Hidingoto 14:23 - Ma Jou ai Demo-demo o Totobelohoka23 De o gareja homoi-homoioka de ona yahinooto yairiki de yagoraka o nyawa yamuruono naga la yodadi ma gareja ma hihira genangoka. Ho yagoraka de ahao ko yosobouahi de yagahoko ma owa Ma Jouino ma titi ma hihira gea, abe o inomo ko yolo-olomuahi de yomaniata Ma Jouiye la manga hininga duru itagi ka Ma Jouika dika. De gea ma hihira yahidoaka Ma Jou ai giama ma hoatika la Una dika watobaduhunu onangika ma titi manga tagongo ma hungi gea. De hokogea yagahoko Ma Jouiye angamoi ma hihira onangoo yomahinganono ka Unangika dika. အခန်းကိုကြည့်ပါ။ |
Hidingoto 14:23
28 ပူးပေါင်းရင်းမြစ်များ
Abe ma dodihiraka ma oraha o Yohanese wiohiki o Yesusika ka hiadono ma wange abe iwigoraka daku o Horogaiye de ka yomakiniikohi. Ho onaguna dika higoraka ahao una gea wodadi womaketero hoka ngoneoli, abe unangoo ahao ka idadi wahiabari o nyawaika abe ma titi o Yesusu womomikoka ai honengino angamoi gea mata-mata unangoo ma hirete wamakeoka.”
De ona mata-mata yomaniata ato, “Mia Baluhu, Ngona dika notobahioriki o nyawa mata-mata manga hininga ma dola. De naa o Yudasa womahirehenoka la woiki to una ma hirete ai dumutika, abe ma titi wohonengoka ho naa ai hohowono ma ngi womahiadonoka. Ho ngomi naa mimagahoko la Ngona nomihidumutu abe onaguna yahinootoino naa Ngona niiriki de nigoraka la una wituruuru o Yudasa ai tagongoka la wodadi o hidingoto ma nyawa de de ngomi.”
De ipaha yosobokali ho o kapa yofarene de yolio manga gareja ma doomuika o Antiokia ma kotaika abe imanoa o Siria ma tonakoka. Abe ma dihiraino de genangoka yagoraka la yodadi o hidingoto ma nyawa abe o tonaka utuika. De ma dihiraino de manga gogianongoru gea abe yahitagongo de yagahoko onangika la Ma Jou ai hidoaka ma owa yahihira-hira ma oraha manga tagongo ihidagi-dagi o tonaka utuikali. Ho naa manga tagongo gea yabootoka ho yolioino manga gogianongoruika.
De hokonaa ma hurata ma demo abe ona ihitulihuku. “Mia gogianongoru o Yesusoka abe nimanoa o Antiokia ma kotaka, de o Siria ma tonakoka, de ngaro o Kilikia ma tonakoka. Ngomi naa o hidingoto ma nyawa de o gareja ma hihira abe migogere o Yerusaleeme ma kotaka. De mia hurata naa mihidingoto nginika abe ko o Yahudi ma nyawaikaua masara niwingaku-ngaku o Yesusika. Ho naa mia dora de mia tabea mihidingoto ngini mata-mataika!
De ma tonakoka gea de yosobo de ipahaino yomahiadonika o Yerusaleeme ma kotaika. De yomahiadonoka de o gareja ma nyawa mata-mataika duru yadafongo irahai, abe ngaro o hidingoto ma nyawa de ngaro o gareja ma hihira de ngaro ma nyawa utu, masara ona mata-mata yadafongo duru irahai onangika. De ahao o Paulusu de o Baranabasa yomulaenge yoade-ade onangika abe ma titi hokokia Ma Jou wodiai to ona manga wowangoino abe ma oraha ihiabari o Abari ma Rorahai o nyawa-nyawaika.
