka o Urimi de o Tumimi o Lewi ma nyawaika, abe o mai-maihi ma kiahonanga gea o tagongo moi duru ma hohailoa, de ma tagongo gea nahidoaka ani hidemo ma nyawaika abe yagou-goungu ininiiki Ngonaika. De ma dihira ani nyawa mata-mata gea natailako ma ngioka abe ma romanga hinooto, abe ihiromanga o Hitaili de o Ribuutuino, angamoi genangoka ona manga ribuutu Ngonaika duru o fara moi, de duru inihitaili ma oraha inihigurubungu ma titi o akere. အခန်းကိုကြည့်ပါ။ |
De Ngona, ahi Jou, naa moi ngohi duru tohioriki de tongaku, Abe ma oraha tohonenge de ngaro ufa ngohi tohawana, Angamoi ko nohihigunoaua tomanoa o honenge ma ngiika ka hiado-adonika. Imaketero hoka Una duru Wotebi-tebini abe nomadingakoka, Unangoo ko nihigunoaua la ai honenge iwedere o lungunu ma goronaka.
De ma ngi gea o Musa wohiromanga hinooto. Ma romanga moi o Hitaili, de ma romanga moioli, o Ribuutuino. Abe nako to ona manga demo o Masa de o Meriba, hokogea wohiromanga ma titi ona duru iwitaili Ma Jou o Yaweika de manga ribuutu ma demo abe yotemo ato, “Sarakia, Ma Jou o Yawe gea, Una naga eko ko iwiwa ngoneoka?” Hokogea iwitaili Ma Jouika.
De naga o hitararono de o hitotiai ma dodunguu ma kiahonanga abe enangoo kiani o Harunu wonoa ai alu ma dadatoko ma juberauku. Abe ma kiahonanga gea una de ai ngofa-ngofaka yapake la ihitunguu nako to Ngohi ahi hininga adaene eko ko adaenua ma oraha yomaputuhu manga hiaturu o Isiraele ma nyawaika. Ho ma oraha o Harunu wowohama Ngohi Ma Jou o Yawe ahi himangino de o hitararono de o hitotiai ma dodunguu ma kiahonanga gea kiani naga to una ai aluoka. Hokogea o Harunu ka ihikaika wao ma dodunguu ma kiahonanga gea ma oraha una naga Ngohi Ma Jou o Yawe ahi himangoka.”
De Ma Jou wohigila-gila ai hiaturu ma demo abe ma titi manga hidemo ai pakeanga, wato, “De o Harunu ai pea ma nyore-nyoreoko kiani iwihidiliko de ai tuaa ma dodunguu o gurasi ma dutuino de ma dulihi ma demo, ‘Ma Debi-debini Ma Jou o Yawe ai Himangoka.’ Ma dodunguu nidiai ma rupa hoka o ban ma haeke ma kiani hatoli ikurutu de ahao ai tuaa ma riwoto ma datekoko iwihidapakiti de o ngoere ma bihi-bihi abe yobuludioka.
Ka de womaokoinoli de wahidetemo o Koraika de onangika abe o Kora iwinii-niiki, wato, “Itebini o ngorumino de ahao Ma Jou o Yawe wonahidumutu ngoneino la hahioriki ona gea abe wato ona duru to Una ai nyawa. De Ma Jou wihidumutoli onaguna abe duru unangohi womadingakoka abe ka una dika ka idadi woboa womahitobahitigi Unangika. Ho womatengo gea abe wiirikoka ahao una ka idadi ngini niwikokimake ma oraha Ma Jou o Yawe wihiboa ai himangino.
De o akere gea ihiromanga o Ribuutuino ma akere o Kadesoka angamoi genangoka o Isiraele ma nyawa iwiribuutu Ma Jou o Yaweika. De genangoka Ma Jou wahimatoko onangika abe Una duru Wotebi-tebini de wogogere manga hidogoronaka. O Edomo ma nyawa yomahidutu o Esauika angamoi ai romanga hinooto de moi o Edomo. De o Isiraele ma nyawa yomahidutu o Yakubika angamoi unangoo ai romanga hinooto de moi o Isiraele. O Esau de o Yakubu ona o ngofaka o hagoino abe o Isaka de o ngo Ribeka manga ngofaka. Ho o Edomo ma nyawa de o Isiraele ma nyawa ona duru o gogianongoru idodutu adaene.
