Hidingoto 13:2 - Ma Jou ai Demo-demo o Totobelohoka2 De o wange moiuku de Ma Jou ai nyawa gea yomahuba-huba nanga Baluhika de o inomo yanoaikahi ho ko yolomua la manga hininga ma dumutu duru ka Ma Jouika dika. De gea yomahuba-huba manga gogiriaka de Ma Jou o Womaha wahuloko onangika wato, “Ngini kiani niatingakino Ngohino o Baranabasa de o Saulusu angamoi naga ma leleani moi abe Ngohi ahao tahitagongo onangika.” အခန်းကိုကြည့်ပါ။ |
Hidingoto 13:2
41 ပူးပေါင်းရင်းမြစ်များ
De o Yesusu wogila-gilali wadotoko ona manga ngoeika wato, “De ma moi ma moi ngini ka idadi nipuaha la ti ngini nia hininga ma dumutu duru Ma Jouika dika, de gea nia datoro irahai. Masara abe ma oraha ngini nipuaha, de ufa nimaaduru abe hoka onangoli yomadokangeluku dika ma titi manga gogao Unangika. Abe ona gea manga himanga itafukuoka o nyawa manga hima-himangoka la ihioriki abe ona yomatongohono abe ma titi ko yaolomua o inomo. De gea manga rupa yodiai la duru ingaliokali hiadono ka de o nyawa yamake de yotemo ato, ‘Abeika ona gea yopuaha!’ Ho ona gea yoigo yamake o higiriiri o nyawaino ma titi ona yopuaha. De naa Ngohi tagou-goungu tinihingahu abe to ona manga utumu manga puahaino gea o nyawaka dika de aino manga higiriiri. Angamoi nako Ma Jouoka de aino duru ko yamakeua o higiriiri eko o utumu mangale ma titi to ona manga hininga la yomagorakiye dika.”
De gea Ma Jou abe wohikaaturu ai redioka ma gugutuku. Ho naa Ngohi togahoko la ngini nimaniata nanga Baluhika de duru nigahoko la Una ahao wahidingoto youtu-utuku ma nyawa utuohi yowoe ai redi ma goronaika. La onangoo gea inaduhunu nanga karajaanga ma goronaka.” De hokogea o Yesusu ai demo iwinii-niikika abe wato kiani o nyawa utuohi yowoe yahingahu-ngahu o Abari ma Rorahai o nyawa-nyawaika.
De ipahainoli de nanga Baluhu idodutu Una wairiki o nauru utu yamoritumidi abe iwinii-niikino la ona yohira yoiki o kapo-kapongika de o kota-kotaika angamoi ko itedekanokaua de Una ahao woiki watutumu ma nyawa abe yogogere ma ngi homoi-homoiika gea. De gea wahidingoto de waregu la ona o nyawa yahohinooto yoiki.
De ipaha yosobokali ho o kapa yofarene de yolio manga gareja ma doomuika o Antiokia ma kotaika abe imanoa o Siria ma tonakoka. Abe ma dihiraino de genangoka yagoraka la yodadi o hidingoto ma nyawa abe o tonaka utuika. De ma dihiraino de manga gogianongoru gea abe yahitagongo de yagahoko onangika la Ma Jou ai hidoaka ma owa yahihira-hira ma oraha manga tagongo ihidagi-dagi o tonaka utuikali. Ho naa manga tagongo gea yabootoka ho yolioino manga gogianongoruika.
“De naa tinihitiari moi nginika! Abe ngini kiani nimagoana ngini ma hirete done nirehene Ma Jou ai ngekomoka de aino. De nginioo kiani niagoana nia gogianongoru mata-mataika abe Ma Jou o Womaha winihitagongoka nginika la ngini nidadioka to ona manga gogoana ma nyawa. Ho Ma Jou ai gareja ma nyawa ona gea kiani ngini niapaliara irahai, angamoi Una womaijaino ai nyawa de wofangu de to Una ma hirete ai awunu!
Masara nanga Baluhu wotemo wato, “Noikohi de naniiki dika ahi demo abe tonihulokoka. Angamoi o Saulusu una gea tiirikoka la tato ahi Abari ma Rorahai una wao de wahingahu-ngahu onangika abe ko o Yahudi ma nyawaua de o kokoanoika, de ngaro o Isiraele ma nyawaikaoo ma ahao wahikodoku ahi wowango ma ade-ade ma demo.
