Hidingoto 17:25 - Ma Jou ai Demo-demo o Totobelohoka

²⁵ De ngone ko idadiua hihidailako to Una ai perelu ma titi hileleani de nanga giamino, angamoi Una gea ko iwa ai perelu! Masara Una ma hirete abe wahidoaka o wowango mata-mataika abe iwango, de ngaro ma womaha, ma gea mata-mata ka Unangoka dika de aino iboa. Ho ka Una dika wohidailako o dunia naa ma perelu mata-mataika.

Hidingoto 17:25 ပူးပေါင်းရင်းမြစ်များ

Dodadi 2:7

De ahao o wange ma butaanga de ipaha Ma Jou o Yawe o tonakino wihidadi o nyawa moi o nauru. De Ma Jou o nauru gea ai ngunungiye widuwuwu la gea wihiwango de to Una ai womaha, ho o nauru gea ka idadi wowomaha hiadono wowango.

Yesaya 42:5

De hokonaa Ma Jou o Yawe ai demo, abe Una ma dihanga wotulaada de wahitauru la wakelenga ma ngioka. De Unangoo abe o dunia naa de ma dola mata-mataika wotulaada. Una gea abe wonahidoaka nanga womaha ngone o nyawa mata-mataino la ka idadi howomaha, de abe mata-mataika naga de ma wowangoka, gea to ena ma wowango ihititi duru Unangoka!

Yesaya 57:16

Angamoi Ngohi naa ahi ngamo nginika ko ihikaikaua itagi, de ahi dadae ma demo nginika naga de ma batingoka. Abe nako hoka ko iwa ahi ngamo ma batingi, gea de ahao o nyawa manga womaha ka ikokitoaka dika, de ona mata-mata tatulaadauku manga womaha agorakoka.”

Gegetongo 16:22

Masara o Musa de o Harunu duru yomangumo yomamotumuku o tonakoka de duru manga gogianongoru gea yagahoko Ma Jouika ato, “Ma Jou, o wowango mata-mata ihititi Ngonaka de aino ho o nyawa mata-mataika manga nyawa to Ngona. Ho done sarakia Ngona nato nangamo ona mata-mataika naa ma titi womatengo dika ai howono?” Hokogea manga niniata ma demo.

Gegetongo 27:16

“Ngona Ma Jou o Yawe, duru tonganono ahi duruuru naga. Ngona Ma Jou abe o nyawa nakokitulaada ho Ngona ka idadi womatengoli niiriki abe ka idadi nihitagongo la unangoli wahihira-hira ani nyawa manga doomuoka naa.

Matiusu 5:45

“De nako nia hininga hokogea nia musuika, gea nimahitaana abe nia hininga duru imakiniiki de ti ngini nia Baba o Horogaka ai hininga, ho ngini nidadioka to Una ai ngofa-ngofaka idodutu. Angamoi abeika ngone homafikirohi to Una ai hininga de ai datoro ngone o nyawaino. Abe Una wohiaturu la ai wange ma dararono ihitararono o nyawa mata-matauku ngaro manga hininga ma rahai ekola manga hininga ma dorou, ma wonahikokidoaka mata-mataika. De ngaro o nyawa abe yao manga wowango itiai ekola abe yao ko itiaiua, masara ngone mata-mataino wonahidoaka o awana ma akere la haborimake de inahikokiutumu genangino.”

