De o Yesusu wogila-gilali wato, “De naa tohigalioli ma moioli tinihitiari nginika. Ngini abe nitobadoto-dotoko o Musa ai Paretaino de nginioo o Farisi manga doomuino, ahao ti ngini nia hohowono duru kohadubuho niamake nginika! Angamoi ngini duru de nia magawe niatobalingiri o nyawa la niahidadi ona ti ngini nia nyawa abe ininii-niiki ngini. Abe ngini nitagi-tagi duru kohagurutika abe ngaro kiani nimahihora o ngooto ma honongaika eko niloiki o tonaka utuikali ma ngini duru nioigo iti niamake o nyawa abe ona yosanangi ininiiki. Masara ona gea abe initobanii-niiki de ma bahauku de nako ona de ngini de ka onangohi manga dorou ilamoko manga hiningaka. Ho mangale ti ngini nia hohowono ahao niamake o Narakaika, ho hongoli ona gea abe initobanii-niiki, angamoi to onangohi manga hohowono itubuho o uku ma ngootoka gea.”
Hidingoto 13:43 - Ma Jou ai Demo-demo o Totobelohoka43 De ahao ona mata-mata gea manga dodotoko ma tauoka yohupuoka. Abe naga o Yahudi ma nyawa yamuruono naga de utuoli ko o Yahudi ma nyawaua abe ma dihiraino de yomangali la o Yahudi ma nyawa manga dodotoko enangoli yatobaniiki. De ona manga ngoe yomulaenge yatobanii-niiki o Paulusu de o Baranabasika. Ho ona yahinooto yahigaro onangika ato, “Kiani ngini ka ihikaika nimahinganono Ma Jou ai hininga ma owa nginika, de ufa nimahipipidili genangino.” အခန်းကိုကြည့်ပါ။ |
Hidingoto 13:43
39 ပူးပေါင်းရင်းမြစ်များ
De o Baranabasa una womahiadonoka de wamake abe Ma Jou ai hidoaka ma owa ona ko o Yahudi ma nyawaua yamakeoka. De gea wamake abe hokokia Ma Jou womahitaana abe wokarajaangoka ona gea manga kokihiningaka, ho o Baranabasa una duru wogogaragoka. De una wahigaro ona abe ahao iwingaku-ngaku nanga Baluhika la ona ka ihikaika yatobaniiki nanga Baluhu o Yesusu dika ai mau onangika.
Masara o Yahudi ma nyawa manga hihira genangoka ona yahitobahigaro o kota ma nyawa manga ngoe la onangoo yatobalawana o Paulusu de o Baranabasika. Abe ona yahigaro o nau-naurika abe yodadi ma kota gea ma hihira, de nagali yahigaro o ngo-ngofekaika abe manga gogere ikokurutiye o kotaka gea masara tanu yomatobahuba-huba Ma Jouika. De ahao onangoli yahigaro o kokawaaha manga ngoe hiadono o huruhara idadioka abe ona mata-mata yangamo o Paulusu de o Baranabasika de yakiniiki ma kotaka ka hiadono ma hoanika.
De ma kota-kotaka gea de duru yahipoputurungu o ngongaku ma nyawa manga hininga mata-mataika. Abe ona yahitobahigaro la ka ihikaika o ngongaku ma dodotoko yatobanii-niiki enangika. De yahihohininga onangika ato, “Ngone hingaku-ngakuoka ko ma titiua nanga wowango ma goronaka de ma rorahai dika ka ihikaika hamake. Masara kiani nagaoo o kokangela abe haohana. De abe ma kokangela hohimangoka de ahao ika-ika hohapongo dakuiye la Una ka idadi wonahikoano ngone ai nyawa.” Hokogea manga higaro onangika.
De ngaro hokogea masara ona yahinooto yomanoa manga dekana ma kotaka gea de duru yahingahu-ngahu de manga domoroinoka abe ma titi nanga Baluhu ka idadi wonaduhunu ma titi ai hininga ma owaino dika. De nanga Baluhu Una gea womahitaana o nyawaika abe manga demoino gea ma titi Una duru yagou-goungu. Abe gea wohitaana ma titi wahiakunu o Paulusu de o Baranabasika la ona yodiai o heheranga de o kuaha ma dodunguu o nyawa manga hima-himangoka la ka idadi duru yongaku manga demoika.
Abe momatengo gea ami romanga o ngo Lidia abe o Tiatira ma kotaka ma nyawa, de muna motobafuku-fukunu o ngoere ma wuu-wuu abe duru ihohailoa. De munangoo momatobahuba-huba Ma Jouika. De ipahaino abe muna motoihene o Paulusu ai demoino de Ma Jou wafelenga to muna ami hininga la ka idadi mataoko itiai ai demo, de ahao muna modafongo ai demo munangika.
