Higalioli 3:11 - Ma Jou ai Demo-demo o Totobelohoka

¹¹ De o Basanoka manga koano o Ogo gea una o Refaimi ma nyawa manga totofora duru ma baha angamoi ona utu mata-mata yohiraka yokokihonengoka. De abe hoka ai gogianongoru ma dodihiraino, to ma koano gea ai badanga duru ma amoko. Angamoi abeika hafikiri dika to una ai hohonenge ma ngi ma amoko. Abe ma ngi gea yodiai o hakaruino de to ena ma gurutu o metere iata ifoloi de ma ngoata ngade-ngade o metere hinooto. De ai hohonenge ma ngi gea ka nagahi hiadono ma oraha naa naga abe ma ade-ade tohitulihuku. De nako o nyawa yoiki o Raba ma kotaika abe o Amono ma nyawa manga tonakoka de ka idadiohi yamake ai hohonenge ma ngi duru ma amoko gea.”

Higalioli 3:11 ပူးပေါင်းရင်းမြစ်များ

Dodadi 14:5

Masara doka to ona manga tonakoka o koano o Kedoro-Lomere gea woihenoka abe ma titi iwioluku ho wahokino ai dodiawo o koano abe yomakokadateke. Ho ona yomatoomuino de wahigaro onangika wato, “Ahi dodiawo naa, abeika ona o Kananioka inaoluku. Ho kiani ngone naa nanga tentara mata-mata hatoomuino de hoiki haparangi hiadono o nyawa gea ko inalawanokaua.” Masara ona abe o Kedoro-Lomere iwioluku ngade-ngade adonoka o taongo moiino ma dekana de ahao o Kedoro-Lomere de ai dodiawo de manga tentara yomahidiai la yoiki yaparangi. Ho ona o koano yaiata yosoboka de manga tentara ato o koano yamotoa yaparangi. Masara manga tentara ma doomu ma amoko gea ko yomahiadonuahi o Kanani ma tonakika de o nyawa mata-mata abe yomakamake manga dodagi ma goronaka de gea onangikahi yaparangi. De ka ihikaika o Kedoro-Lomere de ai dodiawo yolaku. Ho yahikala o Refaimi ma nyawa abe yogogere o Asitorete-Kanaimi ma tonakoka, de ahao o Susimi ma nyawaoo yahikalali abe yogogere o Haama ma tonakoka. De ahao o Emimi ma nyawaoo yahikalali abe yogogere o Sawe-Kirataimi ma tonakoka, de ahao o Hori ma nyawaoo yahikalali mata-mataika abe ona yogogere o Seiri ma loku-lokuoka. Abe o Hori ma nyawa gea manga ngi o Ela-Paranoka abe o tonaka ma kakaaha ma datekoka.

2 Samuele 11:1

De o tao-taongiye abe ma oraha o maata ipahaka de ahao naga o poparangi ma oraha abe o tonaka ma koano manga ngoe manga biaha ona de manga tentara yoiki yaparangi manga musuika. De naa adonokali ma oraha gea abe o maata ipahaka de o Dautu wihuloko ai tentara manga hidimono o Yoabika la una de ona utu abe yahihira o Isiraele ma nyawa manga tentara la ona mata-mata yoiki ihigila-gilali manga parangi o Amono ma nyawaika. Ho ona de o Amono ma nyawa manga tentara yomaketeparangi ma hoanoka de o Isiraele ma tentara yolaku hiadono o Amono ma nyawa manga tentara yahikalaka. De ahao o Isiraele ma nyawa manga tentara yahigiloliti o Amono ma nyawa manga kota abe ma romanga o Raba. De o Raba ma kota yangika la ato enangoo yahibinaaha. Masara o Dautu ko waniikua o parangioka abe una womagoo-gogere dika ai tauoka abe o Yerusaleeme ma kotaka.

2 Samuele 12:26

De ma oraha gea o Dautu ai tentara ma hidimono o Yoaba, una de ai nyawa yomaketeparangi de o Raba ma kota ma nyawa, abe o Raba gea o Amono manga kota ma mayo. De o Yoaba de ai tentara ngade-ngade yahikala de yataokino manga musu gea.

Higalioli 2:11

Ho o Emimi ma nyawa de o Enaka ma nyawa, ona mata-mata o nyawa yahiromanga ato o Refaimi ma nyawa, masara nako o Moaba ma nyawa yahiromanga ato o Emimi ma nyawa dika.

Higalioli 2:20

De o Amono ma nyawa manga tonaka gea ma dodihiraka o Refaimi ma nyawa yogogere genangoka. Masara nako o Amono ma nyawa ko yahiromangua onangika o Refaimi ma nyawa masara ona yotemo ato o Samasumimi ma nyawa.

Himatoko 21:17

De ahao una watuga ma kota ma dadaduhu, de to ena gea ma gurutiye o metere moributaanga de motoa. De gea ma malaekata watuga-tuga ma kotaka, gea una wapake ma duduga abe ngone o nyawa biaha hatobapake, ho ko imakohowonua ma malaekata ai duduga gea.

1 Samuele 17:4

De naga o Filistina manga tentara womatengo o Gaata ma kotaino, abe duru wojago de ona yomahinganono unangika, ai romanga o Goliata. De una wohupu manga tentara ma doomuino la womatengo dika wahimanga o Isiraele manga tentaraika de wadodanauru onangika de ai ilingi ma amokiye la o Isiraele manga tentara womatengo woboa la yomadengo yomaketeparangi. De o Goliata gea ai gurutiye ngade-ngade ai metere hangeiye.