Hidingoto 2:9 - Ma Jou ai Demo-demo o Totobelohoka9 De ngone naa utu nanga tonaka o Paratia, de utu o Mede ma tonakino hoboa, de utuoli o Elamoka ma nyawa. De ngone utu nanga gogere o Mesopotamia ma tonakoka, utu o Yudeaka, de utu o Kapadokia ma tonakoka, de utuoli o Pontusu ma tonakino eko o Asia ma tonakino hoboa. အခန်းကိုကြည့်ပါ။ |
Hidingoto 2:9
34 ပူးပေါင်းရင်းမြစ်များ
De ahao naga o parangi o Kanani ma tonakoka. Naga o kokoano yaiata o homoaino abe yaparangi o kokoano yamotoaika abe manga kota-kota imanoa o tonaka ma dolaka abe genangoka o Loti wogogere. De ma kokoano o homoaino gea, manga romanga de manga tonaka eko manga gogere hokonaa: O Kedoro-Lomere una o koano o Elamoka, O Amapeele una o koano o Babeloka, O Arioko una o koano o Elasaroka, de o Tidala una o koano o Goyimoka. De o koano yamotoa abe yahikoano o nyawa abe yogogere o Yorodani ma dolaka, abe genangoka o Loti wogogere, to ona manga romanga de manga kota hokonaa: O Bera una o koano o Sodomoka, O Birisa una o koano o Gomoraka, O Sinaba una o koano o Adimaka, O Semebe una o koano o Seboimoka, De naga womatengoli una o koano o Bela ma kotaka abe ahao ihiromangoli o Soara ma kota.
Ho o Abarahaama ai duduhunu gea wato wosobo ho womahidiai woiki. De ihira ai dutu ai unta ngimoi wale o duduonino de ahao waleoli ai dutu ai kiahonanga irupa-rupa, abe duru ma rorahai de duru ihali, de mata-mata gea wohibarene o untauku. Ho gea womahidiai ibooto de wosobo de naga ai dodiawo yamuruono naga iwiniiki. De yoiki manga dumutu o Nahoro ai kotaika abe naga o Arama-Mesopotamia ma tonaka ma honongaka.
De ma bahaika o Samaria ma nyawa wahikala de gea yadaene o Hosea ai taongo hiwo ibooto abe wahikoano o Isiraele ma nyawa. De gea o Hosea iwibuiokahi ho ai kuaha iwederoka de o Isiraele ma nyawa manga ngoe o Samanesere wataoko de wao to una ai tonakika. De o Asuru ma tonakoka wahigogere de manga doomu ma ngoe abe manga ngi homoi-homoiika ai tonaka ma honongaka abe ihiromanga o Halaha ma tonaka. De utu o Isiraele ma nyawa wao ai tonaka ma honongali ma romanga o Gosana de wahigogere o Haboro ma akere ma ngigoroka. De o Isiraele ma nyawa utu wao ka hiadono o Madai ma nyawa manga tonakika de wahigogere to ona manga kota-kota ma goronaka.
De ma oraha gea de nanga Baluhu idodutu ahao watoomuinoli ai nyawa manga hou, abe naa ma hinooto ibooto ai nyawa watoomuino. De gea ai nyawa wale de wahigilio o tonaka iwoe-woeino. Abe utu o Asuroka de nagali o Mesiiri ma tonakoka, de utu o Patorosoka, o Etiopia ma tonakoka, o Elamoka, o Babeloka, o Hamatoka, de o nuuhu utuino abe imanoa kohagurutika.
De o Korintusoka naga o Yahudi ma nyawa womatengo abe ai romanga o Akila. De una gea womaboa o Pontusu ma tonakoka masara ipahaino de wogogere o Italia ma tonakoka. De o Akila una woilakoka ho ngoi fekata ami romanga o ngo Pirisikila. De ona yahinooto naa ma duru de yakiniiki o Italia ma tonakoka de yaino angamoi o Roma manga koano wahulokoka wato kiani o Yahudi ma nyawa mata-mata yakokinoaika o Roma ma kotaka de yoiki o tonaka utuika. De ma oraha gea manga koano o Romaka ai romanga o Kalaudiusu. Ho o Paulusu de o Akila de ngoi fekata o ngo Pirisikila ona yomakamake o Korintusu ma kotaka.