De o Paulusu una ka ihikaika wowohama o Yahudi ma nyawa manga dodotoko ma tauika la yomakoketemo de wahigaro onangika ma titi o Abari ma Rorahai. Abe ngaro o Yahudi ma nyawa de ngaro ona ko o Yahudi ma nyawaua abe iwihoromati Ma Jouika, masara una duru wahigaro ona mata-mataika ma titi ai demoino la wato iwingaku o Yesusika. De o wange-wangeiye una woiki o kota ma gogoronaka abe genangoka o nyawa yomatoo-toomuino la onangikaoo wahikodoku o Abari ma Rorahai.
De naga o nauru yamuruono naga onangino abe yomahidutuku o Paulusika de yodadi o gogianongoru o ngongakuoka. Abe manga hidimono manga doomuoka womatengo ai romanga o Dionisiusu wingaku, de naga ai dodiawo utuoli abe onangoo iwingaku. De nagali o ngofeka momatengo munangoo mingaku o Yesusika, abe muna ami romanga o ngo Damarisi.
De o Paulusu wanoaika ona ma dodotoko ma tauoka de woiki wowohama o nyawa manga tauika abe duru ma dodotoko ma tau ma datekoka. Abe ma tau gea ma dutu una ai romanga o Titiusu Yustusu, abe una ko o Yahudi ma nyawaua masara ma dihirainohi de womahuba-huba Ma Jouika. Ho o Paulusu woiki ai tauika la genangokali ka idadi wadoto-dotoko de wahigaro o nyawaika ma titi o Abari ma Rorahai.
De nagahi ngone utu abe o Firigia ma tonakoka de utu o Pamafilia ma tonakoka ma nyawa. De utuoli o Mesiiroka ma nyawa, de utu o Libia ma nyawa abe o Kirene ma datekoka nanga gogere, de ngone utu o Roma ma nyawa abe hodionikino. De abe o Romaka de aino, ngone utu homaboa o Yahudi ma nyawaino, de utuoli ko o Yahudi ma nyawaua masara ma oraha naa de homaputuhoka la hatobanii-niiki to ona manga pareta de manga hiaturu.
De o Paulusu wosanangi womahingahu ai hininga onangika ho wogelenga ma gahe la ahao ma wange adonoka de yomakamakeoli. De ma wange gea adonoka de o nyawa manga ngoe yoboaino o Paulusu ai tauino la yotoihene ai demoika. De una wahingahu onangika abe ma titi hokokia Ma Jou wahikoano ai nyawaika, de nagali wadotoko onangika ma titi o Yesusu abe Ma Jou ai Demo-demoino. De gea wohipake ma demo abe o Musa ai buku motoaino de abe Ma Jou ai uru ma dodofanga manga buku to enangoo ma demo wohipake la wadotoko ma titi o Yesusu. De ma wange gea abe womulaenge wadotoko gea ka o ngoruminohi, de wogila-gila wadotoko ka hiadono ihumuririhuku.
De ona mata-mata manga doomuoka gea duru yosanangi abe yangimoi de yahinooto manga demoika. De ipaha de ona yairiki o nauru yatumidi naa, abe o Setefanusu, una abe duru ai hininga aomanga de o ngongaku de Ma Jou o Womaha, de nagali o Filipusu, de o Prokorusu, de o Nikanoro, de o Timono, de o Paramenasa, de o Nikolausu abe o Antiokia ma tonakoka ma nyawa. De o Nikolausu una gea tanu ko o Yahudi ma nyawaua masara nengokadauino de womangali de waniikoli o Yahudioka manga agama, de ipahainoli de wingaku o Yesusika.
De mangale ngone hohioriki abe Ma Jou wonahidadi ai nyawa duru ma hohailoa ma titi ai hininga ma owaka dika ngoneino, ho gea ka idadi hohiorikoo abe duru ko ma titiua to ngone nanga datoro ma rorahai hiadono wonahidadi to Una ai nyawa. Angamoi nako gea ihititi nanga datoro ma rorahaioka, gea ko ihititiua abe to Una ai hininga ma owaka. De abe ai hininga ma owa gea ka wonahidoaka dika ngoneino, gea ena ko idadiua hamake abe nako ma titi to ngone nanga datorino. Masara ngaro Ma Jou wato wonahidoaka ai hininga ma owa ma amoko ngoneino ma nagahi o Yahudi ma nyawa ko manga ngoe abe yoluku yodafongo enangika.