Abe Ma Jou wahingahu onangika wato, “Musa de Harunu, adonoka naa ma oraha o Harunu wohonenge ho to una ai jiwa de ai totofora manga jiwa ka ma moi tahidotoomuino abe ona yododihiraika yohonenge. Ho una ko idadiua wogila-gila wowohama o tonakika gea abe Ngohi tahidoaka o Isiraele ma nyawaika. Angamoi ngini inihinooto nihilawana hiadono ko nianiikua ahi behehongo nginika ma oraha o akere gea tinihidoaka abe o Ribuutuino ma akeroka. Ho gea ma titi hiadono ngini ko idadiua niwohama o Kanani ma tonakika.
De ma oraha ona yoperelu ihioriki abe to Ngohi Ma Jou o Yawe ahi hininga, abe o kia toigo ona yodiai, gea kiani o Yosua wileha o Eleasarika. De una ka idadi wihingahu to Ngohi Ma Jou ahi mau o Yosuaika. Abe o Eleasara ka idadi wapake o hidemo ma kiahonanga o Urimi de o Tumimi abe ka ihikaika imanoa ai alu ma dadatoko ma juberaka. To ena ma hiaturu tinihidoakoka abe kiani waniiki. De o Urimi de o Tumimi gea ihitunguu la wohioriki to Ngohi ahi mau nginika. De gea angamoi o Eleasara una ti ngini nia hidemo Ngohino ho ahi hininga tihimatoko unangika ma oraha wapake o Urimi de o Tumimi gea. De ahao unangoli wihingahu o Yosuaika.” Hokogea Ma Jou ai hiaturu abe wihingahu o Musaika.
De hokonaa ma hiaturu la ma kapo-kapongo gea o Isiraele ma nyawa yahidoaka manga gogianongoru o Lewi ma nyawaika. Abe nako manga dutu moi naga manga oara ma tonaka hatoli ilamoko de gea kiani to ona manga kapongo hatoli iwoe abe yahidoaka o Lewi ma nyawaika. Masara nako manga dutu utuoli abe manga oara ma tonaka hatoli ieteke, gea de ahao ka idadi manga kapongo muruono dika yahidoaka, ko iwoeua. De manga dutu homoi-homoi kiani yahidoaka manga kapongo muruono naga abe imakiniiki de manga tonaka ma amoko.”
De abeika ngone hafikirohi to Yesusu ai hininga hokokia. Angamoi Una gea duru wotebi-tebini ho hiadono Ma Jou wisanangi Unangika, angamoi to Una ai hiningaka duru ko iwa ma dorou eko o howono o kia dika. De Una gea iwihikitingakoka ngoneino o howo-howono ma nyawaino, de ma oraha naa duru iwigorakiyeoka ho nako o Horogaka ma gogere mata-mataika, gea ka to Unangohi ai gogere duru ikurutiye. Ho o Yesusu ai wowangoino gea ka idadi ngone hohioriki de itararono abe Una dika ka idadi duru wonahingodumu to ngone nanga perelu mata-mataika.
De ahao Una gea wohihulokoli wato, “Naa ngona nohitulihuku ahi demo naa abe o Filadelfia ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe duru totebi-tebini de duru tatobagou-goungu ahi hiningaka. De Ngohioka naga ahi kuaha la ka idadi tahikoano o nyawaika abe imaketero hoka ma dodihiraka manga koano o Dautu unangoo de ai kuahaka gea. De nako tohiketero de o ngorana ma dadatoko, gea naga ma kokusi Ngohioka, ho nako hiadono Ngohi tafelengaka moi ma ngorana, gea ko moiua la o nyawa ka yakunu yatatokoli. De hokogenangoo nako Ngohi ma ngorana moi tatatokoka, gea ko moiua la o nyawa ka idadi yakunu yafelengali.’” Hokogea Una womahingahu.
Ho o Saulu wileha Ma Jou o Yaweika wato, “Done hokokia koaho ngohi todiai?” De ngaro hokogea wileha masara Ma Jou duru ko wipalu-paluhua o Saulika. Abe ko wohidoakua o himatoko o nyawaika la genangino de o Saulu ka idadi wohioriki ai hininga. De ngaro Ma Jou ai uru ma dodofanga o Saulu ai leleha gea iwidofanga Unangika masara ko wopaluhua. De ngaro manga hidemo ma nyawa una waumo o Urimi de o Tumimi gea la genangino de ka idadi ihioriki Ma Jou ai hininga abe koaho hokokia o Saulu wodiai masara genangoo de Ma Jou ko wopaluhua ai leleha.