Gogao 1:3 - Ma Jou ai Demo-demo o Totobelohoka3 “De nako manga huhuba gea o huhuba iharo-harongo abe yale manga duduonino o hapi gea kiani yomahihuba ma nauru abe duru ko iwa ma heluku eko ma nabo. De abe womatengo womahihuba to una ai hapi ma nauru gea kiani wao o Hikamake ma Tau o Ngoerino ma ngoranika. De genangoka ai hapi wahidoaka onangika abe yodadioka nia hohidemo Ngohino abe ona yatobaleleani de manga huhuba iharo-harongo. Ho ai huhuba wahidoaka onangika genangoka la ka idadi Ngohi Ma Jou o Yawe todafongo. အခန်းကိုကြည့်ပါ။ |
Gogao 1:3
79 ပူးပေါင်းရင်းမြစ်များ
De Ma Jou wihibehehongo wato, “Abarahaama, Ngohi togahoko la ngona nile ani ngofaka o Isaka, ani ngofaka o goduuru ka womatengo dika, abe ngona duru nidora. De ahao ngona dika niao o Moria ma tonakika, de naga o loku moi genangoka ahao tonihidumutu. De o lokuoka gea niaika de ahao ma tubuoka ani ngofaka nihihuba Ngohiye iharo-harongo.” Hokogea Ma Jou ai behehongo o Abarahaamika.
Gea yokokihupu ibooto de o Nuhi womahohiningaiye wato womahuba Ma Jouiye ho wodiai manga huhuba ma ngi. Ho o huhuba ma ngi gea wodiai ibooto de ahao o aewani de o totaleo abe ka ma dihirainohi de Ma Jou o Yawe wato ka idadi yomahihuba, enangino naga wairikino o fara amomoiino. De o totaleo de o aewani mata-mata abe wairikino de gea ahao waharongo ka hiadono itinoka la ena gea womahihuba Ma Jouiye.
De ka idadi yomangiriki manga dofo o domba eko o kabingino, ma kiani yairiki ma ngofaka ma nauru abe ma ngumuru adonoka duru o taongo moi dika. De ihidodiai yairiki abe duru ma bobuturungu de ma rorahai dika ho ko idadiua yale ma domba nako naga ma nabo eko ma heluku.’” Hokogea Ma Jou wahibehehongo o Musa de o Harunika la ma titi gea yahitararono manga nyawaika.
De ahao wahikarajaanga o Isiraele ma nyawa o nau-nauru ka o goo-goduuruohi la yoiki yale o hapi ma nauru ma goo muruono naga la gea ena yomahihuba Ma Jou o Yaweika. Ma hapi gea utu idadi iharo-harongo ma huhuba Ma Jouika ho yatoma de ahao yakelenga o huhuba ma ngi ma lokuoka de yaharongo ka hiadono itinoka. De ma hapi ma nauru utuoli idadi o dame ma huhuba.
De o Harunu ai demo gea yaniiki ho ma dawangeino o ngoru-ngorumino de yokokiboaino, de naga utu yaoino o aewani la ena gea yomahihuba. Ho manga aewani gea utu idadi manga huhuba iharo-harongo. De utu idadi o dame ma huhuba abe ma hononga yomahihuba Ma Jouika de ma hononga ona yaolomo. Gea yomahuba ibooto de ahao ona mata-mata yomulaenge ihirame-rame de manga inomo de manga daluku. De ona yoselo-selo de yodiai irupa-rupa de mata-mata gea Ma Jou wamake.
De mangale ma titi o Musa ai higaro ma demoino ho ona utu duru manga hininga yadaene hiadono duru yoigo iwihidoaka Ma Jou o Yaweika. Ho ona gea yomahidiai manga hidoaka abe iwidingakoka Unangika la manga hidoaka gea idadi Ma Jou ai Tau de to ena ma kiahonanga. De manga hidoaka utu abe ahao idadi o hohidemo manga pakeanga abe ahao yadingakoka onangika abe iwileleani Ma Jou genangoka. Ho manga hidoaka gea yakokiao ma ngiika abe genangoka yatoomu.
Hokogea o Isiraele ma nyawa o nauru de o ngofeka manga hidoaka yao Ma Jou o Yaweino de manga balaha ko yomahinganonua angamoi manga hidoaka gea manga igoka dika de aino. Ona duru yoigo yokarajaanga mata-mata gea Ma Jou o Yawe wahibehehongoka abe o Musa wadofanga onangika Ma Jou ai hingahu o Isiraele ma nyawa mata-mataika.
Masara duru o wange nia pakiti o gandumu ma domoro gea nihihidoaka Ngohiye de o wange genangoo naga nia huhuba moi iharo-harongo. Abe kiani nialeino nia huhuba o domba ma nauru abe adonoka ma umuru o taongo moi de ko iwa ma heluku eko ma nabo ma badangoka la idadi ti ngini o Isiraele ma nyawa nia doomu ma amokika nia huhuba iharo-harongo Ngohi Ma Jou o Yaweino.