De naga utuoli ma utumu hamake ma titi nanga ngongaku Unangika. Abe mangale ma titi ngone hingakuoka Unangika hiadono o Yesusu wonahigogere ngone Ma Jou ai hininga ma owa ma goronaka. Abe ma titi ma oraha naa de Ma Jou wonaao duru de ai hininga ma owa dika ngoneino abe nanga boriwowangoka. De nagali ma utumu abe ngone ka idadi hogogarago nanga hiningaka angamoi duru hohioriki abe ahao wonahikodoku ngoneino to Una ai medebini ma dararono, ho ngoneoo ahao naga Ma Jou ai medebini ma dararono ngoneoka.
De tanu enangoo imakiniiki de Ma Jou ai hininga ma dumutu ma dodihirainohi, abe Una duru woigo wonahimatoko ai hininga ma owa gea ngoneino. Angamoi ai Pareta inahimatoko ngoneino abe duru hoperelu ai hininga ma owa gea. De igoungu idadi hokogea, abe to Una ai owa idogo-dogo hiadono duru ilaku ngoneoka. Ho ma dodihirainohi de ngone o howono ma kuahaka homanoa hiadono ka hokokihonenge, masara ma oraha naa de ka idadi ngone homanoali Ma Jou ai hininga ma owa ma kuahaka angamoi Una wonahitotiaioka. De genangino de ngone hamake o wowango ka hiado-adonika ma titi nanga Baluhu idodutu o Yesusu Kristusino.
De ahi gogianongoru, ngomi duru mihioriki abe Ma Jou ahao wonatailako ngone homoi-homoi ho ngomi naga mia hawana de ma horomatioka Unangika ma titi ai hitailako gea. De gea ma titi hiadono ngomi naa duru mioigo la wiwihisanangi Unangika. De naga moioli abe ihititi mia hawanoka gea, abe ngomi duru miahigaro o nyawaika la miato ona iwinii-niiki Unangika. Angamoi nako ona iwiniiki itiai Unangika, gea ahao ma oraha watailako nanga Baluhu idodutu de wasanangi onangika. De Ma Jou Una duru womihioriki itararono abe to ngomi naa mia hininga ko iwa ma dumutu o dorouika, ho ngomi mionganono abe nginioo ka idadi niataoko itiai ma titi to ngomi mia hininga ma rorahai.
De mangale Ma Jou womihitagongo ngomi la mimahikarajaanga moi de de Una, ho ngomioo duru miahigaro o nyawaika imaketero hoka Una ma hirete wahigaro onangika. De gea miahigaro o nyawaika miato, “Ufa hiadono ngini niihene dika Ma Jou ai hininga ma owa ma hingahuika de ipaha ahao niaoluku enangika. Angamoi gea ahao imaketero hoka Ma Jou ai hininga ma owa parahaja dika nginika.”
De abe Una winiduhunoka nia howo-howonino, gea Una winiduhunu ma oraha niwingaku Unangika mangale ma titi to Una ai hininga ma owaka dika de aino hiadono winiduhunoka. De gea duru ko nginiua abe nimaduhunu la niato nia howo-howonino nimangofi, masara gea to Ma Jou dika ai hidoaka ma owaka de aino nginika.
Ho, ahi gogianongoru o Yesusoka abe duru tinidora, ahi behehongo ma ngoe abe tinihibehehongoka naa, ho ahi behehongo naa kiani niongano-nganono la duru nimatongohono nanga Baluhoka. Ngini naa duru tinidora de duru toigo la ngini de ngohi homakamakeoli, abe ma titi ngini ho togarago. De ngini tinihiromangoli tato nidadioka ahi karajaangino ma hofoko.
De ma oraha gea ngini igoungu nidadioka o debi-debini ma nyawa, iti ngini naa nigila-gila niwingaku Unangika la nia ngongaku duru hoka imahingutukuku hiadono ko idomo-domoua. De ufa nimahipipidili nia nganganonino abe nengokadau niihenoka o Abari ma Rorahaioka. De o Abari ma Rorahai naa ihingahu-ngahuoka o dunia ma amokika, de ngohi naa o Paulusu todadioka to ena ma huhuloko abe ngohioo tahingahu-ngahu o nyawaika o Abari ma Rorahai gea. Ho mangale ma titi Ma Jou ai hidee gea ngoneino, ho ngone kiani duru homahigagao nanga nganganonika ka hiadono ai dulaada mata-mataika wahiketehirimoioka.