“De naa ngohi tinihidoaka ngini Ma Jou ai giama ma hoatika. De togahoko la ngini nimanoa duru ai Demo-demo ma goronaka. Abe ai Demo-demoino gea de wonahingahu ma titi ai hininga ma owa duru ma amoko ngoneuku. De nako ngini ka ihikaika niongaku de nimahinganono ai Demo-demoika, gea ahao ngini nibaluhu Unangika. De ipahaino de ahao Una winihidoaka nginika ma hiowa mata-mataika abe ma dodihirainohi de wonahibehehongoka wato ai nyawa mata-mata ahao hakokimake.”
De unangoo o gareja ma doomu mata-mata iwiirikoka una gea la ahao ma oraha o dora ma hidoaka miatoomuinoka de mitotaka o Yerusaleemika de una de ngomi mimakiniiki miloiki la ma duduhunu gea mitotaka nanga gogianongoruika. De abe ngone hahidoaka ma duduhunu onangika, gea ahao ihiboa o higiriiri nanga Baluhika. De gea nanga datorino de inahitaana ngone abe naga nanga hininga ma magawe la haduhunu nanga gogianongoruika.
Ahi ngofaka, nako hiadono naga moi ipuda genangoka abe nia gogianongoruoka de naga yahowono Ma Jouika, gea kiani nomahidodiai hokokia naduhunu onangika. Abe nako womatengo ani baluhu de kiani niduhunu unangika, ufa nitaere, ma koaho nitemo de nihigaro unangika abe imaketero hoka to ngona ani babaikali nitemo. De nako womatengoli naga wahowono abe una hatoli ka o goduuruohi, unangika nitemo abe hoka ani dodoto ma dutuika nitemo de niduhunu.
Ufa nomataitiholi nairiki de nafokumu o nyawa la yodadi o gareja ma hihira, ma koaho nohidodiai done o nyawa nairiki nahowono. Angamoi nako ona gea ka yahowonohi Ma Jouika de masara ngona nafokumu, gea imaketero hoka ngona nahigaro o howonika. De nako o howonika nahigaro, gea ngonaoo nahowono Ma Jouika. Masara ngona koaho nomaagoana la ani wowangoka ka ma hohailoa dika.
De igoungu duru ena gea ma titi hiadono ahi kangela naa tamake abe ihibuioka. Masara ngaro ahi kangela naa ma goronaka ma gea ko ihimalekua, angamoi tingakuoka o Kristusika, de Una gea duru tihioriki abe watobagou-goungu ma titi ai behehongo o kia dika wohibehehongoka. Ho naa duru tonganono de duru tongaku abe Una gea ahao wahitagongo o nyawa utuikali ahi tagongo gea la ahao onangoli yagoraka ma karajaanga gea abe ma dodihiraka wohihidoakoka ngohino. De gea duru tonganono Una ahao woogoana ma karajaanga gea ka hiadono ai gahe ma wange gea o Yesusu Kristusu woboali. Abe ma titi ngaro etohonenge, masara duru tongaku abe Una ahao ka ihikaika woogoana ai Abari ma Rorahai gea la ufa ihihanga ma ka idadi ka ihikaika itagiohi o nyawa utuika ka hiadono Una woboali. Ho ngonaoo kiani ani nganganono duru iputurungu Unangika de hiadono ufa inimaleke ma ka nohidagiohi ani karajaanga abe o Abari ma Rorahai o nyawaika ka nahingahu-ngahuohi.
Ho ma abari ma demo abe nengokadau ngona noihenoka ngohino de abe nanga gogianongoru manga ngoe to onangoo manga demo ma ka imaketero dika de to ngohi ahi demo gea, ho ma abari ma demo gea kiani nahitagongo nanga gogianongoru utuika genangoka. Abe ona gea kiani nanga gogianongoru abe iwileleani de manga tobagou-goungoka Unangika. De gea kiani ngona nairiki o nyawa abe ahao onangoli ka idadi yakunu yadotoko o abari ma demo gea o nyawa utuikali.
