Hidingoto 2:5 - Ma Jou ai Demo-demo o Totobelohoka

⁵ De abe ma oraha gea naga o Yerusaleeme ma kotaka o Yahudi ma nyawa duru ko manga ngoe abe ka ihikaika yomahuba-huba Ma Jouika. Abe ona gea yoboa manga tona-tonakoka de yaino la yodioniki o Yerusaleemino, ho ngaro o tonaka o kia dika naga o duniaka naa masara naga utu o Yahudi ma nyawa abe yoboa gea ma tonakino la yakokiniiki o Pentakosta ma rame-rame.

Hidingoto 2:5 ပူးပေါင်းရင်းမြစ်များ

Huhupu 23:16

“De nia rame-rame moioli tinihidoaka gea o Domoro ma rame-rame abe nimahihuba Ngohino nia dato-datomino ma hasili ma domoro. De ahao nia rame-rame ma hange abe tinihitararono naa gea o Gugutuku ma rame-rame. Abe ma oraha nia datomo hoka o pine eko o gandumu niautuku de hiadono ma hasili ma amokino niautuku niabootoka de ahao ma titi gea kiani nihirame-rame Ngohino.

Matiusu 24:14

“De o Abari ma Rorahai abe ma titi hokokia ahao Ma Jou wahikoano ai nyawa, ma abari gea ahao ahi nyawa ihiabari o dunia ma amokika la o nyawa abe o dutu homoi-homoiino ka idadi yoihene. De nako hiadono o dutu mata-mata yoihenoka, gea de ahao ma oraha adonoka o dunia ma bobaha.”

Lukasa 17:24

Angamoi nako ma oraha adonoka abe Ngohi o Nyawa ma Ngofaka toboali, gea ahao o nyawa mata-mataika o duniaka naa ka ma moi ihimake ahi boa. Abe imaketero hoka ma oraha o leletongo de o nyawa mata-mata ka idadi yamake ngaro ona dai eko dina, hokogenangoo ahao o dunia ma nyawa mata-mataika ahao ihikokimake ma oraha abe toboali.

Lukasa 2:25

De naga womatengo wogogere o Yerusaleeme ma kotaka ai romanga o Simeono. Una gea duru iwimagawe waniiki Ma Jou ai behehongo mata-mataika de to una ai wowango ma datoro itiai. De Ma Jou o Womaha naga o Simeonoka de ma dihira wihibehehongokau o Simeonika wato, “Ngona ko nohonenguahi de kiani nimakeohi de ani lako o koano gea abe Ma Jou wohibehehongoka.” Ho ka ihikaika o Simeono widodamaa ma koano gea abe o Isiraele ma nyawa manga hininga ma huha wagoraka angamoi ahao ma oraha gea de Una waduhunu manga hohowonino.

Lukasa 24:18

De womatengo ona yahinootoino abe ai romanga o Keopasa wipaluhu wato, “Ani demoino gea de tataoko abe ko nohiorikuahi hokokia idadi naa ma duruika o Yerusaleemoka. Ho marai Ngona ka nomatengo dika abe ko nohiorikua, angamoi o nyawa mata-mata ihioriki. Abe barikua o dionikino dika ma nyawa ma onangoo ihiorikoka abe idadioka.”

Yohanese 12:20

De naga utu o Yunani ma nyawa abe onangoo yoiki yaniiki o Totilakuru ma rame-rameika gea la ato onangoo yomahuba genangoka.

Hidingoto 10:2

De una gea ai hininga la woigo ka ihikaika wihisanangi Ma Jouika. Ho una de ai tau ona mata-mata yomaketehiningamoi abe duru iwihoromati Ma Jouika. De una ai hininga ma rorahaiino wahidoa-doaka o hu-huha ma nyawaika, de ka ihikaika womaniata Ma Jouiye.

Hidingoto 10:7

Ho ka de ma malaekata wosoboka de o Koroneliusu wahokino ai nyawa yaruange. Abe yahinooto onangino yodadi ai duduhunu ai tauoka, de abe womatengoli unangoo witobaduhunu o Koroneliusika, masara una gea o tentara ma nyawa. De ma tentara gea, unangoo naga ai horomati ma amoko abe itagi Ma Jouika.

Hidingoto 13:50

Masara o Yahudi ma nyawa manga hihira genangoka ona yahitobahigaro o kota ma nyawa manga ngoe la onangoo yatobalawana o Paulusu de o Baranabasika. Abe ona yahigaro o nau-naurika abe yodadi ma kota gea ma hihira, de nagali yahigaro o ngo-ngofekaika abe manga gogere ikokurutiye o kotaka gea masara tanu yomatobahuba-huba Ma Jouika. De ahao onangoli yahigaro o kokawaaha manga ngoe hiadono o huruhara idadioka abe ona mata-mata yangamo o Paulusu de o Baranabasika de yakiniiki ma kotaka ka hiadono ma hoanika.

Hidingoto 2:1

De ipahaino abe o Pentakosta ma rame-rame adonoka de ona mata-mata yomatoomuinoka abe o ngi moioka.

Hidingoto 22:12

De naga ma kotaka gea womatengo abe ai romanga o Ananiasa, de una duru watobaniiki Ma Jou ai hiningaika de nanga paretaika. De o Yahudi ma nyawa o Damasiki ma kotaka ona mata-mata duru iwisanangi unangika.

Hidingoto 8:27

Hokogea wihuloko de o Filipusu waniiki ai demo ho una wotagi-tagi ma ngekomika gea. De ai dodagi ma goronaka de yomakamake una de o Etiopia ma nyawa womatengo abe una nengokadauino womahuba-huba Ma Jouiye o Yerusaleemoka ho naa wosoboka wato wolio ai tonakika. De una gea o Etiopia ma tonakoka de ai gogere duru ikurutiye. Angamoi to ona manga tonakoka de naga momatengo manga koano abe ami romanga o ngo Kanadake, de una womitobaleleani munangika ho ai gogere duru ikurutiye. Abe una wohiaturu to muna ami tiwi de ami kaya mata-mataika ami tauoka. Ho una o Etiopia ma nyawa naga wofarenuku ai kereta ma goronaka ho wogogeruku de wobasa abe Ma Jou ai uru ma dodofanga o Yesaya ai bukuino.

Higalioli 2:25

Angamoi duru o wange naa dika de ahao tokarajaanga o nyawa mata-mata manga hiningaka la naga manga modongo ma amoko nginika. Ho ma oraha ona yoihenino ma ade-ade ma titi ngini naga niboa manga tonakino de ahao duru yofafara mangale manga hawana de manga modongo nginika.’”

Kolose 1:23

De ma oraha gea ngini igoungu nidadioka o debi-debini ma nyawa, iti ngini naa nigila-gila niwingaku Unangika la nia ngongaku duru hoka imahingutukuku hiadono ko idomo-domoua. De ufa nimahipipidili nia nganganonino abe nengokadau niihenoka o Abari ma Rorahaioka. De o Abari ma Rorahai naa ihingahu-ngahuoka o dunia ma amokika, de ngohi naa o Paulusu todadioka to ena ma huhuloko abe ngohioo tahingahu-ngahu o nyawaika o Abari ma Rorahai gea. Ho mangale ma titi Ma Jou ai hidee gea ngoneino, ho ngone kiani duru homahigagao nanga nganganonika ka hiadono ai dulaada mata-mataika wahiketehirimoioka.