De hokogea ka ihikaika wotobadoto-dotoko de wahikodoku Ma Jou ai Demo-demo o nyawaika abe ai dekana o taongo hinootoino. Ho o nyawa abe o Asia ma tonakoka gea yogogere, ngaro o Yahudi ma nyawa de ngaro ona ko o Yahudi ma nyawaua, masara ona ko manga ngoe ka idadi yoihene nanga Baluhu idodutu ai abari ma titi o Paulusu ai demoino.
De ngohi naa ahi demo ma dumutu ko ma titiua to ngone nanga karajaangika dika, masara tohidifikiroo ma titi nanga jou o ngo Aratemisi gea! Angamoi igoungu ma titi o Paulusu dika hiadono naga utu abe ona ko iwaka manga horomati nanga jouika. De mangale ma titi gea ho nanga karajaanga ma hofoko o nyawa ko yomaijainokaua gea abe hotobadiai. De abe ma titi nanga jou o ngo Aratemisi muna gea duru mokokurutiye, de nanga tonaka naa o Asia ma tonaka ma amokika de homahuba-huba munangika. De ngaro o dunia ma amokika masara naga manga ngoe abe munangika yomahuba-huba. Ho ngohi tato duru hiokoo nako o nyawa ko imilegaikaua munangika de yoetongo to muna ami tau ato ko kia-kiaua! Angamoi gea ahao ami romanga awea-weara dika!” Hokogea o Demetiriusu ai demo onangika.
De o popareta ma nyawa yamuruono naga abe yomaketedodiawo de o Paulusu, onangoo duru ko yoigoua la una wowohamika, ho iwihurata unangika de yahuloko manga nyawa la manga hurata yomataiti iwidotaka. De manga hurata ma dolaka iwihibehehongo ato, “Ngomi duru minihitiari la ufa nowohama ma dodoomu ma ngiika angamoi gea done imaketero abe hoka ani wowango nahidoakika dika onangika.”
De naga o Paulusu ai dodiawo manga ngoe abe yomakiniiki de de una. Abe o Berea ma nyawa naga womatengo ai romanga o Sopatere abe una o Pirusu ai ngofaka, de naga o Tesalonika ma nyawa yahinooto o Arisitarakusu de o Sekundusu, de o Derebe ma nyawa womatengo o Gayusu. De nagali o Timotiusu de o Asia ma nyawa yahinooto o Tikiku de o Torofimusu.
De yomahingahuoka de ipahaino abe manga gahe ngade-ngade adonoka angamoi itigioka manga wange tumidi ipahaikaka. De ma wange gea de o Paulusu naga Ma Jou ai Tauoka, masara nagali o Yahudi ma nyawa yamuruono naga abe o Asia ma tonakino yoboa. De ona gea iwimake o Paulusu de ahao yahikagaro manga dodiawoika hiadono o nyawa manga ngoe duru iwingamo o Paulusika ho iwitaokino.
De nagali nanga gianongoru o Arisitarakusu abe una o Tesalonika ma kotaka ma nyawa o Makedonia ma tonakoka, unangoo naga de de ngomi ma oraha gea. Ho ngomi mia ngoe mifarene o kapa moi abe iboa o Adaramitiumu ma kotaka de aino. De ma kapa gea ma dumutu la itulu-tulu moduku ma kota-kotaika abe o Asia ma tonaka ma ngigorino anii-niiki.
De ipaha o wange moiuku de naga yoboaino o nauru yamuruono naga abe ona yatobaniiki o Yahudi ma nyawa manga dodotoko ma tau moi. De ma dodotoko ma tau gea ihiromanga ato, “o Gogilaongo abe manga dutu yahiluasoka manga dodoomu.” De manga dodotoko ma tau ihiromanga hokogea angamoi ona mata-mata ma dihiraino de yodadi o nyawa manga gogilaongo masara ipahaino de yahiluasoka. De ona gea o Yahudi ma nyawa abe yomadionikino o Yerusaleemoka angamoi manga gogere ma dihiraino gea utu o Kirene ma tonakoka, de utu o Alesandaria ma tonakoka, de utuoli o Kilikia ma tonakino eko o Asia ma tonakino yoboa. Ho o nauru gea yoboaino de yomaketeribuutu ona de o Setefanusu ma titi ai demoino.
