Hidingoto 27:24 - Ma Jou ai Demo-demo o Totobelohoka24 De woboaino de wato, ‘Paulusu, ufa nohawana masara ka idadi ani hininga iriidi dika, angamoi ngona ahao nomahiadono o Kaisara ai ngiika la una ma hirete woniurusu de wonitailako ma titi ani howono naga eko ko iwa. De hongoli ani hininga ka idadi iriidi angamoi Ma Jou duru ai hininga ma owa ma amoko wonihidoaka ngonaika. Abe ko ngonaua dika abe ko nohonengua o gahioka naa, masara ani dodiawo o nyawa mata-mata o kapa ma goronaka, onangoo wonihidoaka la ko moiua yohonenge.’ Hokogea ma malaekata ai hingahu ma demo ngohino. အခန်းကိုကြည့်ပါ။ |
Hidingoto 27:24
35 ပူးပေါင်းရင်းမြစ်များ
Mata-mata gea ipaha de ahao naga moi o himatoko Ma Jou o Yaweoka de aino abe wihimatoko o Abaraamika. De ai himatoko gea imaketero hoka duru yomarihimangino, de Ma Jou wihingahu wato, “Abaraama, ngaro o kia dika naga ma ufa nohawana, Ngaro naga ani musu ma Ngohi todadi ani dadatoko, De ani utumu o kiahonangino abe Ngohino ahao namake kohaamoko, Mangale ngona nosanangi nohiniiki Ngohi naa.”
De ka de ma wange gea o Yusupu wodadioka wohibaluhu ai tau ma hiaturu mata-mataika de Ma Jou o Yawe duru wihiowa o Potifarika mangale ma titi Ma Jou duru widuhunu o Yusupika. De hiadono o Potifara de ai duduhunu de manga karajaanga mata-mataika ai tau ma goronaka gea Ma Jou wahikokiowa. De wohiowaoo ai redi mata-mataika la ai joro enangoo ikutufuru de hiadono ai aewanioo duru ifaa-faatuku.
De o Elia wotemoli munangika wato, “Hobata, ngaro ufae dika de nohawana de o hafini masara nolio de nodiai dika abe hoka nohideeoka. Masara ihira nohidiai ahi roti moi ma eteteke abe ani tarigu de ani saitunu ma minyaino, de ahi roti gea nohihidoaka ngohino de ahao nodiaioli ti ngini nia inomo la ka idadi nginioo niaolomo.
De nagali ahao o gogubernuuru de o kokoano manga hima-himangoka nimaokoino angamoi o nyawa initae nginika abe ma titi ngini nihinii-niiki Ngohi. De genangoka ngini ka idadi nimahingahu onangika ma titi nia ngongaku Ngohino. De gea hiadono ona utu ko o Yahudi ma nyawaua abe naga genangoka, onangikaoo ka idadi nimahingahu ma titi Ngohi.
De to Una ai demo o Yesusu wohigila-gilahi wato, “De naa tohigalioli ahi demo abe tato ufa niamodongo o nyawaika. Angamoi ngaro o nyawa inihikangela nginika de inihidee la ato initoma, ma gea ti ngini nia badanga dika abe ka idadi yatoma. De nako ti ngini nia jiwa, gea o nyawa ko yakunua yahohonenge enangika, masara abe nako Ma Jou, Una dika ka idadi wahibinaaha o nyawa manga badangoo de manga jiwaoo o Naraka ma ukuika. Ho koaho niwimodongo Unangika dika de niwihoromati ma titi ai kuaha kohaamoko gea.”
De o Yesusu wopaluhu onangika la ihioriki ko kia-kiaua ahao idadi onangika ma dorou nako ma oraha ko adonuahi Ma Jou wahigunoa la yamake. Abe Una wotemo wato, “Sarakia ka o wangeohi naa naga? Nako o nyawa yotagi-tagi o wange-wangeoka ngaro o kia dika naga manga dodagioka ma ko yoduhuputua. De imaketero hokogea onagona dika abe yahitararono de Ma Jou ai mau ko idadiua manga wowango ihihanga Unangoka.
De ma futu gea de nanga Baluhu idodutu womahimatoko o Paulusika de wihingahu wato, “Paulusu, ngona ufa ani hininga ihuha masara ka idadi notomoroini dika. Angamoi abe imaketero hoka o Yerusaleeme ma nyawaika naa nahingahuokau ma titi Ngohi, duru hokogenangoo ngona ahao o Roma ma kotaka de nahikodoku onangikali ma titi o Abari ma Rorahai.” Hokogea nanga Baluhu wihingahu o Paulusika.
Abe nako hoka tahowonoka de ahi howonino gea kiani ihihohowono de o hohonenge, gea tosanangi dika todafongo ahi hohowono. Masara mangale ma titi ko iwa ahi howono ho ko idadiua ihihidoaka o nyawaika gea la ihitoma dika. Abe ngaro ngona o gubernuuru de ngaro o nyawa utu, masara moioo de ko iwa abe naga de manga kuahaka la ihihidoaka onangika abe ihihideeoka ato ihitoma! Ho ngohi kiani tomagahoko la nanga koano wokokurutiye o Kaisara to una dika ai himangoka ihiurusu ahi howono!”
De ma tentara ma nyawa ona yamake abe ma kapa ikilianga ho ona yafikiri abe ma nyawa gea yatobagoana onangika marai ahao yokokiloara. Abe ona yafikiri ato done ona utu yomangumo o gahiuku de yotiboko o dowongiha de ahao yoara dika la yomaduhunu manga hohowonino. Masara ma tentara duru yoluku la o howo-howono ma nyawa gea yoara, ho manga hininga ato koaho yatomaka dika.
Masara nanga Baluhu wotemo wato, “Noikohi de naniiki dika ahi demo abe tonihulokoka. Angamoi o Saulusu una gea tiirikoka la tato ahi Abari ma Rorahai una wao de wahingahu-ngahu onangika abe ko o Yahudi ma nyawaua de o kokoanoika, de ngaro o Isiraele ma nyawaikaoo ma ahao wahikodoku ahi wowango ma ade-ade ma demo.
Ho mangale ma titi nanga Baluhu idodutu ka idadi wonahitogumu nanga popanyakeino de ka idadioo wonahiapongo nanga howono ma titi nanga niniatino, ho duru tinihigaro nginika la nia howo-howono nimangaku nia gogianongoruika de nimakokagahoko Ma Jouiye la ngaro nia kangela nia bada-badangoka eko ngaro nia gogao Unangika itoakoka, ma gea mata-mataika de Una ka idadi winihitogumu genangino. Angamoi nako womatengo wataana de Ma Jou ai mau, to una gea ai gogahoko naga duru de ma kuahaka angamoi Ma Jou ahao wihigihene unangika de hiadono wohingodumu ai gogahokino gea.
ကြော်ငြာတွေ