Ahi gogianongoru o Yesusu Kristusoka abe o Roma ma kotaka nimanoa. Ngohi naa o Paulusu to Yesusu Kristusu ai huhuloko, de naa ahi tabea tohidingoto ngini mata-mataika. De abe ma titi to ngohi ahi tagongo, ngohi wohitingakoka Ma Jou de wohiahoko la todadi o hidingoto ma nyawa abe to Una ai Abari ma Rorahai ngohi tahingahu-ngahu o nyawaika.
De nako o nyawa ko yahidingotuahi onangika la yoiki yahingahu-ngahu, gea done sarakia de ma hingahu ma demo gea itagi onangika? Ho gea tanu duru irahai nako hoka Ma Jou wahidingoto o nyawa abe yatobahingahu-ngahu ma titi nanga Baluhu idodutu la genangino ka idadi iwingaku Unangika. La gea ahao o nyawa yosanangi yadafongo abe ona yatobahingahu-ngahu gea.” Marai hokogea nimatemo nia hiningaka. De tanu nia demo gea imakiniiki de Ma Jou ai Demo-demo moi abe ma dodihiraino ihitulihukuoka ato, “Nako hiadono o nyawa yatobahingahu-ngahu o Abari ma Rorahai yomahiadono ngoneino, gea ngone haetongo hato duru ihohailoa to ona manga boa.” Hokogea ma demo abe ihitulihukuoka ma dodihiraino. Masara abe ma titi o Abari ma Rorahai itagi, gea ka idadi hohioriki abe ma dihirainohi de Ma Jou ai Abari ma Rorahai wohidingotoka o nyawaika, masara ko mata-mataua yodafongo ai demo gea la yongaku enangika.
De ahi tagongo gea la todadi o Yesusu Kristusu ai duduhunu abe tinileleani ngini ko o Yahudi ma nyawaikaua. De ahi tagongoka naa ngade-ngade tomaketero hoka Ma Jou ai hidemo todadioka. Angamoi ngohioo tadofanga nginika Ma Jou ai Abari ma Rorahai abe imaketero hoka ma dihiraino de Ma Jou ai hidemo ma nyawa yahitobangahu-ngahu ai Demo-demo o nyawaika. De nagali abe o hidemo manga karajaangoka de ona ka ihikaika iwihidoaka Ma Jouiye o huhuba abe duru iwihisanangi Unangika. De mangale ma titi ngini ko o Yahudi ma nyawaua niodafongoka o Abari ma Rorahai abe ngohi tinihingahu nginika, ho nginioo ka idadi tinihiketero. Abe ngohi tinihiromanga nginika tato ngini hoka to ngohi ahi huhuba ma ngango moi abe ngini duru niwihisanangi Ma Jouika. De ngini winihitebinoka ma titi Ma Jou o Womahino, ho ka idadi ngohi tinihidoaka ngini Ma Jouika de Una duru wosanangi winidafongo ma titi ngini nitebinoka ai himangoka. Ho ngini nidadioka hoka to ngohi ahi huhuba ma debi-debini abe tohidoaka Ma Jouiye. De mangale ma titi abe ngohi ka idadi o huhuba tohidoaka Unangiye ho hiadono tomahiromanga tato ngohi ngade-ngade hoka Ma Jou ai hidemo todadioka.
Ho abeika o hiakunu irupa-rupa, masara Ma Jou o Womaha ka womatengo dika wahikokodoku ai hidoaka gea mata-mata o nyawa homoi-homoiika. De Una ma hirete womaputuhu wato, “Ahi hiakunu naa tihidoaka unangika naa, de ahi hiakunu moioli kiani naa munangika tomihidoaka.” Hokogea Una ma hirete womaputuhu abe hokokia wonahikokodoku ai hidoaka de ai hiakunu gea ngone hingaku-ngaku homoi-homoiika.
Ho nako o giabereki de yomatengo yoigo yomatoomu, gea ibootohi nioluku ngini o giabereki nimaidu. De masara nako ahao naga ma moi ma moi abe o giabereki duru yamao abe koaho duru yomaniata Ma Jouiye, de gea ma rokata de ngoi fekata mata-mata yomaketehiningamoi abe koaho duru yomaniata Unangika. Nako hokogea ona o giabereki yakokiputuhu, gea de ahao ka idadi yomatongohono abe hokokia ma dekana, masara kalioli itedekana yomatongohono, done o Ibilihi yahiata-atara de ona ko idadiokaua yomatongohono de hiadono yahowono. De abe ma oraha yomaniata ipaha de koaho ona yomatoomuoli hoka ma dihirali.