De mia demo abe ngomi miahingahu-ngahu o nyawa mata-mataika, gea duru miahingahu onangika ma titi o Kristusu. De ma oraha miahingahu-ngahu ma titi Una de mia sosawaro ma gahumu miapake, la ngaro miahitiari o nyawaika eko ngaro miadotoko onangika, masara gea mia demo duru itaana mata-mata. Angamoi ngomi miato miaduhunu o nyawa mata-mata hiadono yokokibaluhoka o Yesusu Kristusoka.
Abe duru igoungu Ma Jou womahimatoko ngoneino ai hininga ma owa ma oraha wihidingoto o Yesusu Kristusu la Una gea wonaduhunu ngone nanga howo-howonino. Ho mangale ma titi Ma Jou ai hininga ma owa ngoneino ho gea ngohi naa tonihibehehongoka ngonaika tato kiani nadotoko nanga gogianongoruika la gea ahao manga wowango imakiniiki de to Una ai mau ngoneino.
De ngini kiani nimakokelega ti ngini mata-mata nia perelu nia boringongakuoka homoi-homoioka, de nimahiketehitiari done utu nginioka yorehenoka nia ngongakuino. Abe done naga utu abe yorehene hiadono manga hiningaka yomaputuhu la ato ko iwiniikokaua Ma Jou de gea ahao to Una ai hiowaikaoo, ma enangoo ma yaolukoka. De gea done hiadono to ona manga hininga gea imahora-hora ngini utuikali hiadono ko nia ngoe inihirehenoka nginioo.
De nako to Una ai hininga ko waturuurua, gea ma titi to Una ai dodotoko enangoo ma ko ituruurua. Ho ngini ufa hiadono o dodotoko utuoli inihiloarika la enangikali nianiikoli. Angamoi igoungu naga o dodotoko utu kohangoe, de naga utu genangino abe to ena ma dola duru o fara moi ma hidumutu. Ho ngini naa ibootohi nimahigunoa la inihirehene ma dodotoko utuikali gea. Abe naga utu o nyawa manga dodotoko o fara moi ma titi o inomo o kia haolomo de o kiali ko idadiua haolomo. De ngaro ona ma dodotoko abe ma dumutu o inomika gea duru ka ihikaika yatobaniiki to ena ma hiaturu, masara gea duru ko yaduhunua Ma Jou ai himangoka. Ho ngohi tato, ngone naa ngaro ufa homahitoofo nanga hiningaino de o inomo ma rupa o fara moioli gea, abe ma titi to ona gea manga dodotoko. Masara nako to ngone nanga hininga, gea irahai homahitoofo de Ma Jou ai owa dika ngoneino.
De ahi hurata ma dodipoko naa tohitulihuku de naga o Silasa ahi datekoka wohiduhunu. De nako o Silasa una gea tifetongo unangika tato ahi gianongoru abe duru watobagou-goungu ai ngongakuino. Ho ahi hurata naa tohidingoto nginika la tato tinihigaro la utuohi nia ngongaku iputurungu nia hiningaka Unangika. De naa duru tagou-goungu tinihingahu abe ahi hurata ma demo mata-mataino de duru inihimatoko igou-goungu nginika ma titi Ma Jou ai hininga ma owa ngoneuku. Ho ngini ka idadi nimahingutukuku to Una ai hininga ma owaka la ufa nikelu-kelu genangoka de aino. De gea ma titi hiadono ahi demo naa tinihurata nginika.
Ho, ahi gogianongoru abe ngohi duru tinidora nginika, naa tinihibehehongo tato ngaro ma oraha naa naga abe ka niododamaahi Ma Jou ai gahe ma wange la yadono, masara ma oraha nenangoo ma kiani nimaribuutu la nia hininga duru iriidi Unangoka. De gea kiani nia wowango ma datoro duru itotiai de itebini dika to Una ai himangoka la duru ko iwa nia howono nginioka.
De naa, ahi ngofa-ngofaka o ngongakuoka, ngohi tinihigaro nginika tato ngini ka ihikaika nimanoa o Kristusoka dika. De gea nako Unangoka dika ngini nimanoa, ahao ma oraha Una woboali o duniauku naa de gea ngaro ufa ngini inimaleke to Una ai himangoka masara ka idadi nia hininga de ma domoroini abe ma oraha niwimake Unangika.
De abe onagona dika ko yomanoaua o Kristusu ai dodotoko ma goronaka, de gea ona ko yomanoaua Ma Jouoka. De abe ngaro ona gea yomahingahu yato yoaguru manga dodotokino, ma tanu ona gea yorehenoka ma gurutika abe nako ko o Kristusua ai dodotoko yaniiki. Masara nako onagona dika yomatobanoa ai dodotoko ma goronaka, de gea ona yomanoa Ma Jou o Baba de ai Ngofakokaoo.