Nengokadau abe ma oraha toninoaika genangoka o Kereta ma nuuhoka de tonihibehehongoka la gea tato ngona ka idadi nohitiai ma kuranga eko ma kangela o kia dika nagahi o gareja ma dodoomu ma goronaka gea. De ma oraha gea tonihibehehongo ngonaika tato ahao ngona kiani nairiki de nagoraka o nau-nauru o kapongo homoi-homoiino abe naga iwingaku-ngakuoka genangoka la ma nau-nauru gea ona yodadi o gareja ma hihira manga ngi homoi-homoioka. Ho ngohi naa tonihihohininga abe ma titi ahi behehongo ma demo ngonaika ma oraha gea. Abe hokonaa ahi demo.
De nako naga nginioka abe inigogama ho nikangela, gea ngini niahokino o gareja ma hihira la yoboa nginino de inigahoko Ma Jouiye ma titi ngini. De gea ka idadi inihituagi ti ngini nia peauku de o saitunu ma minya la ihitunguu Ma Jou ai kuaha de gea yafetongo nanga Baluhu idodutu ai romanga. De hokogea o gareja ma hihira ka idadi inigahoko Ma Jouiye ma titi ngini inigo-gogama gea.
De naa ahi higaro ma demo naga abe ma dumutu ngini o gareja ma hihiraika. De nako ngohi naa, ngohioo o gareja ma hihira abe imaketero hoka nginioli. De ngohi naa ma hirete ma dodihiraino de tamake de ahi lako hinooto abe ma titi o Kristusu ai kangela ma ngoe iwidaene, ho ngohioo ai kangela gea tahingahu-ngahu o nyawaika abe hoka nginioli niahingahu-ngahu o nyawaika. De ngohioo ahao wohihidoaka ngohino to Una ai medebini ma dararono abe ma oraha womahimatokoli, de gea ko itedekanokaua abe Una womahimatokoli. Ho ngini de ngohi imaketero nanga tagongo de nanga gogere abe Ma Jou wonahidoaka ngoneino.
De moiohi ahi huhuloko nginika, la ngini naa ufa niafikiri abe inihikangela ma dekana, angamoi nia kangela gea tanu ka jai-jai dika de ipahaka. De gea ipahaka de ahao Ma Jou Una ma hirete winihitogumu nia kangelaino de winihiputurungu nia ngongakuoka. De gea Unangoo winihitongohono la ka nimatongohono ma dorouino de winihibitumu la duru ko nihelorua nia ngongakuoka de aino. Ho ahi gogianongoru, naa tinihigaro abe nia kangela gea tanu ka jai-jai dika de ipahaka. De ufa ngini niawohanga abe Ma Jou ai hininga duru aomanga de ma owa de ma rorahai. Abe Una gea o hiowa mata-mataika ma titi imanoa ka Unangoka dika. De Unangoka naga ai hidee duru ma hohailoa abe winihideeoka nginika. Abe igoungu ngini nidadioka moi de o Yesusu Kristusu, masara hongoli naga ai hidee la ika-ika de o Kristusu winihikodoku de winihidoaka to Una ai medebini ma dararono nginika. De ai medebini ma dararono gea abe ngini ahao niamake Unangoka de aino, ena gea duru itongohono ka hiado-adonika. Ho Una winiahoko ngini la ka idadi niamake ma utumu mata-mata ai hideeoka de aino, abe Una winiahoko ngini wato, “Niaino la nimamake ahi hiowa ma utumu abe Ngohi toigo tinihikodoku nginika!”
Ahi gogianongoru o Yesusu Kristusoka. Ngohi naa ti ngini nia dimono nanga ngongakuoka. De naa ahi hurata tohidingoto abe ngona ahi dodiawoika de to ngona ani ngofa-ngofakikaoo. De igoungu abe ngona Ma Jou woniirikoka la wonihidadi to Una ai ngofaka. De ngini mata-mata duru tagoungu tinidora nginika, masara ka ngohiua dika tinidora, ma naga utu nanga gogianongoru manga ngoe abe onangoo ihiorikoka ma dodotoko ma gou-goungu, de onangoo mata-mata duru inidora nginika.
ကြော်ငြာတွေ