Matiusu 9:13

De ahao wohigila-gila ai demo la utuohi wahitararono onangika wato, “Abeika nimatotoihene de niongano-nganono Ma Jou ai Demo-demoino moi naa abe ma dodihiraino de ihitulihukuoka. De genangoka Ma Jou wotemo wato, ‘Nako abe o nyawa yomahihuba Ngohino, gea manga datoro irahai de imakiniiki de ahi mau. De naga moioli abe o nyawa yapake o hininga ma dora manga date-datekika, enangoo ma datoro ma rahai. Masara nako ma titi hinooto gea de hohidotelega abe o kiakahi ikurutiye to Ngohi ahi himangoka, gea abe o nyawa yatobapake manga hininga ma dora manga date-datekika, ka genangohi ikurutiye.’ Hokogea Ma Jou ai demo ma dodihiraino. Ho koaho ngini naa nimadotokohi ma demoino gea ka hiadono duru niataoko ma titi genangino. De duru ma demo gea ma titi hiadono Ngohi naa tolomo de ma nyawa naangoka!” “Abe ahi datorino naa de tomahimatoko ahi hininga ma dora o nyawa ahi date-datekika naa. De hongoli tomahingahu abe gea ma titi ho hiadono Ngohi naa toboa o duniauku. Abe Ngohi toboa ko ma titiua la tahoko ona gea abe manga wowango itotiaioka, masara ona abe nagahi de manga howonokahi Ma Jouika, ona gea Ngohi tahoko.” Hokogea o Yesusu ai demo ona o Farisi ma doomuika gea angamoi ona ato bote to ona manga wowango itotiaioka Ma Jou ai himangoka.

Hidingoto 14:17

De ngaro hokogea wahigunoa, masara duru ka ihikaika naga ai hohininga abe o nyawa mata-mata ka idadi yamake manga wowangoka. Abe hoka Una ka ihikaika winihidoaka o awana de o joro ma hasili nginika la ka idadi niamake nia inomo de nia hininga ma garago.”

Hidingoto 17:28

De ngohi ka idadi totemo abe Una ko wokurutikaua angamoi ngone homoi-homoi nanga wowango ma titi gea Unangoka de aino. De ngaro abe ngone ka idadi nanga badanga ma kiahonanga hohikelu-kelu masara enangoo ma titi Unangino dika. De nako ko Unangua, ngoneoo ko inaiwa, ho mata-mata abe naga ngoneoka gea ihititi ka Unangoka dika de aino.” “De ahi demo gea imakiniiki de ti ngini o Yunani ma nyawa nia gianongoru womatengo ai demoli. Abe ma dihiraino una gea wotemo wato, ‘Ngone mata-mata to Ma Jou ai ngofa-ngofaka.’

Roma 11:35

De imaketero hoka Ma Jou ai sosawaro de ai tobahioriki duru kohagurutiye, hokogenangoo to Una ai hininga ma dora la wonahidoaka ngoneino. Abe ai Demo-demoka de itemo ato, “Una gea o hidoaka mata-mata ma titi Unangoka, de ngaro o kia dika naga, masara gea duru ihira iboa Ma Jouoka de aino. Ho mode o nyawa onagona naga abe ka idadi iwihidoaka moi Unangika la manga hidoaka gea ihititi onangoka de aino? Gea duru ko iwa! Ho mangale ma titi ko idadiua hahidoaka moi Unangika, ho duru itararono abe Ma Jou duru ko iwa ai nagimi ngone o nyawaino.”

Higalioli 30:20

De naa ma moioli tinihigaro la niwidora nia Jou o Yaweika de nia hingounu itagi Unangika hiadono niatobagou-goungu ka Unangika dika. Angamoi Una dika abe ka idadi winihiakunu la niwango nisosanangi dika ma tonakoka gea abe ma dodihiraino de Una wahibehehongo ti ngini nia totoforaika o Abarahaama de o Isaka de o Yakubika wato wahidoaka onangika.”

1 Timotiusu 6:17

De nanga gogianongoruika abe duru de manga tiwioka o duniaka naa, onangika kiani ngona nahitiari. Nahitiari nato, “Ufa ngini nimasade de ufa nimahinganono nia tiwika. Angamoi ngone ko hohiorikua nako ka ihikaika naga de nanga tiwioka eko bote itebini dika de ihihangoka mata-mata. Ho ufa genangika nimahinganono, ma koaho Ma Jouika dika nimahinganono, angamoi Una duru wonahidailako mata-mata abe ngone hoperelu la howango hosanangi.” Hokogea ngona nahitiari onangika.