De ngohi tomamaoka ahi karajaanga ma dubuho hiadono ahi badanga ma buturungu ko iwaka, de ma ngoe ihihidetebiniye hiadono o giooko ko tamakeua. De ma ngoe duru ihihafini de ahi ngomaha yodudungu, abe ahi inomo ko ihiwedonua ho ka tomatongohono dika ahi hafini ma goronaka. De nagali abe duru ihimaata angamoi ahi baju de ahi ngoere ko iwa la tomakorobitino.
De igoungu ngomi naa ma dihiraino de imipoha-poha, de ma muruono ibooto imibuika o bui ma tau ma goronaka, de nagaoo miaohana o nyawa manga ngamo imihidotadaene abe ona yotobadiai o huruhara ngomino. De ngomi duru mitobakarajaanga ma dubuho ka hiadono imiboleoka, de ma ngoe imihidetebiniye abe mia ngidu ko miamakeua, de ma ngoe imihafini masara mia inomo ko iwa.
De abe ma titi Ma Jou wohihitagongo ai Abari ma Rorahai ngohino, de gea tanu ko tafetongua o tagongo, masara ena gea tohiromanga o hidoaka moi ma owa wohihidoaka ngohino, la gea ka idadi o Abari ma Rorahai tahingahu-ngahu o nyawaika. De ma tagongo gea wohihidoaka ngohino de gea ma titi to Una ai kuaha abe ikarajaanga ahi badangoka.
De mangale ma titi Ma Jou ai mau gea hiadono Una wohihitagongo ngohi la ai Abari ma Rorahai toiki tatobahingahu-ngahu onangika abe ko o Yahudi ma nyawaua. De gea ena totemoka duru tagou-goungu de ko toelukua! Ho gea wohihitagongino ngohino la wato o Abari ma Rorahai gea de nanga ngongaku ma dodotoko ma gou-goungu ngohi tahingahu-ngahu o nyawa mata-mataika. Ho ahi ngofaka, duru tonihigaro la ngini mata-mata genangoka nimaniata de o nyawa mata-mataika niagahoko Ma Jouiye.
Ho ma abari ma demo abe nengokadau ngona noihenoka ngohino de abe nanga gogianongoru manga ngoe to onangoo manga demo ma ka imaketero dika de to ngohi ahi demo gea, ho ma abari ma demo gea kiani nahitagongo nanga gogianongoru utuika genangoka. Abe ona gea kiani nanga gogianongoru abe iwileleani de manga tobagou-goungoka Unangika. De gea kiani ngona nairiki o nyawa abe ahao onangoli ka idadi yakunu yadotoko o abari ma demo gea o nyawa utuikali.
Ho nenangoka ahi duduhunu ka womatengokahi dika, de gea o Lukasa una gea nagahi ngohioka ka wohiduhunohi. De gea ngohi togahokoo la ka idadi ngona nidulu o Maruku la unangoo woboa ngohino, ho ngini inihinooto ka idadi nimakutuono niboa ngohino. Abe o Maruku una ahao ka idadi duru wohiduhunu ahi karajaanga ma goronaka nenangoka.
Masara ngona o Timotiusu, ufa ani hininga irehene o rerehene ma dodotokika gea masara kiani ka ihikaika ani hininga noogoana la ngaro o kia dika nohimanga ma ka idadi nomatongohono ma dorouino. De gea ngaro naga inihikangelaoo ma kiani nomatongohono. De gea kiani nohigila-gila ani karajaanga abe o Abari ma Rorahai nahingahu-ngahu o nyawa utuika. De abe ani karajaanga ma tagongo utu mata-mata wonihidoakoka Ma Jou, enangoo ma kiani nodiai la ani karajaanga Unangoka ingodumu.
De ko iwa o nyawa abe ka idadi ona ma hirete yomagorakiye la ona gea yodadi nanga hidemo wokokurutiye Ma Jouika, masara gea kiani Ma Jou wagoraka ona de ahao ma gogere abe de ma horomatioka gea ona ka idadi yamake. De hokogea idadi abe ma dodihiraino de o Harunu, abe Ma Jou wigorakiye la wodadi manga hidemo wokokurutiye.
ကြော်ငြာတွေ