Higalioli 28:1 - Ma Jou ai Demo-demo o Totobelohoka

¹ O Musa wahingahu o Isiraele ma nyawaika wato, “Nako ngini nihidodiai niwihingounu nia Jou, Ma Jou o Yawe, de nianiiki itiai ai behehongo mata-mata, abe tinihidoaka o wange naa, Una ahao winihiowa nginika. Abe nako hokogea nia hingounu Unangika, ahao duru winigorakiye. Ngaro ngini de o nyawa o tonaka mata-mataika o dunia ma amokika, ma ka nginiohi ahao Ma Jou o Yawe, abe to ngone nanga Jou, winigorakiye iti niwihingounu itiai.”

Higalioli 28:1 ပူးပေါင်းရင်းမြစ်များ

Higiriiri 106:3

De ngone abe ai behehongo hohingounu mata-mata ngone hogarago. De nanga gogao o nyawa utuika hapaliara duru irahai, De hoigo la mata-mata hodiai duru itiai Ma Jou ai himangoka.

Higiriiri 91:14

Abe Ma Jou o Yawe womahingahu wato, “Mangale ma titi ona naa manga hininga itagi ka Ngohino dika, ho Ngohi ka idadi taduhunu onangika ma titi ihitobaniiki Ngohino.

Huhupu 15:26

Abe ai demo onangika wato, “Ngini nako nihiao irahai de nihidodiai nihihigihene Ngohi Ma Jou o Yawe, ti ngini nia Jou, de Ngohi tiniduhunu. Abe nako nianiiki itiai ahi hiaturu de ahi pareta mata-mata de Ngohi ahao ko tinihikangelaua de o popanyake abe hoka ma dihiraino de tahihohowono o Mesiiri ma nyawaika. Ngohi naa Ma Jou o Yawe abe ahi kuaha naga o popanyakeika hiadono Ngohi ka idadi tiniduhunu.” Hokogea Ma Jou wahitiari o Isiraele ma nyawaika.

Huhupu 23:22

Masara nako ngini nihidodiai niwihingounu ahi malaekatika gea, de una duru winiduhunu. Ho to Ngohi ahi demo mata-mataika abe ahao winihingahu nginika kiani niwihigihene. Abe nako ka ihikaika niwihigihene de ahao Ngohi todadi tamusu ti ngini nia musuika. De onagona dika inilawana nginika de Ngohi nia Jou talawana onangika.

Huhupu 23:25

Ngohi ti ngini nia Jou ho kiani nimahuba ka Ngohi Ma Jou o Yaweino dika de ahao nia inomo de nia akere tohiowa abe Ngohi tinihidailako. De Ngohi tinihikatingaka o popanyakeino.

Lukasa 11:28

De o Yesusu wopaluhu wato, “Iya, nagoungu, masara hongoli o nyawa manga sosanangi ilamoko abe yototoihene Ma Jou ai Demo-demoino de yatobaniiki enangika.”

Lukasa 9:48

De Una watemo iwinii-niikika wato, “Ufa ngini nioigo la nimahikurutiye masara koaho nia hiningaka de nimahitipokouku. Abeika tinihitararono hokonaa. De onagona dika abe yadafongo o ngofaka hoka naa una mangale ma titi manga hiningaka ato ihihisanangi Ngohino, ona gea taetongo abe ka ma ngofakua dika yadafongo, masara gea Ngohioli naa ma hirete ihidafongoka. De nako Ngohi nihidafongoka, gea ka Ngohiua dika nihidafongo masara ahi Baba abe wohihidingo-dingotino, Unangoo niwidafongoka. Ho onagona dika nginioka abe nimahitipokouku la nialeleani nia gogianongoruika abe biaha o nyawa yaetongo ato ko kia-kiaua manga wowango ma gogere, ka nginiohi gea abe duru nikokurutiye Ma Jou ai himangoka.” Hokogea o Yesusu ai hitararono onangika abe ma titi ka onagonahi de duru yokurutiye Ma Jou ai himangoka.

Yohanese 15:14

De ngini naa nidadioka ahi dodiawo nako nidiai hoka tinihibehehongoka.”

Galatia 3:10

Masara nako nanga ngongaku de o Musa ai Pareta, gea duru ko imakiniikua. Angamoi nako ma Pareta o nyawa yaniiki, gea ma Pareta yahigaro onangika la ka ihikaika gea dika yanii-niiki. Abe o Musa ai Paretaka naga itulihukuoka ato, “Onagona dika abe yaniikoka ma Pareta, ona gea kiani yomanoa ka genangoka dika ma Pareta ma goronaka.” Hokogea ma Pareta ma demo ma dihira. De gea igoungu abe nako ma Pareta ka ihikaikaua o nyawa yatobanii-niiki, gea ko idadiua Ma Jou waetongo yototiai ho o wowango ma ngango ko amakeua genangino. Masara gea ma dodihirainohi de duru ko moiua abe Ma Jou waetongo onangika wato yototiaioka ai himangoka ma titi yaniiki itiai o Musa ai Pareta. De gea itararono ngoneino de hohioriki igoungu ma titi abe naga Ma Jou ai Demo-demoka moioli abe ma dihiraino ihitulihoka. De ai Demo-demoka gea itemo ato, “O nyawa abe Ma Jou waetongoka wato yototiai ai himangoka ma titi manga ngongakuino, ona gea abe yamakeoka o wowango ma ngango.” Hokogea itemo Ma Jou ai Demo-demoka. Masara nako o nyawa mata-mata abe yomahinganono ma Paretaika la ato duru itiai yaniiki, ona gea Ma Jou ko waetongua wato yototiai ai himangoka, angamoi ona gea duru ko apoaua yaniiki itiai. Ho gea hiadono tanu Ma Jou ahao kiani wahikoboto de o hohowono onangika. Angamoi naga ihitulihukuoka Ma Jou ai Demo-demoka itemo ato, “De onagona dika abe ka ihikaikaua duru yaniiki Ma Jou ai Pareta mata-mataika abe naga ihitulihukuoka ma Pareta ma Bukuoka, de ona gea manga hingounu ko ingodumua o Paretaika. Ho ahao Una kiani wahikokikoboto de o hohowono ona mata-mataika.” Hokogea itemo Ma Jou ai Demo-demoka.

Higalioli 11:13

De ahao o Musa wahingahu ai gogianongoru o Isiraele ma nyawaika wato, “Ho nako ngini duru nihidodiai niahingounu Ma Jou ai pareta mata-mata abe tinidofanga nginika o wange naa, Una ahao duru winihiowa nginika. Abe nengokadauino de Una winihuloko la ngini niwidora Unangika abe ti ngini nia Jou o Yawe, de gea niwidora de ti ngini nia hininga ma gahumu de ti ngini nia wowango ma gahumu.