De Ma Jou wahitararono abe naga manga rame-rame ma huhuba imaketemomoi, wato, “De ma oraha nihirame-rame o Gugutuku ma rame-rame gea ma titi nia redi ma hasili ma riakino abe nihitunguu de nia huhuba o gandumino. De kiani nagali nia huhuba iharo-harongo o domba ma nauru ma goo ma dutu tumidi abe ko iwa ma heluku eko ma nabo ma badangoka, de nimahihubaoo o hapi ma nauru ma goo moi, de o domba ma nauru ma baluhu hinooto. De ti ngini nia huhuba nia aewani o dofoino nenanga idadi nia huhuba iharo-harongo Ngohi Ma Jou o Yaweino. De nihidaulu de o uku ka hiadono ikokitinoka la de ma bounu niwihisanangi Ngohi Ma Jou o Yawe. Hokogenangoo nihihisanangi Ngohi de nia huhuba nia gandumino de nia ngokere ma huhuba abe o angguru ma teongino.”
De naa Ma Jou o Yawe ai hingahu o Isiraele ma nyawaika abe ma titi manga gogao Unangika yapaliara itiai abe duru woigo la naga manga gogao irahai homoi-homoiika. Ho gea wihingahu o Musaika wato, “De ti ngini nia gogao ma huhuba Ngohino abe duru nihihisanangi Ngohi, Ma Jou o Yaweino, ka idadi o aewani abe nia duduonino. Ho ka idadi nia huhuba o hapi ngaro ma nauru eko ma beka ma iti ufa naga ma badangoka abe iheluku eko ma nabo abe nimahihuba Ngohi, Ma Jou o Yaweino.
“De hokonaa ma hiaturu nako una wahowono abe ti ngini nia hidemo manga haeke wokokurutiye abe ka unangohi iwihitunguuoka hokogea de wabaluhu o hidemo mata-mataino. Nako una gea wahowono, gea to una ai howono yakokidaene o Isiraele ma nyawa mata-mataika. Ho unangoo kiani wao Ngohi Ma Jou o Yaweino ai huhuba o hapi ma nauru ma baluhu abe ko iwa ma heluku eko ma nabo la idadi to una o hidemo wokurutiye ai huhuba Ngohino.
“Hokonaa ma ngekomo nako idadi nia hidogoronaka naga o nyawa yahowono abe yahipeseke Ma Jou o Yawe ai kiahonangika abe niwidingakoka Unangika. De ngaro manga howono ko manga hiningakaua de aino de ahao hokonaa ma hiaturu abe kiani yaniiki. Ona kiani yale manga huhuba o duduonino o domba ma nauru ma baluhu abe ko iwa ma heluku eko ma nabo ma badangoka. De o domba gea kiani ma ija yaetongo itiai de o tiwi o se-senge o haaka ma dutuino abe niapake o Hikamake ma Tauoka.
Ho onangoo kiani manga huhuba o duduonino o domba ma nauru ma baluhu abe ko iwa ma heluku eko ma nabo ma badangoka. De o huhuba ma domba gea kiani ma ija yaetongo itiai. De hokogea ma ngekomo la nia hidemo manga howono ma huhuba wahihuba ibooto de una wahitebini ona Ma Jou ai himangoka abe manga howono watamunoka la Ma Jou ka idadi wahiapongo.
“De nahingahu o Isiraele ma nyawaika abe manga howono o nyawaika gea igoungu o howono Ma Jou o Yaweika. Abe hoka naga o nyawa abe to ona manga kiahonanga ihidodogumika de manga dodiawo manga datekoka la gea yogoana manga kiahonanga gea. Masara ma bahauku de ona abe yogoana ma kiahonanga gea yahingahu ma dutuika ato ihihangoka, eko ona ato ena gea o nyawa yatohikoka. Masara manga demoino gea de yoeluku dika hiadono manga dodiawo yarusi. De naga o howono o fara moioli abe o nyawa yodiai manga dodiawoika abe ona manga datekoka yadohiki. Ekola naga o nyawa ato to ona ma hirete manga kiahonanga yofukunu de ma ija yahingahu o nyawaika. De ahao naga o nyawa abe yomaija masara ka yofangu ma hononga dika. De ahao ma oraha yoboali la ato ma ija ma hou yofangu o kiahonanga ma dutuika, masara ona abe yofukunu yogahokoli ato kiani utuohi ihidogo ma ija. De hokogea manga rusi yodiai manga dodiawoika. Ekola ihira yofukunu manga kiahonanga yapake ma ija ko itiaiua ka hiadono yaribuutu la kiani yofangu utuohi ilamoko ho ihifoloi manga utumu de enangoo ihititi o rusino. Ho o nyawa manga howono o nyawaika mata-mata hokogea o howono duru Ma Jou o Yaweika.