De hokonaa o Setefanusu ai bobaluhu unangika, wato, “Ahi gogianongoru de ahi balu-baluhu abe duru tinihoromati, abeika nitotoihene ahi demo naa. Abe duru ma dodihiraka de nanga Jou abe Una duru de ai medebini ma dararonoka, Una womahimatoko nanga tofora o Abarahaamika abe ma oraha ka wogogerohi o Mesopotamia ma tonakokahi. De ai tonaka gea naga ma romanga moioli, abe ihiromanga o Kasidimi ma tonaka. Abe ma oraha gea ko womaturuuruahi o Harana ma tonakika.
De ngohi ahi tabea tohidingotoo abe o nyawa mata-mataika yatoo-toomuino o ngo Pirisikila de o Akila manga tauoka la ona yodiai manga gareja ma doomu genangoka. De ahi tabea tohidingoto ahi olo o Epenetusu abe tidora unangika. Abe nako o nyawa mata-mataika yogogere o Asia ma propinsi ma tona-tonakoka, masara una gea duru wohira wingaku o Kristusika.
De naa marai nanga gogianongoru o Yesusoka ko manga ngoe manga tabea ihidingoto nginika. Abe ona o gareja yanii-niiki o Asia ma propinsioka naa, ona ihidingoto manga tabea nginika o Korintusu ma garejaika. De o Akila de ngoi fekata o ngo Pirisikila de ona nanga gogianongoru utu mata-mata abe o Gareja ma wange ma getongo de yomatoomuino o Akila ai tauoka, ona mata-mata manga tabea ilamoko nanga Baluhoka ihidingoto nginika.
De ahi gogianongoru, ahi demoino gea ma titi o kangela de o lalaru de ko tofeto-fetoua. Abe ngomi duru mioigo la ngini nihioriki ma titi to ngomi mia kangela miaohana nengokadauino abe ma oraha ngomi naga o Asia ma propinsi ma tonakoka. Abe mia kangela gea duru itubuhoholi, hiadono ngomi miamao mia hininga alufungoka de o kangela hiadono ngomi miato bote mia wowango ma baha adonoka. Ho ngini genangoka ufa niataoko ihowono abe niato mia kangela ko iwa. Koaho ngini duru nihioriki ma titi mia kangela ma dodubuho gea!
Ahi gogianongoru abe ngini nidadioka Ma Jou ai nyawa. Ngohi naa o Peturusu to Yesusu Kristusu ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ngini o dionikino ma nyawa abe nimahikokabarihika o tonaka utuika. Abe ngini naga utu nimanoa o Pontusu ma tonakoka, de naga utuoli o Galatia ma tonakoka nimanoa, de utuoli o Kapadokia ma tonakoka nimanoa, de utuoli o Asia ma tonakoka nimanoa, de abe ngini utuoli o Bitinia ma tonakoka nimanoa. De ngohi tinihioriki abe ngini homoi-homoi nimanoa, gea imaketero hoka o dionikino ma nyawa dika nimanoa nia ngi homoi-homoiika.
De ma ilingi gea itemo ngohino ato, “Abe naa bootino namake de ani lako, gea kiani nohitulihuku o buku moiuku de gea nohidingoto abe o gareja ma doomu tumidika. De gea ma gareja ma doomu moi o Efesusu ma kotaika nohidingoto, de o gareja moiikali abe o Semirna ma kotaka, de o gareja moioli abe o Peregamusu ma kotaka, de naga moioli abe o Tiatira ma kotaka, de nagali abe o Saridisi ma kotaka, de nagali abe o Filadelfia ma kotaka, de naga moiohi abe o Laodikia ma kotaka. Ho gea ma buku ahao kiani nohidingoto ma gareja tumidika gea.”
De naa ngohi o Yohanese tinihurata abe ngini ahi gogianongoru o gareja tumidika, de abe nia gareja ma doomu tumidi gea naga nimanoa o Asia ma propinsioka. De ngohi tinigahoko Ma Jouiye de tonganono la to Una ai owa de ai hininga ma miriidi winihidoaka nginika. De Una gea abe ma oraha naa Una nagahi, de Una ngaro ka hiado-adonino ma Una nagau, de ngaro ka hiado-adonika ma Una gea ka wowangohi. De to Una ai kadera duru ma hohailoa ma himangoka de naga genangoka Ma Jou o Womaha ko wokurangua ma duru wongodu-ngodumu.
ကြော်ငြာတွေ