Abe Ma Jou Una ko o nyawaua ho Una duru ko woelu-elukua, De Una ko o nyawa ma ngofakua ho ai hininga ko waturuurua. To Una ai behehongo mata-mataika wohingodumu, Ho done sarakia ngona nafikiri Una wato naga moi wodiai de ngona nato bote Una ko wodiaiuali? Ena gea abe Ma Jou wato wodiai, Una de ahao kiani wodiai. Ai behehongo o nyawaika duru idadi, de imaketero hoka wotemoka ahao idadi.
De ahao o Bileama wihuloko o Balakika wato, “Ngona nomagoo-gogerohi dika nenangoka ani huhuba ma datekoka de ngohi toikohi tomatingaka. Abeika nako Ma Jou o Yawe ahao wohitutumu de naga ai demo ngohino. De o kia dika wohihingahu ngohino gea dika ahao tohidemo ngonaika.” Hokogea wihingahu o Balakika de ahao woiki o loku gea ma tubu moiikali abe o hakaru mata-mataika.
De o malaekata womihingahu munangika wato, “Ko hokogenangua ma ngekomo hiadono o ngofaka gea namake. Masara Ma Jou o Womaha de ahao woboa ngonauku de ai kuaha ho gea Ma Jou Wokokurutiye wonihidadi la ahao ani ngofaka o nauru namake. De gea ma titi hiadono ani ngofaka wotebi-tebini de iwihiromanga Ma Jou ai Ngofaka.
Angamoi gea ma titi to Kristusu ai datorino hiadono ngone mata-mata, ngaro ngone o Yahudi ma nyawa eko koua, masara ngone mata-mataika ka idadi hoboa Ma Jou nanga Baba ai himangino. De abe ngone hoboa ai himangino, gea hoboa ma titi Ma Jou o Womahoka de aino, abe gea Una womatengo dika, masara ngone homoi-homoi hiborimakeoka nanga kokihiningaka.
De gea wonahitebini la ahao dokengika ma oraha wonaao ngone to Una ai himangino de gea duru hotebi-tebinoka, ho duru ko iwaka nanga peseke eko nanga howono ma rupa hokokia dika ngoneoka. De ma oraha gea ngone to Una ai gareja duru homaketero hoka muna o ngofeka gea moila-ilaka, abe ma titi ngaro muna eko ngaro ngone masara gea duru de nanga debi-debinoka ma oraha hodadi to Una ma hirete ai debi-debini ma nyawa. De hokogea ma amoko o Kristusu ai dora abe ngone ai garejaino hiadono wato wonaduhunu de wonahingodumu ho hiadono duru ko iwaka nanga howono.
De abeika ngone hafikirohi to Yesusu ai hininga hokokia. Angamoi Una gea duru wotebi-tebini ho hiadono Ma Jou wisanangi Unangika, angamoi to Una ai hiningaka duru ko iwa ma dorou eko o howono o kia dika. De Una gea iwihikitingakoka ngoneino o howo-howono ma nyawaino, de ma oraha naa duru iwigorakiyeoka ho nako o Horogaka ma gogere mata-mataika, gea ka to Unangohi ai gogere duru ikurutiye. Ho o Yesusu ai wowangoino gea ka idadi ngone hohioriki de itararono abe Una dika ka idadi duru wonahingodumu to ngone nanga perelu mata-mataika.
Ho genangino de ka idadi hamake abe barikua ngaro o kabingi ma awunu masara genangino de ka idadi o nyawa yahitebini manga badangino la yomahuba Ma Jouika. Hongoli nako to Kristusu ai awunu! Abe genangino de ka idadi inahitebini ngone nanga hiningaka. De gea inahitebini nanga hininga la ibootohi nanga datoro ma homoa haniikohi nanga wowangoka, masara ka idadi ka Unangika dika homahuba de hileleani abe Una gea wotobawango ka hiado-adonika. De abeika ngone hafikirohi o Kristusu ai huhuba gea ma titi ngone. Abe Una wapake to Ma Jou o Womaha ai kuahaino abe naga ka hiado-adonika, la genangino ka idadi o Kristusu womahidoaka Ma Jouika. De gea Una wodadi imaketero hoka o huhuba moi abe duru ko iwa ma howono eko ma heluku, la gea Ma Jou duru wosanangi wodafongo ai huhuba gea. De gea ma titi hiadono to Una ai huhuba gea duru inahiutumu ngoneino, la ngone ka idadi homahuba Unangika ka hiado-adonika.
ကြော်ငြာတွေ